2018年4月16日 星期一

舊金山居閑話@Santa Cruz:下

站在古董報紙售賣機前呆呆地發了好一陣白日夢,可惜都唔見Jane Seymour現身(看來下次要著定套燕尾復古suit來)!無計啦,唯有乖乖回到現實,繼續行過去懸崖邊……去看海!



來到Cliff Drive喱邊明顯就是Santa Cruz這裏的超級豪宅區了吧!睇睇上圖喱間臨海大宅先,係咪有點赤柱淺水灣果種富豪別墅feel?再行近少少門口莊一莊……咦!佢幢左個For Sale的木牌在花園閘口喎,如果真係可以入去行個圈參觀就正喇!



基爾有自知之明(長期於貧窮線附近掙扎求存),咁應該連佢度木雕大門都買不起,就無謂去運吉白撞了吧!幸好由古老大屋向外望的世界級懸崖海岸線靚景,就不用花一分一毫去觀賞。



由懸崖路邊望落去下面其實仲有個細沙灘,外面來自太平洋的海浪不斷將細沙帶進峽灣裏,久而久之就堆成了這個迷你沙灘。不過可能因為冬天關係,又唔係咁多人來這裏嬉水露營喎!



好浪漫咁睇完浪之後,就漫步離開豪宅區的懸崖路,開車去wharf另一邊去睇燈塔。見到紅磚塔旁邊原來仲有條路可以行落去沙灘,咁一於先落去行一陣,睇下人地滑浪先啦!



Santa Cruz是加州其中一個衝浪聖地,Lighthouse Field State Beach喱個沙灘其實都幾大幾靚,這日來到雖然是冬天,依然唔少beach boy拎住滑浪板來顯一顯身手。單睇張相可能覺得唔算好大風大浪,但現場實際係強勁海風吹到髻都甩,近岸的白浪目測也有超過1米,不過對於衝浪男來說只是小學級吧!



睇了一陣浪之後再上返去睇燈塔,上圖紅磚塔旁的圍欄外已是懸崖了,雖然有告示牌叫人唔好跨越圍欄,但見唔少心口掛勇字的衝浪小鮮肉拎住滑浪板就咁一躍入海,一個字「型」!



睇完鬼仔衝浪咁又返入去睇燈塔先走啦!喱座紅磚建築物望落都幾古色古香,按資料介紹這燈塔原建於1967年,是為了紀念不幸身亡的衝浪者而建。門口塊板寫住1986又係咩意思呢?原來燈塔於1986年正式活化為Santa Cruz Surfing Museum。



衝浪博物館入面長這樣!地方其實一眼睇晒,主要係睇牆上掛得滿滿的滑浪名將威風照片,另外仲有些介紹衝浪歷史的圖片,唔講唔知原來Santa Cruz這裏於19世紀30年代開始已經是衝浪者天堂。不過仲有些比較恐怖的圖片,是部份被鯊魚襲擊的滑浪者講述逃出生天的經歷。



睇完博物館咁又完成一天行程了,又搭返個零鐘車返屋企。咁返去之前就梗係要先去老地方買野準備晚餐啦!喱日又係去中超永和,貪佢D菜又平又夠新鮮嘛(非廣告)!之前好似唔記得講,去美國的超市都係一定要自備購物袋(仲要係king size),平時出街都會擺定幾個在車尾箱。

41 則留言:

  1. 看海觀浪、瀏覽博物館,好好享受一天,一樂也。

    回覆刪除
    回覆
    1. 平時都營營役役,旅途上就盡量偷得浮生^^

      刪除
  2. 睇海真係會令人呆好耐...尤其去旅行時~~~~

    回覆刪除
    回覆
    1. 旅行較捨得花點時間,平時總覺很少機會享受閒情^^

      刪除
  3. 睇人沖浪可以睇好耐架(如果係靚仔既話)~~哈
    玩煮飯仔好過去餐廳,口味更合自己

    回覆刪除
    回覆
    1. wakakaka....大爺果類你收唔收貨先?!
      旅居他鄉唔駛忙住返工放工,真係多好多時間玩下煮飯仔^^

      刪除
  4. 回覆
    1. HK有好多都靚,菲臘哥夏天會唔會去影下.....美女XXXD

      刪除
  5. 如果係而家嘅Jane Seymour黎搵你又點睇?

    回覆刪除
  6. 如果係我一定約個經紀睇吓樓,住唔起都可以見識吓嘛.

    回覆刪除
    回覆
    1. 下次如果有你陪住壯下膽我都想去睇下^0^

      刪除
  7. 我成日去到豪宅區都會發白日夢中六合彩。

    回覆刪除
    回覆
    1. 反而如果要我一個人住太大間屋我諗我又會有D驚,可能係睇得太多歐美驚慄恐怖片關係,驚有人入咗屋都唔知果隻呢.....

      刪除
  8. 如果森伯走去看海,陣間又畀人話老人與海…哈哈哈

    回覆刪除
    回覆
    1. 唔駛驚有我陪你,兩個老人就無咁礙眼啦.....XXXD

      刪除
    2. 兩個老人懸崖邊……去看海

      刪除
    3. 大夫又想加入睇埋一份呀?

      刪除
    4. 大夫如果唔介意的話join埋我哋睇海…
      睇完海順便搵多隻牌腳, 打番幾圈囉~~

      刪除
    5. 但我又唔識打牌喎,森兄要自備多個partner先夠腳了XXXD

      刪除
  9. 回覆
    1. 紅磚建築總覺有一種獨特韻味......包括理工XXD

      刪除
  10. 睇呢度環境真係衝浪嘅好地方!

    回覆刪除
    回覆
    1. 如果係漫畫人物一定又係騷肌最佳機會wakakaka....

      刪除
  11. 開口埋口貧窮線,好似d食綜援成日去旅遊一樣咁肉麻🤥

    回覆刪除
    回覆
    1. 這類無產階級你係咪都見唔少...XXXXD

      刪除
  12. 旅遊嘅好處就係可以慢活,享受下啲閑暇。

    回覆刪除
    回覆
    1. 係呀間中叉下電都唔錯嘅^^

      刪除
  13. 係呀!我睇過紀錄片話因爲以鯊魚在水底的角度,看上去滑浪板似海獅海豹,以為有美食才會對滑浪者進行攻擊咋~

    回覆刪除
    回覆
    1. 仲有,忙完一大輪無上一排Blog,以為你已寫完舊金山添~

      刪除
    2. oic...ic!!!!原來如此~~~!!咁又可能真係幾似喎,滑浪板本身似海獅海豹個肚呢!我都覺得合理,因為人類對鯊魚來說實在太瘦無乜肉食,一定係食海獅海豹夠啖啖肉多啲!
      未寫完呀,或者武漢和金山一齊夾住寫都未定:P

      刪除
    3. 慢慢寫,好過成個月都唔寫🤣

      刪除
    4. 係最驚有時隔太耐就唔記得啲有趣細節啫^^

      刪除
    5. 我平時去旅行有寫日記,所以隔幾耐唔會唔記得

      刪除
    6. 我就一時時啦,好多時都懶咗寫...:P

      刪除
  14. 相片中那種由深至淺的天空漸變藍好靚^_^

    回覆刪除
    回覆
    1. 純天然的,萬里晴空時影出來就是這樣子了.....

      刪除
  15. 看山看海不用花費分文,很好呀!
    我也特別喜愛用紅磚建成的建築物,覺得古典得來質樸。

    回覆刪除
    回覆
    1. 大自然可共享^^
      係呀,有獨特的歷史感!!

      刪除