珍郵庫@二十四節氣之春

無去旅行又無出街食飯又無乜特別題材好寫，唔嫌悶的話最好又來看看郵票吧！除了鼠年的生肖郵票之外，今年年頭時還買了下面這套同樣中國風味十足的小全張……

二十四節氣是古時中國人按照太陽運行周期規律而製定的曆法之一，在昔日的農耕社會確實非常有用，大概可預計何時播種何時收割吧！不過現代人除了間中揭日曆時會留意到有大暑小暑夏至冬至之外，其他就已經很少會注意了。順帶一提二十四節氣於2016年已獲列為世界非物質文化遺！



今次發行的這套郵票以春天的6個節氣為主題，包括有立春、雨水、驚蟄、春分、清明和榖雨，而設計上也有新突破，首次採用了半圓形郵票共組成3組圓形圖案，感覺幾有創意呢！

二十四節氣之春
發行日期：2020年2月4日

珍郵庫@歲次庚子鼠年

每年農曆新年前都會出一套生肖郵票，今年也不例外，這套庚子鼠年郵票原來已是香港郵政署第4輯的第9套（十二生肖只餘牛虎兔尚未推出），又看看老鼠仔的造型有乜特別先！

今輯生肖賀歲郵票都以中國傳統工藝作主題，當中的$2是泥塑鼠公仔，身上寫有福字加添新年氣氛，背景牡丹花象徵富貴圓滿；$3.7是刺繡鼠，以針線繡成各種色彩鮮艷的花紋，背景的菊花象徵多福多壽、繁茂興盛。



再看$4.9的陶瓷鼠造型小巧機靈，上釉和燒製等工序技術要求都很高，背景的蘭花形態優美，寓意來年事事美好；最後$5果隻睇真才知原來是玻璃鼠，製成品晶瑩剔透繽紛多彩，而背景襯以繡球花有美滿團圓之意。



慣常也會買多張$10小型張，今年是以巧鼠賀歲的金鼠剪紙圖案作主題，背景是盛放的杜鵑花充滿節日熱鬧氣氛。聽說還有出絲綢版的小型張，但基爾就沒買了。

歲次庚子鼠年
發行日期：2020年1月11日

珍郵庫@老夫子

去年底壓軸推出的這套老夫子首日封甚令人期待，主要原因是本地以往都甚少推出以漫畫為主題的郵票，加上老夫子可以說是陪伴了幾代港人成長的經典漫畫人物，不論是否集開郵的人應該都有興趣買返套來收藏吧！

一套八枚$2面額的郵票和$10小型張可以見到老夫子、大番薯、秦先生、老趙和陳小姐等粉墨登場，分別以經典又生動的廣東話：「行街睇戲，食飯幾味」呈現出香港地道的生活面貌和人生百態。



今時今日每逢周末見細路仔跟家人去飲茶時，總會手機不離手，不是打機就是睇片（當然大人也一樣）。基爾回憶返細個果陣仍是沒有電子奶咀的年代，咁係靠乜野令細路仔坐定定唔會四圍搞搞震兼嘈冤巴閉呢？咪就係靠本《老夫子》或《叮噹》囉（後來還有卡片遊戲機和Game Boy）！



以電車作主題的小型張也很有懷舊味道！有看過老夫子的一定記得當中的四格漫畫故事，多數都以四字箴言作標題，今次不知為何選用了「行街睇戲，食飯幾味」？可能是想展示衣食住行等各方面的港人生活寫照吧！



下次如果再出老夫子郵票，大可再用耐人尋味、原來如此又或者各有千秋之類最具代表性的經典題目也不錯，至少一睇就自然令老夫子迷會心微笑了……順帶一提今次郵戳以老夫子頭像作設計也好靚，另外在郵局也見過版票背後原來也同樣印有老夫子肖像圖案，以本地郵票而言算是頗嶄新又有心思的印刷設計。

老夫子
發行日期：2019年12月5日

珍郵庫@麥理浩徑

深秋冬季又是行山的好時節，到郊外去呼吸一下清新空氣也是賞心樂事，趁住2020年第一blog就寫下這套行山郵票吧！事實上本地不少行山徑都好出名，秋高氣爽時份有時有些行山熱點更會出現人山人海情況。趁住今個weekend會唔會plan返個快閃行山路線呢？

不說不知，原來早在2016年郵政署已率先發行了第一套行山徑首日封，當時是取材自大嶼山的鳳凰徑（有興趣可click返去重溫）。事隔3年再出系列第二號，這次則選了同樣聞名中外的麥理浩徑。



今次的小全張一套共有十款郵票，幸好面額全部都只是$2（幫基爾銀包慳返唔少）。看封背的簡介說，這套郵票最大特色是用了漁護署平時維護和清理麥理浩徑時收集的泥土作為原料製作，郵票上還有鐳射切割的箭頭花紋（係有點特色，但覺得有少少破壞了郵票上的靚風景），郵戳則以等高線和一對腳印展現行山元素。



估計唔少blog友應該多多少少都有行過麥理浩徑或聽過它的大名，原來它早於1979年落成啟用，並以當時港督命名。由西貢一直伸延至屯門的行山徑全長達100公里，當中穿越了8個郊野公園。基爾雖然沒參與過毅行者，但也試過分段行麥理浩徑，例如郵票上見到的西貢萬宜水庫、大浪灣海岸，以及獅子山和大帽山的風光，還有大欖楓香林秋日紅葉等，基爾都留抵過唔少汗水。睇完這輯郵票會唔會即時興起，近近地去一趟城門水塘逛個圈呢？

香港行山徑系列第二號：麥理浩徑
發行日期：2019年10月24日

珍郵庫@左江花山岩畫

自2012年起每年郵政署都會出一套中國世遺主題的首日封，來到今年暑假已經出到第八號，為延續這系列所以繼續買了下面這套新郵票！

自從1985年成為保護世界文化和自然遺產公約的締約國之後，至今中國獲UNESCO列入世遺名錄的自然文化遺產已多達五十幾個，要揀邊個出首日封其實都幾傷腦筋。



今次揀的這處花山岩畫是2016年才列入世遺名錄，不說不知原來是位於廣西崇左市，岩畫繪在左江及其支流明江兩岸的懸崖峭壁上，當地人稱這些崖壁為花山。岩畫綿延逾百公里共四千幾幅圖像，據考證是戰國至東漢時代壯族人的畫作，至今已有逾二千年歷史。而今次郵票上選取的是一幅描繪祭祀歌舞場面的壁畫，非常具代表性。

中國世界遺產系列第八號︰左江花山岩畫文化景觀
發行日期：2019年8月13日

珍郵庫@香港海底世界

唔經晤覺話咁快又放完了暑假！又係時候要拎返D「暑假作業」出來做下……成兩個幾月無寫過blog感覺好似有點生疏，不如就寫比較容易應付的郵票先啦！

暑假期間都買了兩套design得幾靚的首日封，包括上面這套以香港海底世界為題材的郵票。其實以珊瑚和熱帶魚等海洋生物為主題，基本上已經夠晒色彩繽紛，應該都好難會設計得醜樣吧！所以不論中外不少國家和地區都經常以此發行郵票。



印象中香港以往都出過魚類或者珊瑚郵票，不說不知雖然經常受各種海洋生態災難困擾，但位處亞熱帶西太平洋邊緣的香港海域仍能孕育出豐富而獨特的海洋生態圈，例如$3.4那張可見到中華白海豚和綠海龜。



仲有好多種連名聽都未聽過的魚，例如$4.9有邁氏條尾魟（魔鬼魚的一種）；當然仲有好多唔同的蝶魚小丑魚雞泡魚鯛魚海馬海牛之類，就不逐一介紹了（驚有人會睇到打喊露）……



值得一提是今次的魚形小全張設計也頗有心思，郵票的兩邊還有魚形的齒孔，都是玩味十足的花巧元素。順帶反轉首日封睇埋背面仲有非常詳細的介紹，每條魚都有中英對照的名字，不論大人細路都會有興趣逐一細看，認識下這些居於香港海域的鄰居吧！

香港海底世界
發行日期：2019年7月16日

珍郵庫@歲次己亥豬年

之前花了不少時間集中寫巡館記和遊記，又係時候再寫返少少郵票，今年刻意在填寫預訂表格時盡量買少一點，不過生肖郵票因為之前都有訂開所以不能慳，就先重溫1月時推出的豬年郵票吧！

生肖郵票向來設計變化都不會太大，今年的歲次己亥豬年已是歷來第四輯第八套（這輯的首套首日封是2012年的龍年），按之前預訂的習慣，都只是買了一套四款郵票同埋小型張首日封而已。



先看看一套四款的郵票首日封，依舊承襲之前七套生肖風格，以中華工藝為主題，當中包括$2的布藝豬，展示了中國傳統刺繡和剪裁等民間藝術，而背景的桂花則寓意富貴榮華……



再看$3.7的木雕豬，郵票上可見一對可愛木製小豬擺設，背景有象徵美滿姻緣的桃花；基爾覺得$4.9的陶瓷豬最靚最經典，小時候係咪好多人都擁有過這種豬仔錢罌？背景的百合裝飾象徵百年好合；最後$5的玉器豬也很常見，玉雕向來象徵祥瑞，而背景的蘭花則屬花中四君子之一。



不能少的仲有$10的小型張，今年好特別就用了中式婚禮中新娘裙褂上不時掛上的金豬牌，寓意當然是福氣安康、開枝散葉，而背景則是象徵雍容華貴的牡丹。另外，豬年特別郵戳設計成花開形狀，也頗見心思。

歲次己亥豬年
發行日期：2019年1月12日

珍郵庫@金庸小說人物

去年年尾推出的金庸小說人物郵票掀起了好一陣金庸紀念熱潮，郵局亦好耐沒試過見有人排起長長人龍輪候買首日封。

基爾之前已預訂了所以幸免做「龍的傳人」。講返一套六款郵票全都是以港人耳熟能詳的金庸武俠小說人物作主人翁，包括$2是《射鵰英雄傳》的郭靖與黃蓉（還有鵰兄作陪襯背景）；$2.6是《書劍恩仇錄》的陳家洛（會唔會令你想起秋官）；$3.4則是《笑傲江湖》的令狐沖與任盈盈（基爾只記得東方不敗）……



另外三張郵票分別是$3.7《倚天屠龍記》的張無忌；不能少的當然還有$4.9《神鵰俠侶》中的過兒和姑姑（小龍女仲要表演瞓繩絕技）；仲有$5《鹿鼎記》的一對活寶貝韋小寶和康熙在打交嬉戲。



當然仲買了$10的小型張，是以《天龍八部》中的三位結拜兄弟做主角，大哥喬峰、二哥虛竹和三弟段譽全部到齊晒！必須提一提佢個特別郵戳以傳統武俠漫畫的飛劍造型設計，覺得有點如來神掌的卡通feel呢！



以往金庸武俠漫畫都是主要由李志清執筆，今次的金庸郵票也不例外，仍由這位著名漫畫家以國畫手法繪製人物，向這位一代武俠小說大師致敬！

金庸小說人物
發行日期：2018年12月6日

珍郵庫@粵劇劇目

快快手手又寫多個首日封！今年年尾好似都幾多靚郵票推出，當中必買的包括下面這套以粵劇為主題的郵票。

粵劇是中國著名的傳統戲曲藝術，於2009年獲聯合國教科文組織列入非物質世界文化遺產名錄。演員主要以唱、做、唸、打四種基本演繹方式，配合饒具特色的音樂、服裝、道具和舞台場景，把故事呈現出來。



細細個時基爾睇得最多大戲就是從電視重播的粵語長片中看到的戲曲片，那些任白戲寶紫釵記帝女花獅吼記唐伯虎點秋香就最有印象了。另外就係每年年尾的籌款節目，都仲經常可以睇到大戲演出。



今次發行的粵劇郵票首日封，全部都是選取自最經典的劇目，相信即使無睇過都一定聽過個戲名，分別包括有$2《帝女花：香夭》（明末清初長平公主與駙馬周世顯花燭夜拜堂殉國）、$2.6《雙仙拜月亭：搶傘》（宋朝尚書王鎮女兒瑞蘭與書生蔣世隆戰亂中相遇）……



另外仲有$3.4《關公月下釋貂蟬：貂蟬自刎》（三國時代關羽識破貂蟬夜訪的美人計）、$3.7《鳳閣恩仇未了情：惜別》（自幼到金國作人質的紅鸞郡主期滿返回宋土淚別護送的耶律將軍）、$4.9《梁祝恨史：化蝶》（祝英台到梁山伯墳前殉愛雙雙化蝶永不分離）、$5《昭君出塞：出塞》（王昭君出塞到匈奴和蕃以一曲琵琶懷念家國之情）。



講左咁多會唔會勾起返好多粵劇大老倌的身影？那些年小基爾睇電視時最有印象係紫禁城破時靚次伯拎住把劍追斬白雪仙果幕；另外麥炳榮同鳳凰女唱「一葉輕舟去」也是經典；仲有芳艷芬去到任劍輝墓前哭墳時突然成個墓爆開，一陣煙就化成了一對蝴蝶；王昭君出塞唔駛講一定記得紅線女拎住琵琶唱歌吧！

粵劇劇目
發行日期：2018年10月9日

珍郵庫@亞洲國際郵展

無無聊聊又繼續睇下郵票！今次這張之前沒有預訂，留返發行當天先去郵局買，重溫了小時候去排隊買首日封的舊情懷！

不過依家時代唔同了，當然也不用大排長龍，非熱門的郵票基本上行埋counter就買到。講返今次這個小型張特別郵票，是為了紀念香港參與澳門國際郵展而發行，唔講真係唔知澳門有搞國際郵展。



以花為題材的郵票系列向來都好少會令人跌眼鏡（很少會設計得醜樣），今次這個小型張以澳門的荷花和香港的洋紫荊為主題，配合以水墨畫風格呈現更別具清𨾣脫俗氣息。



就連背景的荷塘也很有幽雅味道，充滿了夏日的悠閒舒泰感覺。郵票始終只是個小方塊，太花俏複雜的設計有時反而不及簡潔清雅的來得突出，這張小全張絕對是今年最令人眼前一亮的佳作。

澳門2018第35屆亞洲國際集郵展覽
發行日期：2018年9月21日

珍郵庫@天壇

回顧返舊網誌發現今年好似無乜買郵票（可能大多不太吸引），唯獨喱套中國世遺系列因為之前有買開，咁又繼續買啦！

翻查資料原來中國目前獲UNESCO列入世遺名錄已有逾50個，即使每年出一套都可以再出多40幾年咁犀利，可謂長出長有……講返今次喱套以天壇為主題，繼長城之後又回歸到北京著名景點！



近排電視似乎好hit那些前朝宮廷鬥爭攻略劇集，不少觀眾應該對北京故宮、頤和園和天壇等古蹟建築群都睇到熟口熟面了吧！唔知係咪趁住這股宮廷熱潮，郵署亦乘勢發行了這套天壇首日封。



天壇的祈年殿（皇帝春祭場所）位於內壇北面，直徑32米高38米，是北京現存最大的古代圓形木結構建築。據首日封背後的簡介記載，天壇始建於明朝永樂十八年（1420年），其後經歷數百年維修擴建，至清朝乾隆年間完成目前規模，1998年正式列為世遺。

中國世界遺產系列第七號︰天壇
發行日期：2018年8月10日

珍郵庫@香港消防處150周年

連續寫咁多篇hea遊誌都有D驚驚地睇到人悶出鳥來，又係時候由床下底搬返D郵票出來間一間場先（咪話仲悶）！

今次喱套都算叫做新鮮滾熱辣上月才發行，主題為「香港消防處150周年」的紀念首日封。簡單數數手指計返條數，2018減返150發現原來消防處是成立於1868年，唔出郵票真係唔多知道呢！



先睇面值$10的那個郵票小型張，上面有成排共12個消防員公仔，仔細睇才知原來係由19世紀一直到現今百五年來消防員制服的演變，有好多都未見過真係幾特別喎！



睇完消防員制服之後，咁梗係要睇埋D消防車先得啦！一套6款郵票就包含了50年代至今的消防車和救護車面貌，基爾覺得都幾有細個時玩果種Tomica車仔的感覺，唔知有冇人細個時都玩過……



依家諗返兒時真係曾經擁有過一輛玩具消防車仔，記得係有條鐵梯可以伸長豎起添架！可惜今次套郵票就無送玩具消防車，只係補送返年頭的狗年生肖磁石貼，設計都頗求其唔太靚有點失望，如果送車仔會開心好多！



訂生肖郵票除了送磁石貼之外，其實年年都有送個仿金生肖襟章，上面分別係蛇羊猴雞和狗年，其實都幾金光閃閃，當然如果係真金牌會更開心……（發夢中）！順帶一提原來今次個消防車郵票係加了AR效果，不過要裝了郵署個app先玩到，聽聞係可以360度睇到車仔模型和內部設計咁犀利，如果有人玩過記得話返畀基爾聽下效果如何喎！

香港消防處150周年
發行日期：2018年5月8日

珍郵庫@歲次戊戌狗年

一元復始萬象更新，話咁快又即將迎接狗年，唔知係你第幾隻狗仔？Anyway，迎接農曆新年除了忙於洗邋遢、買藍色罐曲奇餅辦年貨和去維園行花市之外，仲有咩可以感受一下新年氣氛呢？

唔駛講，答案當然係睇下基爾D生肖郵票啦！今次喱套狗年郵票已經係第4輯的第7套（2012年龍年果套有冇買？）……好記性的blog友可能記得基爾年前都有post過馬羊猴雞年郵票，今年發行狗年生肖首日封都貫徹以往幾年的中國傳統手工藝風格！



簡單講下這4款狗仔郵票係乜東東！$2瓷器狗仔，背景襯托了牡丹浮雕；$3.7玉器狗仔，背景是海棠；$4.9陶器狗仔，背景是長春花；$5貝殼狗仔，背景是山茶花……連郵戳設計也加入了狗狗造型，唔知一眾愛狗人士會唔會買返套收藏下呢？



再睇埋$10小型張，主題是靈犬彩釉瓷塑，背景是杏花。彩釉在中國古代由於屬技巧複雜的工藝，很多時只用來製作名貴的瓷塑擺設。每年這款生肖小型張都設計得很棒，今年的狗仔也不例外吧！

歲次戊戌狗年
發行日期：2018年1月27日

珍郵庫@地質公園增郵

睇了咁多篇金山blog係咪想放返個小息？會唔會有人又有少少掛住基爾D郵票呢？2018年度的新郵其實在年頭已經掀開了序幕，搶閘推出的不是慣常見的生肖郵票，而係下面喱一套……

進入2018年原來郵局即加了郵費，所以順帶推出新增面值的通用郵票，至於依家郵費加到幾錢？由於本身寄信的人就不多，可能無乜人會留意到。講返這套地質公園通用郵票原來已是2014年推出的（之前果套雀仔系列都好靚），翻查大典舊網誌都有寫過，有興趣睇返全套有乜地質公園景點，可以click返入去：珍郵庫@香港世界地質公園。



睇返今次新增的3款面值分別係$2.6馬屎洲、$3.4印洲以及$4.9花山；馬屎洲之前踩單車踩去三門仔好似有離遠望過一望；印洲因為去烏蛟騰行山有路經印洲塘，對那裏的紅石有很深刻印象（想睇返可click返去：穿山甲喪行@烏蛟騰）；至於花山海岸據簡介稱是近萬宜東壩和糧船灣一帶，是觀賞六角石柱的核心區域，咁萬宜的六角柱基爾年前都有去睇過（可重溫舊網誌：萬宜浪茄地質行:下@西貢），所以今次新增的3處地質公園都算是新界東熱門行山點了！

2014香港通用郵票新增面額：地質公園
發行日期：2018年1月1日