遺忘的唱盤時光@Barry Manilow

好耐無聽歌仔，咁又來翻一翻基爾床下底個文物囊摷返D陳年CD出來，唔知又會唔會喚醒小小那些年的回憶呢？

70-80's年代如果提起「大鼻子」歌手，女的一定會想起之前有提過的Diva兼影后Barbra Streisand，男的第一時間諗起必定是Barry Manilow。



想像到今時今日應該唔多人會再聽佢D歌，甚至連佢個名都未聽過……不過如果有聽開oldies的就不可能沒聽過他的經典歌，如果有買過Favourites In Originals之類的精選碟唔知會唔會對他的名字有少少印象呢？



睇真D佢個樣可能會有少少印象，係咪記返起以前睇《周末任你點》有睇過佢的MV？喱張演唱會2VCD其實歷史都唔算太耐，是輯錄自2000年的Nashville演唱會，當中唱了不少他80-90's的代表作，如果要重溫返佢的live演出，這張影碟會是不錯的選擇。



除了有得睇仲有得聽，上面這張發行於1994年10月的《Manilow Greatest Hits: The Platinum Collection》也是不二之選，幾乎當年hit過的歌都收錄在內，基爾最喜歡的是數年前Westlife也翻唱過的Mandy。



總覺得Barry Manilow的代表作很有點殿堂式grand味道，例如Can't Smile Without You、I Write the Songs、Somewhere in the Night、Weekend in New England等等，都是最吸引fans一聽再聽的招牌式大路情歌，而且都好適合在Royal Albert Hall又或者舊日利舞台之類的theatre演唱。當然他也唱過唔少流行味十足的Bossa Nova，除了Hey Mambo、Bermuda Triangle之外，基爾還記得當年隔籬屋鄰居每逢暑假炎炎夏日之際，必然會扭大唱機volume播起Copacabana。

同心泰國菜館@九龍城

已忘記上次來九龍城是什麼時候了，印象較深刻依然係：細個時隨基爾媽來逛成衣出口店又或者去街市買菜；每分鐘會見到巨型鐵鳥從唐樓頂夾縫快速掠過的奇景，還傳來震耳的尖刺嘈音……

今時今日九龍城當然不可能再有鐵鳥低飛掠過，甚至成衣店好像也消失了，只剩老唐樓依舊靜靜佇立行人不多的街上（咩事突然咁文藝）……間唔中有一兩幢新式的摩天豪宅在唐樓夾縫間拔地而起，新舊對比顯得有點突兀，難度是時空錯配了的「飛來峰」？



在唐樓老街中穿梭有點迷惘，幸好有手機地圖幫助終於找對了方向，不能不承認先進科技始終帶來了方便，時代巨輪新舊交替似乎是不可能逆轉的規律吧！原來預約好聚腳的泰菜館就在原先行人隧道出口附近，足足繞了一整個大圈，真是眾裏尋它千百度……



其實如果早知係賣潮洲禮餅老店隔籬（這是一個非常關鍵又具地標性的hint），就唔駛浪費了一刻鐘有多的腳骨力去兜兜轉轉到處亂晃。Anyway，喱日主角唔係基爾，點餐重任全交主角主理，睇menu大部份係$40-80都幾抵食喎！比較特別係點河粉可向侍應要個調味架，裏面有辣椒粉、辣椒油和炸蒜茸等幾樣味料，重口味者可自行酌量加料！



由於人數唔多只點了數樣，基爾第一次來幫襯都唔知有乜特色菜，不過見附近食客唔少都有點湯河檬粉之類。上圖喱兩個係泰式鴨肉湯河和泰式海南雞飯，味道都算唔差，份量也很足。



另外上面喱個泰式滷豬手都幾有特色幾入味，肉質比較林和嫩，有點入口即溶的感覺，同中式燒味檔的豬手燻蹄不一樣。不過基爾對肥東西始終有點戒心，都係淺嘗即可……



食飽飽立即出去附近行多一陣消耗一下，反正很久沒來過九龍城，發現老街一帶依然仲有唔少老牌食店和麵包店，間中還見到一些很新派的蛋糕店，反而九龍城廣場看來沒什麼特別店舖好行。



結果亂蕩一遍又蕩到來寨城公園，記得初初開幕時基爾都曾經來逛過數次，這次舊地重遊感覺依然閒適，大樹林蔭中式亭園佈局清幽雅緻。雖然這日來到時天氣仍未算太熱，但已見不少街坊來乘涼散步，大都市裏有這樣一片綠洲確實不錯！

同心泰國菜館 Ruamjai Thai Restaurant
九龍城打鼓嶺道5號

中大天空之鏡@馬料水

沿湖行完一圈之後，當然未有咁快就走人，這次來不是要找天空之鏡嗎？快快趣趣行返去校巴站等車，因為都幾多人在等車上山。

如果唔想等校巴其實也可以沿那條行山徑上山，當是行山也未嘗不可。若計車程也不過10分鐘左右，就可來到山頂的新亞。



基爾鏡頭下的這個CU天空之鏡也不太差吧！幸好復活節這幾日長假的天色不錯，才拍出了點點神韻，不枉此行了！這裏與山下湖邊同樣有很多畢業生來拍照，要耐心輪住排隊影相。



這裏其實也有個別具詩意的名字，叫做「天人合一」。由懸崖邊望出去仲可以盡覽山下科學園一帶的豪宅級靚景，吐露港無敵270度靚景也一覽無遺，遠處藍天白雲下的八仙嶺和船灣大壩都清晰可賞。



照完鏡之後就行返入去知行樓那邊，看到上圖喱幾棵有白色小圍欄圍住的樹仔，有冇發現有乜特別呢？唔講可能無人會認得出，這幾株幼幼的小樹苗就係CU很有名氣的櫻花樹。



平時去開日本賞櫻的人，很多時都係只觀其花不見其葉，因為要待花瓣落盡之後才會慢慢重新長出嫩葉迎接夏天到來。基爾都係第一次留意到櫻花樹的葉原來都幾大片幾綠悠悠的。



大約農曆新年前後，本來基爾都有意來這裏賞櫻，可惜一直無法抽空來看，遲成個幾月才來當然乜野櫻花碎都不會看到，卻發現樹旁圍封了一圈紅白膠帶，可能係因為之前來賞櫻影櫻的人潮實在太多又太肉緊，校方恐怕傷害了脆弱的櫻花樹和草地所以就用膠帶圍封了。



若連同CU新亞這裏的櫻花園計，基爾總算也去過3處HK的賞櫻熱點（另外兩處是較多人熟悉的長洲關公亭和大帽山扶輪公園），只餘下嘉道理未去過，明年真要好好計劃一下賞櫻路線圖了。上圖不用多介紹也知是中大很有名的百萬大道。



可能因為長假期關係，大部份學生都返晒屋企，百萬大道上都變得冷冷清清無乜人，間中只見幾個來拍照的畢業生家庭，像基爾這類專程來hea蕩的無聊人也不多見。



沿山路隨意往下山方向走，又路經了上圖這個中草藥園。翻查資料才知原來CU總共有3個中藥園，分別在崇基、新亞和聯合。



中藥園佔地約2萬平方呎，由中醫學院管理，園裏原來種了多達500幾種中草藥作科研和教學用途，有好多都係熟悉的名字，例如上圖的紅葉鐵樹、車前草和龍利葉。



一直行到2:30pm見有點餓，本來諗住快快落山搭火車返沙田醫肚，不過行行下又見到喱間茶樓，在大門口問過侍應假日可招待外賓（weekdays只招待教職員及學生），唔駛諗一於試下啦！非會員只係$8一位茶，大中小點分別係$19、$16和$14，以假日來說不算貴，結果叫了珍珠雞、粉果、叉燒包、蘿蔔糕和蜆蚧鯪魚球，每樣都熱辣辣真不錯，很有點驚喜！加上侍應阿姐招呼也好好，基爾覺得水準比外面的連鎖式茶樓好得多，有空可以再來encore。



為免唔記得這間樂雅軒在CU半山什麼地方，特別拍下茶樓對面這間教堂作記認。唔來真係唔知原來中大校園範圍裏竟然還有間咁大的教堂，沿路落山時還不斷聽到教堂傳來的鐘聲，難道有人在行婚禮？



來到這條築有紅色欄杆的「順利橋」，即表示又重新回到山腳的崇基了。橋邊仲有一處清幽雅緻的小瀑布，增添了不少點郊遊味道。突然記起以前HKU也有座「勁過門」，與CU這座「順利橋」也可以說是絕配吧！

中大荷花之湖@馬料水

復活長假期連續4日都甚好天氣，睇新聞話幾萬人排長龍搭船湧入長洲郊遊，搞到逼人過旺角。基爾向來有「人多恐懼症」，最終決定靜靜地又近近地去大學校園輕鬆走一轉。

好耐無來CU，原來依家都幾犀利喎，在火車站出口已有這個「樂步行」地圖，證明除了學生之外，都好歡迎基爾喱類無聊外人來閒逛hea蕩……



之前都唔太覺得喱個擺在校門前的女神像咁搶眼，今日點解一來到就見到佢？哦……可能因為佢下身披了幅非常colourful的彩虹旗吧！探完女神後，先去走走崇基湖邊，橫亙湖上的九曲橋是必然的「到此一遊」景點。



真係唔知原來喱度湖畔一帶都有唔少水鳥棲息，突然覺得好似去了米埔睇雀一樣，勝在全天然沒有鳥籠阻隔，當然睇唔睇到就要靠少少運氣了。



果然有人專程來set晒腳架影雀，依家其實好多人多擠逼地方已經唔畀人set腳架和用自拍棍了。上圖右是花園外的石碑，令人想起了心經簡林。



恬靜的湖邊特別有悠閒的放假feel，如果年頭來這裏可能會比較墟陷，因為是賞楓香樹和落羽松紅葉的旺季，CU這裏的落羽松比青衣公園的更多更壯觀。



玩開有癮，又來做個全景照質素小測試，圖上是相機本身的全景mode，基爾有點失手看來是偏光了，下次嘗試將曝光值調校到負多一點。圖下是PS merge的接駁效果，同相機全景mode一樣無縫連接而且色調更靚，科技真係犀利。



再看另一張湖邊靚景全景照，無瑕連接確實係鬼斧神工天衣無縫，基本上光暗和色調都很一致，中央的接合點也找不到破綻。



來到湖中心的獅子亭，紅色樑柱和綠瓦圓形蓋頂是典型的中國風，與九曲橋和拱橋相映成趣，遠看很有點「小天壇」味道（給多一點想像力）。



獅子亭顧名思義就是由獅子會捐錢建造的，亭邊還有個養德池，聽聞以前真係有在這裏養duck，不過後來因為禽流感盛行就沒再養了，現時湖裏仍見養了不少鯉魚。



中大的荷花池向來很有名，1997年大裝修後改了個很有詩意的名字Lake Ad Excellentiam（未圓湖），廣闊的湖面最適合用來測試panorama。



喱日假日都有唔少一家大細帶埋露營帳幕來picnic，真有點誇張呢！另外仲有好多著晒袍帶晒四方帽與父母一起來影紀念相的畢業生，場面夠晒溫馨……

賞味@青衣權發酒家

繼賞花和賞霧之後，今次這個長篇的「青衣三部曲」來到Part 3，不可或缺的當然就是賞味了。

離開行山徑後搭車返青衣城會合餘下部眾，本來諗住近近地在青衣城覓食，不過可能周末關係都幾多人，大約6:00pm來到稻香竟然話要7:30pm食完埋單交枱，基爾當然睬佢都傻，一於轉戰去灝景灣那邊的權發。



印象中基爾年前都有幫襯過權發位於筲箕灣和北角的老店，依家才知原來青衣也有分店，而且店面裝修比港島兩間老店新淨光猛得多又大得多，不過菜式依然係傳統風味十足，更重要係價錢依然實惠抵食！



簡單睇睇menu，已經立即畀上圖喱個「必食孖寶」吸引，上湯焗波士頓龍蝦1隻（送伊麵底）加上金牌蒜香雞半隻只係HKD$248，此外仲可以揀清蒸龍躉仔或燒鵝皇。



之前食過權發的老店，早知佢每樣菜式都非常均真份量十足不會將貨就價，所以午市經常吸引唔少從事體力勞動的地盤或搬運工人幫襯，基爾之前lunch見識過佢D大大碟叉雞碟頭飯真係要有少少毅力才食得晒！上面喱味龍蝦伊麵有齊兩隻大蝦鉗和龍蝦身，果真是童叟無欺。



除了足料之外，味道其實也不俗，傳統菜式都合乎水準。例如上圖喱幾味都係掛住食差不多食剩三分一才記得影相，西蘭花炒澳洲鮮帶子（$168）碟上估計有十餘個帶子；金銀蛋浸時蔬（$76）可以選菠菜底；右圖的菠蘿生炒骨（$75）是參考過鄰桌食客的sample覺得不錯於是又叫。



至於上面這碟椒鹽鮮魷（$78）同樣係大大碟XXL份量，一上桌已經有點令人擔心會食唔晒。幸好最後沒有叫到椒鹽豆腐，否則一定勁熱氣，要飲返幾jar竹蔗水酸梅湯先掂！



如果喜歡打邊爐的話，同場其實仲有$148邊爐任食，若是天寒地凍季節也是不錯的選擇。喱餐食咁多野最後埋單計人均才$150（晚飯免茶芥，需加一），同邊爐任食價錢差不多。總括而言，這間權發少了麻甩味卻依舊經濟實惠，值得來take two。

權發海鮮酒家 Kuen Fat Restaurant
青衣牙鷹洲街8號灝景灣商業大廈4樓