上次行完Art Space，之後某weekend再順腳行埋過去以前新世界果邊，因為那裏有座重建後的新商場最近終於開幕了，唔知會唔會似以前Sogo或者東急果類百貨公司呢？
同樣是行地底隧道過去，感覺上比行地面方便。以前基爾除非是去太空館或藝術館或文化中心，否則都極少會蕩過來這邊，Sogo搬走了之後就更少來了，新商場開幕後這個weekend來逛逛似乎又見重現了「人氣」。
連接basement地下城的原來是個大型food court（另外仲有間高尚惠康），不過可能因為才開業不久，眼見不少攤檔仍未營業。唯獨是上圖遠處見有大群人圍觀，行埋去睇真才知原來是間機械人茶檔，有機械人即席表演沖奶茶都幾有綽頭喎！
基爾從來都不好這類茶檔所以都無幫襯，繼續四圍行陣。經過小酒吧之後赫然發現路有一座爛鐵機器無端擺放在路中心，還以為是附近的裝修工人忘記了沒運走。行近睇才知原來是展品，據告示介紹它原來是Grand Hyatt酒店用過的烘焙焗爐，已經有成三十年歷史。
行返上地面果層，先出去外面星光大道那邊逛逛，由海邊再回望返新商場大廈的外觀就長這樣！感覺都幾前衛而且有很多綠色元素……
唔講唔知，商場的新名字MUSEA，靈感原來是源自海邊的希臘繆斯女神（係咪突然覺得好有詩意）。商場本身除了是購物場所之外，也融合了藝術館風格，定期會展出一系列公共藝術品。
現時這個新休閒區還有個靚靚的新名字叫做Victoria Dockside，令人聯想到唔知係咪要同新加坡的Clarke Quay又或者雪梨的Circular Quay媲美呢？遠處已可見到人氣十足的MoMA Design Store，不過咪心急住都係留待一陣先再行過去吧！
行返入商場一時間忘記將手機調校返室內mode所以影到黑嗎嗎咁，其實這裏是位於Ground Floor中庭的Artisan Lounge，不少人在嘆下午茶感覺幾有五星級酒店的貴氣。
主力一向負責運吉兼巡場的基爾，繼續沿住扶手電梯往上走，很想先去參觀位於二樓的那個Gold Ball大騎樓地標看看，因為這裏是這個新商場內其中一個人氣打卡熱點。
咁喱個玻璃水晶球到底有乜咁特別呢？它除了是垂直懸掛於二樓和三樓的大露台外，也是放映藝術短片的小影院，而且是不收費的公眾空間，聽說將來還會有即場表演之類。
睇完巨型水晶球之後繼續往商場樓上走。扶手電梯口一上去就見到上圖這座怪誕城風格的藝術雕塑，唔通咁快就有聖萬節裝飾？
同場仲見有SpongeBob同佢個好朋友Patrick Star的壁畫，都見有唔少粉絲（不論大人細路都有）同佢地合照。
行下行下又蕩到去一間類似書房的地方，唔通又有藝術品展出？原來唔係……睇真先知原來係搭升降機大堂來喎！係咪有點哈里波特feel先？
最搞鬼係佢個升降機按扭原來就在書架上面這本書上，唔留意可能真係未必即時搵得到佢。參觀完個「書房」之後再出返去行商場，見其中有間專賣酒的店舖陳列出一set浮世繪酒都幾持別。
其他店舖就無咩特別了，除了名店之外好多其他商場亦有的慣見店舖，所以基爾都沒花太多時間去逐一逛。上圖是路經其中一間著名茶檔，門外同樣是有條長長的人龍。
始終對商場展出的玩味式擺設較有興趣，例如上圖的Ronnie Rabbit聽說很出名，基爾大鄉里還是第一次認識佢。再細仔睇這些藝術品原來好多都有價有市，這個雪糕兔仔標價要HKD$2600一個，喜歡前衛藝術的不妨買個返屋企床頭擺。
另一間比較特別的服裝店就是這間National Geographic！在基爾的字典中這名字仍停留在雜誌刊物的層面，原來今時今日已經進軍時裝界成為行山裝備的系列品牌，果然是行街都可以長知識了。
至於上圖這間買手作藝術品的店舖亦都幾多人入去睇，店門前這套美國太空人所穿的太空衣都好多人同佢打卡影相，不過就屬於非賣品；其他精品大多亦明碼實價。
再往上層走，就可以見到人頭湧湧的戲院Art House，聞說是UA的旗艦影院，裏面有12間影廳咁多，將來如果有機會或者真會買張飛入場看看，同外面其他貴價戲院有乜分別呢！
越行上商場的頂層，仍在裝修的吉舖就越多，或許再過多個幾月才可以全面開幕營業吧！而且現時大部份店舖可能才剛開業，似乎不見有什麼Big Sale優惠出現，見遊人大多都只是來視察場地多於購物而已。最後基爾在頂層影多張高角度靚相作總結，就鳴金收兵撤退了。
咪住！幾乎忘了行埋過隔籬果間好有人氣的MoMA Design Store。這間店之所以咁多人去朝聖皆因它來頭不小，據聞是來自美國紐約的Museum of Modern Art，香港這間新店也是亞洲最大的旗艦店云云。基爾來到時門外已有長長人龍輪候入內，咁算吧啦就在門外影張打卡相先，留返下次再入去參觀睇睇係咪好似人地話咁似Loft或者Log-on果類精品潮店！
