興記@屯門

記憶中都有4-5年無去過屯門了，三聖村更是從來無去過。喱個周未友人話去開餐，雖然基爾碰正長周要返工但都一於奉陪，索性早少少收工蛇出去。

基爾的mental map裏對三聖村是一片空白，也不知搭乜車去，原本check過諗住金鐘轉962最唔駛搵路，不過友人話搭東涌線到青衣城再轉140M綠van更快……平時久居深山的基爾其實連青衣城都N年無去過！



結果由公司收工到正式抵達三聖村都用了成個半鐘，主要係等140M都幾耐……Anyway，總結途上的3個發現：1.青山公路沿途日落景真係幾靚；2.黃金海岸真係有錢人的家；3.上圖的青山灣海岸風景都唔錯喎！



三聖村其實都幾有八十年代公共屋村的味道，基爾曾住過喱類屋村好多年，其中地標設施就是這類冬菇亭式的大排檔，以前多數係粥檔或賣粉麵飯的小食亭，而且多數無冷氣吹大牛角扇，依家就多數組合改建成冷氣開放式小酒家，喱間興記就以食海鮮出名。



由於友人早到已經去了街市買晒海鮮，「來料加工」都按斤計算，醬料茶芥當然又另計。最先上台的是白灼蝦和花螺，驚問友人D蝦係咪好貴，竟然買咁細隻蝦毛？！



對比起來，這碟椒鹽瀨尿蝦就好巨型好對辦，每隻都足有10寸咁長，非常好肉地，不過搣起殼來有少少論盡！



店員話驚order太多食唔晒只提議叫半隻燒鵝，上到台其實份量都唔少，而且味道好過之前去深井食的。另外還有基爾最愛的扇貝和蟶子，全部都大大碟，味道俱佳。



最後還要一提是這味鹽焗蟹，為了小食多滋味就兩人一隻，由於已預先剪開非常方便，裏面金黃色蟹膏食落似蛋黃，味道好正但當然膽固醇也勁高，所以還是淺嘗半隻為佳吧！



整體而言這餐以人均$350計不算平也不算太貴，菜式則是average水平，不過由於對基爾來說實在太山長水遠，暫未有機會再encore了。食完後大伙兒再坐61M出葵芳……



唔搭過都唔知61M真係似架「觀光巴士」，由三聖村搭出葵芳連等車足足成個鐘，真係耐過飛台灣！特登出新都會係因為友人請食甜品，不過由於已近打烊時段似乎無乜選擇，最後只揀了Delifrance，原來佢個雪糕心太軟和香蕉士多啤梨雪糕crepe都唔錯呢！

興記 Hing Kee
屯門三聖村熟食亭地下2號舖

遺忘的唱盤時光@王菲

記得幾個月前提過王菲的《菲靡靡之音》，之前買落的王菲舊碟又點只一張咁少，今次又來聽聽這張1997年推出的《Faye Best 最菲》陳年精選碟吧！

上次提到寶麗金在90年代中期出過一系列包裝極「簡約」的精選碟，同系的新藝寶原來一樣出過這類「紙皮碟」以抵抗老翻，霎眼睇其實這種粗製濫造的唱片封面本身就很有老翻味道！雖然包裝令人不敢恭維，不過當年唱片公司不惜工本將母帶運去日本重新數碼編製，可說是第一代的粵語流行曲hi-fi發燒碟，音色絕對不會令人失望。



選曲方面則不算太有驚喜，多屬王菲中前期的代表作，來來去去又係無奈那天、容易受傷的女人、多得他、執迷不悔、Miss You Night & Day之類耳熟能詳的首本歌，當然還有百聽不厭的冷戰、流非飛、季候風、靜夜的單簧管、可否抱緊我等。



令基爾最回味的，是碟中還收錄了3首比較少聽的電影電視主題曲：動心、誘惑我和忘掉你像忘掉我。老實說除了白髮魔女傳仍有點印象外，基爾對於千歲情人和誘僧已是零記憶。事實上王菲除了初出道時為無記拍過原振俠（這套反而有印象，男主角是黎明，還唱了願你今夜別離去）和千歲情人外，應該再無拍過無何電視劇了吧！

札幌拉麵@尖沙嘴

喱排唔係太得閒積存唔少野要補寫返，例如上個月就去了趟紅館睇女排，現場睇雖然無旁述而且距離遠幸好氣氛唔錯，六點幾打完頒埋獎就返出尖東醫肚。

由於要等埋友人收工，就在加連威老道行陣，好耐無行喱條街但其實都無乜野好買，純粹齋行kill time而已。之前聽人講話嘉蘭圍有間老牌日本拉麵店不錯，反正就在這附近姑且去一試吧！



雖然是周日晚但店裏不多人，門口簡單揭過menu價錢不算貴，反正逛街逛得累了先入去坐坐。在卡位坐低後店員推介2人set dinner，真係沙律前菜餃子串燒粉麵飯大包圍乜都有，懶諗就叫喱個set吧！



套餐裏的拉麵預了不會太大碗，不過來到上台時發現也不算太蚊型，是標準的中型size，賣相雖然有點「行」但味道不算差，有叉燒有紫菜有菇，且湯底也不俗比味千的高一班！



前菜有蟹籽和薯仔沙律選擇，另外還有煎餃、牛油炒草菇和蒜片雪花牛柳，每樣份量都不算多但味道俱佳。可能由於人客不多，師傅似乎只serve基爾一台客而已，即叫即整味道自然加了分。



之前聽聞友人說這店的師傅確來自日本，已在港住了十幾年。由於基爾坐的卡位就在開房式廚桌旁，果真很有點在日本小店吃爐端燒的感覺，一面吃一面欣賞師傅在廚房裏熟練地煮野食原來也是一種享受。主菜除了拉麵和炒飯之外仲有中碗的饅魚飯，開始有少少懷疑如果是男女情侶拍拖撐台腳的話是否食得晒？！幸好饅魚飯本身也幾好味，即使已經飽飽地都一樣食得落。



講開喱類日式拉麵小店似乎多數唔興甜品，即使有都係雪米滋三兩粒之類，喱間的set dinner也無甜品，但仍有啤酒、果汁酒和汽水3款飲品供應，店員話果汁酒只有4度比啤酒還低，就信佢啦！果汁酒有三種口味：白桃、荔枝和巨峰提，基爾3種都想試所以全都叫晒！初頭都驚會太甜又或者似藥水，但飲落完全唔會過甜，就如加了淡味啤酒的果汁，基爾偏好白桃味的一罐，初初飲由於易入口幾乎當了是果汁咁飲，但大半罐後竟然開始有點暈暈地……懷疑酒精係咪真係只得4度咁少呢！



p.s.順帶搭單講埋喱排在759買的朱古力，睇包裝背後才知原來是奧地利的朱古力廠出品（無睇錯的話生產線是在波蘭），由於只係幾蚊貨仔初頭只是抱住姑且一試的心態，但食落cappuccino的味道確實幾香濃幼滑，絕對是物超所值之選，隔幾日想再去買已經無貨！

札幌拉麵 Sapporo Ramen Miso No.1
尖沙嘴加連威老道嘉蘭圍22號地下

書裏人間@參考工具書

除了之前提過那些小說外，基爾平時間中也會看關於graphic design的書，比較權威的是SND出的年度選輯，通常又厚又大本又重，當然價錢也貴實在買不起，好多時都係問人借來齋睇下偷下師就算。

好多年前基爾第一次去台灣逛誠品時，無意間發掘到喱本新參考書，雖然「份量」上與SND差得遠，只有約三分一左右。



不過當中選載的多是歐美的一流傑作，依然很有偷師價值，而且只係500幾台幣（約百幾港紙），不用考慮即買了下來。



只要睇得多其實都不難發覺外文報紙雜誌一般設計都比較多以概念為主，整體感覺簡約得來又不失優雅，上圖這個圓形設計就幾突出兼典雅大方。



這其實也是西方主流的美學觀點（明顯不似香港的雜誌報紙咁花碌碌兼老土），即使過了廿多年這些版面睇落依然不太覺得out。



今年6月才剛舉行過巴西世界盃，原來這書裏有幾頁是20年前即1994年美國世界盃的舊報紙，當年決賽正是巴西對意大利，唔知仲有冇人記得書中那兩位巨星呢？

珍郵庫@粵劇服飾

以前除了一年一度歡樂滿東華又或者盂蘭戲台之外，平時真的很少會看到大戲演出，最多也只是從電視上看帝女花、紫釵記的電影版，當然對粵劇也不會有太深入認識！

後來中學時讀文學才知不少粵劇是源自古老的唐宋元明小說雜劇和戲曲，角色又有生旦淨丑多個類別，越看就越發覺它其實一點也不老土，且是一門深厚的文化藝術。



突然講咁多粵劇主要並非想悶走大家，而係基爾最近買了這套「粵劇服飾」首日封，粵劇戲服原來除了手工精巧色彩繽紛之外，不同角色也有不同服飾：$1.7是大漢裝（皇后公主及貴妃）；$2.2是海青（公子少爺）；$2.9是小古裝（未婚閨秀）；$3.1是小軍裝（武生士兵）；$3.7是蟒袍（帝王侯相）；$5是帔風（官宦人家）。細心留意埋個郵戳都設計得很精緻用心，是神來之筆！



另外上面這張$10郵票小型張首日封也有買，大戲開場有時會先演出《六國大封相》介紹演員出場，細個時覺得背插令旗的大戲服威風凜凜很有趣，原來它的正式名稱叫「大靠」，演出的都是大將元帥角色。睇完喱套郵票先知，單單大戲服飾都有咁多學問呢！

粵劇服飾
發行日期：2014年8月21日