6月點唱機@no.1黃韻玲

過去讓它過去 來不及
從頭喜歡你 白雲纏繞著藍天
哦……如果不能夠永遠走在一起
也至少給我們懷念的勇氣 擁抱的權利
好讓你明白 我心動的痕跡……

1.心動
主唱：黃韻玲、馬海生 / 作曲：黃韻玲 / 填詞：林夕

聽別人說70-80年代的台灣女歌手都有一種獨特的氣質，如果有聽過《忘了我是誰》的王海玲，又或者《我踏浪而來》的沈雁和《橄欖樹》的齊豫應可略知一二，而黃韻玲肯定也是這派傳人。雖然今時今日人有認為這種風格早已過時了，但基爾仍偏愛這種獨特韻味。黃韻玲由80年代至今一直沒被遺忘除了因為唱得之外，最主要還因她曾作過不少好歌。林曉培原唱《心動》時基爾已經很愛聽，原作者重唱又有另一種感覺，直至最近基爾才第一次聽到這個合唱版本，確是神來之筆值得推介！

結束忙碌的一天 換回熟悉的寂寞
懶懶的躺在沙發上 像母親溫暖臂彎
轉到昨天的頻道 讓聲音驅走寂靜
總是同樣的劇情
同樣的對白 同樣的空白……

2.是不是這樣的夜晚你才會這樣的想起我
主唱：張智成 / 作曲：蔡宗政 / 填詞：陳本瑜

之前彭家麗翻生hit過一輪之後，又令人想起這首歌名超長的首本名曲。基爾對原創國語版本沒太深印象，翻查資料才知原唱是吳宗憲，幾乎也忘了吳原本是歌手，只記得他與庾澄慶做過電視節目主持。至於最近基爾聽電台節目先知原來還有張智成這個翻唱版本，覺得不論編曲和演繹水準都比舊的彭吳版本優勝，為這首有廿幾年歷史的「老歌」重新賦予了生命。

其餘翻唱心水：3. 熊天平 假如 / 4.齊豫 女人花 / 5.胡彥斌 你怎麼捨得我難過

香港大學校友會@中環

之前聽友人講喱間HKUAA會所飯堂唔錯，但由於是members only，要先入紙申請個alumni會籍。結果搞來搞去又要補交資料，等了成個月先搞掂，喱晚約齊腳終於可以去試下。

HKUAA位於中環心臟地帶，見到Coach大招牌沿德己立街行上去不遠見到隱沒在鬧市裏的小招牌。



上到會所飯堂由於係位於商業大廈內，地方沒有一般酒樓大，感覺介乎傳統酒樓與私房菜格局之間，由於台數不多，之前試過早一個月預訂紅字日子也爆滿，閒日可能會好一點。



除了要訂台之外，部份菜式也要先預訂，上圖兩款是毋須預訂的金銀蛋莧菜（$100）和粟米班塊。其實看menu見價錢一點不便宜，幸而味道算是ok。



由於事先已看了網上食評做定功課，上圖喱味菜膽杏汁白肺湯（$120）說是這裏必點菜式之選，味道也是中規中矩沒想像中咁大驚喜，也可能由於冷氣勁關係，湯稍嫌不夠熱令它打了折扣！



訂台時要先預訂三味菜式，包括上圖的喱味鳳尾蝦多士，雖然份量稍嫌少但夠香脆新鮮熱辣又不覺油膩，難怪網評說是必點「招牌菜」，果然沒令人失望。



這次沒叫白飯，因為之前已預訂了上面喱個貌似糯米雞的荷葉飯，份量非常夠，足6個人食。由於是用荷葉包飯蒸所以飯裏也充滿了荷葉香味。可能基爾食慣清淡，若荷葉飯的調味輕手少少更佳。



再來就是上面這味菠蘿咕嚕肉（$100），基爾其實向來出街食飯都極少點喱味，因為家裏的基爾媽煮得太好味，街外吃的咕嚕肉一般都唔好食又多色素。不過HKUAA喱度又煮得唔錯喎，拍得住屋企的味道。



本來想預訂古法鹽焗雞但訂台部阿姐話冇（冇解釋原因），話炸子雞其實都一樣（真係？！！），咁求其啦訂半隻炸子雞，雖然「鹽焗」變了「炸子」但雞本身的味道和肉質都唔錯。埋單計人均$190又唔係想像中咁貴，而且唔駛限時限刻交台，想雞啄唔斷傾足成晚兼嘆冷氣也不用怕被趕走，如果是搞gathering也是個不錯的落腳地。

香港大學校友會 Hong Kong University Alumni Association
中環德己立街2號業豐大廈101室

2Q13秋見信州@白川公園

「小心翼翼地摸索著大約是通向前面的小路。樹木越來越威武挺拔，周圍的空氣密度越來越濃。頭上樹枝縱橫交錯，幾乎看不見天空。剛才還洋溢在四周的夏日氣息早已消失，這裡似乎原本就不存在什麼季節……蝴蝶從樹後飛出，款款地在空間移動，重新消失在樹後。」

每次外遊特別容易感受到何為「快樂不知時日過」！話咁快就寫到喱次日本信州之行的最後一篇網誌，在名古屋最後的大半天又有乜野做好呢？



本來諗住搭地鐵再去行一趟名古屋城，不過最後也是作罷，一來唔想太趕來去匆匆（計算過來回車程連參觀城堡只有約2小時），二來慳返D入場費和車費可以lunch食得豐富少少吧！索性就在酒店附近行陣街，部份友人去了百貨公司最後「血拼」，當然分頭行事之前必須先去酒店隔籬買定機場巴士車票。



酒店喱一區其實除了多百貨公司外（包括之前去過的高島屋，還有以前香港都有的松坂屋和三越等），原來仲有幾多公園，例如上圖喱個大型噴水池就位於久屋大通公園的愛之廣場裏，這裏還可望到遠處聳立的名古屋電視塔。



這個久屋大通公園本身確實也內有乾坤，它的地底其實是個多層停車場，大大方便了附近金融商業區上班族解決泊車煩惱。上圖這個貌似紙船的雕塑就建在其中一個停車場出入口上。



由此可見日本人設計公園也別具心思，事實上日本的大城市其實同香港一樣都係寸金尺土，若要在市中心黃金地段起個咁大的公園唔畀人鬧爆浪費土地資源才怪，若內裏原來是停車場就更實用。看來香港政府也應好好去取經……



由於基爾無打算跟友人去血拚（帶來的旅費已用得八八九九），所以穿過久屋大通公園後就分道揚鑣，基爾反而幾有興趣繼續行入去附近D橫街窄巷，睇下會唔會有意外收穫……果然行過幾個街口就見到間古老寺廟。



看門口豎立的告示牌介紹，這間木建的古寺名為勝鬘寺，始建於1573年（約中國明朝萬曆年間），屬淨土真宗大谷派的佛寺，原建於古代信州的清須城，後來藩主將屬地獻歸德川幕府後，於1632年（約中國明朝崇禎年間）獲賜名古屋現今領地重建勝鬘寺，現時寺廟的山門及太鼓樓仍保留300多年前江戶初年的原貌，已列為名古屋市的文化遺產。



睇完古寺之後，繼續睇住地圖行過去白川公園，不過原來個地圖的scale唔係好合比例，結果問了幾個嬸嬸和大叔先找到公園所在地。其實公園的環境也頗清幽，仲有幾棵正在轉紅的楓樹呢！



來到白川公園其實主要係想睇睇兩間博物館，先去看看上圖這間名古屋市科學館吧！單看建築物外貌似個凌空的大圓球就夠晒特別了（至少比尖沙嘴科學館特別吧）。翻看資料介紹原來這間新科學館是2011年才開幕，大圓球是目前全球最大的巨蛋天文館Brother Earth，直徑達35米。聞說館內還有模擬極光和9米高的人造龍捲風讓遊人親身體驗大自然的震撼力。



科學館門票才￥800，其實也不貴（可以睇人造極光和感受龍捲風喎），可惜基爾時間唔太夠，只好在門外看看其他展品吧！上圖喱兩架古董電車和蒸汽火車頭對向來愛看懷舊野的基爾來說就相當吸引。



上面喱架是1936年製的名古屋市電1400型電車，基爾其實都幾鍾意搭喱類古董單層電車，上次去北海道函館時仲見到古董有軌電車穿梭市內；至於名古屋就早已淘汰了，只留下這卡擺在博物館前作古物展覽。



至於喱架B6型2412號蒸汽火車頭也很型，原來這卡火車頭來頭不少，可追溯至1904年明治時代的日俄戰爭，當年主要負責運送軍事物資往前線；二次大戰後轉為民用，主要行走中央線、武豊線和高山線，直至1968年昭和四十三年才退役。



除了睇火車和電車之外，科學館外仲有一支很巨型的H-II型衛星發射運載火箭，是日本首支自主研發的液態燃料火箭，於1994至99年間共發射了7次。



科學館對面這間美術館相對上就比較失色，館外不見有什麼特別的擺設，如果擺一些戶外雕塑相信會加添不少藝術氣息，若單看外觀，可能還會誤以為是間體育館。由於不夠時間無奈放棄參觀美術館，繼續在白川公園四圍逛多陣吧！



公園裏最矚目的就是這個「虹之舞‧白川」大噴水池，是1991年為紀念中部日本放送啟播40周年而建。白川公園於1945年名古屋大空襲時被夷為平地，戰後由美軍駐紮，至50年代後期才歸還日本，由名古屋市政府改建為公園。



見時間差不多，都係時候回程返酒店拎行李，不過路經橫街時發現喱間「自助式」食店，見價錢好平就入去食埋lunch先。食店入面有一整列長長的食物櫃，睇中想食乜就自己拎，湯飯冷盤沙律隨意，擺滿托盤就去畀錢就可以了。上圖右基爾吃的這碗章魚飯才¥280，平過食大記。



食飽之後施施然返酒店，先去reception拎返朝早寄存在這裏的行李吧，去血拚的友人邊可能會咁準時返到，幸好只遲了半個鐘左右，幫手閃電pack好戰利品後要拿拿林推篋去機場巴士站，雖然有點依依不捨，但都要同名古屋講聲sayonara了！



不坐機場鐵路改坐巴士主要原因係巴士站較近酒店，唔駛拎住重篋上上落落地鐵站咁煩，加上價錢又差不多，還是搭巴士較方便。由名古屋市中心到中部國際機場全程幾乎都走高速公路，約45分鐘就到了。



名古屋機場其實都幾多食店，不過之前食了章魚飯仲幾飽，所以都係只睇不吃了。由於買的package是平價CX票，回程要短暫停留台北，合指一算都有好幾年無去過台灣，可惜只是短停兩個鐘當然就不會出外面逛了，不過基爾傻傻下逛shop時竟然蕩出了轉機區域範圍，最後又要重新安檢先可以入返候機室，好彩唔駛空姐嗌咪咁醜……



看到上圖喱個大篋安抵家門，又象徵了一次旅程畫上圓滿句號！不過其實返抵香港機場時還有段小插曲，事源於行李輸送帶拎返個篋時，發現其中一個手抽環被掟至鬆脫，連行李帶也失蹤，友人話可以去CX counter claim維修。果然服務非常周到，幾日後就有師傅登門拎篋去修理，3日後搞掂送返上門，仲附送了CX行李帶一條，要畀個讚！

新森林焗之專門店@北角

北角同其他油尖旺以至灣銅等旺區最大分別之處，就是總算仍能保留不少地舖食店（當中還有唔少係有幾十年歷史的老店），幸免仍未受藥房金舖化妝品連鎖店淘汰淹沒，也因此造就食探有不少出動機會。

話明係「森林」餐廳，店外的深綠色招牌甚搶眼，店內竟還有一棵「樹雕塑」

不過北角的食店相信經營也絕不容易，由年頭至今不少已經先後無聲無息地加了一至兩次價（真係人工都無加得咁快），雖說是每次都係一兩蚊咁加上去，但始終少數怕長計，食探不易為！今次喱間話明係「焗之專門店」應是以焗飯之類出名吧，之前無幫襯過一於去試下新野！


午餐之選：炸帶子伴西冷牛扒 $39（配薯菜）

睇返個menu介紹，發覺其實只係基爾太少出街食飯孤陋寡聞大鄉里而已！喱間新森林原來在中環灣仔旺角都有分店，唔算係咩新野。不過令人有點「詫異」係店裏少有地空間幾大，放得落棵樹雕塑外仲有偌大空間剩，同慣常見那種餐台座椅逼無可逼的蚊型茶餐廳有很大分別。


午市系列：「焗之選」芝士黑松茸焗豬扒飯 $39

Set lunch有不少選擇，第一次來還是先叫個焗飯吧！這個芝士黑松茸焗豬扒飯的精髓不在豬扒上，而是在甜甜地且有很濃松茸香味的芝士焗飯，果然沒令招牌失禮；友人話炸帶子伴西冷牛扒也不錯，連餐茶$40有找（毋須加一），以今時今日平民餐廳水平而言算是平靚正之選。基爾已睇定menu，下次可以再來試試拉麵的水準又如何！

新森林焗之專門店 New Forest Restaurant
北角英皇道441號地下C舖

2Q13秋見信州@名古屋城

「月亮沒有出來，雲很厚，說不定還下了一點雨。房間裡比昨晚暗得多，唯有遠處庭園的燈光從樹隙間隱約透入，眼睛習慣黑暗需要時間……」

由黑漆漆的深海館返出去海洋劇場這邊，頓時有重見天日的感覺。由於3:30pm左右有海豚表演，基爾也去襯熱鬧吧！



海豚海獅和殺人鯨的縱合表演其實與香港的海馬公園大同小異，不過由於出場的海豚有十幾條，牠們一齊躍起頂波的場面就更有氣勢更可觀。



睇完約半小時的表演後，由於近海的戶外環境都幾當風幾凍，還是返回館裏參觀比較舒適。上圖是館裏展出的巨鯨標本和骨架模型。



睇完主館後再行一條橋過去另一邊的南極海洋館，喱邊除了有好多展示關於日本多年來探索南極海洋生態的研究外，還有個播放海洋生態紀錄片的小影院，不過今期播的喱套唔係太吸引。



南極館這邊的重點係看企鵝，展出的企鵝品種明顯較前年在東京上野動物園看到的多好多，最難得係見到體型最龐大的皇帝企鵝。



企鵝館最勁係連個3D佈景都像真度十足，冰山和有湧浪的岩岸全部都有齊，在相機的鏡頭下特別靚。



由於企鵝館的展示設計係一半海平面一半是海底，所以不論是陸上休息的企鵝還是海中暢泳的企鵝都可以一次過睇晒。



除了南極館之外，基爾覺得水晶球水族館和迴游海龜水族館都幾值得一看。上圖是模擬雨林生態的水晶球水族館，喱條係咪叫做「龍吐珠」？



至於迴游海龜水族館顧名思義就係睇海龜為主，不過原來海龜的游泳速度都幾快，加上館裏燈光暗，用基爾部傻瓜機影有點難度。



結果足足行了成個下午，到了6:00pm休館先肯走。行返出去海傍公園睇一陣夜景，商場外面其實都幾靚，仲有個大型摩天輪，不過行過去其實都頗遠，無謂浪費腳骨力吧！



日間看過的海豚和鯨魚雕塑，晚上亮燈後勁靚！不過海濱這一帶由於較空曠，入夜後寒風更凜冽，影一陣就要快快趣趣打退堂鼓。



除了打退堂鼓之外，其實本身個肚都已經開始有少少打鼓。之前已約好分途去血拚的友人於6:30pm在名古屋站集合食飯，結果等到7:00pm才齊人，近近地就在地鐵站附近的高島屋百貨公司12-13階food court這間蕎麥麵店開餐。打開menu一睇，set dinner不算貴，上圖左是友人叫的茸參舞定食（￥1890）。



另外還叫了左上圖的極上大和芋冷麵定食（￥1155），友人話冷麵唔錯幾好味。基爾叫的是左下的江戶小町定食（￥1785），個餐有齊蕎麥麵、飯和天婦羅，大滿足！



點解揀喱間食店，主要係因為佢舖面有個超大櫃窗，所有套餐全部整晒模型出來有樣可睇絕對無花假。食飽搭lift離開時仲有個無敵靚名古屋夜景睇，值回票價！



食完飽飽地唔想返酒店住，再搭地鐵過去名古屋城睇夜景吧！不過原來本丸和天守閣範圍在夜間是關閉的（收費區），只能在外圍的名城公園（非收費區）隔河遙賞古城夜色。



名城公園一帶入夜後其實已經無乜人，沿路只間中遇到由附近住宅區過來跑步的人。日間去了shopping的友人原來也有順道去名古屋城一逛，立即借其照片一看，日間的名古屋城遊人也頗多，日景和夜景各有美態。



名古屋城的歷史可追溯至17世紀初，始建於1610年；至1891年曾因大地震而受損。20世紀初名古屋城曾成為皇室的離宮；1945年美軍大規模空襲名古屋令本丸御殿和天守閣遭焚毀，直至1959年才重建成現今規模。



雖然咁夜來到無法入城內逛逛，但單單圍繞護城河走一圈也很值得。結果基爾夜遊名古屋城護城河花了大半小時行了一圈，由市役所站行到名城公園站足足行了一個地鐵站，才打道回府。

Ishiyaki+Cafe@旺角

成日覺得朗豪坊入面似乎無乜合心水的食店，不過今次去的喱間Ishiyaki+Cafe又幾ok喎！以後多個選擇，唔駛再傷腦筋了。

menu上的二人餐不錯，就揀佢

單睇個店名其實已知係間日式cafe，事實上店裏的投射電視就在長播Arashi演唱會。不過吸引基爾入去幫襯的當然不是Arashi，而係聽友人話喱間餐廳在開飯網的評價不俗，姑且去試試！


洛神花白桃果醋（熱）/ 小食（5選1）香草單骨雞中翼

6點幾去到唔駛排隊等位可即時入座，相比天使BB間cafe那邊門口成堆人大排長龍見到已經煩！日式cafe當然不是只有拉麵壽司魚生，打開menu原來菜式選擇頗多，見二人餐幾合胃口且抵食，唔傷腦筋就叫喱個吧！


主菜：蒜香辣味大蝦炒意粉

頭盤是野菜沙律（掛住傾忘了影），慣常的沙律菜沒太大特別但幾喜歡撈在裏面的黑醋，即時變成美味的開胃菜。小食揀了香草單骨雞中翼，睇外表完全唔似中翼因為剝剩一條骨，食落方便好多，如要挑剔就是炸得稍嫌太乾。


主菜：芝士焗珍寶豬扒飯 / 甜品：紅豆抹茶布甸

主菜揀了一飯一粉，分別係蒜香辣味大蝦炒意粉和一般來說會比穩陣的芝士焗珍寶豬扒飯，兩款味道都唔差，基爾較愛前者，雖然份量不算太大但豬扒和大蝦都好足料，絕對唔係交行貨。甜品方面揀了紅豆抹茶布甸，抹茶味適中，比較特別係布甸頂的紅豆和幾粒唔知係淡味軟糖定還是蒟蒻的東西，煙煙韌韌很有點嚼勁！埋單計連加一$230有找，以朗豪坊裏的食店而言算是抵食之選。

Ishiyaki+Cafe
旺角亞皆老街8號朗豪坊10樓19-20號舖