是日看來天氣確實不錯,那就無謂浪費了南半球這美好的藍天白雲與碧海時光,上午去逛過雨林看過瀑布之後,下午又駕車去看看海吧!
![](https://blogger.googleusercontent.com/img/b/R29vZ2xl/AVvXsEjb2UGyMYCf6eP4R8ssyYI_0nXeQBuhmGLwbbtTDxdV5Mj4XZ-KS3h1MGRc1grQoLuqMOHnRng9NoLL3D_FJZVzyU8KfbDkDYwvr6edyLQjhghyphenhyphenEIfrC8k5-cd2CifdD7nwGBZyeGxfHsc/s1600/1_AUS_H1.jpg)
Nambucca Heads這裏面向一望無際的南太平洋海岸線,不少當地人夏天都愛來觀潮又或者在內湖區一帶釣魚嬉水划艇之類,享受各適其適的水上活動,不過外國旅行團似乎就較少會來到這種偏遠地方(又或者閃令令旅行書都很少介紹到)……
![](https://blogger.googleusercontent.com/img/b/R29vZ2xl/AVvXsEhIf_I1DVXo4yhNiel4YYaHPThdVS2NBhcaDl-KwIZYHk14UFtcLC2339vPvfN_fH-ZnuuSiXfkrPtf5SRrp-oYCvNSCsAXzdxnC8AAo0BRFo_h6v6Y7nsWexGl68rn-5qo8NFpRTs1fe0/s1600/1_AUS_H2.jpg)
姑勿論這處濱海勝地是否所謂的地道「秘景」,對基爾而言最大好處咪就係可以優哉悠哉唔駛同人逼,而且搵位泊車(無料駐車場)也非常方便,是個好好享受「靜靜雞」旅行的理想地。
![](https://blogger.googleusercontent.com/img/b/R29vZ2xl/AVvXsEji3jf728JDLyUe5P1LcZGivehAyXLsIakGBumGFhyfkgPguIpXPS-2hD7Tkajo1vWXFPLelYcG4txp7V1x12SmK2LXK1vG3loVxc_cb9ZrRQb0FfreLQ1Y_5_o_itB9BLPAV7IsaDxaIc/s1600/1_AUS_H3.jpg)
來到這裏除了可以好chill咁沿住著名的地標海濱長堤邊遊逛之外(當然先決條件係唔怕烈日當空曝晒),基本上就沒有什麼東西好做了,因為這裏四周好像也不見有什麼大型shopping mall或者熱鬧的食街,正好是讓心靈好好放空的清淨地(咪講到懶係好spiritual咁啦)!
![](https://blogger.googleusercontent.com/img/b/R29vZ2xl/AVvXsEjtTxFKmlCv1L4OtbUPwKTcuqCxloIrHgMPuWX4HQfxMvnd8_mQkQDAbIYY30cEezZPP1OHomjRvEpT7gTKmUcnO9iPa6QrxMwdGVDUDRKyZRY2YmD023wB3E8eb2Uhs9VTRLAG_NKTZC0/s1600/1_AUS_H4.jpg)
基爾眼見目測河流出海口這一帶湧浪水流都頗急,而且也有告示牌警告遊人不可落水啊!雖然晒係晒D,但留在岸邊享受來自太平洋的海風送爽,已夠晒愜意了(要幾hea有幾hea)。
![](https://blogger.googleusercontent.com/img/b/R29vZ2xl/AVvXsEjgd-VIySUtNC55yx56gASHJ9Is9lTV0rLIN4dy5mtdMMMldvTign_EU0bPBK15VL4sd6j8I7Y2qAiFBWD1zyPx8EpeYPJl-pTM8P6W_oftD0I5LloaXPdsp8srRwaYsx3yqh7R1Uwgnls/s1600/1_AUS_H5.jpg)
睇了幾張基爾影的岸邊靚相(事先聲明本身這裏的海濱風景就是美,不關基爾水皮攝影技術事)之後,可能已經有眼利的人想問:做乜喱度有咁多五顏六色的大石塗鴉呢?
![](https://blogger.googleusercontent.com/img/b/R29vZ2xl/AVvXsEifeEMALtZAUBovWrigIom_5Re-PLCfw6MC2nt8aqk1OkRmVbRJPrTB6hhMEPG6qtnf4E1afk-01nticbD5RHTweSS68x4Iz71695DIIEwl6fJHKA1r_b3J7iuUs9JiZDFW9ZVtiFIxIgc/s1600/1_AUS_H6.jpg)
卯錯!來Nambucca Heads除了是迤逛海濱長堤看看海景之外,最主要就是來參觀這些防波堤大石塗鴉,沿長堤走見到不少乜水乜水邊年到此一遊的彩繪,有些甚至已有十幾廿年歷史。基爾覺得上圖這幅用不同藍色瓷磚拼湊出來的海浪馬賽克也頗具特色呢!
![](https://blogger.googleusercontent.com/img/b/R29vZ2xl/AVvXsEgZ8rVrC3b82-4O84UE1cDixQBHcGG5pTqIXZw0a6GDfTNwwN9wRRCH0oxQ6YHWdhUxOfQdAjUjSjLFsiOaqXaRyNXctZBn_LhQhh9Xwvc-GfuSG7xBOLbknalOznGj1gGVUsyLgQaShbw/s1600/1_AUS_H7.jpg)
另外,上面這幅「小孩與海龜」(純粹自己無聊作個題畀佢)睇落也是甚有水準之作,不知是否出自大師手筆定還是某位隱世名家的傑作呢?總之感覺就是與四周的海岸風景融為一體襯到絕呀!
![](https://blogger.googleusercontent.com/img/b/R29vZ2xl/AVvXsEjR5c-I0PuquYLZYrfiUm2SfSqFebch53H3l_qDafWbWSHBu_uBcaaudyW9xaedSdF2Bi1NO-nZJUhrUP056uAwN2pjpo5zBdwUaOGDB1rnkuZZpoNBiYSsCwVk8RNcZFL7MZnSp40yZMU/s1600/1_AUS_H8.jpg)
在芸芸眾多靚石畫之中,仲見有舊藍得來又相當搶眼的澳洲國旗石添喎!其實這處塗鴉長堤有個名堂叫作「V-Wall」,上網search看看原來都有唔少人去過影相打卡,唔知有冇西營盤樓梯街那些壁畫咁hit呢?
![](https://blogger.googleusercontent.com/img/b/R29vZ2xl/AVvXsEiIlmE_5-axeuMQ3ZH327apOq2JefwpOYtjNlqRIQ6x8EmjFbe9YdhGvsMyKVNWjjVfb2fDrXFZpybiHp6K_fFx5m9APrqZ6BBUu_V0tgxvNN4dOs1FIKh1oj3PuRd8SpbrBwZNTXe7igk/s1600/1_AUS_H9.jpg)
沿住全長500米的防洪堤壩一直走到盡頭會有處小沙丘,不知這些海沙是否由太平洋遠處吹過來?唔知係咪同日本的鳥取沙丘屬同一類大自然奇觀呢?要注意這裏也有樹立危險告示牌,警告遊人不可在這裏跳水或游水!
![](https://blogger.googleusercontent.com/img/b/R29vZ2xl/AVvXsEjvjx3f4UuqkAUp81k0Y_nYVCQVK4k-ow77rJ3NPzvQz9iY_Q-gW1on-xPUClxdiNNgj6NHY_JlbnJU3rRODZsy7b0YrxIinf97sb_D1w1YlHJTTTYap3wpYnwfjGx-1AncC4-gzVy1RYw/s1600/1_AUS_H10.jpg)
沙丘隔籬仲畀基爾發現了一條貌似行山小徑的「秘道」叫做Nyambaga Walking Trail,睇佢樹立果幅小地圖應該是行入去裏面的內湖區,見唔多蚊咁又入去八卦下先!
![](https://blogger.googleusercontent.com/img/b/R29vZ2xl/AVvXsEgmFsI7WxMZmQPdP18fCxJ5JrnHQSJMtxOF_L_aq64-y0vROpn_DnHDClTmwjNghYwiHA3Ev022_KkcnE-FHTrZBpDDMJErRMWwfM9AURbOJV-ZKNd_E97FKXptQfYxmOX0XxvNLnB6Rj8/s1600/1_AUS_H11.jpg)
唔入去由自可,一入去就發現原來風景完全不一樣,這邊明顯風平浪靜波平如鏡得多,同外面長堤那邊凜凜海風幾乎吹甩髻彷彿是兩個世界。見湖邊仲有一排屋仔,唔知係咪有錢人的度假別墅定係resort之類?
![](https://blogger.googleusercontent.com/img/b/R29vZ2xl/AVvXsEi7tRT9gFW-h1TiAsbhJyszUAQYPwBhSOfjbkOkwfCpMIo23k9q5lOutYWcOyPMKaZcSYqUnIGQvGtCL36yE1yrdFL1WuKqtkA45kF4eEEolaP_ytAiTyDM9c5tbzcYQBndJGy3-nmpFOs/s1600/1_AUS_H12.jpg)
總之成個畫面感覺都幾有隱世桃園feel,只見三兩小孩手拿小魚網在湖邊涉水而過,聽他們好像在談論去找什麼石罅泥洞之類,看看會否捉到蝦仔蟹仔……如果唔係怕濕腳基爾都想去玩下喎!
![](https://blogger.googleusercontent.com/img/b/R29vZ2xl/AVvXsEhO_tPhW1gcOBUrSrbusZG4bcoTkB_4CFrinlcw4oWEA1q_bAIjdrIJes4dg0Rvtta2A9ieP75CqrqFQicIwrJkCgySoWc6sIqt-XPOhVW2J_KlF4t-PeP_u8WrgLcJDSRgOPSXGdCEzGo/s1600/1_AUS_H13.jpg)
在世外桃園遊走似乎時間過得特別快,轉眼間日落西山又係時候要講bye bye!之後又坐車返到去住處附近那個大型商場看看仲有乜食店會開。睇睇手錶雖然才不過傍晚六七點鐘,但果然大部份店舖都閂晒門,四處都水靜河飛,只得返間Woolworths超市有開!
![](https://blogger.googleusercontent.com/img/b/R29vZ2xl/AVvXsEiNSxGlbZoaft9QmWHHGIAgg9tfahDLZRqsxYKCHZPmQcoR7r2v51D7GsN8JIK1WSH2u4IIzh35tJJ0VNbwziHak3DrQIOoJDeHFicBk5sSCUi0rBJXA9p4Ha4vujwpQZ3I7x6rzDFJTwo/s1600/1_AUS_H14.jpg)
人地話明係大節流流聖誕前夕,大部份店舖原來晏晝三四點已陸續close了!(如果換轉係海港城在23、24號靜成咁會唔會有D驚?)莫講話食肆food court,連上圖這間無記錯似係蛋糕麵包甜品店都全部清倉無野賣。
![](https://blogger.googleusercontent.com/img/b/R29vZ2xl/AVvXsEhvt4ebDjlyfs4voVgwsXKy9ZfMdqPAWPqomfXnh_DnVdOrbZRvX9PCT5iNk8fXQvwEb-ZWI76LUjYZQ4z2npPeDT6JOIX5Pbag41Z4FIPRaRe6ST2lh_15FLaP0hfTJnAUtTWXH2e8M9E/s1600/1_AUS_H15.jpg)
好彩住處已預早入定足夠糧餉,再去超市買多少少新鮮蔬菜同埋少少冰鮮肉和生果、麵包先返去煮飯都未遲。不過唯一仲有開的這間大超市都係好靜蠅蠅,不論顧客和店員都唔多見,唔知點解總有少少明日之後feel!
![](https://blogger.googleusercontent.com/img/b/R29vZ2xl/AVvXsEiXZppr4yOGVbJYJJokMXNn_IglkUgPvToZCGA4nntiZLtMc0fXUUFIvPe15rCxYg4zJ4MPPhPbsDXTlpfJU1la5bsWyJQfjxq6SpfqhZ1Ri0JA3fsIuMLK0G_p49qHrnxHQl1EMXgQoqM/s1600/1_AUS_HM.jpg)