上回逛了獅子會自然教育中心的前半part（為免篇幅大長就分上下集吧），今回繼續寫埋下半場看看園內仲有咩特別野睇下！
4:28pm │ 另一處最想去睇睇的仲有這個Lotus Pond，之前看blog友的網誌也會經常來逛逛，最初走來走去都找不到，後來才知原來是在茶室後面，都幾隱閉喎！
4:29pm │ 冬天來到荷花池邊，其實都預了沒什麼睇頭吧！不過這個荷塘的環境感覺確係幾天然，不似市區公園那類咁人工化。如果初夏再來獅子會一遊，要記得來這荷塘賞花。
4:32pm │ 之後再迤行返出去茶座外面的花圃，見有工作人員在摘楊桃樹；另外仲見到不太常見的貓鬚草，還有在花墟也見過的狐尾天冬。
4:36pm │ 唔浪費時間了！火速走返過去自然教育中心那邊，因為想去看看上圖這間漁館展廳。
4:37pm │ 漁館入面就長這樣……主要介紹本地漁業的發展，基爾比較有興趣看看香港水域一帶會有咩海洋生物棲息呢？
4:38pm │ 這隻大海龜的標本好栩栩如生！展廳本身的設計其實都幾colourful幾靚，資料亦頗豐富（可惜沒太多時間逐一仔細睇），不過可能因為快要關館所以遊人也不多，好似成了專為基爾開放的私人展館咁！
4:43pm │ 趁佢仲未熄燈閂冷氣「拉閘放狗」，又去睇下館裏收藏的珊瑚化石先，展櫃設計得靚喎！
4:45pm │ 另外再去看看關於漁業發展的模型，其中的漁船模型真係做得幾靚，似去了模型店參觀咁。
4:47pm │ 漁館隔籬這間地質化石展館同樣未閂門，一於又入去八一八。入面同樣靜蠅蠅無乜人，最搶眼的是展櫃內的這條娃娃魚化石。
4:49pm │ 其他仲有一些古生物的化石可看，這裏其實還有不少西貢附近地質公園的簡介，睇完展覽還可即時搭返車出去實地視察也無妨。
4:51pm │ 見有人入去貝殼館，咁基爾又跟埋入去參觀。大門口有石油公司標誌，可能係有份出錢建館吧！
4:52pm │ 貝殼館入面就長這樣！有好多唔同展檯分門別類咁展示出各類型貝殼，一時間可能會睇到眼花咁多……
4:53pm │ 貝殼類動物會唔會係全世界最多唔同品種的生物？真係唔同大細唔同咩花款都有，上圖這款叫日本旋梯螺的品種又幾特別喎！
4:54pm │ 除了品種多到睇唔晒之外，值得一讚是展櫃的佈置擺設亦頗見心思，完全唔會覺得亂糟糟。
4:55pm │ 比恐龍年代還要早出現的鸚鵡螺原來都幾大隻，這裏展出的貝殼全部都好完整，有些表面花紋還保持得好鮮艷光滑亮麗。
4:57pm │ 看到扇貝，不其然會想起粉絲蒸帶子（又掛住食？咁快肚餓了？）……這裏見到的都沒有崩崩裂裂的貨色，應該不是隨意在海灘邊或酒家廚房後欄拾回來的。
5:35pm │ 睇完貝殼館出來，差不多全部展館都陸續閂門了，為免阻人收工還是走吧！因為懶行，所以選擇搭小巴返去西貢市集，準備吃了晚飯才回家（西貢勝在食肆選擇多）。
5:38pm │ 這間旺泰之前都食過幾次（重溫），每次來西貢如果食埋dinner先走通常都係幫趁佢，假日來到經常都其門如市非常墟陷，所以這天也不敢怠慢早早來食頭圍唔駛等位。上圖是例必會order的泰式拼盤。
5:57pm │ 另外仲簡單叫了幾味，包括有泰式燒雞翼、柚子沙律和海南雞飯，全部都不錯吃也不太辣，埋單約三百蚊左右也不太貴；美中不足是座位較逼，假日客太多要自己去斟水，食飽了也要即走以免阻住下檯客。
6:45pm │ 通常假日傍晚五六點都係西貢巴士站的人潮高峰期，為免同人逼車還是繼續四圍逛多陣夜街先返歸吧！行行下行到滿記，咁一於食埋甜品啦！基爾通常喜歡吃芝麻糊，這碗黑芝麻糊黑糯米（$32）是冬日甜品心水之選。另外還叫了杏仁蛋白（$40）和榴槤班戟（二件$36），基爾試了一啖杏仁蛋白也不錯吃。
7:01pm │ 另外店裏還有見佢張貼了綠豆仙草芋圓（$42）的海報（有點台式風味，不知是否期間限定），初頭以為好大碗但原來只有普通飯碗size，確有點失望。埋單計齊頭百五蚊，今時今日食個甜品都不便宜了！
