跟住雷神過大海@何東圖書館

仲夏8月伊始，這個過大海網誌系列迆下迆下又終於寫到來「最終回」了！每次寫旅程的終章總有一份莫名的興奮感（就好似完成了一項龐大工程一樣），唔知有冇人會有同感呢？

上一回講到償了心願吃了豆腐花之後，飽飽的基爾繼續沿住果欄街四圍行多陣，路邊又見到這間梳打埠懷舊店，「梳打埠」這個店名本身已很有古典味，裏面又有好多陳年舊物睇，有些鐵皮玩具還似曾相識……



無聊間又閒蕩返去大馬路近議事亭果邊，本來都係諗住食埋dinner先搭夜船走，不過之前又食粥又食麵又食豆腐花都還未落晒格，5點幾鐘又半能亢咁好多食肆仲未正式有晚市，本來想食埋營地大街果間鳳城珠記水餃都因為尚飽而作罷了，就留返下次來才食吧！



咁飽又仲有咁多時間咁無聊，又有乜野好做呢？一於又行上去崗頂兜個圈先算！以前上到去崗頂總會見到劇院、教堂和上圖這幢古式古香的何東圖書館，但很多時都遇不到開門時間，只能在門外看看影張相打下卡就走，今次見佢竟然有開喎，咁一定要入去行下啦！



原來這幢建於1894年的豪華大宅仲保留了一個充滿南歐風情的小亭園，以圖書館來說算是很特別的設施，至少香港的圖書館應不會設有優雅的後花園畀人睇書吧！入面其實仲有分成新翼及舊翼大樓，沿玻璃樓梯走往新翼果陣頗有點穿越古今的奇幻感覺……



行完一輪圖書館吸收了唔少書卷氣息之後（其實係想去嘆陣冷氣），咁又沿斜巷行返落去營地大街果邊的食肆，見開始有少少餓意，唔駛揀就行入去食北京水餃！上圖店內一副「客似雲來」的招牌字畫下面好似有一行藍色字仔，係寫乜野呢？



行近D睇真，原來係記錄了舊年颱風天鴿吹襲澳門時的水浸水位高度，真係好勁喎！之後快快趣去叫野食先，叫了3樣包括有狗不理包子、韭菜水餃和白菜水餃，夾埋豬骨老火例湯埋單計都係一舊水有找，算唔算貴唔知，但因為太耐無食過北方餃子包點，感覺都算幾好食。



三爬兩撥食飽，又飛快趕返出去大馬路搭巴士出碼頭了，因乜事突然間又咁趕急呢？其實原本係買了9點幾的船飛可以慢慢hea返港，不過見7點半仲有班船返尖沙嘴，即管早點出碼頭博一博看看有冇位，可能閒日關係果然仲有位，咁就索性坐早一班船返歸啦！回程船上可能仲有少少雷神強勁的風尾威勢，隻船堅大浪堅拋，幸好基爾向來不太怕（只係最怕聽到人地嘔吐聲和搽藥油味），仲覺得好好玩好似玩海盜船那種離心力，堅爽！

北京水餃
澳門新馬路新填巷5號A

跟住雷神過大海@黃枝記

上回講到原本想去李康記食碗豆腐花，點知無奈地變了吃閉門羹，幸好古舊的十月初五都仲有唔少野睇，總算沒浪費了腳骨力。

沿街有唔少上圖這類兩三層高的老房子，相信大多都是前舖後居的老店，陳舊的屋頂瓦面除了有一綑綑不知從哪裏接駁到哪裏的電線外，就是石隙夾縫間生長出來的雜草野籐，與油麻地果欄那類百年老建築如出一轍。



沿街其實就長這樣，應該唔係咁多人好似基爾咁喜歡去行這類橫街窄巷吧！事實上這裏也不算是什麼逛街買手信的熱門地方，也不太覺有大陸拖篋大媽來這區買奶粉，卻有濃濃的地道民生百態。



一路漫無目的地行到街尾就見到屹立於街角處的黃枝記，雖然這間香港也有開分店（像義順牛奶），但基爾好像一次也沒幫襯過，反而來到澳門才有機會處子光顧。「無酒安能邀月飲，有錢最好食雲吞」……Menu上這副對聯又幾搞笑喎！



店裏比較特別係這幅「懷舊價目表」，幾十年前一碗細蓉（即細雲吞麵）原來只售3毫子，蠔油菜遠反而要5毫。蝦子撈麵要收1蚊，同大碗牛腩同價！有冇人知「孖水」係乜？



基爾其實都唔知，上網翻查先知係粗麵。來這店當然要試試著名的竹升麵，新鮮的蝦子撈麵還是第一次食，真係比普通蝦子麵香好多，雖然售價要成70幾蚊都值得一試！另外還叫了碗淨雲吞都要差不多50大元，再對比返「懷舊價目表」一睇，真係要慨嘆通漲猛於虎！



之前行過去李康記卻吃了閉門羹，心裏納悶始終想吃碗豆腐花作甜品才算圓滿。結果在街上無聊地行下行下，基爾又行到來這間榮記，咁一於去食返碗補數，雖然一碗凍豆腐花要收8蚊雞好似仲貴過香港，不過唔理咁多食左先算啦（返到屋企先食腐乳撈冷飯粥）！

黃枝記 Wong Chi Kei
新馬路十月初五街51號

榮記豆腐麵食 Sopa De Fitas Wing Kei

新馬路果欄街47號地下

跟住雷神過大海@盛記白粥

坐酒店shuttle出去外港碼頭果然係精明之選，免費之餘更重要係快好多，慳好多時間！

咁快出碼頭？未咁快返屋企住喎！由外港碼頭先行返去議事亭果邊食下野先啦！今次有熟人帶路，行地下停車場的「秘道」可以好方便咁直達葡京那邊，唔駛行地面要過咁多條馬路咁煩。



來到議事亭前地依舊係超級多遊人，基爾選擇轉往上行去民政總署隔籬果條小小的天通街，即時好似靜了50%。行橫街主要咪就係去食碗靚粥囉！



幾喜歡店裏這幅大大的懷舊素描壁畫，隱約感受到昔日街邊檔老字號的風情。以前無發泡膠碗的年代，有冇人記得係拎乜野去買粥呢？



店裏提供的粥類選擇其實不多，就只有白粥和皮蛋瘦肉粥，售價也不貴，介乎6至14蚊，視乎大碗還是細碗，反而配搭粥的食品選擇頗多，有腸粉炸兩炒麵蘿蔔糕芋頭糕咸肉粽魚蓉燒賣油炸鬼牛脷酥煎堆等，連笑口棗馬仔都有，上圖的一磚蘿蔔糕只售7蚊雞實惠抵食。



食飽飽之後的「指定動作」，當然又係四圍行陣街街消化下先啦！粥店喱邊附近又係有好多舊唐樓小街的老區風貌，唔知陋街窄巷之間會唔會仲有隱世食肆有待發掘呢？

盛記白粥 Sam Un Loja de Canja
澳門新馬路天通街14號雅緻大廈地下

跟住雷神過大海@路氹歷史館:下

唔嫌悶的話，就繼續跟基爾行埋路氹歷史館二樓的幾間展覽廳吧！

往二樓的樓梯鋪設了紅地氈，感覺係咪都幾grand，牆邊仲擺了一set古裝武俠片常見的中式古代兵器，即使諗起細個時玩的那種膠劍仔玩具！



二樓又有D石磨和農具睇，以前在香港的博物館好多時都有見過了，為慳時間所以都無再逐個去睇文字介紹，求其影下相就走。



雖則話滾水淥腳，不過上圖喱間房又幾靚幾值得駐足睇下喎！原來佢係原本海島市政廳的會議室，桌椅窗簾和牆上的掛飾都保留了上世紀的原貌，係咪好有殖民地色彩！



其實地下果陣仲有間房展示了海島市政廳地下室石結構遺址，地面鋪了強化玻璃可以透視睇到下面D舊石砌石板路面，不過因為間房太暗就無影到相了。上圖左是大門內的天后像。



歎夠冷氣就行返出官也街野少少手信野食先。不過這天有幾間老字號沒開門，晃記牛耳也賣晒，咁買肉切酥和蝦米卷啦（發覺貴了好多）！再過隔籬文記買埋紅豆餅和香蕉糕，特登唔買杏仁餅住因為想去其他店舖買。臨走時仲經過上圖喱間氹仔中葡學校。



拎住大包小包行返過去銀河果邊，慶幸唔算買太多野一次過可塞晒入背囊算數。來銀河主要係想搭返佢架shuttle出市區，一來慳返D錢，二來前一日坐過巴士勁兜路怕過鬼浪費時間！



咁既然一場來到銀河，順便都睇埋佢個大堂鑽石噴水池show先走啦！睇銀河個網頁介紹話，喱個係所謂「銀河十景」之一來的（唔好問其餘九樣係乜野），又真係幾巴閉咁喎！



大鄉里基爾都係第一次睇，又真係幾grand幾靚，中間果粒大鑽石升起果陣，四圍圍觀果D北方大媽大叔係咁閃閃光燈閃到眼花……



至於噴水池隔籬個賭場的門面design都幾靚喎，係咪有D似孔雀開屏feel？唔知同風水有冇關呢又？由於要趕住出返去大門外面等shuttle，所以就無謂入賭場混吉了，下次來先入去參觀吧！



等免費shuttle果條龍其實都幾鬼長，結果等了兩架巴士先上到。人多都要等除了因為唔駛錢之外，最主要仲係佢唔似得搭Transmac咁勁兜路，由銀河出去外港碼頭大約15分鐘已到了，真係直接好多兼慳時間好多喎！

跟住雷神過大海@路氹歷史館:上

尋日傍晚落了場大雨之後，好似真係變得天朗氣清了好多，把握時間第二朝好早就起身，正所謂「一日之計在於晨」，食返個靚靚早餐是常識吧！

對於酒店早餐本來沒抱太大期望（畢竟澳門街外美食選擇太多了），不過既然個package包埋都唔好蝕啦，即管先去食少少再留肚出去食過吧！點知落到去個G/F果間超大的餐廳一睇，咦佢個自助早餐原來一D都唔hea喎，而且仲幾grand幾多野食選擇添！



上面只係其中好少好少的一部份（掛住食就沒有碟碟影了），記憶中還有各式粥粉麵飯和中式點心，越南檬粉印度咖喱甚至日式的壽司魚生都有供應，感覺似lunch buffet多一點，西式也有很多唔同包類和蛋糕，仲有好多唔同味的芝士一次過試晒！食食下仲有侍應遞上杯香檳叫基爾試下喎（其實仲有幾輪分別擺低唔同果汁cocktail飲品試飲，所以非常唔得閒影相）！



結果因為實在有太多好野食和飲，不知不覺間就由七點半一路食到成十點鐘食埋幾球雪糕先肯走，唔駛講一定係飽到上頭殼頂啦（邊個話要留肚出去再食過）！後來睇返佢個價錢先知，原來喱個咁豐富的自助早餐原價都值成百幾蚊架喎，如果以食足3粒鐘計其實都幾抵食的（感覺賺了）。



晨早流流食到幾乎爆紐咁滯，緊接節目唔駛講一定係先去散陣步落一落格先（毫無懸念了吧）！一於由酒店近近地行出返去官也街買少少牛耳肉切酥蝦米卷先啦！行到去上圖喱個花園仔以前基爾都留唔少腳毛，咪就係天時暑熱個個滴住大汗排長龍去買豬扒包果度囉！依家完全唔同晒喎，唔見晒晒班龍的傳人……



飽成咁當然也不可能再質多個豬扒飽，繼續再無聊行陣街好過。好彩氹仔舊區喱邊仲有濃濃小城風味，求其四圍hea蕩下都幾有紓壓效果，最緊要係好似基爾咁揀閒日去是王道！



上次記得有經過喱間西式古董別墅模樣的大宅，但那時沒有開門，今次行過見佢有開喎，一於貢入去八一陣啦（其實係想去嘆陣冷氣）！睇睇佢正門外有個小小的招牌，原來這間是路氹歷史館。



如果有去過港島半山的甘棠第的話（現時已活化為孫中山紀念館），這間路氹歷史館就是類似的19-20世紀初歐式大宅了！



又來個參觀博物館學葡文，這幢歷史館的葡文名稱是Museu da Historia da Taipa e Coloane，睇返資料介紹話佢前身原來係始建於1920年的海島市政廳大樓，樓高兩層，佔地638平方米（依家如果計樓價一定億億聲）。上圖喱個古蹟模型唔駛多介紹，如果有去過Taipa官也街舊市區果邊就一定會去過這個大涼亭公園，以前佢原本是個小市集。



歷史館入面都有好多這類澳門的古蹟模型，例如上面喱間天后宮在氹仔同樣有很悠久歷史。另外，展廳入面仲有擺放一些昔日的農家漁家用品。



唔講唔知，原來氹仔以前仲有好多炮仗廠和造船廠，上圖可以見到其中一間展廳，仲有艘漁船的船骨吊在天花頂，望落係咪好壯觀；另外仲有龍船和出土的瓷器展出。

跟住雷神過大海@三元粥品

萬里長城長又長，都不及去澳門閒蕩夜街咁悠長！上次講到夜晚食飽飯之後，由雀仔園一直hea行到去大三巴，不過見大三巴可能太夜也關了燈所以都無影夜景相就走了，因為跟住仲有深宵特備節目安排嘛！

夜媽媽要影有氣氛的夜景相，上圖福隆新街這裏的陳年古老紅燈區街景自然是澳門的不二之選，事實上都幾多人專登揀夜晚才來這裏影相，一來固然因為昏黃街燈下特別有情調；二來當然係唔駛驚好似日間咁多北方大媽大叔熙來攘往咁吵耳擠擁啦！



記得以前街頭有間碗仔翅係好墟陷要排晒長龍好熱鬧，依家無晒條人龍看來就回復清靜好多！深夜來到其實好多店舖都閂晒門，不過齋行下條街都幾靚幾舒服的，最緊要係人少少樂得清閒一點。



還記得當天旅館的門牌……昏黃的街燈下看來又是另一電影場景，會否有興趣與無聊基爾沿路繼續走下去那半哩長街？



咦，乜行行下好似聽到有少少鼓聲？唔係喎好似係由肚裏面傳出來架喎！食飽飯行街又行了差不多成個鐘，又開始有點進食意欲了吧！剛好又行到來這間好老字號的三元粥店，一定要食返碗肉丸粥做宵夜先返酒店啦！



咁多年無食佢個肉丸粥今次終於可以舊味重溫一下，不過價錢三級跳真係貴了好多，要成三十幾蚊一碗（連隔離枱來自台灣花蓮的幾位大叔都話覺得幾貴），幸好依然好味道！



食飽粥之後驚太夜無巴士返酒店，都係時候搭車返歸了（p.s.巴士上又遇到大媽與大叔因為爭位落車而鬧交，雙方互有「問候」其實感覺都幾小學雞，在旁的人都在邊忍笑邊勸交）。好彩回程無乜塞車好快就返到去，酒店對面仲可以睇到夜晚亮了燈會變色的鐵塔，難得咁鬼夜仲有成大班北方大媽吱吱咋咋爭住同鐵塔影selfie添喎！咁基爾都襯下熱鬧快手影兩張，之後即閃啦！

三元粥品專家 Sam Un Loja de Canja
澳門新馬路褔隆下街44號地下

跟住雷神過大海@雀仔園

可能因為食左成個燒雞釀飯關係，感覺好似都幾飽，不太適宜即刻返酒店沖涼訓覺，一定要去散陣步先得，順便去夜遊一下澳門的舊街小巷……

由食肆行返出來已經見到這條恍如電影場景的樓梯街，在昏黃街燈下真的很有點戲劇味道，事實上又真係有人坐在樓梯級上閒聊隊啤吹水喎！



澳門夜晚的舊區小巷多野睇之餘，仲幾多街邊檔賣野食涼茶之類，如果晚餐未食夠亦可以順道買少少生果返酒店食，又或者再打個冷都得……



夜色中以喱座古色古香的Mercado Municipal雀仔園街市最搶眼，正門標示了建於1939年，原來是戰前的歷史建築，係咪同紅街市一樣咁大年紀？可惜夜晚早已收市關了門，睇唔到裏面係點樣。



繼續沿住條馬賽克石砌小路向前行，無耐就會見到葡萄牙總領事館同埋斜對面喱一欄西式古建築，上網check返先知原來依家活化了成為餐廳云云，荷蘭園這一帶有幾幢這類20世紀初的新古典主義風格歷史建築物，有些活化成為圖書館和歷史檔案館，也有些保留用作政府機構的辦公室。



之前搭巴士塞車又兜路真係怕怕，其實澳門勝在地方細細，好多時用雙腳行就最悠閒愜意，沿小街行下睇下影下開心過坐車，可以更貼地睇到D民生面貌。眨下眼基爾又行到來上圖右喱間似十足荒廢古老大宅的Teatro Capitol舊國華戲院，原來它比雀仔園街市還要古老，落成日期可追溯到1931年4月，成日想入去八卦下但夜媽媽貢入去唔知會唔會畀人老笠呢？



安全起見就在大門外裝下就算……再向前無聊閒蕩多一陣，原來不知不覺已經來到最熟悉的議事亭前地一帶了，轉角位又見到外貌建築似教堂的女媧廟。這一帶又熱鬧返因為沿街大多都係遊客手信店，成日好奇想問樓上那些舊樓係咪都仲有人住架呢？但大部份又唔見有人開燈咁喎！值得一提係仲見到上圖喱間歷史好悠久的大聲公涼茶舖，基爾好似上個世紀第一次來澳門果陣都有幫襯過，佢個舖位依家係咪應該都升值好幾千倍了吧！