周末日常之私房蘿蔔糕

數數手指話咁快又來到11月，好似好耐無郁下個blog，剛剛上周末整了底蘿蔔糕，算唔算叫做有少少新鮮野寫下？

平時真係好少喱個11月深秋初冬季節來整蘿蔔糕，通常多數都係臨近農曆新年才會整吧！不過近排行街市見白蘿蔔真係好鬼平喎，咁基爾又做下二廚幫手刨下蘿蔔絲整底糕先啦！



用慣份量一般都係3支白蘿蔔大根約重5至6斤左右，今次只係賣9蚊雞係咪平到笑……咁順手再買埋粘米粉又係10蚊有找，三象牌粘米粉600克裝一般只用半包就夠，可以留返半包下次整。

p.s.由於整蘿蔔糕印象中已寫過兩三次，具體詳細steps就無謂囉唆長氣再講了（有興趣睇可自動波click返去蒸蘿蔔糕網誌）。不過今次有少少唔同係無落蝦乾，改用了小元貝，如用小元貝就要先浸林再用廚剪仔細剪成粉蓉狀，食果陣就唔駛驚太攝牙，算是基爾少少秘技吧！

歲晚煎堆之蘿蔔糕

話咁快又就來到送猴迎雞的農曆新年了，係時候每個周末放假都要抽時間逐少逐少大掃除（驚留到年廿八先一次過做會勁辛苦）。其餘時間就做D過年必備人有我有的手作仔，整蘿蔔糕就是當中的首要重任。

翻查大典，其實幾年前基爾早已寫過整蘿蔔糕的網誌（仲好有心機好詳細咁寫晒每個步驟，真佩服自己），所以今次都唔再逐個step寫咁煩了，有興趣翻看跟住整可click入舊網誌「蒸蘿蔔糕」。



不過如果完全唔寫齋post相片又好似唔係幾好，咁都簡單寫少少當作caption。按照慣例（基爾媽秘傳口述食譜），做一底糕約莫都係用3支大白蘿蔔（重約6斤左右），通常用上面這款三象牌的粘米粉較好，一整包600克，約用三分之二包已足夠蒸一底糕有餘。



照辦煮碗依舊先將白蘿蔔刨成絲再蒸熟，另外再炒熟蝦米臘腸小元貝和蔥花作餡料（更傳統的會加埋臘肉乾瑤柱等）。基爾媽口述秘訣係粘米粉混入蘿蔔時要分段逐少咁加，搞勻循才再加粉和餡料，務求不會結成粉團。



最後同底糕扮靚少少，預留返少量餡料鋪在糕面就大功告成，係咪好有專業水準呢！之後再拎去隔水蒸大約1粒鐘已OK。其實平時去飲茶時，基爾都間中會叫蘿蔔糕食（因為平時懶整，只有新年才會的起心肝去整），不過總覺得茶樓食果D唔太好食……



一來可能因為自己整始終比較真材實料，二來落雞粉和鹽、胡椒粉調味可按個人喜好完全是tailor-made，一定無得輸！幾乎忘了告訴大家，基爾其實係典型的「蘿蔔糕控」，飯唔識煮都唔緊要最緊要學識整蘿蔔糕，即使過年前後每朝早食蘿蔔糕做早餐都不會食厭，可配碗粥、磨菇海鮮湯咸麥皮，甚或來一杯鐵觀音清茶，對基爾來說已勝過任何珍饈百味了。

煎魚肉蓮藕餅

某個周末晚上閒來看電視正在播《神廚遇上女主播》，這集是由高師傅教新聞主播曾美華煎蓮藕餅，望落雖然工序多但應該handle到，於是向基爾媽申請重開親子P牌型廚教室！

睇完個電視節目，其實心中已有個譜，加上有基爾媽傍住應問題不大吧……先去街市買來一小截蓮藕，揀蓮藕都有學問，基爾媽傳授秘訣係長身係較爽用來炒菜較佳，圓身的較易煮林多數用來燜或煲湯云云；魚肉就去魚檔買$10-15蚊已經好夠食。



平時喱個刨一年都只係會用兩三次，而且多數用來刨蘿蔔絲整蘿蔔糕（整蘿蔔糕請click：蒸蘿蔔糕 ），喱次第一次拎來刨蓮藕絲，不過方法同刨蘿蔔絲會有些少分別，蒸蘿蔔糕的絲要刨得較長身，整蓮藕餅的絲就要盡量短而細，接近蓮藕蓉狀會好食D。



其實高師傅在節目中係用蓮藕絲拌豬肉蒸肉餅，不過基爾覺得用魚肉會健康D無咁「三高」，所以就改了食譜。其實煮野食好多時都可以自由執生，下次又可以試試玩下煎芋頭餅，不過煎芋餅要多幾個steps，就係要先去皮切片和完全蒸熟蒸林晒個芋頭，才能與魚肉混成一體。



魚肉和蓮藕絲大約係half-half啦！口味因人而異，不過如果蓮藕絲太多可能會散吧！魚肉方面基爾媽提議可加上蔥花和切粒加瘦臘腸（節目中高師傅加了蔥花和蝦米粒冬菇粒，口味也是因人而異），基爾平時完全唔食蔥，但肉餅加少量蔥花可以接受。



幾乎忘了蓮藕絲拌魚肉之前仲有一個非…常…重…要的step，就係要先盡量搾乾蓮藕絲的水份，蓮藕絲若大多水份原來會令肉餅整出來不夠結實。蓮藕絲搾乾水後再與魚肉拌勻，其間可以加入少量雞粉、胡椒粉、麻油和豉油調味。



搞勻晒蓮藕絲和魚肉之後就可以落鑊煎了。用平底易潔鑊煎野可以用少D油，睇電視的高師傅因為手藝熟練就用唧魚蛋方式，基爾唔識控制咁就用搓湯丸方式啦！不過手上要先拍上粟粉以免魚肉黐手。



一個個大魚肉丸放在煎pan上之後再輕輕壓平成為肉餅狀，先煎熟煎香一面，才反轉煎另一邊。如果想煎薄D易熟D可以再用鑊剷壓平一點，不過基爾鍾意厚身D似burger的肉餅狀，食落覺得好味D。



由於還有一點魚肉剩下來，咁同場加映埋魚肉煎釀茄子吧！（整煎釀三寶請click：煎釀青椒矮瓜）可先將茄子斜切片狀，中間界幾刀挖個小凹位，再搽少少粟粉，魚肉釀上去會穩陣一點。



剩下的魚肉不太多，所以盡量塗薄薄的一層已足夠，煎的時候魚肉也無咁容易甩出來，會靚仔D！基爾慳家，挖出來的小粒茄子肉也可重新混入魚肉中搓勻再釀。



好喇唔講咁多馬上落鑊煎一煎，煎釀茄子時也有個小秘訣，就是要先煎熟釀了魚肉的一面，落鑊後先不要亂動……



等一會魚肉煎熟了穩陣了之後才再反轉煎熟另一面，咁樣魚肉同茄子就打風都打唔甩。



最後上碟當然要影下製成品玉照，基爾媽話鍾意煎釀茄子再與椰菜散花和甘筍煮，加蠔油生粉水煮成獻汁上碟即可，當然若直接上碟基爾也覺得完全沒問題。



至於魚肉蓮藕餅也煎得相當靚仔，平時一向「謙厚」的基爾咬一啖試味發現確實係…極…度…好…味呀（全力開動自吹自擂mode），很喜歡軟軟的魚餅又有爽爽的藕絲口感，幾乎要好似味皇和食神中的家燕姐咁要睡在藕餅上面轆幾轆不斷翻滾！聽高師傅話整蓮藕餅其實食材用料不貴，但由於工序繁多（是幾花心機的傳統菜式），依家好多食肆都已經不再整了，即使menu有提供都會賣得好貴，一碟只6-7塊已經要成$60-70蚊云云，今次基爾仲唔發大達！

白汁海鮮磨菇燴意粉

搬了blog之後，好似一路都無乜再寫過煮食blog，之前突然有人問起，咁又求其整D來寫下沖撐一陣場面吧！

整完影完食埋再準備上blog前，先醒起不如翻查下以前寫過的煮食野，才發現原來一早已經寫過了「白汁海鮮磨菇燴螺絲粉」，反正無乜人會記得，照寫可也！



由於煮法大同小異，有興趣睇steps可click返入「螺絲粉」，這裏就不重覆了！值的一提係依家買大罐裝Campbell's soup比較抵，一罐可分兩次煮（另一半可煮海鮮豆腐湯）。另外，Barilla意粉也可一提，這款是購自價真棧，兩人份量可以煮三四餐都夠食，一盒有折$10有找，去邊度搵？



為免太「行貨」同場再加映「煲洛神花」，話說洛神花又到了一年一度當造季節，街市見到有得賣就買來煲下。洛神花基本上有乾貨和濕貨兩種，如買濕貨要先挖走花芯才落水煲，大約煲4-5個字即可，再落幾粒冰糖調味即可，熱飲凍飲皆宜，凍飲很有點似利賓納味道（色澤也似），酸酸地非常開胃消滯又怡神，仲有降膽固醇作用！



p.s.除了煲洛神花外，順便又搭單講埋上面喱隻幾好味道的生果乳酪，之前在價真棧買開係$15（最近一次買就加價了$1），真係平到有少少驚，一來怕唔知用乜食材做，二來又唔知係咪來自大陸……



不過睇真D包裝上有幾種歐洲語文，樓下有blog友話係來自東歐的拉脫維亞出品，加上食落又似無乜大礙而且味道亦幾natural，總共有車厘子、士多啤梨和蜜桃三種口味，每款yogurt裏面都食得出有粒粒果肉，基爾個人覺得桃味最正，而且佢聲稱只有0.1%fat，食多幾杯都唔怕有罪咎感吧！

芝麻湯丸

「過年三部曲」郁完個口同對腳之後，都係時候要郁郁手……好似好耐無煮野，就揀樣簡簡單單的玩下。相信好多人都會在冬至或新年搓下湯丸，依幾日天寒地凍食返碗暖笠笠的湯丸，確實係幾正的！

搓湯丸太容易，相信好多人都識架喇！所以都唔詳細講steps，大家睇相自自然然就一定領悟到。唔講咁多即刻開波！

Step 1﹕湯丸主要由糯米粉搓成，先倒粉在盤中，再分段加水搓成粉團一舊。
Step 2﹕由於基爾最鍾意食芝麻湯丸，所以一早就準備好磨成粉的黑芝麻，只需加少少砂糖同黑芝麻粉撈埋就搞掂。
Step 3﹕搣一小團麵粉，先搓成小圓餅狀，再加入黑芝麻糖粉做餡。



平時嫌麻煩，可能通常只會求其在P記或W記超市買利川就算數，反正人少又唔食得多，都係要等大時大節先肯花時間搞一大餐。不過整完後立即就發現私房製的比街買的無咁甜，因為可以自己控制糖的份量，健康得來又合口味，正！

Step 4﹕仔細包好黑芝麻糖粉後，再搓圓佢，成為乒乓波狀。
Step 5﹕煲定一煲糖水，份量以浸過所有湯丸為宜，糖水以一塊片糖煮成。
Step 6﹕最後滾起一陣就食得啦。



黑芝麻湯丸是基爾的至愛，今次只集中搓喱種餡，食時一咬開就成口感受到黑芝麻醬爆的香口刺激感；另外若鍾意食花生餡，也可加入花生醬；之前也包過最古典的片糖餡一粒，同埋最前衛的朱古力，味道同樣非常唔錯！同場加送一條燒肉，佢其實同湯丸完全無關，只不過同樣係做節常客而已。問基爾媽喱條燒肉駛唔駛$40，點知即刻就畀人鬧「十八歲仔唔知米價」！喱條肉竟然要成八十幾九十蚊，犀利！！！依家D錢真唔見駛，都係學多幾味撚手菜傍下身為上了……

咖喱薯仔燜雞翼

咖喱係基爾其中一味不時會煮下的菜式，主要原因係味道比較容易控制，唔容易會煮得太難食。比較常用的食材係燜薯仔、紅蘿蔔和雞翼，唔講咁多快快手手開工，咪又畀人話長氣！

落鑊煮之前，當然要先搞掂D材料先。薯仔批走D皮之後砌成一塊塊，如果加埋紅蘿蔔一齊燜的話，也同樣先批皮再砌塊。由於加入紅蘿蔔煮咖喱的味道較濃，與薯仔同雞翼一齊煮會幾夾幾好味，不過今次唔記得左買。Anyway，都照煮啦！煮之前當然仲要先用少少鹽、糖、豉油（或鮮露）、胡椒粉等稍稍醃一醃D雞翼先。

Step 1﹕先落少少油再將醃好的雞翼落鑊稍為煎香表面，毋須完全煮透就可先撈起用碟裝好備用。
Step 2﹕將砌好的薯仔倒進鑊中，再加入咖喱糕慢火煮溶，再加入雞翼返兜，讓雞翼沾上咖喱汁再撈起。



Step 3﹕將一湯碗水倒入鑊中，蓋上鑊蓋繼續燜薯仔。
Step 4﹕約15分鐘後稍見收水，再將雞翼回鑊，與薯仔一燜至熟透。
Step 5﹕再過10多分鐘後見咖喱汁已漸趨濃縮收乾少少，就可以熄火上碟了。



為免燜薯仔雞翼時會黐鑊有燒焦味，所以燜的途中最好留在廚房「罰企」睇火，不時要揭開鑊蓋炒兩下以防黐底，咁就very good喇！值得一提的是，近年基爾比較鍾意用喱種日式咖喱糕，一來味道唔太辛辣，而且咖喱味較一般的咖喱粉濃一點，色素也比較少，食得更加安心健康！

蜂蜜楊枝甘蜜

近日秋意漸濃風高物燥，濕度經常跌破50%，成日感到喉乾鼻涸之餘仲好似有少少喉嚨痛！拿拿林走去沖返杯蜜糖黎飲下，真係當堂成個人都無咁dry。不過齋沖蜜糖飲又好似有D悶，要搞返少少新意先至夠情趣！

就整下喱個非常簡易又乾手淨腳的自家製「楊枝甘蜜」啦！材料其實都好簡單，只要有碌柚、西柚同埋honey就得。

Step 1﹕先將西柚及碌柚皮切開，再將裏面包住果肉的薄衣撕走。
Step 2﹕將果肉取出後小心地逐小搣開成一塊塊。
Step 3﹕將數塊果肉放入杯內篤爛至出汁。
Step 4﹕倒出小半杯蜜糖進杯內，再加入小量涼開水將蜜糖和果肉稍梢搞勻。
Step 5﹕最後倒入熱開水，楊枝甘蜜熱飲就完成了。

注意一定要先用涼開水開稀蜜糖搞勻果肉，才再加熱水，因為聽基爾媽話若直接在蜜糖上加熱水，會破壞了蜜糖的營養云云。姑勿論喱個「古方」孰真孰假，照跟就應該無失拖，始終是傳統中國人智慧吧！此外，如果平時怕酸怕苦澀唔敢食西柚碌柚的話，用喱D生果黎沖蜜糖，味道比單用檸檬更加夾，因為蜜糖可以中和西柚肉的酸味之餘，基爾覺得浸過蜜糖水的西柚肉和碌柚肉亦非常好食（若用檸檬就無乜果肉食了），潤得來又有很清新很fresh的感覺，秋冬時節飲就最適合不過。

白汁海鮮磨菇燴螺絲粉

由於學藝未精，之前整黎整去都係D簡單的甜品，貪佢容易整又唔花時間！不過為了向成為「港版JO」的目標進發，今次點都要試下正正經經去煮一味野先得。一係唔整，一整就要整鋪勁D！搞乜咁勁呢？咪就係下面喱味中西fusion菜囉！

話時話都係唔好bold到咁大以免大家失望！其實都一樣係D簡單野黎，名堂就係「白汁海鮮磨菇燴雜菜蟹柳芝士肉腸螺絲粉」，係就係長左D，不過都算幾襯基爾吧！所指的係喱度一向作風都興長篇大論架啦！唔講太多廢話即刻開工……其實材料都好簡單，我諗好多人屋企都會有，唔駛勞師動眾去買，包括﹕一大包螺絲粉、一包有齊紅蘿蔔粒粟米粒同青豆的雜菜、幾條蟹柳、芝士腸、大肉腸等等，加咩真係按個人口味喜好適隨尊便順手拈來就可以了，非常freestyle的創作！

Step 1﹕先解凍所有材料，紅蘿蔔粒粟米粒青豆雜菜可以先放入水內微微煮滾稍稍煮林一點就OK，可撈起備用。
Step 2﹕雪到硬繃繃的蟹柳芝士腸仔大肉腸之類的亦可先放入小水盆裏解凍，然後全部切成短度或粒狀。
Step 3﹕等緊材料解凍的時間也不是只矯埋雙手等運到，而係可以煮一煮D螺絲粉先，由於螺絲粉一般麵身比意粉、通粉或蜆殼粉果D較硬身，要煮大約15分鐘左右才會變林，煮好之後可以先隔水用碗裝好；蟹柳腸仔亦同樣可以先出出水再撈起隔水備用。



Step 4﹕搞掂左螺絲粉同材料之後就要拿拿林開始煮個白汁。基爾咁懶當然唔會咁神心慢慢走去調校個白汁啦，求其隨手就找來喱罐Campbell's的海鮮磨菇湯咪算囉，乾手淨腳又好味！
Step 5﹕平時煮這個海鮮磨菇湯時，份量大概係一罐湯漿加一罐水；不過今次煮喱個白汁當然就唔可以太稀，大約一罐湯漿只能加五分一罐水，否則煮到天光都未收乾水。
Step 6﹕由於添加的水份較少，所以要用筷子先將水同湯漿仔細攪勻，以免凝結成一舊舊粉就不好食了。



Step 7﹕好喇！最後埋尾段階都好簡單，就係將所有野撈埋一碟就大功告成！
Step 8﹕可以將白汁倒落一個細煲度，再將所有雜菜蟹柳芝士肉腸通通倒晒入去攪勻並煮至滾起，就可以淋落去螺絲粉度即刻食得。
Step 9﹕不過基爾通常會連螺絲粉一併倒進煲內，一來可以同白汁和配菜攪在一起加均勻；二來螺絲粉可以先吸收一點白汁，會更林身更好味道。



最後奉上基爾的「秘製新作」製成品﹕白汁海鮮磨菇燴雜菜蟹柳芝士肉腸螺絲粉！重點係所有配料要與螺絲粉融為一體，同時白汁要全部沾在螺絲粉身上，絕對不能汁還汁粉還粉，這樣才算合格！可能有blog友喱個時候會質疑﹕搞咁耐咪又係一碟白汁燴螺絲粉~~~Fu咩sion菜丫！~~~冇錯，大家有冇留意係碟邊仲有幾舊鼓油雞，係基爾媽臨時斬料加上去的，所以喱味菜式正確名稱係「白汁海鮮磨菇油雞燴雜菜蟹柳芝士肉腸螺絲粉」，問你服未！

椰汁大菜糕

翻查上一次講煮野食，到依家原來又隔左成好耐！生手再上陣，為防搞到廚房火燭，都係整D簡簡單單的為上策，以免失禮街坊。

記得細個時每逢七夕（七月初七），基爾媽都會整椰汁大菜糕畀基爾食，就如新年會整蘿蔔糕、角仔；端午節會包?；年尾做冬就會搓湯丸……不過今時今日七夕老實說已經沒有什麼節日氣氛，為免連整大菜糕喱味家傳甜品也會一同失傳，基爾就的起心肝在七夕節前向基爾媽偷師，實行為承傳中國傳統美食文化出一點棉力。~~~~~會否作得大左少少呢？！



其實整大菜糕比之前整的紅豆糕還要簡單，材料方面只需要半兩大菜、水、幾粒冰糖同埋一罐細裝椰漿就可以了。本來還可加一罐細裝花奶，不過基爾因為「年事漸高」，為了活耐一點，所以要食得健康一點，今次就專登「走奶」，看看味道會否差很遠。唔講太多廢話，拿拿林摺高衫袖開工先！



Step 1﹕用清水先浸一浸果塊大菜，令它變成軟身。「大菜」其實係乜野黎架呢？鍾意查根究底的基爾在網上查出，原來大菜係由海藻提煉出來的一種植物膠質原料，感覺上比較天然，至少比?喱健康一點，而且性質偏涼，最適合夏日炎炎三伏暑天時節作為消暑食材。
Step 2﹕以普通食飯碗量7至8碗清水倒進煲內，然後將已經浸軟的大菜趁凍水掉進煲內，連同幾粒冰糖一齊煮溶（也可用片糖，但整出來的糕身會呈深色一點）。
Step 3﹕當整煲大菜糖水滾起後，再倒入椰漿搞勻；滾起後就可以熄火。
Step 4﹕在室溫下稍稍攤涼，就要立即倒進盛器內，大菜椰漿糖水會迅速自動凝固成糕狀。
Step 5﹕完全攤涼凝固後，可鋪上保鮮紙放入雪櫃雪凍才食，更加好味。



整完後當然要試食同埋做少少賽後檢討。由於今次唔放花奶，大菜糕身較呈現晶瑩剔透狀，糕頂側明顯有一層薄薄的椰漿糕，食落爽脆清新，但就少了淡奶的香味和細滑感覺。記得細個時見基爾媽整大菜糕，在煮滾大菜椰漿糖水熄火之後，還會打上蛋花，做出來的大菜糕會有蛋絲花紋圖案，更加美觀，且有更綿密的口感，不會一咬即散，下次緊記要加返。總括而言尚算成功，不失為一道美味的消暑甜品~~~~~正！

海帶綠豆沙

上次整完紅豆糕意猶未盡，加上有blog友話想睇下我煲的綠豆沙，於是的起心肝去煲！其實都係D簡單野，絕對唔花時間，在大熱天時又可以清熱消暑，如果係睇波唔夠訓虛火上升的話，就最適合不過！

早前基爾捱左幾晚夜，即時虛火上升牙肉腫漲頸梗膊痛復發……拿拿林叫基爾媽煲綠豆沙先，當然仲要在旁偷偷師，過程其實都唔太複雜，材料也很簡單，包括有陳年陳皮數片，臭草一小紮，海帶一大塊……當然仲有主角綠豆半斤。



首先洗洗棵臭草先，再用水浸一浸D綠豆同陳皮，當然仲要洗下塊海帶。準備好晒材料之後，就將綠豆放入半煲水內，同時放入陳皮，再開火煲佢。緊記陳皮要凍水落，因為如果熱水落係會苦的。萬一開始煲時唔記得落的話，就索性唔好落了，雖然會無左陳皮的果香味道，但都好過成煲野苦晒丫！



當綠豆正在煲緊的時候，再黎搞下D海帶，由於海帶係好大幅的，所以浸過發大左之後，要用刀切成小條狀，咁就可以更易入口。臭草如果太大棵的話，也可以摘短少少，搞掂之後再全部掉入煲內，大火猛滾呀滾…… 用大火猛滾10分鐘左右，見佢有少少開始起沙，就可以先熄火。由於基爾向來係慳家之人，煤氣費咁鬼貴當然唔會全程用明火煲啦！所以若係煲綠豆沙紅豆沙一向都用真空煲來煲。大滾10分鐘之後立即將煲膽放入煲身內，佢自然就會慢慢滾4、5粒鐘。



其實除左慳煤氣之外，用真空煲仲有個好處就係因為用超慢熱力去煲，所以綠豆可以全部「開花」，起晒沙之餘更加綿滑，口感更佳。慢滾4、5個鐘之後，只要再用明火大滾一次，再加入兩三塊冰糖（也可加片糖），煮溶晒之後就大功告成。通常基爾都會煮稀少少，因為除左即刻熱食一碗之外，其餘仲會雪成冰凍綠豆沙，凍食通常會杰少少，但大熱天時更好味，若再食唔晒仲會雪成綠豆冰，超正！

椰汁紅豆糕

因為日日返工太忙碌（又可以話係懶的藉口），所以都有一排無煮野食。諗諗今次「久休復出」煮D咩畀大家睇下好呢？！好啦，就整下面喱樣好耐都無整過既野啦。

久疏廚房戰陣的基爾，其實今次都有少少緊張，但又無理由就咁煎隻荷包蛋畀大家睇咁欺場吧！諗起都好耐無整上面喱味野，不如就試下睇睇仲記唔記得點整先……無錯！嚴格上黎講今次唔係玩煮飯仔，而係整甜品——登登登凳！椰汁紅豆糕是也！

好喇，講完一輪無聊的開場白之後，點都要郁手架喇！整法其實都唔太複雜，首先當然係要去買定材料先，包括半斤紅豆、大裝椰漿一罐、大裝花奶一罐、栗粉一大盒，就係咁多野，有幾難唧（肥媽上身）！

Step 1﹕先用清水將紅豆烚熟，約10分鐘見佢開始林身即可，注意千其唔好煮太耐變成煲紅豆沙。烚熟後隔走水份，用大碗裝好攤凍備用，而烚紅豆的水也可另外用碗盛載備用。
Step 2﹕將椰漿及花奶全部倒在另一大碗內，再攪勻。
Step 3﹕將粟粉逐少逐少咁倒落去椰漿花奶裏，份量大約用半包，有心機的話就用個篩仔一路篩住D粟粉落，再用筷子一路攪勻佢，避免佢凝固成一舊舊粉團。



耐心咁攪勻喱碗椰漿花奶粟粉水，見佢呈白膠漿狀之後就OK。然後就要分身去煲定一煲糖水。

Step 4﹕糖水的份量大約係7碗飯碗的清水，加一碗白砂糖，驚肥的可以酌量減少少（淡奶也可選用植脂果隻），水微滾後再倒糖入水內，攪勻。
Step 5﹕糖溶化後，再將之前攪好的「白膠漿」椰漿花奶栗粉水倒入糖水內，倒的時候可以再用個篩仔篩多一次，以防還有未攪勻的粉團在內。
Step 6﹕見「白膠漿」微滾，然後才落已烚林的紅豆，落完紅豆後要再慢慢攪一攪成煲野，以防紅豆黐底會燒焦。全程毋須蓋上煲蓋。
Step 7﹕好喇，為免底糕太白雪雪令賣相唔係咁靚仔，最後再酌量落返少少先前烚紅豆的水，令「白膠漿」呈現微紅色。



經過上面7個steps之後，基本上已經完成，然後就要快手快腳「上碟」。基本上可以用返上次做蘿蔔糕時用的大盤子，將微微杰杰地的紅豆糕漿倒入去。由於在室溫之下，紅豆糕漿會迅速凝固成糕狀，所以手腳要盡量快。將紅豆糕攤涼之後可以用保鮮紙包好，再放入雪櫃普通格內雪凍即可。食的時間可以先將盤狀的紅豆糕切成一個個立方體，咁就very good喇！

基爾媽賽後評語﹕全個過程中，攪栗粉的步驟最重要，基爾又要攪又要掛住影相雞手鴨腳咁，所以攪得唔算太勻均，不過好彩有個篩隔一隔D粉漿補救返；另外最後倒紅豆水的份量唔多足夠，所以糕身白雪雪左D，唔太靚仔，下次可以再倒多少少紅豆水令佢呈現紅一點顏色。

p.s.煮野其實同做其他野一樣，都唔可以懶，真係工多先至可以藝熟，又上了寶貴的一課！

蒸蘿蔔糕

新年期間都幾忙，所以到依家先寫好喱篇跟基爾媽學整蘿蔔糕，希望唔會太遲啦！基爾向來都唔鍾意食荼樓的蘿蔔糕，因為總覺得好難食，成舊粉咁，失敗！蘿蔔絲又少，仲失敗！件糕一夾就散，簡直係失敗之中的失敗！所以，都係私房製作的好味D，依家就黎講畀大家知究竟點整！

首先，準備的材料其實不太多，不過蘿蔔同粘米粉的份量要有一定比例，這次在街市買了3大條白蘿蔔，大約共6斤左右。返到屋企先用個這個刨仔刨乾淨晒D蘿蔔皮，非常方便又容易刨，以前要用刀仔去慢慢批，就慢D同埋辛苦D。批走蘿蔔皮之後，就用喱個有好多窿窿、好似一塊鐵片的刨去將大大條的蘿蔔刨成絲狀，刨時秘訣係要由上到下咁磨，刨出的蘿蔔絲越長就越好食。刨好蘿蔔絲之後，就放在一個大煲內，煮大約10至15分鐘，先煮熟少少D蘿蔔絲，令它變軟。



煮蘿蔔絲時唔係就咁橋埋雙手等，而係去準好糕裏面的涵料。最主要的涵料係蝦米同臘腸，記得細個時基爾媽仲會加埋臘肉的，不過基爾唔鍾意食太肥膩的肥豬肉，所以唔加，改為加少少瑤柱，但要記得先浸林佢。另外，雖然基爾唔食蔥，但為左底糕蒸出黎可以靚少少，都要加少少蔥花。切幼所以涵料後落鑊係咁倚加少少油炒煮佢就得！好喇，等到蘿蔔絲蒸熟，先倒出從蘿蔔蒸出來的蘿蔔水，用湯碗裝好備用，再在蘿蔔絲上加上大約4-5茶匙鹽，仲有4-5茶匙雞粉調下味，再要加多一點胡椒粉，然後同蘿蔔絲攪勻。之後再倒入粘米粉，6斤蘿蔔大約撈600克粘米粉，通常係一袋裝，超級市場有售。



倒粉時注意要續少續少加，攪勻再倒，不能心急，以免粘米粉會結埋一舊，此外也要不停補充之前倒出來的蘿蔔汁，攪起來也更容易及勻循。如果時間充足的話，也可以用個篩慢慢去篩住咁落粉。落粘米份的途中，同時要加上少少粟粉，蒸出來就更加滑溜好味。最後再加上涵料，緊記要留返少少，一會兒放在糕面上裝飾之用。將蘿蔔粘米粉同涵料等全部攪勻晒之後，準備好一個大盤子，加少少油搽一搽盤底及盤邊，再將攪好的蘿蔔粉漿團倒進盤內，用匙羹好似批蕩咁將粉漿團鋪平，之後再將剩下的涵料均勻沈在糕面，當堂係咪靚好多呢！最後將整個糕放落鑊，中火隔水蒸大約75分鐘就搞掂，完全無難度！



又到基爾媽試味及評分時間。本來個蘿蔔糕蒸好之後，基本上就可以即刻食，不過基爾鍾意切片再煎香，外脆內軟咁會更加好食！基爾媽表示大致上都算係合格架啦，不過可以再鹹少少！我心諗﹕唔好食咁鹹啦基爾媽，無益呀！依家咁樣清清地咪幾好囉！好食又健康，係咪？！