又係時候歇一歇將個雪梨放入雪櫃先,快快手寫幾篇巡館記再算!今次快閃Check Point 1先來看看由必列者士街街市活化而成的新聞博覽館。
![](https://blogger.googleusercontent.com/img/b/R29vZ2xl/AVvXsEg9vfM3CWcGlaWeQYT4Mm5B9_D_HBv_CpYvGMx5vjGPcbXo_JaTX1JJLSgLSTdWRoLlMoIUuD4kxXLWrqggsVOobynqSIo9VeSTT0BGyECWFSZ25wigk10jwNYc3y4O2YVURKngbyvDKCk/s1600/1_newexpo1.jpg)
3:30pm │ 好長一段時間沒去過中上環因為都好山長水遠(好懶搭車),這天終於的起心肝因為約了舊公司同事年度飯聚,反正都過開港島區就去巡一巡上圖這間新館。應該唔少人已經去過認得佢個門面,沒錯就是去年底十二月才開幕的新聞博覽館。
![](https://blogger.googleusercontent.com/img/b/R29vZ2xl/AVvXsEj5nR0-LhErvp43Lp47MFpY9Ijabt2kqGiy-mEyIKvA5PkpV8shG91XHrhiCxwzCn_8kpAijVvU1D7mFqGcNZgGydGB2UeQJiU-VB2WOhttR2ahOPVfEAz4SUkNQMj6T0DNELAez6-SRTw/s1600/1_newexpo2.jpg)
3:33pm │ 由於在家裏mememormor(這是基爾常態)搞到預留巡館的時間只餘三句鐘左右,但目標是去勻中西區三間館(因唔想之後再花時間搭車來),所以一定要抓緊時間,頭一站火速入去新聞博覽館打個round先。上圖是地下果層展出的電視台新聞記者用的咪,相信大部份人都唔識佳視果支咪吧(傻啦識都話唔識)!
![](https://blogger.googleusercontent.com/img/b/R29vZ2xl/AVvXsEgmNkFkJKokYE1HOExlDmLfpEIsdAOlpU_rKgnwxxEynA8dU-ocKs9AtjQuqQs59JLYUlct2wGCP4jbuagG9kFmvTPBIeeZNASMjj96_RzedG3fSNAsemJ-IZMwQDbEFtW93wCn1jDQxIw/s1600/1_newexpo3.jpg)
3:45pm │ 算把啦……咁上圖這份《循環日報》應該更加無乜人見過!睇返資料話這份創刊於1874年的老字號,是香港開埠後首份由華人創辦的報紙,直至六十年代才停刊。
![](https://blogger.googleusercontent.com/img/b/R29vZ2xl/AVvXsEhUjuvuu4QBlgHiolA0COhJawOw4oUtto0ZmufVWanRJHqloZ_SDNEtze_5SOApjF1aGZqaL4nnJTie1-vk0ckbKT4J-Cp7d-uqKCsM8P3cuCVy2oT-4pQvbbLF8QGRaXgJ_5z6EkoLSHU/s1600/1_newexpo4.jpg)
3:52pm │ 除了電視台舊咪和舊報紙之外,館內仲有唔少關於傳媒的舊事舊物可看,例如有新聞攝影師抬出街採訪拍攝用的攝錄機,仲有好大部的古董錄音機,全部看來都甚具份量。當年應想像不到半世紀後一部手機就可取代咁多重裝備吧!同場仲見有學生團體來參觀;右邊黃色果塊展版講述當年一份報紙的售價與同期物價對照都幾有趣,唔講唔知六十年代一份報紙只售一至兩毫,同期一支可樂賣三毫子,而戲票一張售一元七角。
![](https://blogger.googleusercontent.com/img/b/R29vZ2xl/AVvXsEizjMBHg6eQA0kb0PeFtNpM7fdgNCmjeaOJMRx3xxMXkEryl88y8FrlTlDuX7uPK2x5jhXly7Q8yGlM9XylnSUMr97XlHbkvCU6KEgdpwERGA85R_j5GpM3Ith4yD5WmiytrV2vrfchr9U/s1600/1_newexpo5.jpg)
4:03pm │ 另外上圖這個新聞界大事年表都幾多野睇,由十九世紀《循環日報》創辦,一直至前年的奇妙電視開台(依家改了名做開電視)都有介紹,傳媒百年滄桑歷史就濃縮到一塊展版上講晒。
![](https://blogger.googleusercontent.com/img/b/R29vZ2xl/AVvXsEg0EuaJDqdNyVgNPsRHPz1Mfc98BSa3QrOD0dRoXCQflpLJ64_WWuzJUgvqNTdYH2xAk8OxzIvw9204TW3brBj5uTRdi5RPaQdNjlf504GBxXiXZwTRvBn8duSbxrX5r5zwSSRjugzYExA/s1600/1_newexpo6.jpg)
4:06pm │ 唔敢花太多時間逐一仔細睇展品,只揀選覺得比較有趣的才詳細睇,例如上圖這個是介紹二戰前到日治時期的新聞管制和審查,報紙不得刊載貶斥日本的字眼和文章,所以經常有新聞被抽起出現開天窗情況。
![](https://blogger.googleusercontent.com/img/b/R29vZ2xl/AVvXsEh9viKwMgjgNJ3z-Zs2mq26EGakFUqcNgEu2hUCUT9xCK6jqJRV7HlUyafymu37d3qkgffsxpuqCf4jPxWs6_ASRBw5ErGYkOSmKsieb6ztckNLX7HjRyuy5_rlojNTmLb45lhIFSi6znM/s1600/1_newexpo7.jpg)
4:10pm │ 時間不多火速上埋二樓參觀,基爾其實對這幢五十年代舊建築的興趣更大。好耐以前這裏未變成博物館前,印象中已曾路經過這裏幾次,以前還保留了街市檔攤的石桌間隔之類,依家當然早已拆走大部份,只餘下少量檔攤舊貌保存下來。
![](https://blogger.googleusercontent.com/img/b/R29vZ2xl/AVvXsEiCmIZeoUJYXIMFFU4GS9kg57L3LZU0rywCtdsau-gu3CDhSJj4VoflxQkvTplCgKnRJvth6Wiyry-85hxFtWzU_bC2inz1Eh6oEcsULDGL00BF8SV6idymOBD579klA0QLYN9rHmmnqpg/s1600/1_newexpo8.jpg)
4:15pm │ 比較有趣是上面這個跳飛機,街市都有得玩跳飛機又幾有趣,係咪畀小朋友跟阿媽去街市買餸時有得成班一齊玩下唔駛咁悶呢?聽聞以前這裏也曾改建過成為公園休憩地方,咁有跳飛機都唔出奇……不過話時話係咪已經唔係咁多人知跳飛機係乜?
![](https://blogger.googleusercontent.com/img/b/R29vZ2xl/AVvXsEh3VbQ9z6o7WRwlB3Pi7UdBASJMLIuOdxSOb8nQCQv_4BmwVJdFzvHEiXCw9M34QszuF58oLcC_WgERTc4qEq-V7CqouTuOooaiNfBZrMrNOpAHC27OTuUgFcbQNez1mqV-emwwQFnTJXg/s1600/1_newexpo9.jpg)
4:20pm │ 老人院時間到此為止,都係加快少少速度巡一巡二樓有乜睇。二樓其實地方都幾大,間隔成不同空間用來展出唔少昔日的新聞圖片,有暴動的火紅年代也有制水和颱風,不能少的還有中英談判和回歸新聞,當然仲有抗疫和股災的歷史……巨細無遺包羅萬有。
![](https://blogger.googleusercontent.com/img/b/R29vZ2xl/AVvXsEi8p8ZLLZxyVPxmDqWmYzDe82H6wYfqaFS7Ow9DxFarBpb5iOBkvHtMj70nPyZ7ui4f_RZTVw8SNuZ040V8L26tavKUuExGABqHl9uQNJISJoYzwfz88k5LS1iewNlVAgOW3WLIckjQtY8/s1600/1_newexpo10.jpg)
4:23pm │ 全館整體而言算是比較細規模,特別的展品也不算多,其中上圖這個「當日頭條、今日歷史」展覽感覺上較有互動性,那其實是一座大型投影器,只需站在前方用手上下左右揮動,便可重看很多經典的報刊畫面,比齋睇展版有趣。