珍郵庫@香港玩具40-60's

如果對懷舊玩具有興趣的話，今次喱套「香港玩具︰1940至1960年代」應該是必買的了，當中會唔會有D你當年都玩過呢？（想像到好多人會即時話：冇！連見都未見過喎）

如果真係未見過咁就要繼續睇下基爾介紹了……據首日封背面的簡介，原來二戰後40-50年代美國玩具商為了降低成本，逐漸將生產線轉移至亞洲，造就了香港玩具業的興起，到了60年代玩具業與電子、紡織及塑膠業已成為香港四大工業支柱。



實不相瞞，今次郵票上喱6樣玩具基爾細個時都有玩過：膠鎚仔（$1.70）雙星報喜的經典道具，用來扑人會發出唧唧聲；紙公仔（$2.20）雖然係男仔之家但基爾都有玩過幫公仔著衫，另外仲玩過塑膠煮飯仔……



水槍（$2.90）夏天至愛的玩具，因為可以玩水，大熱天時特別消暑；膠劍仔（$3.10）雖然唔知有乜咁好玩，但一班小朋友圍埋一齊互片贏晒人地D劍仔會好有成就感；黃膠鴨（$3.70）好多人的沖涼恩物；鐵皮青蛙（$5）除了青蛙之外仲有隻鐵皮雞仔，會一路跳一路啄地。



除了這些之外，基爾印象中細個時仲擁有過幾架Tomica車仔和紅巴士、寶馬遙控車、回力車、積木砌圖、可以組成動物園大巡遊規模的塑膠動物公仔、豆槍、叮噹小露寶和Gundam黃金戰士機械人等等，後期當然還有些遊戲機，不過依家大部份都送晒畀人無再收藏了。講返今次套郵票，原來是採用了亮漆印刷效果，唔怪得咁有立體質感。最喜歡是那個鴨仔特別版郵戳，非常cutie！

香港玩具︰1940至1960年代
發行日期：2016年6月8日

後現代阿伯生活之賞莫奈:下

逛博物館相信唔係人人有興趣睇，都係快快手手寫埋個下半集唔好拖咁耐悶親人！

上篇睇完晒關於莫奈生活環境面貌的展廳，發覺仲未睇到那些價值連城的名畫喎！搵來搵去都唔見，原來名畫係擺放在另一間展廳，如果有興趣去參觀千其咪睇漏眼！



作品展喱邊個廳相對而言就比較平實，似返之前尖沙嘴藝術館果類正式的展覽。一入去就見到成班人圍住張大圓台，有乜野睇呢？



這part原來是「關於莫奈」的介紹，以圖片故事形式講述他於1840年在巴黎出生至1926年離世的人生歷程……



影片中收錄了不少莫奈晚年生活在Giverny故居裏的珍貴老照片，當然少不了那個幫助他增添很多創作靈感的蓮池花園。



展廳劃分了好幾個區域，中央就是介紹莫奈生平的大圓台，睇完之後仲要行去其他小展區繼續睇。



上面是其中一個迷你放映室，播放介紹莫奈與印象派的短片。「印象派」一名源於1874年在巴黎舉行的一個畫展，除了莫奈外，Cezanne、Degas、Pissarro、Renoir等30多位藝術家都參與其中，他們突破了西方傳統畫派風格，開創了戶外寫生模式，捕捉晝夜四季大自然的變幻神緒，尤其擅於表現水與光最真切的物理感覺。



對印象派有基本認識後，再行過去睇正式的莫奈真蹟名畫。好彩唔算太多人咋喎，總算可以舒舒服服咁慢慢睇喇！



展出作品雖然不算多，但仍可大致分作莫奈前中後期幾個階段。最早期的作品主要是上圖的Normandy and Brittany，是莫奈少年時代成長的地方。他曾說過「那時我每天都會發現更美的東西，讓我瘋狂地想將一切置於畫中……」至於令他最迷戀的貝勒島和Etretat懸崖今次也有運來香港展出。



跟住果part係介紹莫奈成年後畫的一系列巴黎鄉郊寫生畫，1878年莫奈一家搬到Vetheuil居住，創作了好幾幅描繪維特尼流域塞納河四季轉變的風景畫。莫奈似乎也迷上了畫鄉郊的火車站，例如上圖喱幅《阿爾讓特伊火車站》（Argenteuil Railway Station, 1872）也是這時期的代表作。



第3part是介紹20世紀初莫奈旅居倫敦和威尼斯時期的作品，由於汽車和鐵路的快速發展令他有機會到歐洲各地寫生，泰晤士河畔的國會大樓、著名的Charing Cross Bridge和Waterloo Bridge以至威尼斯的貢多拉都成為他取景作畫的題材。



不過說到底基爾還是最喜歡莫奈晚年在Giverny定居後畫下的一系列舉世聞名的「花園大作」，包括上面這幅色彩非常鮮艷、美得令人神往的《春天的吉維尼》，確實是一片很適合晚年避世的田園風光。



說到吉維尼又怎能沒有莫奈當年在自己小花園畫下的睡蓮系列名畫，展廳裏不可或缺的就是這幾幅睡蓮，也是最多人圍觀欣賞的作品。



莫奈晚年特別愛上東洋風，1893年買下Giverny大宅後幾年間，就在花園裏修築了一個日式水榭亭苑，除了在池塘裏種了不少日本睡蓮外，園中還種了很多鳶尾花、蘆葦、柳樹竹樹楓樹、牡丹杜鵑等植物。除了睡蓮系列外，基爾也很喜歡上圖這幅《紫藤習作》（Wisteria, 1920）。



莫奈的日式水園原來除了有得睇之餘仲有得玩！展廳最後一部份闢了一個暗室，初頭見D人手指指一味捽個荷花池邊的ipad唔知做乜？



行埋去仔細一睇，先知原來係在玩「種花」遊戲！遊人可按個人喜好，在畫布上不同位置擺放唔同顏色品種的蓮花，這樣就可學莫奈一樣畫一幅屬於自己的《睡蓮》了。



荷花池上一樣有條日本橋，莫奈晚年花了不少精神、金錢和時間精心打造這個Japanese water garden，據聞1901年他與園藝師將池塘面積擴大了3倍，還增建了人工島和4條相連的小橋方便觀賞蓮花（看來比周敦頤更愛蓮），據聞莫奈也經常帶親朋好友趕在傍晚5時蓮花閉合之前同來賞蓮。話時話賞蓮季節又到，相信唔少人又會去賞下蓮花！

「他鄉情韻：克勞德‧莫奈作品展」
地點：沙田香港文化博物館
展期：4.5.2016 - 11.7.2016

後現代阿伯生活之賞莫奈:上

炎炎夏日三十幾度除了浸在水中之外，去逛商場或到茶樓、圖書館打躉都係唔錯的消暑活動，如果覺得無新意，咁去巡巡博物館既有冷氣嘆又有各式展覽睇，亦係唔錯的選擇。

今年暑假最hit的展覽都莫過於這個以法國印象派大師莫奈（Claude Monet, 1840-1926）為主題的畫展，反正預計日日都會好多人去睇，咁就索性揀周三有半價先去。



博物館平時周三係免費日，不過今次莫奈真蹟名畫遠自法國多間藝術館空運而來，可能運輸成本保險都貴所以要收$10，但其實都係勁抵，只要去過法國D藝術館就知佢地入場費有幾貴！上圖係文化博物館大堂長樓梯豎立的莫奈展廣告板，要影多幾張因為佢會變色，有藍有紅有綠好靚。



買左飛咁就拿拿林入場上一樓展廳。先睇上圖喱間個展廳設計都幾特別，一入去就好黑漆漆又掛了好幾塊白布圍成一圈，投射了莫奈居於法國小鎮Giverny時建造的水榭花園，就如巨型的curved tv一樣像真度很高，令人感覺恍如置身水園之內。



這個Giverny水榭花園之所以咁出名，主要原因係莫奈一系列著名的睡蓮代表作品都是在這裏取景。展廳裏特別之處係修築了一條小木橋，橫跨在地面投射的蓮花池塘上……



身處橋上看風景，霎眼間真有點以為來到法國Giverny這個莫奈精心建造的小花園裏一樣，又有點似化身進名畫裏成為其中一個「路人甲」！唯一比較後悔偷懶無帶相機去，剩係靠手機影就一定唔夠光。



除了投射映像版的小花園外，展廳還復刻了莫奈故居裏的起居室、飯廳和畫室，都是非常值得參觀的場景佈置，其中還展出故居建築的照片作對比。下次如有機會重遊巴黎，真的要抽一天去逛逛這個西北邊的小鎮。



先睇睇佢個飯廳，今次莫奈展基爾真係覺得佢搞得幾有心思，這飯廳不只單純復刻了莫奈故居的餐桌餐椅壁爐和布簾門窗等陳設，餐桌上還有一些「別出心裁」的餐具……



餐桌上有部ipad可以「點菜」，menu上主要係莫奈早午晚餐以至雪糕甜品等常吃的東西，這樣就比慣常單純看展板的圖片文字介紹生動得多了，對莫奈的生活環境細節也有更完整的認識。



不說不知莫奈除了畫畫出色之外，原來仲係「識食之人」，愛各式美食之餘也會下廚，可能因為在法國小鎮深居簡出，平時除了畫畫之外，閒來就愛煮返兩味作消遺吧！



單看這dining room的佈置也很美，原來莫奈喜歡飯廳以黃色作主調，因為貪佢夠warm，有家的感覺。不過照片中似乎人人都好專注細看「莫奈menu」，反而無暇欣賞這間小黃廳的細緻陳設。



由於Giverny故居附近有近2英畝蘋果園，所以蘋果批、蘋果酒都經常出現在莫奈的餐桌和畫中，另外諾曼第著名的Camembert及Neufchatel芝士都是早餐慣常菜式。



午餐晚餐方面，莫奈原來極愛吃Yorkshire Pudding，有時會配燒牛肉、羊肉或火雞肉蘸上肉汁吃，也會摘取花園種的沙律菜作side dish；魚方面，諾曼第龍利魚做的傳統菜式Sole a la Normande也是他的心頭愛。上圖是飯餐壁爐上掛的幾幅日本畫，有段時期莫奈瘋狂愛上了東洋畫，還買了不少珍藏家中，就連花園裏的小橋也採用了東洋風建築設計。



「食飽飽」之後，再行過去隔籬以紅色作主調的起居室休息一陣。這間充滿情調的living room除了有雅緻的布梳化、貴妃椅、台燈擺設和桌椅之外，仲掛了不少印象派的復刻名畫……



不過最吸引基爾眼球的反而是上面這扇大玻璃窗，望出窗外滿眼就是樹影婆娑的迷人鄉郊靚景。由於這片園林美景實在太靚太逼真，很有理由相信當年莫奈買下這間屋都係為了這個靚景。



不過這「迷人玻璃窗」最勁之處，原來佢仲會每隔1分鐘左右就由朝早晨曦變成午後再慢慢變成黃昏和入夜，全日的早午晚風景盡收眼底實在太amazing了！基爾覺得D豪宅樓盤示範單位設計師都好應該來「取經」。



睇睇下突然有成群人湧入來起居室，應該是導賞團煞到，全個living room即時擠得水洩不通，咁基爾唯有退出去隔籬另一間「莫奈畫室」吧！



莫奈畫室最主要係一張超大型的白色工作台，聞說個別日子這裏會有沙畫表演，不過基爾這天來就沒有這個節目。至於畫室隔籬特設的塗鴉室（左上圖），就有不少人來留下到此一遊的「大作」。



睇完畫室見導賞團的人潮散退了不少，於是又行返去花園那邊，反正一場來到又無謂咁快走啦！而且之前因為人太多，有些場景圍滿人排隊影相跟本都無辦法逼到埋去睇真，咁趁人少D又走去再仔細睇多一遍。



人潮散了之後，仲可以有充裕時間輕輕鬆鬆上橋影下相添！其實好多人都係想影相多過去睇畫，基爾覺得將場景和名畫分開展出都不失為一個幾好的處理手法，既可滿足遊人的拍照慾望又不妨礙別人賞畫。



行完一圈咁又出返去，順便又逛埋隔籬的趙少昂藝術館，其實之前來時都有逛這間常設展廳，不過佢會定期更新廳內的展品，今次換上的主題是「丹青四季」，之前好似沒看過。



趙氏與莫奈一樣，畫家詩人可能對四季變化的觀察特別細緻，所謂「丹青四季」是他取材自四季萬物生態變化的畫作，不論盛夏蟬鳴荔熟垂柳依依還是冬雪夜月賞梅花，都可從中領悟人生，感受與大自然共處的和諧……



這次展出以春夏秋冬為主題的畫作有40幾幅，畫中有詩詩中有畫，這就是國畫最大的特色，不論池塘邊一躍入水的青蛙，還是點點海棠紅，神韻皆活現紙上栩栩如生，與印象派的光影流轉風格相比，又是另一種的美。



上圖是同場展出的趙氏印鑑。咁睇完一輪國畫之後，仲未去到睇莫奈真蹟間展廳喎！由於篇幅太長，為免悶親blog友都係留返下回分解吧！



p.s.寫這篇blog時赫然發現基爾大典自從搬來blogger這裏之後，累計瀏覽量原來已接近10萬人次了（之前在yahoo時反而沒有留意有幾多），當然10萬這數字與好多其他人氣blogger而言實在是小巫見大巫，不過對於大典而言也是個里程碑。至於對基爾來說，click數有幾多就沒太大意義（反正都係hea寫），反而繼續同blog友們chitchat才是最大動力吧！另一樣最希望係blogger這裏可以長命百歲，試過一次搬blog已經煩到震，實在不想再經歷多一次了！

後現代阿伯生活之遊坪洲

今年入夏後天氣好似時晴時陰，看天氣預報這天又說會有雷雨，本來有意取消行程，不過大清早醒來天氣又不算太差，而且都無乜雨喎！咁一於按原定計劃拿拿林出發……

閒日去街其實心情都幾興奮，眼見身邊好多上班族穿戴整齊卻又舂住眼訓搭車返工，自己就可以精神十足咁去hea遊，感覺真係特別逍遙疏乎！晨早出發仲有個好處就係可以搭到返工時段才有的特快巴士，原來早D獅隧又無咁塞，彌敦道也算暢通，結果比預定時間早了很多出到尖沙嘴。



既然咁早，索性在鐘樓下睇住成班uncle auntie耍一陣太極吧！同場還有幾個老外在學耍太極扇，仲耍得頭頭是道有板有眼幾過癮！睇完一輪之後，才施施然行過去天星碼頭搭渡輪，朝早空氣特別好，唔搭地鐵選擇搭船絕對係明智之舉（又要讚自己）。



另一個揀搭船的原因係中環天星碼頭就在港外線碼頭隔籬，如果搭地鐵反而會貴左又行遠左，反正是愜意遊唔駛睇錶趕時間，就來一天「長者慢活」調校慢一點生活節奏吧！看到上圖的坪洲碼頭就知基爾這天hea遊的目的地，weekday去離島除了人少D之外，原來船錢也比周末假日平了一大截，感覺上又賺了一筆！



不過要留意閒日船期班次會較疏，如果唔想搭比較貴的快船最好是先上網check check。基爾這天由中環去到坪洲大約只半個鐘，除了港內較大浪外，一出外海反而風平浪靜，搭船的人也不太多，肯定無去長洲咁墟陷。上圖是坪洲公眾碼頭，有街渡來往對岸的愉景灣。



翻查大典網誌幾年前都去過一次坪洲，那次有去東灣和大利島，今次就主要去行Finger Hill。不過嚴格來講這個實在不能叫做hill，只算是小山丘而已！坪洲有名你叫成個島幾乎係平的，全島最高的這座手指山才不過海拔95米，比市區好多高樓大廈仲要矮……Anyway，起步行山前先去街市買海鮮準備個豐富的seafood lunch！



香港行山有個好處就係一般熱門路線的指示牌都幾清晰，離島也不例外，由坪洲碼頭一直沿住海濱長堤往前走，行到中段就見到往手指山的路牌，由這裏再轉入村就見到上山的大斜路。上圖是海邊遙望對岸的愉景灣，唔知喱度夜晚睇唔睇到迪士尼煙花呢？



入村後見到這條登山大斜道（感覺上超過30度），有幾個同行團友已即時打退堂鼓，寧願返去海邊hea蕩。不過基爾見一場來到而且天氣又唔錯喎，有點陰涼不太曬，咁一於照撐上山去。上圖可以見到山路兩旁民居栽種的紅玫瑰和牽牛花，好少見開得咁燦爛，忍不住幫佢地影張寫真先。



沿路上山其實都無乜大樹遮蔭，如果盛夏暑假來行山可能真係會曬得幾金，幸好喱日初夏來到依然微涼，相當perfect。而且半山沿途有唔少新裝修的靚屋參觀，漫步hea走也有點加勒比或者南歐希臘的小島風情（雖然兩處基爾其實都無去過）……



上山路程都唔算太長，大約同上次行青衣自然徑差不多，以基爾的「長者慢速」上落山來回也不過個半鐘左右吧！山頂有個鳳萍亭可以稍歇一會，由這裏望出去風景都幾靚。這天雖然有點煙霞，但仍可見到對面海的長洲、有三支大煙囪的南丫島，隱約仲見到遠處的香港仔。



在山頂涼亭抖一陣就落山會合返其他團友。途中見到有鐵鑄的殖民時代坪洲地圖路牌，留意到原來坪洲的英文拼音是Peng而不是Ping。另一樣開心大發現係原來手指山上可以說是「離島中的鳳園」，唔知初夏係咪正值蝴蝶的繁殖季節，沿路樹林都有極多色彩繽紛的蝴蝶和蜻蜓在飛舞，有些寶藍色、紫色和黃斑紋的，大鄉里基爾都未見過。可惜隨行的手機捕捉不到翩躚蝶影（飛得太快），咁唯有影欄杆上這條好似結了蛹的毛蟲吧！



返到入村，時間已過了中午1點，開始有點烈日當空的熱力了，好彩已完成行山的行程。順便路經議員辦事處外睇睇貼出來的船期表，諗定大約搭4點船出返中環，仲有成3個鐘想點樣hea飲hea食都絕對卓卓有餘啦！



怎知來到預約好的食店時，卻發現出了小岔子。這種離島小店向來舖面細小，一般只能同時招呼5圍台左右，這天閒日來到竟然有「一日遊團」來包了場。老闆娘本來想在店外加開大台畀基爾一行人，但因為未食已經有點熱加上有D蚊，咁唯有等佢地D團體餐用膳完畢先再返去食尾圍啦！



基爾唔想在店外hea等齋傾計，又行返出去碼頭附近市政街市大廈那邊無聊遊蕩。原來坪洲喱座市政大樓麻雀雖小但又幾五臟俱全喎！除了街市之外仲有間蚊型圖書館，樓上仲有體育館，裏面個gym room仲幾新淨而且設備齊全呢！健身室門外還有個榜，上一上榜竟然又有D驚喜，比年頭驗身時輕左6-7磅咁多？開始懷疑果間驗身診所個榜唔準！



開心完之後，再去八卦下喱張比較新的坪洲地圖，發現原來坪洲都有個迷你版的居屋和公共屋村（就在剛才食店旁一直往前走），另外除了天后廟之外仲有好多唔同的廟宇古蹟和教堂，若要行埋東灣和大利島恐怕真的要花大半天才夠時間巡勻晒。



見差不多兩點鐘開始行到有少少口渴肚餓兼且對腳有點累，索性就在碼頭旁這間cafe坐一陣，背後果幅壁畫影出來真係幾靚，可以扮下去了南法康城都唔錯喎！不過見店面正門交叉纏了封舖的膠帶，似乎這間cafe已沒有營業了，店外有個乘涼伯伯見基爾一臉疑惑就同基爾搭訕，原來這間cafe因為欠租兩個多月，前日已被封舖了。



既然連間cafe都閂埋檔，唯有無奈地moonwalk返去食店先算啦！返到去發現「一日遊團」已經埋單走人了，拿拿林叫廚師開工啦仲諗。早上買來的海鮮其實早就自動運送到食店的廚房裏（這間食店同街市間魚檔係姐妹聯營），老闆娘的老公就是大廚，好勁喎兩三下手腳已經煮好晒熱辣辣拎出來有得食啦！



雖然由午餐變了下午茶餐但份量依然好強勁，有魚有蝦有蟹有蚌有雞有菜非常豐富真係唔知食得邊樣，難得係樣樣都煮得唔錯，有點住家菜風味之餘，油鹽糖份量都比較少，總括而言相當清淡健康，埋單計人均才$170，以海鮮餐計是相當便宜了（記得上次去屯門三聖村食要三百幾蚊）。



食到飽一飽都係時候出碼頭搭船返歸了，結果4:30pm已返到中環。咁早又唔想返屋企住，突然醒起之前睇過blog友寫的網誌，話IFC有個觀景台可以上去參觀，而且係完全免費的，既然一場來到一於又蕩過去八卦下。



問過info counter原來觀景台是在55樓，雖然無ICC個Sky100咁高，但唔駛錢喎（ICC果個要收成舊水門票），唔駛諗一於上去。不過上去之前要先在低層個counter證記身份證（唔知係咪驚恐襲呢），佢會閃電出個pass畀你，才可以去閘口嘟個pass再入去搭。



記憶中架係直上55樓，時間只需大半分鐘左右，隻耳仔會因為氣壓問題聾聾地，打返個呵欠就冇事了。上到來有專人招呼帶路，感覺有少少似去了五星級酒店，一般人來到會當了喱度係免費觀景台（類似外國城市的觀光塔），但實質上這裏其實是金管局的展覽廳。



不過由於展覽廳四周圍都用了全落地的大玻璃窗，所以好多人甚至外國遊客都會當了這裏是「香港觀光塔」。事實上由這裏望出去中西區海岸和太平山風景都好有香港代表性，如果來香港沒有來過這裏就等如沒去過山頂一樣可惜，而且最重要最重要最重要係……喱度連一蚊入場費都唔駛！



既然上到覽展廳，除了影外面個靚view之外，點都要花少少時間睇睇D展品，尊重返人地主人家先合禮儀吧！老實說個展覽雖然規模唔算好大，但都幾值得一看，除了有展板介紹香港百幾年金融業發展歷史之外，仲有好多古董錢幣睇（係人都知基爾最鍾意D老餅野），有D舊十蚊紙、5仙斗零和50年代「事頭婆」的1分錢紙幣基爾屋企都仲有喎，唔知依家值唔值錢呢？