金漆潮州木雕@歷史博物館

既然出開尖沙嘴，咁唔好浪費時間繼續行過去尖東逛埋歷史博物館，反正之前剛見識了故宮的華麗金箔，咁一定要去睇埋這個潮州金漆木雕展！

又有成大半年無來過歷史博物館，近年好似取消了博物館的半年通行證，如買全年證又好似有點浪費，因為依家好多展覽都係無料開館，例如這個潮州木雕展也是免費，對於閒來愛巡館的基爾來說也算開了方便之門。



其實到訪之前都無上網去先check下佢係咪免費入場，去到問問門口的保安阿姐確定唔駛錢，咁一定入去睇睇參觀下無走雞。



果然無呃人喎展廳入面的展品大多都髹上金漆，望落真係同故宮展品一樣咁金碧輝煌。而且歷史博物館這邊的專題展廳比探知館大得多，所以展品就更多更精彩，絕對值得一去逛逛。先見到上圖望落似皇帝龍椅的其實是供奉廟宇神像出巡的神轎，旁邊似屏風的是神轎的圍屏，都是清朝古董。



依家入場後通常先行一圈觀察有冇人影相，穩陣的可再問駐場保安阿姐確認一下可否影相（費事畀人話面懵懵），阿姐很友善話當然可以但不可開flash（其實唔開閃光燈是常識吧）。上圖右這座不是坐椅，而是雕工非常精巧的金漆木雕鼓架，也是廟會巡遊時用。至於旁邊兩個類似古代漆盒的東西，圓形的是福祿壽三星生果盒；另一是六角形佘太君掛帥薰爐罩。



展廳裏最大幅就是上圖這座郭子儀慶壽大壽屏風，這種大型屏風昔日一般擺放於祠堂大廳，大壽屏共有十一扇面，正面有福祿壽八仙和花鳥等吉祥圖案，背面是金漆郭子儀慶壽圖。



再看上面這個叫王茂生進酒菱形饌盒，饌盒是擺放食品或貢品的禮盒，王茂生進酒則是著名的潮劇劇目。粵東潮汕一帶的鏤通雕技藝有悠久歷史，融合了不少潮汕風俗和工藝，已列入國家級非物質文化遺產。



上圖是另一個山水菱形饌盒；旁邊仲有個係五福臨門花板和方形薰爐罩，原木色的薰爐罩用了通雕技巧，望落就似雕象牙球那類的工藝品，一層包著一層非常有層次感，而且都好巧奪天工。



這座通雕龍蝦蟹簍相信是全場最金光燦爛的工藝品，望落應有超過一米高。潮汕地區向來是魚米之鄉，以蝦蟹作題材的日常用品也很常見。這座以樟木雕刻而成的擺設貼上金箔後，更加金光閃閃華麗非凡。旁邊還有蟹簍樑托，是屋樑的裝飾品。



之後再看看潮劇的介紹，戲服同粵劇也是大同小異；左邊見有些木製的餅模，如果有去過九龍城逛街，應該對這些潮州禮餅不會感到陌生吧！



中國舞獅有分南派北派相信好多人都知，不過南獅的製作原來是以潮洲最首屈一指。上圖這對南獅燭台也很栩栩如生造型非常精巧細緻。



除了燭台外，同場仲有不少木雕家具擺設，例如上圖這張四方木桌雖然已經好古舊，但桌邊的金花依舊保養得好好沒有脫色。睇完潮州木雕展後再去埋館內的常設展廳閒蕩，廳內復現了遠古年代香港的熱帶叢林和華南虎，仲有漁港風情睇，見不少外國遊客都甚感興趣。



逛完歷史博物館後，咁通常都順腳行過去睇埋隔籬間科學館啦！今期有個絲路山水地圖展和鐘錶珍寶展，不過問過門口保安阿姐話原來要收入場費，咁等遲下周三免費日而又有休假先來睇了。

金漆輝映：潮州木雕
地點：尖沙嘴香港歷史博物館
展期：8.11.2018 - 25.2.2019

穿越紫禁城@文物探知館

基爾有段長時間沒去巡過博物館，唔太知最近有乜熱門展覽，這次也是聽友人話尖沙嘴九龍公園入面果間探知館有新的故宮展覽，咁一於去走走！

每次來探知館，除為了看展覽之外，點都要抽點時間去中庭小花園坐一坐，下午時份來享受一下英式庭園裏的悠閒也挺愜意（如果可以嘆多個afternoon tea就更perfect了）！



小庭園四周圍繞的兩層高古舊軍營建築也很有20-30年代風情，身處其中彷彿隔絕了外面的浮華鬧市（和廣東道那邊湧來的拖篋遊客）。



這次來主要是看上圖這個關於故宮維修的小展覽，雖然探知館的專題展廳比較細，但仍覺得都幾值得來參觀（更重要是遊人不多可輕鬆看展品）。



專題展廳就位於一樓，大門入口附近已見到非常方便不用找，展品雖不多但都有外籍遊客來參觀，可能尖沙嘴始終對遊客而言很方便！



電梯上樓上二樓則是常設展廳，由於基爾之前已逛過就先去看故宮展吧！一入展廳就見到這幅發光的故宮地圖都幾大幾特別。



好多人都會先駐足看看這幅故宮地圖，以了解其建築群的整體佈局。基爾特別喜歡地圖旁邊用藍色瓦片吊起砌成有太和殿輪廓圖樣的垂簾，設計真係好靚又好有特色和心思，將來如果西九的故宮博物院建成之後，唔知會唔會保留並搬遷過去呢？



另外仲有一些故宮建築物的小模型，製作同樣好精美。上圖這座是長春宮，仲有圖解如何重修樑柱情況。咦……長春宮個名聽落好似有點熟悉，係咪之前看《延禧攻略》有拍過這宮殿？



故宮內外之所以咁金碧輝煌，主要因為不少雕樑畫楝都貼滿了金箔裝飾吧！不看不知原來修葺故宮必須用故宮專用庫金箔，不是求其任何質素的金箔都可用，而且都盡量用返古時的裝修方式復修，非常講究。



看看修葺工具就知有幾古老，每一樣設計出來的工具都有其特定的作用，用來修葺不同的建築結構部份，皇宮果然係皇宮，相信修葺的技師也都是全國的一級高手（至少要懂得用這套工具吧）。



雕花木門也很神乎其技，基爾初頭以為是先分拆配件雕製再合併成花門，怎知看過短片介紹才知是整塊原木雕製，唔小心雕斷一條花木都要重頭來過！上圖左是擺放在屋簷頂的瑞獸裝飾，傳統上有守護屋舍的作用。



另外仲有介紹中式傳統斗拱的製作，之前好似在志蓮那間博物館也有見過類似的入榫式斗拱，古時沒有鋼筋水泥就是靠這些斗拱乘托起建築物的樑柱，榫卯相扣必須萬分精準才夠穩固實淨。睇完故宮展反正仲有時間，再去樓上巡一巡常設展廳才走人。

穿越紫禁城：建築營造
地點：尖沙嘴九龍公園香港文物探知館
展期：11.1.2019 - 7.4.2019

光影流聲九十年@文化博物館

好耐好耐無寫巡館手記，其實舊年十二月初臨出發外遊前，都揀了個weekend去巡過一巡文化博物館，主要係想睇睇下面這個大型展覽。

基爾估計都幾多人去睇過這展覽，所以即使展覽完結後才寫網誌出來應該也沒所謂吧！萬一真係無去睇錯過了，咁就在大典這裏睇返當去過啦！



先睇睇佢門口這幅圓形序言先，原來香港公共廣播可追溯至二戰前的1928年6月，當時港府接手民營的「香港無線電廣播社」成立香港電台前身。展覽中仲可以睇返好多關於公共廣播的舊事舊物，包括戰前的古老通訊工具；令人驚訝是較新的數碼收音機原來已經成為歷史文物躋身博物館了！



除了看歷史文物外，場內仲有回歸前大英帝國頒授的荷蘭水蓋睇，上圖這枚係1987年郭利民Uncle Ray於倫敦白金漢宮接受英女皇頒贈的大英帝國員佐勳章及證書（即係MBE），表揚他在香港廣播界多年來的貢獻。



有聽過港台的英文歌節目應該會知誰是Uncle Ray吧！繼續在展廳裏看看有乜其他特別展品。上圖右這個時光隧道記錄了九十年來香港的電台和電視業發展史，仲有1970年代英女皇訪港參觀街市的新聞圖片；較特別的仲有個《城市論壇》的模擬佈景，可以坐上去試試當發言嘉賓影張相打卡。



上圖左這個大展台擺放了好多古董攝影器材和錄音機，包括有大卷16和35米厘菲林，仲有film viewer和film synchronizer（菲林畫面與聲帶同步的後期製作機器），依家大部份製作已進入數碼年代很少再用菲林拍片了吧！



除了可以看看古董廣播器材外，場內還展出了一些昔日拍攝港台電視節目如《獅子山下》和《香江歲月》之類的戲服及劇照，原來不少天王巨星以往都有拍過港台劇呢！



上世紀每年年尾必睇的樂壇頒獎禮，今時今日仲有冇人留意？今年最受歡迎男女歌手是誰呢？基爾一時間也想不起來（但記得達明獲頒金針獎）。展廳裏排列出四十幾屆以來的獎座真係好有氣勢，仲有場刊和部份經典頒獎片段重溫非常精彩；同場仲展出了張國榮、梅艷芳和鄧麗君三位樂壇巨星出席頒獎禮時穿過的歌衫，都是很珍貴的展品。



睇完頒獎禮又再睇睇另一邊廂，見有個《獅子山下》的拍攝場景，模擬了昔日七層徙置區公屋單位的佈置，雖然環境狹窄但每樣家具也井然有序，絕不會像現代劏房咁亂過垃圾崗。基爾還見到好多古舊擺設例如暖水壺、藤籃、日曆上的嫦娥鐵牌和原子粒收音機之類，梗有一款你都用過。



上圖右的門鐘也很經典，一按就會奏出一首甚覺吵耳的樂曲，依家仲有冇人用呢？另外還有撥輪式的電話，聽聞依家千禧後係唔識點樣撥個輪打電話，係咪有點誇張了？比較特別係場裏仲有間玻璃房仔模擬作電台的直播室，有空也可去排隊試試當DJ報天氣和交通消息的滋味，聽返自己把聲出咪的效果應該會幾好玩。到訪當日係港台《旅遊樂園》主持劉蓮擔任當值DJ與聽眾互動，平時基爾都有聽過佢做節目，第一次見佢真人呢！

光影流聲：香港公共廣播九十年
地點：沙田香港文化博物館
展期：7.11.2018 - 25.2.2019

珍郵庫@金庸小說人物

去年年尾推出的金庸小說人物郵票掀起了好一陣金庸紀念熱潮，郵局亦好耐沒試過見有人排起長長人龍輪候買首日封。

基爾之前已預訂了所以幸免做「龍的傳人」。講返一套六款郵票全都是以港人耳熟能詳的金庸武俠小說人物作主人翁，包括$2是《射鵰英雄傳》的郭靖與黃蓉（還有鵰兄作陪襯背景）；$2.6是《書劍恩仇錄》的陳家洛（會唔會令你想起秋官）；$3.4則是《笑傲江湖》的令狐沖與任盈盈（基爾只記得東方不敗）……



另外三張郵票分別是$3.7《倚天屠龍記》的張無忌；不能少的當然還有$4.9《神鵰俠侶》中的過兒和姑姑（小龍女仲要表演瞓繩絕技）；仲有$5《鹿鼎記》的一對活寶貝韋小寶和康熙在打交嬉戲。



當然仲買了$10的小型張，是以《天龍八部》中的三位結拜兄弟做主角，大哥喬峰、二哥虛竹和三弟段譽全部到齊晒！必須提一提佢個特別郵戳以傳統武俠漫畫的飛劍造型設計，覺得有點如來神掌的卡通feel呢！



以往金庸武俠漫畫都是主要由李志清執筆，今次的金庸郵票也不例外，仍由這位著名漫畫家以國畫手法繪製人物，向這位一代武俠小說大師致敬！

金庸小說人物
發行日期：2018年12月6日

雪梨盛夏光年@到著SYD

經歷了一夜一朝約九粒幾鐘的半休眠煎熬，航機終於橫越了南海、菲島和印尼之後，睇睇個飛航地圖原來目的地已經相距不遠了，可喜可賀！

在機上看了一套戲又吃過晚餐後，本來想再看多套戲（反正睡意不濃），但突然醒起不如改變策略熄掉電視屏幕嘗試眠一眠也好，結果也有點奏效，半休眠比齋硬坐煲戲來得舒服一丁點。



這朝晨早七點幾航機其實已在雪梨上空盤旋了，但好像因為機場太繁忙，所以盤了大半粒鐘先有泊位降落，令人納悶（據聞聖誕前後旺季這是常態）！落機即時九秒九走去smart gate（類似自助入境E道）部機拎張飛仔，可以快少少過關，怎料基爾媽本passport不知為何scan了十幾廿次都係唔得，咁唯有去排返條長隊！



影完相出了海關再畀狗仔聞過之後，搞了近成粒鐘終於可以出機場，果然係聖誕暑假旺季成個機場都係人好墟陷熱鬧。Anyway，都係拿拿林搭車返歸休息……幸好這朝看來天陰陰不算太感受到雪梨盛夏的火熱動感！



返歸放低了大細篋和背囊，簡單梳洗再放低幾両之後立即再出外逛逛（幾乎完全沒有睡意）。數數手指原來都有好幾年沒來過這小社區，走在街上除多了路人講國語韓文外，似乎也沒多大轉變，反正大把時間就先入去圖書館嘆陣冷氣吧！



圖書館其實同香港的屋村社區小型圖書館分別不太大，可能因為這裏多亞裔居民所以中韓文書也挺多，冷不防還會以為自己穿過了隨意門瞬間回到香港的圖書館（時空錯亂mode）。



另外每次來到也很愛到這片球場草地走走，總有點令人心曠神怡的悠閒holiday感覺，像要告訴你這趟盛夏光年長假期已揭開序幕了！



接近正午時份還不覺太餓，就去無聊逛陣超市入定少少貨先！今時今日的華人超市真係乜都有，除了有各式新鮮菜檔之外還有好多熟悉品牌，令基爾眼前一亮的仲有香港超市已不常見的那盒炸蝦片，舊時農曆年前經常會買回家炸一大袋招呼拜年客人！



留意到貨架上仲有大量冬菇海味臘腸豉油腐乳腐竹蠔士海帶昆布之類的中式食材，更難得是就連各式茅根竹蔗夏桑菊板藍根沖劑也齊備，真係可以講一句：在外國生活也可以很港式！



另外特別喜歡去逛這裏的生果檔，品種選擇多之餘也非常靚又新鮮，最重要係售價比老家平一大截，例如布冧AUD$5有3kg已是必食之選，湯碗咁大的澳洲芒果$13一箱（約九至十個）唔係唔買下嘛！



老家超市經常有售的澳洲橙依家平極也差不多HKD$12-13左右3個吧（食橙唔太知價）！喱度AUD$3有3kg，係咪可以榨大量鮮橙汁？



街市入面仲見有間吉之島特別覺得幾有懷舊親切味道，唔知遲下會唔會仲有八佰伴松坂屋Daimaru或者三越果類復刻版雜貨店呢……



去完街市入貨之後，終於有少少餓係時候去食個lunch。這區中韓食肆選擇頗多，而且收費也不會比香港貴，更要激讚的是這裏食店一般都不用畀稅、加一或者貼士之類繁瑣附加收費，明碼實價夠晒貼地。



其實基爾在港時也很少會去幫襯粥麵店（通常食粥麵也多數自家煮或去飲茶時食），也忘了最近一次食油炸鬼是什麼時候，來到這間港式茶餐廳就試一試水準如何吧！幸而油炸鬼夠脆，粥的味道也尚可。



炒粉麵和炒飯不算油膩，慶幸份量也是正常size，否則一定食唔晒！值得一提是那碗酸辣湯是套餐包埋的，而且是少辣水平正合基爾心意。



食飽飽之後咁仲有咩精彩行程先……當然就係去逛埋韓超先啦！一箱箱辛辣麵和Jin拉麵就咁堆晒在大門口，係咪驚人唔知佢係韓超？



除了即食麵之外當然不會少了大量罐頭年糕泡菜醬油之類的韓式食材，聽聞不少居住附近的韓裔移民都會駕車來這區shopping食飯和飛髮，周街碰口碰面都係韓人和韓文招牌，差點會以為去了東大門。



商場附近的泊車位也經常爆滿，不過韓國阿珠媽和大叔駕駛技術一般都好一般，所以路經停車場時要打醒十二分精神為佳，唔好掛住睇手機。



最後基爾也有收穫，買了罐韓國午餐肉才走。之後咁又點呀！就梗係去順腳行埋個西人超市先啦！這間Woolworths就似在港的百記惠記一類連鎖超市（附近通常還會有間Coles），貨品售價兌換港紙計都幾抵，尤其係麵包鮮奶雪糕cheese cake真係平到笑（好驚肥十磅）。上圖紅色的不是蘋果，而係手掌咁大的石榴。



好喇大鄉里出城就到此為止！拎住成抽環保袋戰利品又係時候返歸補眠一眠和睇一陣電視。Hea到傍晚時份，又係出街食算，四人叫個三人套餐都夠晒食，明碼實價唔駛收茶芥花生加一，兌換港紙三舊水有找人均唔駛一百（係咪時候要考慮來長住）。



咪字先！咪字先！齋平唔得喎要睇埋個質素水準如何再決定吧！先睇佢個白飯用保溫飯壺裝住上枱套餐已包不另計白飯錢（好像還有例湯忘了影）；椒鹽左口炸得酥脆做得好過好多香港食肆，平時不太愛食魚（驚骨）的基爾都食了大半條，激讚！至於個羅漢齋煲和番鬼至愛甜酸咕嚕肉都新鮮熱辣同屬上乘水平（回來後食唔返點算）。



Anyway食了再算吧！食到飽一飽捧住個肚腩又係時返去瞓（槽豬乎）！不過今趟有另類安排，由於客房已稍作改動變了工作室放不下睡床，所以這晚會同基爾媽移玉步去附近預先book好的小motel暫住，基爾媽第一次來住這種只有兩層的小旅館也甚感新鮮有趣，企理之餘也有冷氣供應（家裏反而沒冷氣會睡出汗來），舟車勞頓一整天後正好可以睡個好覺吧！