珍郵庫@大運河

去年底預訂2016年郵票時已發現，今年上半年設計吸引的首日封實在不多，除了農曆年那套猴年郵票之外，一直到5月中才訂了這套「中國世界遺產系列之大運河」！

這個世遺系列之前已經出了4款，翻查大典網誌才記得對上一次是紅河哈尼梯田，至於今次這套則是大運河，唔知有冇人記得梁朝偉做虬髯客果套陳年電視劇《大運河》呢？之前好似有重播過……係咪吳啟華做隋煬帝？仲有劉青雲、黃日華、曾華倩和陳玉蓮，80年代卡士都幾強喎！



如果中學有讀過中史的話，講起隋朝一定有讀過咩係大運河，北自北京、南達杭州、西至長安連綿逾千公里共27段河道，是中世紀時代華北地區最重要的內陸運輸及灌溉網絡系統，不說不知原來到2014年才納入聯合國教科文組織的《世界遺產名錄》。



與上次實景拍攝的紅河哈尼梯田郵票設計不同，今次這套大運河採用了甚具中國韻味的水墨畫風格，展現大運河在冬雪中的秀美景致，郵票中的傳統中式三孔石拱橋是位於杭州的拱宸橋。其實早在yahoo年代如果有留意基爾網誌的資深blog友應該記得，幾年前基爾去上海世博時抽了幾日去了一趟杭州，還在烏鎮住宿一宵，流經烏鎮外圍就是其中一段古代的京杭大運河，有興趣不妨click返去睇睇！

中國世界遺產系列第五號︰大運河
發行日期：2016年5月10日

後現代阿伯生活之睇早場

自從上了游水班之後，似乎已養成了晨運伯伯的作息時間，即使唔駛上堂和返工的假期日子都變得早醒過雞啼。既然咁早起身，當然不會浪費了清新開朗的晨早空氣……除了真係去晨運跑步之外，去戲院睇場早場都係另一種不錯的「長者節目」吧！

之前舊同事送了兩張換票證過基爾，連平時早場特別平的幾十塊錢都慳埋，不過由於是較冷門的西片，唔係太多戲院有得做，上網check過最近的都要去到比較隔涉的圓方先有，無計啦反正係免費飛都一於去。



印象中好似無試過朝早8點幾已來到柯士甸站，平時相信喱個站都唔會多人（麵包店便利店都唔多間），周末清晨無乜人返工搭車就更加冷冷清清，基爾在圓方出口企了成分鐘影相都好似無乜人在身邊經過……



行出天橋外望依然係一整幅「大爛地」，高鐵西九總站工程正如火如荼，好似見到少少大樓站頂的波浪型設計。話時話將來西九這裏約直徑500米範圍內，已經分別有西鐵線柯士甸站、東涌機場線九龍站和高鐵總站共3個火車站，即使以國際大都會計，唔知係咪都已算是個「世界紀錄」呢？



可能由於要遷就高鐵站工程，由柯士甸站行去圓方果條臨時天橋依家又好似仲遠了，感覺像兜了個大弧圈。等到高鐵站起好後，希望條天橋由柯士甸站穿過高鐵站再接駁圓方會拉直返，唔駛浪費時間兜大圈。



幸好基爾預早出門，雖然行遠了路都仲有充裕時間，來到圓方才8:30am左右而已，當然商場裏大部份店舖都未開門。圓方出名通道設計像迷宮，轉來轉去好易蕩失路，都係先問問info counter已上班的那位美少女，找清方向不會再浪費時間亂搵。最後來到溜冰場就知道無行錯路，原來8點幾已經有成班學生在練ice hockey，真犀利！



戲院就在溜冰場樓上，今次來係睇《Race》和《The Dressmaker》，前者是講述美國跑手奧雲斯由窮小子到1936年柏林奧運奪金的傳記式電影；後者主要是想睇今年初問鼎過奧斯卡最佳女配角的琦溫絲莉（最後敗於丹麥女孩的Alicia Vikander），近年佢好似比較少演這類黑色輕喜劇。



兩套電影之中，基爾個人比較喜歡《華麗轉身》。可能由於《美國飛人》始終係比較平鋪直敘式的傳記電影，驚喜度始終較少，或許美國人看到奧雲斯在希特拉面前摘金的經典歷史場面重現會比較興奮吧！反觀《華麗轉身》中演時裝設計師的琦溫絲莉，困惑沉鬱得來有時又不期然有點笑料，令人很有驚喜，功不可沒的當然仲有那班澳洲村姑，穿上一身華麗晚裝catwalk去逛郵局和爬上屋頂換燈膽那一幕實在笑到人標眼淚……



另外值得一讚係兩套戲的場景設計，不論是《美國飛人》中的30年代美國紐約Time Square和俄亥俄小城老街，又或是《華麗轉身》中的50年代澳洲內陸小鎮風情，彷彿讓觀眾坐上了時光機回到過去一樣，荷李活的製作感覺上一點不會馬虎。突然想起昔日三色台吳昊甘國亮王天林製作的那些儂本多情、山水有相逢和香江花月夜，依家大台除了拍古裝和時裝劇之外，好似已經完全放棄了拍這類老香港背景的舊劇了，實在可惜……



講完套戲再講返上網check場次時其實都要左量右度，由於唔想長途跋涉去兩次圓方咁煩，要揀一日內同時有這兩套戲上映的日子之餘，兩套戲之間又唔可以相隔太遠以免呆等太無聊，終於揀到喱朝早分別有9:00am和11:30am場次，實在太perfect了（剛好中間有15分鐘break，足夠時間去個廁所仲可以去埋戲院對面間HMV打個白鴿轉）。不過成朝都身處暗室裏睇戲足足4個幾鐘頭，幾乎忘了外面世界的時間，差不多1:30pm完場後個肚都打晒鼓，就拿拿林搭車返家鄉因為約了基爾媽食個late lunch。



返到去商場喱間「大自然素食」其實都開張了成大半年，卻一直都無幫趁過，依家基爾要食清D都不妨一試。去到仲有個開心大發現，原來3:00pm之後大部份菜式都有半價優惠，即時覺得好抵食。除了上面喱個有成個足球咁大的咖喱羊腩雜菜農夫包之外，仲order了吉列田園素豬扒和原隻木瓜蟹籽沙律，吉豬咬落質感像真度極高，個醬汁尤其一流；木瓜沙律亦頗清新，作為甜品又不太甜，夠健康！



食農夫包都要講究技巧：最好沿住包邊一路轉圈剪下去，一路點咖喱汁食又唔駛怕D汁漏晒出來咁核突。個包其實都焗得幾香脆，有點似澳門豬扒包那種質感，咖喱汁料帶點椰香，另外包裏仲有青椒、椰菜、露筍、冬菇磨菇和素肉麵筋等幾種材料，總體而言算是相當豐富了，食完其實已飽了七成，埋單計連茶芥加一沒記錯約$110左右，下午茶時段果然有著數。



至於夜場方面仲有節目，之前聽聞舊同事與友合資開了間酒bar，基爾獲邀去參觀兼八卦一下，反正很久沒見就順道去傾下偈，幾個舊同事幾年間已先後離巢舊公司，彼此都有各自發展，閒來都好少再見面，聚舊其實都係update一下大家的近況吧！酒方面基爾向來唔太飲得（亦唔識飲），無謂牛趙牡丹浪費人地枝whisky，不過舊同事極力推介一種以中國二十四節氣命名的台灣啤酒，試了「夏至」和「穀雨」味道都頗特別，前者酒花香氣很清新，幾乎不帶甘苦味，還以為不是喝啤酒；後者飲落則帶有一點點烏龍茶的回甘，完全顛覆了以往飲啤酒的概念，連平時極少飲啤酒的基爾都破戒飲了幾啖！

後現代阿伯生活之夏水禮

一排無寫blog，感覺又似乎有點生疏了，咁又求其搵D野寫下……先將個時鐘回撥到年頭！

話說年頭body check了一次，睇report時醫生話基爾唔算太靚仔喎（指個報告），有幾樣指數接近臨界點，問基爾係咪平時食太多好野（冤枉呀邊有呀）！咁要開始注意多點飲食啦，少鹽少甜少油更嚴格執行，減少出街食自己帶飯，此外醫生仲提意重點要加強多D運動……



平時除了「間中」有落街慢跑半個鐘（約3-5k）又或者放假去踩單車之外，夏天來到最佳運動都莫過於去浸下水吧！不過如果唔計以前中學P.E.堂學過幾下蛙式之外，基爾基本上係唔算識游水，總覺得要學懂自由式先叫識游水吧！



3月時上網book了游水班後，幸運地抽中於5月頭開課。由於要遷就返工時間，唯一選擇就係最早的7:00-8:00am，初頭都有點擔心唔知醒，不過盡量調校生活作息早睡早起習慣之後又ok喎，就當係提早預演老人家去晨運的退休生活吧！



晨咁早去上游水堂，其實一早預了同班同學都多數係退休uncle和auntie了（後生仔女應該都無乜邊個似基爾咁傻咁有恆心），而且好多都已經游得唔錯，游一個塘又在池邊吹水然後再游，落堂後有D就去飲茶，退休生活真愜意啊！



值得一提係頭幾堂基爾怕遲到，咁就搭港鐵或者小巴去上堂啦！不過要花時間等車之餘，又要穿過商場和Central Park先行到去（泳池在公園內），步行都要花十分八分鐘，後來就索性踩單車去，又增加了運動量，今次仲唔fit到爆？

p.s.順帶一提，基爾平時食開果隻Quaker原片大燕麥，之前聽到有外國新聞話畀人告，因為收割時落了除草劑而鬧上法庭云云（份量話係好低仍合乎安全標準）。後來行過價真棧見有喱隻澳洲品牌有貨，之前食過都唔錯，而且價錢又比Quaker平幾蚊，咁一於又買包……食多D希望下次body check可以重回健康正軌，個report可以靚仔返D啦！

遺忘的唱盤時光@Roberta Flack

基爾唔清楚依家其實仲多唔多人聽soul，不過在年輕族群裏應該不太多吧（至少一定比K-pop少得多）！不過若難得有個weekend午後賦閒在家看書的話，基爾都喜歡拎返喱類唱片出來聽聽，當中Roberta Flack這張《Softly with These Songs》相信是其中一張最熱門常播之選。

若說現今聽soul的人少，咁一時間能醒起誰是Roberta Flack的人應該更少。不過如果講起Killing Me Softly with His Song或者Tonight, I Celebrate My Love這些名曲，應該好多人都會知道，「哦……原來係佢唱！」



Roberta Flack原來今年已經年屆77高齡，唔怪得近年似乎也很少再見到佢有演唱會或公開演出，不過由70到80年代她一直是美國首屈一指的騷靈女王之一，而她也是歷來首位連續兩年（1973年的The First Time Ever I Saw Your Face及1974年的Killing Me Softly with His Song）奪得格林美Record of the Year殊榮的歌手。



至於這張《Softly with These Songs: The Best of Roberta Flack》其實已經忘了是什麼時候買，返查資料才知原來是發行於1993年，也是Roberta Flack幾十年唱歌生涯以來僅有的第3張精選碟，所以幾乎已囊括了她歷年最hit也最賣得的代表作品。基爾有時都真係有D奇怪：點解當年年紀輕輕已經咁鬼有taste，竟識得襯big sale時去那間大型唱片舖掃貨，仲識掃喱D筍碟添！依家要去搵唔知難唔難？仲有冇出復刻版？



Roberta Flack近年已不常登台表演，除了昔日的周末任你點之外，就連全能的YT似乎也沒有太多她的舊MV或演唱會片段，如要感受她live演唱的魅力，基爾也只能靠上面這張2002年推出的VCD一睹她的風采，該碟收錄的是她在2000年於華盛頓DC舉行的一個mini studio show，雖然話係迷你concert但都唱了很多她的經典歌，絕對值得收藏。