意廊@沙田

以往造冬或團年如果不想煮就多數去酒樓食，不過喱類大時大節通常冇得訂位之餘仲要被迫叫熱推套餐，所以基爾一家繼舊年去Pizza Hut造冬之後，今年食團年飯又有新創意……

以往基爾間中都有來幫襯喱間位於河畔的酒店，因為佢個lunch buffet間唔中會有五五折，百幾蚊位菜式選擇算多所以都幾抵食，閒日去客量不多非常清靜。不過今次團年飯就移師地下的意廊。



顧名思義這就是間意大利菜餐廳，年廿九晚來到不太多人（可訂座）。基爾覺得佢個4人自選套餐非常抵食，連加一都係約$1000。特別喜歡佢個自助頭盤及沙律吧有好多款沙律菜、芝士、麵包餅乾和果乾，仲有不斷添加的煙三文魚，正過Pizza Hut以前果個salad bar好多，要重點一提係佢果兩支無花果和士多啤梨黑醋，真係超…級…正！



除了頭盤沙律可自取之外，其餘都是4人份量，包括soup of the day（記憶中係忌廉湯），至於pasta方面就選了上面喱個香蒜白酒忌廉藍青口闊條麵（另外還可選煙肉忌廉汁意粉或紅酒燴牛肉雜菜貝殼粉），基爾覺得D青口仔實在太細隻唔係好夠攝牙罅，但肉質尚算ok。



跟住仲有個snack platter，除了fish finger（配他他醫）幾好味之外，仲有黑椒蜜糖雞翼、炸蟹肉餅以及意式烤豬肋骨。佢個ribs個醬幾好味，仲有個tartar sauce幾乎畀我點晒，直豎拇指！



套餐不可少的仲有個12-inch pizza，結果選了上面喱個巴馬火腿牛油果批（另外還可選煙三文魚批和Quattro Formaggi批，不過因為出面salad bar有無限量芝士和煙三文魚供應，所以還是選了Parma Ham），其實基爾都幾鍾意食喱類薄批，好脆好香口，但基爾媽唔識欣賞猛話唔夠芝士，又話鍾意食PH果D厚批多D。



至於entree只有兩個選擇，分別是燒春雞及上面喱個意式烤羊鞍（配薯仔及炒時蔬），基爾覺得個羊鞍唔算太羶喎，是可以接受的程度……平時也有食開枝竹羊腩煲的基爾媽反而覺得這羊鞍有點羶。



最後仲有甜品和coffee or tea，蛋糕一般而已沒太大特色，如果有cheese cake更佳，反而杯cappuccino幾好飲唔太甜。



講完團年飯順帶又講埋開年飯，今年繼續encore了稻香盆菜，年初二晨早基爾去晨運發財跑順便去隔籬村拎盆菜，同去年一樣相當足料，$888的價錢仍算是合理吧！不過舊年一次過落晒兩樽醬汁實在太咸了，今年汲取了經驗先落大半樽，唔夠先酌量再加會好一點。



之前講過刨蓮藕絲整蓮藕餅，今次再整埋籮蔔糕，之前睇肥媽食平D教刨籮蔔絲，可以留返個籮蔔椗來搾手就唔駛驚刨傷隻手，基爾試過又真係幾好刨喎！睇烹飪節目真係經常可以學到新知識。



餡料方面除了慣常的臘腸和蔥花之外仲有蝦米，不過今年蝦米好貴，索性升級用蝦乾，然而蝦乾太大條，要先一剪開三。其實整糕過程和製成品本來都有影，但唔知點解D相後來發現爛了打不開……



年初三赤口與舊同學食開年飯（由團年飯約到變開年飯），因為有好多食肆仲未開，一波三折後終於決定去食新世紀的Outback，之前睇blog友講先知佢開了在6樓，初三去到門口逼滿人，幸好多數係對面茶樓D等位客。



睇完menu後，初頭諗住叫兩個lunch set之後再散叫其他小食，不過waiter哥哥話散叫份量同個套餐係差不多，叫套餐會抵食D云云，咁又係喎套餐只係$78-88，以美式餐廳來說係非常非常抵食，而且份量都幾大，最後叫了牛柳粒串燒、香芒燒雞肉沙律和燒肉醬味豬肋骨3個餐，食到飽一飽人均才$100，以新年檔期計平過去茶樓啦！

p.s.有冇發現Outback食果餐又係冇乜影相！唔知點解個電話又神神地，D相又係爛晒開唔返，究竟係咪時候要考慮換新手機呢？下次都係帶返架相機傍身穩陣D。

意廊 Avanti Pizzeria
沙田大涌橋路34-36號麗豪酒店地下

煎魚肉蓮藕餅

某個周末晚上閒來看電視正在播《神廚遇上女主播》，這集是由高師傅教新聞主播曾美華煎蓮藕餅，望落雖然工序多但應該handle到，於是向基爾媽申請重開親子P牌型廚教室！

睇完個電視節目，其實心中已有個譜，加上有基爾媽傍住應問題不大吧……先去街市買來一小截蓮藕，揀蓮藕都有學問，基爾媽傳授秘訣係長身係較爽用來炒菜較佳，圓身的較易煮林多數用來燜或煲湯云云；魚肉就去魚檔買$10-15蚊已經好夠食。



平時喱個刨一年都只係會用兩三次，而且多數用來刨蘿蔔絲整蘿蔔糕（整蘿蔔糕請click：蒸蘿蔔糕 ），喱次第一次拎來刨蓮藕絲，不過方法同刨蘿蔔絲會有些少分別，蒸蘿蔔糕的絲要刨得較長身，整蓮藕餅的絲就要盡量短而細，接近蓮藕蓉狀會好食D。



其實高師傅在節目中係用蓮藕絲拌豬肉蒸肉餅，不過基爾覺得用魚肉會健康D無咁「三高」，所以就改了食譜。其實煮野食好多時都可以自由執生，下次又可以試試玩下煎芋頭餅，不過煎芋餅要多幾個steps，就係要先去皮切片和完全蒸熟蒸林晒個芋頭，才能與魚肉混成一體。



魚肉和蓮藕絲大約係half-half啦！口味因人而異，不過如果蓮藕絲太多可能會散吧！魚肉方面基爾媽提議可加上蔥花和切粒加瘦臘腸（節目中高師傅加了蔥花和蝦米粒冬菇粒，口味也是因人而異），基爾平時完全唔食蔥，但肉餅加少量蔥花可以接受。



幾乎忘了蓮藕絲拌魚肉之前仲有一個非…常…重…要的step，就係要先盡量搾乾蓮藕絲的水份，蓮藕絲若大多水份原來會令肉餅整出來不夠結實。蓮藕絲搾乾水後再與魚肉拌勻，其間可以加入少量雞粉、胡椒粉、麻油和豉油調味。



搞勻晒蓮藕絲和魚肉之後就可以落鑊煎了。用平底易潔鑊煎野可以用少D油，睇電視的高師傅因為手藝熟練就用唧魚蛋方式，基爾唔識控制咁就用搓湯丸方式啦！不過手上要先拍上粟粉以免魚肉黐手。



一個個大魚肉丸放在煎pan上之後再輕輕壓平成為肉餅狀，先煎熟煎香一面，才反轉煎另一邊。如果想煎薄D易熟D可以再用鑊剷壓平一點，不過基爾鍾意厚身D似burger的肉餅狀，食落覺得好味D。



由於還有一點魚肉剩下來，咁同場加映埋魚肉煎釀茄子吧！（整煎釀三寶請click：煎釀青椒矮瓜）可先將茄子斜切片狀，中間界幾刀挖個小凹位，再搽少少粟粉，魚肉釀上去會穩陣一點。



剩下的魚肉不太多，所以盡量塗薄薄的一層已足夠，煎的時候魚肉也無咁容易甩出來，會靚仔D！基爾慳家，挖出來的小粒茄子肉也可重新混入魚肉中搓勻再釀。



好喇唔講咁多馬上落鑊煎一煎，煎釀茄子時也有個小秘訣，就是要先煎熟釀了魚肉的一面，落鑊後先不要亂動……



等一會魚肉煎熟了穩陣了之後才再反轉煎熟另一面，咁樣魚肉同茄子就打風都打唔甩。



最後上碟當然要影下製成品玉照，基爾媽話鍾意煎釀茄子再與椰菜散花和甘筍煮，加蠔油生粉水煮成獻汁上碟即可，當然若直接上碟基爾也覺得完全沒問題。



至於魚肉蓮藕餅也煎得相當靚仔，平時一向「謙厚」的基爾咬一啖試味發現確實係…極…度…好…味呀（全力開動自吹自擂mode），很喜歡軟軟的魚餅又有爽爽的藕絲口感，幾乎要好似味皇和食神中的家燕姐咁要睡在藕餅上面轆幾轆不斷翻滾！聽高師傅話整蓮藕餅其實食材用料不貴，但由於工序繁多（是幾花心機的傳統菜式），依家好多食肆都已經不再整了，即使menu有提供都會賣得好貴，一碟只6-7塊已經要成$60-70蚊云云，今次基爾仲唔發大達！

京饌@觀塘

話咁快又到了大年初五，好多人應該仍在逍遙外遊中吧！基爾就比較少大時大節紅字長假期外遊了，多數都係要返工睇住檔口……Playback返今年農曆年前與舊同事吃了頓團年飯，第一次來apm幫襯這間京饌。

舊同事提返先記起原來舊年團年飯都係食類似的京滬菜館，不過上次係去銅鑼灣食通天的鍾廚……話時話其實都好耐無來apm（多數門口經過），赫然發現原來個food court都唔同晒，細左好多之餘仲少左選擇，名店亦多左，底層仲有個迷你花市（期間限定），氣氛都幾熱鬧。



成班舊同事夠鐘都未見現身全部都姍姍來遲，咁基爾入座先以免被cancel訂位啦！入到去發現係坐卡位仲要係三人一排其實都幾逼幾唔方便出入，下次如再來都係坐返出面的窗邊台比較理想。



一個人無聊間先揭下個menu睇睇有乜好野食先，驟眼睇本menu都幾靚喎！唔講可能會以為係食日式理料，唔知其餘春夏秋又會唔會有不同菜單供應呢？



裏面有好多常見的京川滬菜式，包括有鴨舌牛舌、醉雞醉鴿醉豬手、五香烤魚、麻辣炸鳳尾魚、醋汁海蜇頭、蒜泥白肉陳醋餚肉之類……仲有甜品如棗泥糕、高力豆沙和豆沙鍋餅（賣飛佛），可惜最後太飽冇叫到！



終於等齊人可以order了，最搞笑係原本各人已諗好晒想食乜，但落order時waitress姐姐不斷提供大量「具建設性」的反建議，到最後差不多九成都不是我們最初原意想點的菜式，包括上面這味香醋汁海蜇頭（$88），waitress姐姐強調一定要叫黑醋汁喱款，又真係好食D咁喎！



見waitress姐姐推介的幾款都甚對辦，咁一於依佢意見叫埋喱味大龍躉兩食（$288），佢強力推介好抵食，同埋好多台客都會叫……



事實證明侍應的待客態度真係好影響食客心情，聽得出這位waitress姐姐唔hard sell之餘，仲好處處為食客著想，盡量以最抵價錢食到最好的菜式。例如本來基爾想叫埋上面喱碟手撕雞絲粉皮（$68），waitress姐姐就直截了當話唔駛另外叫了，因為只要order夠$300就會送這味菜式。



同雞絲粉皮一樣，食京川滬菜好似例必要食埋上面喱個麻辣牛舌（$68），雖然基爾唔太食得辣也不太食牛，不過見價錢咁平就試試叫一碟share食應該不會有幾多，來到才知原來係大大碟有成十幾廿片咁多，如果愛麻辣的川菜迷一定要食啦咁抵！



另外仲叫了唔辣的蔥油淋雞（半隻$130）和上面喱味鐵板譚府蝦子鍋鎉豆腐（$98），都係味道ok之選。有人想食小籠包咁又叫了一籠4件的貝勒爺灌湯小籠包（$45），不過唔夠分，若叫多籠又好似太多而且都幾貴，喱個時候waitress姐姐又再出動話其實可以只加點1個小籠包（加$12），咁就可以人人有得試啦！



其實平時基爾都好少出外食小籠包因為通常都幾貴又唔好食，但喱個又幾ok喎，食得出係師傅手工包唔係雪藏貨色。最後仲有叫埋上面喱味京蔥肉絲薄餅（$98），用餅皮包來食，醬汁甜甜地似上海粗炒，平時唔食蔥的基爾都覺得不錯。最後埋單計人均兩舊水有找，感覺抵食（歸功於waitress姐姐精打細算），睇單才知茶錢只$8位（不錯的鐵觀音茶），是平時下午茶價錢吧！

京饌 Kingduck
觀塘觀塘道418號創紀之城五期（apm）3樓1號舖

珍郵庫@歲次丙申猴年

霎下眼2016年又過了一個月，好快又來到農曆新年，點都要搵D有節日氣氛的東西寫下，最就手又莫過於生肖郵票吧！

每年訂首日封，第一炮通常都係生肖郵票，今年也不例外。要知道生肖郵票向來都特別好賣（不論是回歸前或後），為免排長龍都係預早訂為妙，上圖是最常規的一套4款猴年郵票……



今次這套是香港郵政歷來發行第4輯中的第5套生肖郵票（第1輯發行的十二生肖郵票可追溯至60年代），與往年一樣，都是用了4種獨特的中國傳統手工藝為主題，分別是：$1.7琉璃藝術，以猴子抱桃為造型，琉璃是中國古代常用的古法水晶；$2.9絲綢刺繡，在中國古代非常有名實在不用多介紹了；$3.7銀器；$5剪紙，採用孫悟空京劇面譜造型。



也由於生肖郵票銷情特別暢旺，郵署推出的郵品款式也特別多以增加撂水收入。除了一套4款郵票外，還買了上面這款印刷甚為精美的$10郵票小型張，另外更有絲綢郵票、套摺、賀年卡、小版張之類，不過基爾實在沒地方收藏所以就沒有買了。



值得一提的是，基爾特別喜歡今輯設計的「特別郵戳」，線條簡單得來又很有點活潑玩味（比舊年羊年首日封好看多了），很期待明年雞年又會以什麼造型亮相呢？！

歲次丙申猴年
發行日期：2016年1月16日