免費玩足上下半場@運動日

眨下眼又來到立秋了！不過夏日艷陽的熱力似乎絲毫沒有減退跡像，有藉口偷懶唔去跑步（驚中暑+蚊多）！

日日三十幾度高溫的八月天，戶外運動真係可免則免。但眼見條褲越來越著唔落咁點算好呢？唯一想做的運動就係去泳池浸下水囉！喱個禮拜日剛好是全民運動日所有政府體育場館都免費入場，咁抵玩要去游下啦！



基爾以往都盡量唔揀假日去游因為一定超多人，預計免費日情況更甚，咁就一於晨早去飲頭啖湯先。星期日流流朝早六點未夠就起身真係覺得自己超神心，連搭巴士都無乜人，去到泳池已驕陽高掛（7a.m.都未夠）！



鏡頭一轉已經游完出來了……清晨游早場果然係上上之策，大部份係長者阿叔大嬸之外其他人也較少，浸在水中人也精神涼快得多，但先決條件係之前一晚要早少少睡，因為驚清晨唔夠毅力起身！



朝早九點人潮開始陸續湧入，十時左右係時候要散水！臨走出閘前竟見到有個counter好似有野派，八卦埋去睇原來有快勞和書籤送喎，隻黃鴨仔咁靚咁可愛梗係帶埋佢返屋企！



星期日lunch通常同家人來這商場飲下午茶，之前話這裏會開吉野家咁基爾媽又話未食過想試下，就臨時變陣唔去茶樓了！不過可能新屎坑關係超多人排隊，條人龍排到出商場認真誇張，幸好不趕時間也沒所謂！

p.s.吃飽飽休息陣咁又去埋下半場，因為喱日健身室都係唔駛錢（有便宜唔駛使頸），初頭都驚人多但去到望下又唔算喎，最多時都係7-8人左右以星期日計可以接受呢！

書展速遊運吉@灣仔會展

記憶中近幾年暑假都無去書展了，一來無乜書要買，二來其實折扣也不多，三來怕了人潮汗味，即使有少少意慾逛逛但最終多數偷懶放棄！今年的書展weekend剛巧要返工，就順道過去八一八。

諗住一朝早就去，因為入場平D，也希望人潮無咁勁！但事與願違，一走上灣仔行人天橋已開始成條臭汗人龍打蛇餅（頓時頭痛），未到中環廣場其實已經想棄權走人……（上圖是入場後有浙江越劇表演，好似唱類似梁祝黃梅調之類！）



最可恨係想半途「速撇」都不可能，因為全條路擺滿晒鐵馬只能順人潮龜速向前蠕行別無他法。千辛萬苦終於捱到去售票處，幸好甚有效率（要讚）不用再大排長龍買飛，順利入場後稍稍嘆陣冷氣即上Hall 5，主力去睇新的運動消閒博覽。見到有得打機和教玩攀石的攤位都幾有趣，齋睇人玩左一陣（小朋友為主）！其餘就有超多日本旅遊展攤位，還有賣攝影器材、運動醫療和行山用品檔口。



齋睇無幫襯，好快出返去第二個大展廳……嘩！乜原來改裝變了個大餐廳真係好犀利，很有點一望無際feel，基爾食飽野來就無去八卦有乜野食，所以價錢也不太知平定貴，只借用了restroom之後就快閃。



去完廁所再穿返入去消閒博覽果邊，無意間見到間賣迷你模型的店舖，喱間甜品店又真係做得幾真幾靚喎（櫃入面仲有幾款蛋糕甜品！）



睇多陣其他模型，由於時間不多就要火速轉場，途中例必會路經這個大玻璃幕牆，每次來會展好像例必要在這裏影張維港靚相先走，今次天朗氣清當然也不會錯過機會吧！



轉場落返去Hall 1果個書展主場館，始終沒太大驚喜同以前來時基本上都一樣，來來去去都係逛那幾間慣見的出版社和書店檔攤。由於寒舍淺窄近年已絕少買書，來書展主要都係看看有乜新野出當係趁趁墟而已！



其中最想去八卦睇下村上春樹的新作《刺殺騎士團長》會唔會有折？網上書店見佢索價逾三百大元都幾貴，之前睇新聞已知佢被列為「18禁」要包膠裝云云，但點知原來書展竟全場禁售咁犀利，村上生如果知道會唔會傻眼？

周末日常之爽爽單車遊

夏天時日日30幾度驕陽似火，真係提唔起勇氣去踩單車，一來怕熱到標汗兼中暑，二來又驚晒到個人兩截色好異相！反而秋天就似乎與單車畫上了等號，趁住涼涼地又咁好天氣，點懶都要出去踩一轉吧！

慣常見的城門河景，係咪百看不厭！Weekend來到更加熱鬧，幸好這天沒有「塞車」的誇張情況，感覺上仍算很愜意，合乎慢活的標準。



望下山再望下海，另一邊就係濾水廠，之前有聽聞想搬濾水廠入岩洞，這大片空地又可以賣畀大財團地產商大賺一筆了，將來就不復見這片靚絕的海闊天空，先把這美景永久封存在基爾blog中吧！



再踩去畫舫果邊，剛剛連這座歷史悠久的畫舫也執笠了，聽聞好快又會改建為婚禮宴會場地，唔知第時船上會唔會有部份設施作公眾開放呢？



對岸另一邊是沙田馬場，小學時學校有去過彭福公園旅行的請舉手……嘩！原來真係都幾多人去過喎！沙田彭福公園同西貢大坳門和大埔大美督係咪可以合稱為「小學秋季旅行三大至hit聖地」呢？其實唔多明白點解年年投票最終都係要揀喱幾處地方去……



緬懷完小學秋季旅行之後繼續出發，沿河岸一路踩返去烏溪沙方向。唔係講笑喎！秋天單車徑旁的石壆上，原來除了有勁多人晒果皮之外，第一次見有人晾枝竹竿在晒咸魚添喎（上圖右）！記得春天時這裏又係晒木棉花的熱門地，整片紅花海都好壯觀。



好喇最後踩到來烏溪沙個小碼頭，點都要歇一歇睇陣吐露港靚景先。這天相信仍有23-4度左右，不少大叔大嬸都愛來這裏碧波暢泳，碼頭邊也有唔少叔叔來釣魚，加埋八八卦卦做塘邊鶴的基爾就更加熱鬧了。



心水清的blog友可能會問基爾做乜唔去影影個「海洋之心」？好簡單因為來到時剛好係中午潮漲時份，心心都浸在水裏了，唔好咁懶下次就自己踩單車來睇吧！

書裏人間@消失中的香港

少了寫blog有個好處是多了看書時間，某天看blog友又有好推介，上網check過鄰近圖書館正好又有喎，咁無得懶要去揭揭佢啦！

這本《消失中的香港》結集了不少精彩的畫作，將唔少令人懷緬的舊香港老街小店印象，以充滿本土情懷的線條筆觸定格下來……



記得書裏其中一篇序言有謂：今時今日攝影科技咁先進，數碼相機簡單按個掣就拍下照片又可拍短片，為何還要花咁多時間慢慢描素寫生？



但正如其中畫家所講，每幅街頭寫生作品，每筆每畫彷彿都是充滿人情味的撫慰，讓每個熟悉的街角、老舊的店舖和屋村都滿載回憶畫面……



一條又長又直的屋村走廊，沒住過屋村的一定不會覺得有什麼特別，還不是一條空蕩蕩的冷巷吧！住過就知這裏就是小孩的「百變playground」，什麼打排球打羽毛球踢波打樂康棋跳大繩跳飛機僕匿匿兵捉賊狐狸先生和何仔公……通通可以在這狹小空間上演！



走廊多野玩，公園當然也不輸蝕，返學前放學後又或者周末放假路經公園時，係咪總要騎上去這些大象鴨仔電單車搖兩野先肯走？基爾印象中還有馬仔鯨魚和飛機。記憶中見過有個肥仔搖斷彈弓，是童年影陰！



上面這間經典老牌冰室相信唔少人留低過腳毛，以前去BC看戲經常都會經過，後來知道它還成為電影的場景，不過印象中基爾只幫襯過一次咁大把，因為可能名氣勁，價錢一點不便宜呢！



這些新年掃街市集曾幾何時也hit過一排，不過唔知點解基爾自細已經唔太熱衷周街篤魚蛋燒賣牛雜炒栗子又或者雞蛋仔格仔餅碗仔翅之類，極其量就只買個砵仔糕袋返屋企先食。



這本畫冊最獨特之處係最後一章講傘運，馬路上的營帳雖然早就煙消雲散了，卻仍深刻地保留在畫作中……



感覺上這些街上寫生的用色和筆觸都比較沉重，相信除了呈現畫面之外，同時也融注了當時作者置身其中的心情！



這不就正好回應了序言所說，既然有了方便的數碼相機，為何還要寫生素描吧！看完這本畫冊你自然會找到答案。

金雞迎春之開年飯

話咁快又過了農曆新年，今年基爾無去行花市和夜市掃街（係咪年紀大了就怕同人逼湊熱鬧），到年初二就食了餐豐富的開年飯。

食年依然幫襯這酒樓的新春盆菜，舊年幫襯了一次覺得唔錯所以今年再買，也讓基爾媽不用煮太多賀年菜太勞累。不過今年這盆菜好似加大碼了份量十足（感覺上有成十幾kg），基爾長途托回家發現手瓜也有少少起展。反正吃不晒，明年可考慮買4人份量的就夠了。



雖說叫基爾媽不用大清早起來煮開年飯，但她仍堅持煲了螺頭花膠湯仲有必要的齋菜，又去斬了燒肉，豬利是基爾飛佛，但因為實在太多而且主力要消耗個大盆菜，燒肉和豬利幾乎也沒有吃（實在飽到上頸）。



仲要整多碟冬菇海參燜蠔士，能不投降了吧！幾乎只供觀賞了……按慣例這些賀年菜都是要不分早午晚餐食幾日才可食得晒，有餘有剩年年有餘正是新年的好意頭！尚沒有影的還包括芋頭糕、年糕和棗蓉糕（過年前做的蘿蔔糕已率先食晒），食到初七人日應是沒問題了。



吃撐了肚子變肥仔，少不了要多點去運動跑幾圈，此外看看圖書館借來的小說也是不錯的消遣！基爾年前看過《沒有色彩的多崎作和他的巡禮之年》之後已沒再看村上春樹作品，這次借到這本《沒有女人的男人們》短篇小說集原來已是2014年的舊作，全書是由7個獨男為主題的故事，貫徹了孤單灰藍的宅男式格調。似乎1Q84之後村上也沒有太大突破或令人眼前一亮的作品了，發條鳥三部曲已是宅男小說的頂峰之作，但人造衛星倩人中的迷人愛琴海和卡夫卡的夢幻式圖書館，還有1Q84的月夜，相信依然是村上迷的心頭愛。



話就話吃撐了，但過年前某次去巡數字屋，發現有這包泡菜餃子八折後只賣十幾蚊，咁就買來試下啦！基爾怕熱氣，一般食鍋貼煎餃之類也多是放湯或煮麵食，極少真真正正去煎，這包泡菜味只屬微辣，即使當水餃食也無不可，或許下次真的試試煎來看看，會不會有不同食法。



另外惠記超市過年前有獎抽，抽獎券揭中上面喱包水餃，不過要過年後才可以去領取，咁就留返年初二才去拎吧！不過由於實在太多賀年菜未食，暫時都未試喱包水餃，睇返佢正常價係賣成廿幾蚊，偏貴而且份量少只有十數隻，相信如果無特價就多數不會買了。

歲晚煎堆之聽金曲

農曆新年快到，又係經常聽到財神到、恭喜發財利市逗來、年年歡樂歡樂年年等傳統賀年歌的時候，如果想有點新意不如又摷舊CD金曲出來聽下當賀年吧！

摷返喱張Sentimental Gold Live in Concert的雜錦CD出來聽，奇怪在CD盒上沒有寫出碟年份，只印有Made in Australia的字樣，網上也查找不到……Anyway基爾向來都幾鍾意聽喱類live version的CD，尤其喜歡那種現場感和歌手的即場發揮，真係唱功有幾多斤兩完全無得偷雞，正如碟名話齋好多時都比studio version來得更有感染力。



講返碟中收錄的演唱會片段，主要來自80-90年代天王天后級歌手樂隊的現場演出，所以估計CD出版年份也不會遲過2000年吧！當中Whitney Houston就佔了3首，都是耳熟能詳聽慣聽熟的大熱之作I Will Always Love You、Saving All My Love For You和The Greatest Love of All，其中後者幾乎是全新演繹同普遍CD版本感覺完全不一樣，喜歡與否就因人而異，但當年全盛時期的Whitney唱功確係無懈可擊。



至於沙聲天王Rod Stewart也有首招牌的I Don't Want To Talk About It，同Michael Bolton的How Am I Supposed To Live Without You不相伯仲，好驚Michael Bolton再咁聲嘶力竭唱下去會唔會聲帶撕裂！可能老多十年八載會好似Rod Stewart咁聲沙都未定。



很久沒聽的Roxette、U2和Eagles等樂隊組合，向來都係聽現場版本比錄音室製作更出色，band sound真係聽live贏晒更加有power和氣氛，識聽真係要聽喱D！另外在月初紐約Time Square跨年尷尬演出的Mariah Carey在碟中也有兩首，分別係翻唱Air Supply的Without You和Michael Jackson的I'll Will Be There，很難想像堂堂Diva都會在新年show失手。



相比之下，All 4 One的I Swear和Vanessa Williams的Save The Best For The Last已經算是唱得比較「一般」了，提起後者又突然醒起The Adventures of Priscilla，戲中唱了好多好聽的ABBA金曲，澳洲中部的沙漠曠野景色也很迷人，是很經典的一套音樂片，可惜近年似乎已經好少再在電視重播了。

歲晚煎堆之蘿蔔糕

話咁快又就來到送猴迎雞的農曆新年了，係時候每個周末放假都要抽時間逐少逐少大掃除（驚留到年廿八先一次過做會勁辛苦）。其餘時間就做D過年必備人有我有的手作仔，整蘿蔔糕就是當中的首要重任。

翻查大典，其實幾年前基爾早已寫過整蘿蔔糕的網誌（仲好有心機好詳細咁寫晒每個步驟，真佩服自己），所以今次都唔再逐個step寫咁煩了，有興趣翻看跟住整可click入舊網誌「蒸蘿蔔糕」。



不過如果完全唔寫齋post相片又好似唔係幾好，咁都簡單寫少少當作caption。按照慣例（基爾媽秘傳口述食譜），做一底糕約莫都係用3支大白蘿蔔（重約6斤左右），通常用上面這款三象牌的粘米粉較好，一整包600克，約用三分之二包已足夠蒸一底糕有餘。



照辦煮碗依舊先將白蘿蔔刨成絲再蒸熟，另外再炒熟蝦米臘腸小元貝和蔥花作餡料（更傳統的會加埋臘肉乾瑤柱等）。基爾媽口述秘訣係粘米粉混入蘿蔔時要分段逐少咁加，搞勻循才再加粉和餡料，務求不會結成粉團。



最後同底糕扮靚少少，預留返少量餡料鋪在糕面就大功告成，係咪好有專業水準呢！之後再拎去隔水蒸大約1粒鐘已OK。其實平時去飲茶時，基爾都間中會叫蘿蔔糕食（因為平時懶整，只有新年才會的起心肝去整），不過總覺得茶樓食果D唔太好食……



一來可能因為自己整始終比較真材實料，二來落雞粉和鹽、胡椒粉調味可按個人喜好完全是tailor-made，一定無得輸！幾乎忘了告訴大家，基爾其實係典型的「蘿蔔糕控」，飯唔識煮都唔緊要最緊要學識整蘿蔔糕，即使過年前後每朝早食蘿蔔糕做早餐都不會食厭，可配碗粥、磨菇海鮮湯咸麥皮，甚或來一杯鐵觀音清茶，對基爾來說已勝過任何珍饈百味了。

書裏人間@多田便利屋

依家睇電視劇好多時都只係得啖笑，試過睇大台兩線劇無獨有偶都係豪門恩怨式的爭產勾心鬧角，睇到人都癲又悶蛋，似乎又係返樸歸真回歸看書的日子……

讀書網誌一般「收視率」不高，基爾也只打算簡介做個記錄就了事。今次看的是近年日本大熱女作家三浦紫苑（曾獲直木賞）的兩本省招牌代表作小說《真幌站前多田便利屋》和《昔年往事》。



基爾之前因為看過其他blog友寫的書介，才去圖書館借這兩本小說來看。相信愛看日本電影的應對三浦紫苑這名有點印象吧！之前上映過的《戀上春樹》和《字裏人間》就是改編自她的名作《哪啊哪啊～神去村》和《啟航吧！編舟計劃》。



三浦的短篇小說《你是北極星》和《月魚》之前也看過，感覺上風格與《神去村》和《編舟》都很一致，寫人情細膩得來又有幾分幽默，與電影版一樣都有不少令人忍俊不禁和會心微笑位。首刊於2006年的《真幌站前多田便利屋》可說是三浦紫苑打響名堂之作，除了小說仲有漫畫版，還曾翻拍成電視劇和電影（由瑛太飾演老闆多田啟介），故事主要圍繞兩個中年失婚男開設的便利屋發生。



日本的「便利屋」有別於香港的便利店，簡單而言可以理解為一種街坊式的雜務店舖，除了慣常的修理水電，還有替顧客打理花園，甚至接送學童、照顧寵物、統計公車班次等，確是很神奇的經營模式。三浦筆下兩個失婚男背後各有不堪回首的人生故事，一次巧合相遇後竟一同生活起來，還一起面對各種古怪客人的古怪委託，看盡人間百態之餘，漸漸成為互相扶持的摯友……突然醒起《深夜食堂》，《便利屋》也很有這類細膩人情色彩，只是主角改成了「雙人版」。



趁放假期間迅速睇埋三浦紫苑另一本作品《昔年往事》，同樣是看了blog友書介再去圖書館借來看。小說的結構甚特別，全書以7個非常經典的日本童話故事作引子（包括有輝夜姬、開花爺爺、仙女羽衣、浦島太郎、頂缽姬、猴女婿以及桃太郎），延伸出7個重新演譯的故事，都是圍繞隕石墜落地球前3個月的「末世風情畫」，世界末日雖然是虛構的，但每篇故事都頗耐人尋味。當中比較長篇又是最後一章的，是由桃太郎延伸的「令人懷念的河邊小鎮故事」，講述叛逆高中生桃子與3位好友（儼如跟桃太郎去鬼島降魔服妖的狗、雉雞與猴子）在這個「最後暑假」中的共同經歷，故事講的友情與人性矛盾還有因果輪迴，也很有點發人深省，而且與首章「無愛」中的黑幫人物竟也有點巧妙的首尾呼應！



另外，基爾覺得由頂缽姬作引子的「抵達為止」講變性人的士司機載著整容女乘客遊走死城街道的故事，很有深沉的末世feel。至於由仙女羽衣引伸寫成的「距離」（講述回憶與叔叔發生不倫戀的故事）；由輝夜姬變奏而成的「無愛」（講述紅牌牛郎被追殺的故事）；還有與開花爺爺呼應的「火箭的回憶」（講小偷巧遇昔日中學同學，再去幫他爆竊前女友的家以解開失戀心結）……這7個口述故事都會錄製成CD帶到太空去，至於最後這些故事人物能否搭上飛赴火星和木星的大逃亡方舟太空船，似乎已不是重點了，反而令基爾更深徹體會到的是故事背後組成的浮世繪，好明顯沒有浪費了美好的聖誕新年假期吧！