跟住雷神過大海@黃枝記

上回講到原本想去李康記食碗豆腐花，點知無奈地變了吃閉門羹，幸好古舊的十月初五都仲有唔少野睇，總算沒浪費了腳骨力。

沿街有唔少上圖這類兩三層高的老房子，相信大多都是前舖後居的老店，陳舊的屋頂瓦面除了有一綑綑不知從哪裏接駁到哪裏的電線外，就是石隙夾縫間生長出來的雜草野籐，與油麻地果欄那類百年老建築如出一轍。



沿街其實就長這樣，應該唔係咁多人好似基爾咁喜歡去行這類橫街窄巷吧！事實上這裏也不算是什麼逛街買手信的熱門地方，也不太覺有大陸拖篋大媽來這區買奶粉，卻有濃濃的地道民生百態。



一路漫無目的地行到街尾就見到屹立於街角處的黃枝記，雖然這間香港也有開分店（像義順牛奶），但基爾好像一次也沒幫襯過，反而來到澳門才有機會處子光顧。「無酒安能邀月飲，有錢最好食雲吞」……Menu上這副對聯又幾搞笑喎！



店裏比較特別係這幅「懷舊價目表」，幾十年前一碗細蓉（即細雲吞麵）原來只售3毫子，蠔油菜遠反而要5毫。蝦子撈麵要收1蚊，同大碗牛腩同價！有冇人知「孖水」係乜？



基爾其實都唔知，上網翻查先知係粗麵。來這店當然要試試著名的竹升麵，新鮮的蝦子撈麵還是第一次食，真係比普通蝦子麵香好多，雖然售價要成70幾蚊都值得一試！另外還叫了碗淨雲吞都要差不多50大元，再對比返「懷舊價目表」一睇，真係要慨嘆通漲猛於虎！



之前行過去李康記卻吃了閉門羹，心裏納悶始終想吃碗豆腐花作甜品才算圓滿。結果在街上無聊地行下行下，基爾又行到來這間榮記，咁一於去食返碗補數，雖然一碗凍豆腐花要收8蚊雞好似仲貴過香港，不過唔理咁多食左先算啦（返到屋企先食腐乳撈冷飯粥）！

黃枝記 Wong Chi Kei
新馬路十月初五街51號

榮記豆腐麵食 Sopa De Fitas Wing Kei

新馬路果欄街47號地下

書展速遊運吉@灣仔會展

記憶中近幾年暑假都無去書展了，一來無乜書要買，二來其實折扣也不多，三來怕了人潮汗味，即使有少少意慾逛逛但最終多數偷懶放棄！今年的書展weekend剛巧要返工，就順道過去八一八。

諗住一朝早就去，因為入場平D，也希望人潮無咁勁！但事與願違，一走上灣仔行人天橋已開始成條臭汗人龍打蛇餅（頓時頭痛），未到中環廣場其實已經想棄權走人……（上圖是入場後有浙江越劇表演，好似唱類似梁祝黃梅調之類！）



最可恨係想半途「速撇」都不可能，因為全條路擺滿晒鐵馬只能順人潮龜速向前蠕行別無他法。千辛萬苦終於捱到去售票處，幸好甚有效率（要讚）不用再大排長龍買飛，順利入場後稍稍嘆陣冷氣即上Hall 5，主力去睇新的運動消閒博覽。見到有得打機和教玩攀石的攤位都幾有趣，齋睇人玩左一陣（小朋友為主）！其餘就有超多日本旅遊展攤位，還有賣攝影器材、運動醫療和行山用品檔口。



齋睇無幫襯，好快出返去第二個大展廳……嘩！乜原來改裝變了個大餐廳真係好犀利，很有點一望無際feel，基爾食飽野來就無去八卦有乜野食，所以價錢也不太知平定貴，只借用了restroom之後就快閃。



去完廁所再穿返入去消閒博覽果邊，無意間見到間賣迷你模型的店舖，喱間甜品店又真係做得幾真幾靚喎（櫃入面仲有幾款蛋糕甜品！）



睇多陣其他模型，由於時間不多就要火速轉場，途中例必會路經這個大玻璃幕牆，每次來會展好像例必要在這裏影張維港靚相先走，今次天朗氣清當然也不會錯過機會吧！



轉場落返去Hall 1果個書展主場館，始終沒太大驚喜同以前來時基本上都一樣，來來去去都係逛那幾間慣見的出版社和書店檔攤。由於寒舍淺窄近年已絕少買書，來書展主要都係看看有乜新野出當係趁趁墟而已！



其中最想去八卦睇下村上春樹的新作《刺殺騎士團長》會唔會有折？網上書店見佢索價逾三百大元都幾貴，之前睇新聞已知佢被列為「18禁」要包膠裝云云，但點知原來書展竟全場禁售咁犀利，村上生如果知道會唔會傻眼？

遺忘的唱盤時光@山口百惠

上次摷了一隻紅白歌合戰舊CD，已講了一大餐80's日系天后，會唔會意猶未盡想聽多幾首？拿拿林又去摷摷個CD寶盒，今次一於揀多幾張先！

如果好記性的話，可能仲記得幾年前基爾都有講過真弓傳這張碟（重溫請click五輪真弓），其實千禧年前後Sony Music除了推出真弓傳之外，仲有出過一張百惠傳。邊個百惠呀？除了山口百惠，還會有誰？



可惜百惠傳摷來摷去都唔見影唔知放左係邊度，不過記憶中同上面這張山口百惠精選CD也大同小異吧！這張同樣是Sony Music出品的寶藍色精選碟發行於1991年（比百惠傳還要早近十年），已經忘了當年買時係幾錢，八卦上網check返原來依家炒價已升到二百幾，果然係有價有市呢！

唔講咁多即刻聽歌！全碟16首歌當中，除了上次提過中森明菜翻唱的秋櫻之外，其實仲有好多都係山口百惠70's年代主演過的電影電視劇主題曲和插曲等作品，所以幾乎每首都係耳熟能詳的經典，基爾心水的No.1是上面這首山鳩，來自她與三浦友和主演的電影《絕唱》。

未夠喉？再來多首心水No.2伊豆之踊子！唔知有冇人睇過喱齣《伊豆舞孃》（唔駛爭住話完全無睇過喎！）話時話明年就係百惠嬸嬸的登六大壽了，唔知到時電視台會唔會又重播返佢一系列經典戲寶賀一賀佢呢？如果有就真係不能錯過了！

就因為聽了百惠傳，基爾當年就急急腳跑去圖書館借來了川端康成這位諾貝爾文學獎得主的幾本代表作品伊豆舞孃、雪國、千羽鶴和古都一次過睇晒！所以都唔爭在聽埋上面喱首古都，連小鳳姐都曾改編唱過廣東版。

除了古裝扮相靚絕東瀛之外，山口百惠當年的時裝劇同樣大熱，如果唔提下赤的疑惑會唔會有人投訴呢？赤的疑惑之後仲有續集赤的衝擊，80年代初無記重播時仲掀起一輪日劇熱。另外她還主演過松本清張名著改編的電影霧之旗，少不免又令基爾趕去圖書館掃齊了砂之器、點與線等好幾本偵探大師的代表作回家追看。



除了這張超級精選之外，基爾仲收藏了山口百惠於1980年東京武道館舉行的收山演唱會VCD，記得當年都係無意間在信和找到即時如獲至寶，今時今日當然可以在網上輕易找到片段重溫。

在這個收山演唱會裏，山口百惠唱了多達29首歌，曼珠沙華、橫須賀的故事和秋櫻等當然不能不唱（D歌迷一定喊晒唔肯畀佢走），開場的This is My Trial和散場的再見的另一方更加係基爾的超級心水之選，好驚隻碟會睇到花左播唔到，安全起見都係睇網上片段好D！



基爾這隻是很舊很舊的台版，近年在某大型連鎖唱片店發現原來也有港版DVD發售，不過價錢都唔平喎！當然也可以試試上網淘一淘，blu-ray的售價平到呢……唔怪得咁多人淘上癮！

跟住雷神過大海@盛記白粥

坐酒店shuttle出去外港碼頭果然係精明之選，免費之餘更重要係快好多，慳好多時間！

咁快出碼頭？未咁快返屋企住喎！由外港碼頭先行返去議事亭果邊食下野先啦！今次有熟人帶路，行地下停車場的「秘道」可以好方便咁直達葡京那邊，唔駛行地面要過咁多條馬路咁煩。



來到議事亭前地依舊係超級多遊人，基爾選擇轉往上行去民政總署隔籬果條小小的天通街，即時好似靜了50%。行橫街主要咪就係去食碗靚粥囉！



幾喜歡店裏這幅大大的懷舊素描壁畫，隱約感受到昔日街邊檔老字號的風情。以前無發泡膠碗的年代，有冇人記得係拎乜野去買粥呢？



店裏提供的粥類選擇其實不多，就只有白粥和皮蛋瘦肉粥，售價也不貴，介乎6至14蚊，視乎大碗還是細碗，反而配搭粥的食品選擇頗多，有腸粉炸兩炒麵蘿蔔糕芋頭糕咸肉粽魚蓉燒賣油炸鬼牛脷酥煎堆等，連笑口棗馬仔都有，上圖的一磚蘿蔔糕只售7蚊雞實惠抵食。



食飽飽之後的「指定動作」，當然又係四圍行陣街街消化下先啦！粥店喱邊附近又係有好多舊唐樓小街的老區風貌，唔知陋街窄巷之間會唔會仲有隱世食肆有待發掘呢？

盛記白粥 Sam Un Loja de Canja
澳門新馬路天通街14號雅緻大廈地下

遺忘的唱盤時光@日本紅白

之前摷開床下底個CD寶盒，咁又繼續搵返D陳年老碟出來抹下塵回味下先得！唔覺意之下又摷出喱張日文碟，唔知有冇人有興趣陪基爾伯伯來重溫一下紅白盛世年代呢？

上網查返喱張CD其實又唔算好耐歷史喎！據資料話係2007年發行的復刻版雜錦碟，不過內裏收藏的就多數係上世紀80年代日本藝能界響噹噹巨星的代表作，正如碟中的簡介話齋，是記載了一代人的青蔥歲月……

按動唱機的play按鈕之後，一陣濃濃的昭和風味徐徐滲透到每個空間角落，時鐘即時也有反應，迅即回撥到30多年前……小林明子唱起Fall In Love果陣，到底係做緊暑期作業定係讀書報告？定還是在計緊sine cosine和tangent的數學題？再聽松田聖子的搖擺口紅，你會發覺初出道的林憶蓮看來也甚得聖子真傳吧！

依家聽返聖子姨姨30年後重唱搖擺口紅，會唔會有點毛管戙？昔日的小忌廉可愛教主雖然早已不復再，但唱功仍算是殿堂級數吧！至於當年的型女派掌門人應非中森明菜莫屬了，或者有些人會怕了她那把低沉聲線，但當年她的駅、難破船和禁區就分別改成了梅艷芳和張國榮的名作……30幾年後的今天，基爾竟神奇地迷上了她翻唱的秋櫻。

係咪好多人已經急住要舉手話：「完全唔識佢地喎！」……唔緊要，即使純粹當新歌聽其實都依然好好聽（老實說單聽旋律都好聽過好多新歌），依D係咪叫百聽不厭的經典？除了有可愛教主和型女出場之外，當然不可不提玉女派的河合奈保子，偶像派除了個樣要睇得之外，唱功也不能太離譜，聽聽上面這首月半小夜曲算是她的水準之作吧！

滴住汗唱月半小夜曲的河合奈保子，明顯比好似鼻塞塞咁唱小雨點來得更出色！講開日系的玉女派傳人，當然不能漏了柏原芳惠，她的最愛後來也成了周慧敏的代表作。30年後的今日，到底又係邊個keep得好D先？

除了有清純玉女宅男女神唱情歌之外，當然不能少了勁舞快歌，這方面就不能不提荻野目洋子，上面的跳舞街原版係咪好勁先？數數手指以上咁多位80's天后大部份都入晒五了吧（有些應該快要登六了）！Keep到這水平其實都要寫個服字畀佢地啦！

這張紅白紀念碟中仲有個小驚喜，就係收錄了南沙織的哀泣的妖精。或者大部份人早已忘了誰是南沙織，睇返個舊MV就即時醒起深秋立樓頭了。南沙織的樣子有別於一般日系女歌手，外表很有點country民謠歌手風味（當年應算是別樹一幟），說她有點三毛的氣質又會唔會有人同意呢？

跟住雷神過大海@路氹歷史館:下

唔嫌悶的話，就繼續跟基爾行埋路氹歷史館二樓的幾間展覽廳吧！

往二樓的樓梯鋪設了紅地氈，感覺係咪都幾grand，牆邊仲擺了一set古裝武俠片常見的中式古代兵器，即使諗起細個時玩的那種膠劍仔玩具！



二樓又有D石磨和農具睇，以前在香港的博物館好多時都有見過了，為慳時間所以都無再逐個去睇文字介紹，求其影下相就走。



雖則話滾水淥腳，不過上圖喱間房又幾靚幾值得駐足睇下喎！原來佢係原本海島市政廳的會議室，桌椅窗簾和牆上的掛飾都保留了上世紀的原貌，係咪好有殖民地色彩！



其實地下果陣仲有間房展示了海島市政廳地下室石結構遺址，地面鋪了強化玻璃可以透視睇到下面D舊石砌石板路面，不過因為間房太暗就無影到相了。上圖左是大門內的天后像。



歎夠冷氣就行返出官也街野少少手信野食先。不過這天有幾間老字號沒開門，晃記牛耳也賣晒，咁買肉切酥和蝦米卷啦（發覺貴了好多）！再過隔籬文記買埋紅豆餅和香蕉糕，特登唔買杏仁餅住因為想去其他店舖買。臨走時仲經過上圖喱間氹仔中葡學校。



拎住大包小包行返過去銀河果邊，慶幸唔算買太多野一次過可塞晒入背囊算數。來銀河主要係想搭返佢架shuttle出市區，一來慳返D錢，二來前一日坐過巴士勁兜路怕過鬼浪費時間！



咁既然一場來到銀河，順便都睇埋佢個大堂鑽石噴水池show先走啦！睇銀河個網頁介紹話，喱個係所謂「銀河十景」之一來的（唔好問其餘九樣係乜野），又真係幾巴閉咁喎！



大鄉里基爾都係第一次睇，又真係幾grand幾靚，中間果粒大鑽石升起果陣，四圍圍觀果D北方大媽大叔係咁閃閃光燈閃到眼花……



至於噴水池隔籬個賭場的門面design都幾靚喎，係咪有D似孔雀開屏feel？唔知同風水有冇關呢又？由於要趕住出返去大門外面等shuttle，所以就無謂入賭場混吉了，下次來先入去參觀吧！



等免費shuttle果條龍其實都幾鬼長，結果等了兩架巴士先上到。人多都要等除了因為唔駛錢之外，最主要仲係佢唔似得搭Transmac咁勁兜路，由銀河出去外港碼頭大約15分鐘已到了，真係直接好多兼慳時間好多喎！