遺忘的唱盤時光@梁漢文

前幾篇寫鹽田梓還是初春時節，轉個眼已經到初夏五月天，近排工作太忙幾乎都沒空寫blog，不過忙裏也要偷閒，又來轉動一下個舊唱盤。

CD和Cassette帶不知不覺間幾乎都進了博物館，而且依家即使去行街，都真係好難先搵到間唱片店逛，基爾也忘了最近什麼時候逛過CD舖和買過邊張CD……不過奇就奇在，依然好記得自己第一張買的CD，就係上面這張梁漢文的《壹精選》。



基爾唔算係佢粉絲，歷來買他的CD就只此一張而已，也忘了為何當年在CD舖芸芸眾多歌手當中會揀中這張來買。唔知係咪當年讀書時代幫人補習（定還是第一次做暑期工）出糧之後，第一次擁有自己賺來的錢，咁橋又剛好行過唱片店，咁就買了這張CD吧！



翻查網上資料這張碟是發行於1994年，收錄的13首歌（為何當年的精選碟都興13首）都是梁漢文華星年代初出道時比較hit的作品，例如第一位、一世一次戀愛、想著你等著你、不願一個人等等，當然某月某夜、纏綿遊戲和流離夜雨都是不可缺少的代表作。記憶中隻碟當年都唔算貴大約一百蚊以內，不過由於是第一隻買的CD所以就一直保存至今。你又記唔記得第一隻買的CD是什麼呢？