貫徹基爾一向hea寫又口水多過茶的遊記網誌風格，單單一篇肯定不足夠寫咁大間加州政總吧！來到中篇又仲有咩特別野睇呢？
唔講唔知一講你就知，上回講到簡單逛過那間souvenir shop之後未咁快走住（話晒山長水遠搭成兩粒幾鐘車來吧），基爾其實仲有join到加州政總這裏的導賞團，見時間差不多就回到圓形大廳集合，順帶一提上圖大廳周圍牆上的幾幅大壁畫介紹了加州百年以來的歷史。
唔知同荷李活有冇關係，連帶團的導賞員哥哥顏值都相當高，直情係有條件去casting的明星相，而且佢講的英文口音清晰易聽懂，絕對有理由相信是經當局精挑細選兼訓練過才獲聘用來帶導賞團的。
全團大約有十幾廿人，當中由小朋友到長者一家大細都有，最初還以為大多數是基爾這類外國遊客吧！不過經導賞哥哥一問先知（舉手統計），原來絕大部份都是美國人甚至是加州本地人，令人頗感意料之外呢！
在政總大樓內簡單遊一圈，其實大部份都是參眾兩院議員和官員的office，由於臨近聖誕大部份都已放晒假，辦公室也不開放外人參觀，所以多數都係聽導賞員哥哥講解乜乜知名政客曾在這裏辦公之類的歷史。
簡單而言美國國會（華盛頓D.C.）和州議會都是採用兩院制，Senate參議院大廳這天好像正趁長假期裝修沒有開放，只去了參觀眾議院Assembly Chambers，議會大廳古色古香感覺有點似陸佑堂，議員座位二人一排又有點似中小學的課室喎！
議會大廳外的走廊就掛滿了歷任加州州長的大幅玉照，當中唔駛多講最為人所熟悉的，一定係上面喱位荷李活大隻佬明星啦！個個團友都爭住同佢影張近距離合照……
由於美國憲法規定選總統必須是美國本土出生的公民，所以奧地利出生的阿諾從政極其量只能做到州長職位，始終不及另一位荷李活明星能做到美國總統咁威水，他的名字叫朗奴列根。
可能唔係咁多人記得80年代的列根總統，原來他於1967-75年間也曾擔任第33任加州州長（阿諾舒華辛歷加是第38任州長，2003-11在任），唔知係咪歷來唯一當上總統的加州州長呢？
團友影完晒明星相之後，基爾隨大隊再返回大圓穹頂中庭準備解散，這時突然傳來了管弦樂的奏樂聲，望落去圓廳下面原來有個迷你樂團就在哥倫布雕像旁邊演奏，仲有唔少遊人在聽這個快閃音樂會，咁基爾都唔執輸企在二樓「廂座」聽一陣囉！
導賞團解散之後，政總大樓內其實仲有個別展廳開放讓遊人自由參觀，其中上圖這間無記錯應是州政府昔日的庫房吧！只見佢有座類似機關重重大夾萬的厚鐵門，直情就似舊式銀行的金庫模樣……
另外仲有一些開放的舊辦公室、宴會廳和演講廳之類供遊人參觀，全部都有古典華麗的佈置，如果喜歡這類亂世佳人年代古老大宅風格的話，一定可以找到好多瘋狂打卡影相靚位。
在古雅的政總大樓內兜兜轉轉打了好幾圈之後，看看手錶才知原來早已過了lunch time，唔怪得個肚係咁打晒鼓投訴啦！都係拿拿林穿過走廊，落返去安檢大門口走人了。
之前入去大樓時好似都無留意花園地上這個大圓銅蓋裝飾，唔知係咪類似日本好興的那些雕花渠蓋呢？定還是政總大樓的出入秘道都未定喎！花園外仲見到有架警車泊在門口……咦！行近睇真，原來係雪糕車至真（做乜扮到咁鬼似警車），因為有點大風天色又有點陰寒，加上空肚都係無謂食gelato和sorbet了，還是趕快去正正經經食碗熱飯暖肚吧！
