寧波會館@中環

近大半年都極少與友共聚相約食飯，這晚旅行腳們難得興致到，就選了在weekday於中環搞飯局，基爾收工即急急腳坐車赴會！

基爾大鄉里第一次來這類同鄉會開餐，聞說是開業於1968年的老字號，只招待會員（而且會費都幾貴），很有點私人會所味道。



網上資料簡介話這裏吃的是上海寧波菜，不過看上面這幾味似乎又不似想像中咁濃油赤醬，感覺與王家沙、三六九甚至姥姥果類有點分別。例如隻圓碌碌的醉雞（$110）賣相幾靚，食落也有濃濃花雕香味；黃金蝦球（$240）和蔥油海蜇頭（$170）雖然幾貴但幸好份量足味道也不錯。



比較搞笑係侍應阿姐，除了經常來催促落單外，本來叫的萵筍海蜇頭上檯時見碟上竟只有寥寥兩條萵筍，問佢係咪落錯單佢又話冇，叫她夾多幾條萵筍來又左推右搪似的，最後都不了了之……上圖這味幸好沒搞錯，糖醋排骨（$105）同外面吃的不一樣，有點似茄汁豬扒。



另外還叫了中規中矩的小籠包（$60/6個），甜品方面有拳頭咁大個的高力豆沙（$60/5個），不過豆沙餡不算太多。最後加埋兩碗白飯（$26/2碗）和茶芥加一之類，總計人均約兩舊水，抵食與否就見仁見智吧！



除了侍應阿姐多蝦碌之外，另一樣要扣點分數的是館內環境也相當嘈雜，基本上全晚要擘大喉嚨才可以傾到偈，埋單走時真有點耳鳴不適感！聽聞menu中還有無錫脆鱔、炒蟹、醉豬手和燻蛋、臭豆腐等小食也值得一試，但大前提要頂得順超嘈吵的環境……



吃飽飯傾飽偈之後就差不多要各自散水了（以免無車搭返屋企），反正不趕時間，基爾就放棄坐喧鬧的地鐵，改由Landmark漫步到去碼頭，選擇搭船過海享受多一點悠閒與寧靜。



由澳洲回來換了手機後，記憶中好似都無乜機會試過佢影夜景的效果。這部日系品牌（自從進入智能手機年代後就沒轉過會）雖說不是什麼貴價貨，但無腳架下影夜景原來都幾唔錯，至少沒有鬆郁矇也夠亮度，自問要求不高絕對收貨了（p.s.順帶有留意鐘樓的4點鐘，確是用了羅馬數字IIII而不是IV）。

香港寧波同鄉會 Ning Po
中環德己立街2-18號業豐大廈401-405室

名門讌客@葵芳

暑假期間其實食探都無乜偷懶到！餐照開相照影但就無開筆記錄下來，留返依家先一次過揀部份來寫少少做record吧！

以往都甚少去葵芳開飯因為其實唔算太就腳，不過這次是旅行腳聚會咁又去試試新野。由於早到了很多，咁順便先去隔籬葵廣逛一圈。基爾大鄉里還是第一次來，可惜向來不太擅長掃街（選擇困難症）所以最後只係齋睇當作見識見識乜都無食到。



另一主要原因咪就係要留肚食飯囉！這間茶樓當然也是第一次來幫襯，六點準時入去竟然烏蠅都無隻，無所謂由於友人早已訂位咁就先入座開茶做晒洗杯碗等工序先。



差不多齊人就開始點菜，見套餐不錯有菜有魚有雞鵝而且價錢實惠，唔多考慮就先叫這個；之後再散叫了扇貝等幾味作補充。以人均百鬆少少來計可說是「不妨一試」的一餐，唯一係飯後似有點肚仔痛可能自己腸胃過敏水土不適應（其他與會人士看來沒太礙）。



另一餐就去了九龍灣區某茶樓，由於是半事務性質就咁無逐樣菜式去影了，但最後的甜品就不能不影，因為佢喱個花形的果凍實在太精緻了，雖然味道沒太特別但影相打卡就一流呢！飯後仲去了附近麥卡菲飲多杯綠茶豆奶，算是很完滿的一餐（第一次飲覺得價錢略貴）。



為食停不了繼續寫埋之前仲去了幾次薩莉亞，由於此店早已寫過咁又簡述略載就算了吧！這次主要是去試佢個幾抵食的下午茶餐（其實原本這店的pizza意粉小食沙律都不貴）。



佢個下午茶餐都只是三十幾蚊，選擇也算豐富；值得一提是加十幾蚊就有飯、湯和飲品任飲，其中有親友讚過他們的咖啡不錯好飲過UCC。基爾向來對咖啡沒研究，只覺得以任飲計也是「不妨一試」之選。

名門讌客 Wealth Banquet
葵芳新葵芳花園商場好爵中心1樓

中區警署建築群@中環

金山網誌又係時候要歇一歇，再寫返少少本地料先……大館早前開放後好多人去參觀，基爾都無走雞某個秋日周末也走去趁一趁這個新墟。

之前見好多人不論日場和夜場都有去過大館影相，所以基爾都唔會長篇大論，求其揀幾處特別地方打下卡就算（其實係人太多，也懶了影相）！到訪當天由中環街市沿自動電梯一路上山，好快就到了大館。以前半山的Hollywood Road同Old Bailey Street交界喱度，係無上圖喱條天橋，因為活化大館之後才新建的，現在就成了主要的出入口。



入到去就係Parade Ground這個大大的檢閱廣場，係咪以前D警察操兵集隊的所在地？上圖右的紅磚牆建築物是Police Headquarters Block，即係面向荷李活道經常搭車會經過的那幢灰色的警察總部大樓；至於對面就係昔日的Barrack Block，這幢營房大樓高四層，外面有好幽雅的拱廊（遮太陽隔熱兼通風），是常見的殖民地建築style。



Parade Ground上仲樹立了一幅超級大地圖，真係大近視都唔驚睇唔清楚，成間大館古蹟建築群就長這樣，要行勻一圈其實也不太花時間，當然如果閒日來會chill一點，唔駛周圍都咁人來人往！



近距離再影一影Barrack Block，經修葺後係咪新淨好多？基爾覺得有少少似赤柱美利樓那類風格，但這幢營房大樓就望落好似高少少。由於要趕住六點前Prison Yard果邊閂門前要入去參觀，所以Barrack Block就暫時唔花時間上去閒逛了。



上圖右是Prison Yard的入口，入面其實都頗大，有好多一幢幢監倉，建築物感覺上還帶一點英倫城堡的風味，也可能這種殖民地遺風有一定吸引力，仲見有攝影師帶同model來取景。上圖左這幢紅磚牆建築是昔日的Central Magistracy，可惜這天好像休館，大門口擺了不開放的告示牌。



穿過這度拱門長廊就入到去Prison Yard，途中見有外籍維修工匠正在修補牆上維多利亞時代的壁畫油漆，真係好認真喎！基爾記得以往外遊時，間中見有些大教堂或者修道院之類，都會有很多維修工匠即席表演文物修復工作，有時是修補壁畫瓷磚，也有維修雕花裝飾之類；至於香港的古蹟還是第一次現場見到！



Prison Yard周邊有幾間刑房可參觀，到訪這天是周末要排長龍，結果排了大約二十分鐘才入到去睇，不過因為太多人又有點焗所以無花時間影相，快閃巡一圈簡單看看狹小的監房就走了。上圖是Prison Yard廣場上的面貌，可以見到兩幢新建的賽馬會藝方和立方，前衛的鋼鐵建築風格別具現代感，同四周的古雅風貌又明顯別樹一幟。



近看上圖這幢叫做JC Cube，基爾沒太多時間所以都沒有入去睇，只在外圍參觀而已！右邊紅磚牆那一幢昔日是另一座監房，依家可能改作博物館的員工office了吧。



上圖右是JC Contemporary藝方，鋼鐵外牆離遠望都有點磚牆風格，但同時也有濃濃的當代建築的摩登感覺。至於左圖是法院的入口，這天去到不見有開放參觀，只能在大門口影這張相。



行了一圈見無乜野好行，就出返去Parade Ground那邊，去補返睇睇上圖紅色的這幢警察總部大樓和營房大樓先。



近睇這幢Barrack Block係咪果然有少少美利樓的影子，地下長廊一樣吸引好多人來取景影幾張靚相喎！小朋友很多時都成了客串模特兒……



Barrack Block樓上的間隔有點似HKU的Main Building，麻石樓梯和花磚地同樣是古典風味十足（不過入面當然就沒有Lecture Room），最特別之處係部份展廳有出租畀時裝名店，裝修設計配襯埋古式古香的門窗，感覺上又好似幾型幾有格調咁款。



除了時裝名店之外，另一邊仲有間茶室，上圖右是茶室門口的盆景，真係好有日本風的花道feel，成件事變得好東洋味又好閒適幽雅；上圖左是「大館一百面」的展覽廳。



最搞笑係其中一間展廳仲寫明係「蛇竇」，基爾以為警署入面竟然咁明目張膽有間蛇竇房咁堅？睇真先知其實佢係介紹駐守中區警署的差人以前巡邏時，經常會去附近的茶餐廳或大排檔打躉，久而久之就成了蛇竇。



繼續四周圍行下八卦下，行到喱間展廳又幾特別，見到好多大館昔日面貌的復刻版模型，手工都做得好精細好靚，除了營房大樓外泊滿了警車和衝鋒車，連好細細架的交通警電單車都有，基本上將昔日的Parade Ground立體地重現眼前了，感覺上比單睇老照片更好更有趣味。



上圖喱個報案室的模型係咪都好盞鬼！除了有警察和報案counter之外，仲有來報案的人，成個設計都很有官威高高在上的感覺；不要錯過牆上還掛了昔日政府部門一定會掛的女皇玉照。



行到成六點都差不多夠晒皮，係時候轉移陣地搭地鐵過返九龍，因為仲有下半場的「必備節目」，就係去開餐！友人介紹的這間日式燒肉放題店基爾還是第一次來，地點也算方便，從油麻地站A出口向右一直走就見到。



店舖不大一眼睇晒，話明係放題，點餐紙選擇都算幾多，如果加$40可以upgrade去貴價菜單，多了帶子刺身、馬刀貝、虎蝦、帆立貝、牛肋肉、羊架羊鞍等選擇。埋單計連加一差不多要三舊水（限時90分鐘），整體而言略貴同埋基爾向來不太愛限時限刻，所以評價只係「一試無妨」！

鳴橋燒肉料理 Naru Kyou Yakiniku
旺角砵蘭街104號

Bro's Cuisine@觀塘

話說神龍見首不見尾的隱世食探偷懶玩失蹤一排，打風過後終於又有機會蒲頭，今次覓食地點選擇了同樣是非常隱秘的觀塘工廈區。

喱日難得有得早收工（正確一點說應該係準時收工），平時真係好少機會睇到這樣靚這樣colourful的火燒雲晚霞，因為很多時收工搭車返歸，天也早已經全黑了（尤其是冬天），基本上都過了黃昏的magic moment，能看到晚霞感覺上是忙碌完一整天之後的小確幸吧！



很久沒見的幾個舊同事似乎比基爾還要忙得多，既然早到步了就在工業區裏無聊散策蹓躂一會吧！來之前已事先check過姑高地圖，可能在觀塘工業區一帶返工的人才會比較識路，區外人一般都應不太知成業街在邊弗。



由於工廈裏面的間隔確實係幾四通八達又多樓梯走廊，雖然老早記下了確實地址，但向來沒甚方向感的基爾還是像找迷宮出路一樣咁找了好一會，才終於搵到這間已預訂了位的西餐廳所在地。



餐廳裏的陳設其實與一般食肆無異，完全不自覺是身處於陳舊的工業大廈之中，不過由於是樓上舖，餐桌擺設明顯闊偌得多，至少不會只得令人討厭的A4枱。由於尚未齊人，席間在坐的按慣例都係先研究一下menu睇睇有乜心水選擇，同時間又互相問候一下（不是講粗口果種），再報告交待工作近況和行業資訊八卦秘聞之類吧！



接近9點才終於等齊人，個個肚子早已打晒鼓，咁索性一口氣叫了兩個豐富set dinner無得走雞了！到底佢個cuisine究竟有幾special呢？由於叫了兩個set，所以可試齊佢兩款appetizer，上面是其中一款：牛肝菌雲吞配黑松露忌廉汁，睇睇旁邊枝叉就知隻雲吞size完全唔係兒戲，牛肝菌本身一啖咬落也很香（定還是係黑松露的香氣），大鄉里基爾覺得頓時很有點意式風情，確是一款很不錯的前菜。



另一款前菜則是西餐慣常見到的Caesar salad，味道本來沒有太大期望，都是沙律菜撈埋一堆吧！但佢個醬感覺幾清新幾fresh不會太漏（正好平衡了牛肝菌雲吞的忌廉汁），而且上面一粒粒像炸脆了的煙肉碎粒是亮點（不記得係唔係，除非唔係）……



攀車邊食探其實唔係乜都食得出，好多時都係一知半解沒有太多深究，總之食落好味夾新鮮健康就最緊要。吃過前菜之後就來了個大大的pizza（忘了是12吋定16吋批），上圖喱個睇個樣都應該係莎樂美腸車厘茄薄餅。



基爾覺得這個pizza餡料配搭都幾唔錯，其實薄餅材料不一定多就叫好，也不是成堆芝士就叫香，感覺上薄批也不太飽太膩；至於上圖左下的香草海鮮薄餅反而略見失色，基爾只吃了一小角而已！



食完pizza其實都超過六成full，咁主菜又揀左咩呢？唔駛估上圖一望而知就係秘製豬肋骨，略帶甜味的秘製汁醬味道不錯，ribs的骨肉分佈平均也不會太粗鞋太韌，個人覺得好食過星期二打ruby那間美式餐廳。



另一款主菜原本選了巴西燒脆雞，但侍應提醒只有半隻上碟，衡量過後最終揀了澳洲羊扒。好多人唔食羊因為怕羶，但如醃料太多似乎又吃不到羊肉應有的風味，這味羊扒看來拿捏掌握得恰到好處了。



幾乎忘記了個set原來仲有pasta喎！雖然已經飽到上頸，但都要夾手夾腳KO埋佢，不能浪費食物耶！上圖這個是先來的香草醬意大利粉，幸好份量不算太勁，味道也不錯，如果是lunch來單點這個都非常正！



另一個點了Pasta with Parma Ham，食材味道同樣是上乘級數，基爾如果唔係因為太飽關係，應該會覺得更好味。同場其實仲有一款紅葉頭risotto選擇，不過因為太飽當然不揀飯了。



盡了最大努力，最後也無法全部清碟，有幾片pizza要打包拎走，老闆還細心地提點回家後可放入微波爐翻叮，效果其實都不俗。網上話老闆兩兄弟都大有來頭，分別曾任酒店和著名西式甜品店的top chef，唔知有冇博友來試過甜點呢？Anyway，這餐以人均約$280計，CP值個人覺得都幾高，lunch時段聽聞也很旺場。



p.s.講開食野，再寫多少少零食延續篇！最近基爾在超市發現了這款低鹽cracker。平時買食品時，有冇習慣睇成份含量標籤（尤其係鹽糖卡路里反式脂肪果類）？基爾發現以往食開果種蕃茄味和紫菜味餅乾，sodium含量一般都有成500幾至600幾mg（每100克計），而上圖這款低鹽餅八卦特別望下佢到底有幾低先。咦！原來只有30幾mg咋喎！看來真係差好遠，就買兩包試試。個人覺得幾有芝麻香，但就真係餅味明顯夠淡口，可想而知平時食開果D係落左幾多鹽幾多香料製造。直覺這款「健康餅」可以再買，平時擺在公司作為下午4-5點醫肚零食也不錯呢！



零食延續篇之二：泰國篇！因為有家人剛由泰國出trip回來，帶了些榴槤和山竹乾果零食作手信，榴槤乾還沒開封，基爾本身也不吃榴槤；另一盒山竹乾就吃了，都幾脆口幾酸，是原個山竹模樣；至於上圖的山竹小蛋卷也未食，相信都係略帶山竹酸味吧！話時話新鮮山竹基爾都好耐好耐無食過，依家都賣得好貴呢！

Bro's Cuisine
觀塘成業街19-21號成業工業大廈2樓13室

跟住雷神過大海@Fernando

搭Transmac來到黑沙海灘喱邊已經停左雨唔駛再擔遮，睇睇時間原來已差不多晏晝成點鐘，就去食個lunch先！

以往基爾幾乎每次來澳門，總會到一到這間老牌葡菜餐廳打一打卡，今次都唔例外。這次揀了閒日的食晏時段來貪佢無咁多人，之前試過假期來要排隊等位，好旺場呢！



雖然有成十幾年無來過，但餐廳陳設就好似穿越時空咁一D都冇改變，似乎時間在這裏已失去了意義……還記得上圖那座古老的足球遊戲機，第一次來時成大班人玩到嘈到拆天咁勁開心，估不到佢仲依然放在原位，只多添了些刮花的歲月痕蹟吧！



依舊的古老紅磚牆……依舊的歐式壁爐……依舊的紅白格仔桌布……依舊的白色餐碟和透明玻璃水杯！唯一有些不同的是昔日喧喧鬧鬧的大廳不見了，依家反而可享受難得的清幽悠閒。



安坐後看看menu，發現價錢也早已不一樣了！趕快點了幾味慣常會吃的菜式，趁住還未上菜的空檔就去後花園走走，順便去廁所洗洗手才開餐（廁所入口仍舊在後園那邊）。



最先上桌的幾個大碼豬仔包依然新鮮熱辣皮脆好味，用來點橄欖油、沙律醋以至夾著沙律菜吃都是神來之筆。上圖右是每次來都定必order的葡式烤乳豬（$372/2份），皮夠脆肉夠鮮之餘也沒有廣式燒豬咁咸，唯一係食多幾舊會有點膩，這時最好飲多幾啖Sangria（$70/半jar）就完全無問題。



至於什菜沙律撈上了酸酸的沙律醋之後更是解膩的還魂丹，平時基爾極少會食生洋蔥，但對這碟鋪滿了洋蔥絲的沙律卻是完全失去抵抗力，愛煞了它對味蕾那種微微辛辣的刺激感覺！嫌唔夠喉咁於是睇睇menu再order埋上圖喱個燒排骨（$162）。



平時燒臘檔賣的港式燒排骨通常都沾了甜甜的蜜糖味，葡式這種就沒有太多調味醬料醃製，反而可以食到豬肋骨的原味，只需唧一點點檸檬汁提鮮已夠晒，順帶一讚連伴碟的粗薯條都好好味！



繼之前的睇menu學英文之後，再來多個check bill學葡文吧！先睇最貴果味Leitao，就是葡式烤乳豬；跟住Salada單睇字面都估到係什菜沙律；Sangria應該都好多人飲過，這種南歐水果酒又叫做桑格麗亞（感覺又譯得幾靚咁喎），是由紅酒梳打水葡萄汁柑橘玉桂混合少少切碎生果肉調製而成，飲落似果汁多過酒，但酒精濃度一般仍有7-8度，基爾試過溝七喜或可樂飲依然會有些醉意……



講埋賬單上餘下兩味係乜，Agua應該好多人知係水，這間葡菜餐廳飲水要收費，每桌會擺一枝兩公升樽裝蒸漏水（就好似中餐廳酒樓會擺幾碟花生蕎頭前菜），收$45感覺都幾貴；最後的Entrecosto唔駛估就知係剩返果味燒排骨。結果埋單合計約700幾蚊，以人均消費計雖然比以前略貴了一些，但仍算是可接受的範圍吧！



食飽飽之後襯住沒下雨又行出去黑沙海灘行多陣先走。4月尾天氣仍有點微涼，加上才剛剛下完場大雨，所以沙灘上幾乎都不見有泳客或者游人閒蕩。咁樣其實都幾好，可以重拾返少少昔日澳門那種寧靜的南歐海岸小鎮feel……上圖可遠眺沙灘邊緣盡頭的舊威斯汀酒店，昔日總覺很有氣派，依家降左grade唔知有冇唔同左呢？



海灘邊的石階好似修葺得比以前靚了，仲種了不少樹，上圖由樹梢交錯之間望返出去一望無際的海灣，可能因為天色灰暗關係唔知點解竟多了一份「迷離境界」的神秘感覺！



又真係喎！無人的沙灘總有些獨特的蒼涼味道，對澳門來說算唔算係一幅難得的閒適風情畫……唔知黃金周果陣會唔會又好似西貢大浪西咁有好多大陸自由行來紮營和起爐燒野食唱歌挖沙摸蜆呢？浪漫地行完沙灘之後，係時候搭巴士返去酒店check-in攞房先！

法蘭度餐廳 Restaurante Fernando
澳門黑沙海灘9號