舊金山居閑話@Chikara

去旅行總離不開睇靚風景和飲飲食食，基爾是次旅居他鄉也不例外。不過除了在飛機上影過杯雪糕之後，好似都無乜影過開餐相，今勻咁就講少少喱個日系午餐先啦！

這間Chikara Japanese Yakiniku不見有漢字店名，所以唔知中文叫乜名，來到時已過了中午一點但店裏仍有不少人在食lunch……



店面本身都相當闊偌，不過可能午市時段侍應人手不多，只開了半間舖（另外半間沒有開燈），即使只有5-6台客但都要等位。



等位無聊就四周圍參觀下，近廚房喱半邊是bar台格局，半截台面設有烤爐頭相信是for燒肉用。後來果然見有人來吃一人燒肉，香港的一人邊爐就多，一人烤肉好似沒見過。



基爾在港時也沒吃過這類日式燒肉（但在京都食過），類似食韓燒，因為不想食完沾滿一身燒烤味所以今次就沒吃了！反而被佢個Lunch Set吸引，價錢都幾抵食USD$10有交易係咪平過香港？



Menu沒有中文，幸好有英文解說，睇英文大約會知道係豬牛羊定蝦，部分也有圖文並茂唔駛擔心唔識點，而且製成品與照片九成對辦！最後點了上圖喱個Ramen Set……



除了有必備的前菜沙律和海帶麵豉湯之外，仲有一碗炸蝦天婦羅飯（湯碗size）再加一大碗Kotteri Miso拉麵（大湯碗size，有蛋有肉有芽菜）盛惠USD$12.5（HKD$97.5），對基爾而言這明顯已是二人餐份量了，而且味道可以畀78.99分屬中上水平。連嘴尖的基爾媽也大讚這裏吃的飯，算是成個灣區食過的幾間餐廳中最好食的呢！

珍郵庫@地質公園增郵

睇了咁多篇金山blog係咪想放返個小息？會唔會有人又有少少掛住基爾D郵票呢？2018年度的新郵其實在年頭已經掀開了序幕，搶閘推出的不是慣常見的生肖郵票，而係下面喱一套……

進入2018年原來郵局即加了郵費，所以順帶推出新增面值的通用郵票，至於依家郵費加到幾錢？由於本身寄信的人就不多，可能無乜人會留意到。講返這套地質公園通用郵票原來已是2014年推出的（之前果套雀仔系列都好靚），翻查大典舊網誌都有寫過，有興趣睇返全套有乜地質公園景點，可以click返入去：珍郵庫@香港世界地質公園。



睇返今次新增的3款面值分別係$2.6馬屎洲、$3.4印洲以及$4.9花山；馬屎洲之前踩單車踩去三門仔好似有離遠望過一望；印洲因為去烏蛟騰行山有路經印洲塘，對那裏的紅石有很深刻印象（想睇返可click返去：穿山甲喪行@烏蛟騰）；至於花山海岸據簡介稱是近萬宜東壩和糧船灣一帶，是觀賞六角石柱的核心區域，咁萬宜的六角柱基爾年前都有去睇過（可重溫舊網誌：萬宜浪茄地質行:下@西貢），所以今次新增的3處地質公園都算是新界東熱門行山點了！

2014香港通用郵票新增面額：地質公園
發行日期：2018年1月1日

舊金山居閑話@Stanford:下

在這邊住得耐，可能人都會變得慢節奏，寫blog也一於用這種超慢鏡逐格重播手法（另一種說法是hea住寫），細緻得來係咪都唔覺悶先！

慢遊史丹福校園來到最終回仲有咩野睇？說得上是有百幾年歷史的大學校園，每處地方似乎都充滿歷史故事。離開大教堂後基爾穿過通向教育學院種了不少高大棕櫚樹的長廊，就來到格林圖書館前的一個小噴泉公園。圍繞噴泉的圓形石椅上刻了密密麻麻的人物名字，唔知係咪百年來的校友名人呢？突然間有點圓桌武士feel……



既然大家都咁有耐心跟無聊基爾行校園行足三個回合，咁都係時候要獎勵一下講個「小秘密」你知！（應該無乜人想知囉……）其實基爾對這類噴泉係有種特殊偏好，每次遇上總會按捺不住要去玩下水先肯走。上圖喱個古樸無華得來仲刻有年份、圓周圍繞有小水柱的設計，要加分！背後右邊建築物就是圖書館，據講它收藏了九百萬冊書刊，連同其他以百萬計的多媒體文檔，已被譽為目前全球最大及最多元化的學術圖書庫之一。



玩過這裏的噴泉水唔知讀書會唔會入腦D聰明醒目D呢？Anyway玩夠就跟基爾行埋過去Hoover Tower果邊。其實一入校園大門離遠已見到這座高聳的觀景塔樓，不過外來人士若要登上塔頂都要畀入場費，成人USD$4（約HKD$31），長者小童平1蚊。



同搭飛機一樣，原來上胡佛塔都有安檢程序，不過手續當然簡單好多，所有背包手提袋都必須留在升降機大堂，不能帶上塔頂。上圖就是塔頂的古老落地大鐵窗（行近窗邊真有少少畏高，驚佢日久失修會連人帶窗花跌落街），往外望就是史丹福這一帶一望無際的大平原靚景，方圓幾十里最高建築物就是這座高塔了。



聽到Hoover這名字一定會想起Las Vegas郊外那座胡佛大水壩了吧！原來胡佛Herbert Hoover是史丹佛大學第一屆畢業生，他也是美國第31任總統（1929-1933年在任）。上圖是由塔頂冒住畏高之險伸手出鐵窗外拍的風景照，所有紅瓦頂建築物都是史丹福大學校園範圍。



胡佛塔建於1941年，是為了紀念史丹福金禧校慶（50周年）而建，巨塔高285英尺，樓高14層，遊客可乘升降機由塔底大堂直上塔頂觀景台。塔頂還設有48個大小不同的銅鐘，其中最大的鐘上刻有「For Peace Alone Do I Ring」字樣，此外中間玻璃房裏有座古老裝罝負責操作敲鐘節奏，問過導賞員話只有特別節慶日子才有敲鐘表演云云……



登高參觀完巨塔之後，由於時間早過了中午怕餓親太后娘娘們，都係時候要返出去食個late lunch了。後來基爾寫blog時翻查資料才知原來胡佛塔一樓仲有個小圖書室，據聞裏面還收藏了蔣介石自1915至1972年的私人日記，但導賞員竟沒叫基爾去參觀呢！

舊金山居閑話@Stanford:中

在老家過慣營營役役節奏快的生活，即使weekend放日假也總覺是無事忙，反而在外地就有多點時間，樂得清閒下來，望望花園的樹，再望望樹上的橙，還有那在枝頭間快閃而過小松鼠……

既然咁得閒，就趕快接續寫返上次講史丹福大學的校園遊吧……穿過Main Quad之後，不遠處就見到有座外牆畫滿了天使和聖像壁畫的古老建築物，行近少少睇，原來有塊奠基石簡介，這就是校園裏另一著名地標Stanford Memorial Church。



沒錯，大學校園內竟也有一座宏偉的大教堂！這幢建於1893年的莊嚴華麗大教堂，是史丹福太太為紀念當年離世的丈夫而建。



大教堂裏除了有宏偉的大圓穹頂外，也有歐美教堂常見的五彩鑲嵌聖人壁畫，以及講述聖經故事的彩繪玻璃和天使雕像等。基爾到訪當天，仲有對年近百歲的老夫妻與家人特別來到教堂慶祝結婚75周年的鑽禧紀念呢！



蘋果公司創辦人喬布斯雖然當年不是在史丹福大學畢業，但就曾於2005年獲邀出席在這間大教堂裏舉行的大學畢業禮，並向畢業生們送上了著名的勉勵金句：Stay hungry！Stay foolish。上圖是大教堂裏的唱詩班高壇，背後還有座巨型的管風琴。



在教堂裏試試手機的不同相片效果mode，分別用了局部彩色、懷舊和鮮明活躍mode，出來的效果原來也頗不同！另外還有哈里斯快門、濾鏡、魚眼和萬花筒效果，相信十幾廿年前發明手提電話的人也估不到今天的手機可以發展出咁多拍攝功能吧（當然還有更多的上網和支付功能）！



上圖是教堂大門外精巧的馬塞克鑲嵌畫。教堂門口的地磚上，其實還鋪著從92開始的一系列數字石磚，基爾當時不知有什麼意思所以就沒有拍照了，後來看網上資料才知是紀念自1892年起的歷屆史丹福畢業生而設。

舊金山居閑話@Stanford:上

在飛機上沒睡過，還以為可以稍稍調整了jet lag，不過原來作用不太大，每天凌晨三點幾都會醒一醒，之後去過廁所有時可以再睡一會，但大多數都係眼光光+輾轉反側一直到天亮……

這朝早本來很早就醒了，不過這裏冬日也是日短夜長，要過了七點半後才開始正式天光。簡單梳洗吃過早餐就出去屋企四周繞一圈當晨運吧！



正當東岸風雪大作之際，幸好這邊的加州陽光依然充沛，清晨的藍天晴空廣闊幾乎沒一朵雲，可能也因為附近都沒有高樓遮擋關係，朝陽直射到大街上竟還有點和暖感（其實氣溫只有10度左右）……



只有間中吹來一兩陣微弱冷風，令路邊那幾棵紅黃葉楓樹掉下數片乾葉來，才告訴你這已是冬日清晨吧！加州陽光果然名不虛傳，鄰屋前園不少橙樹和檸檬樹在和煦日照下結出纍纍果實。屋企人講過的潛規則是：人家的果樹不可亂摘，只有掉在地上的才可以執，長知識了！



可能基爾出來巡場時其實已經稍晏了，街上幾乎都沒遇到任何人。之前在家裏床前的窗口外望，鄰居多數六點幾七點已上街跑步放狗，還見到有個男人天天都來街上好像在練習華爾茲般，一個人自得其樂團團轉翩翩起舞掠過窗前，睇落有點似役所廣司。



晨運一圈後，這天也沒有plan去什麼特別景點一遊，家人提議不如就去屋企附近的Stanford University走走，當是去行公園也好。上圖是停車場旁的一抹楓葉紅；校園裏的水渠蓋有古雅的圖案和史丹福大學字樣。



翻查維基原來史丹福大學成立於1891年，至今已有逾126年歷史，校園最古老的主建築群大方院Main Quad始建於1887年，唔怪得走在其中都不難感受到它的百年歲月味道。



基爾覺得主大樓的這道長長拱廊最吸引眼球，望落很有點歐洲中世紀修道院的氣氛。繼續看看網上百科簡介，史丹福大學名稱是源自19世紀創辦大學的加州鐵路富豪Leland Stanford，他當年也是加州州長及參議員，出資成立大學是為了紀念早逝的愛兒。



19世紀時校園所在地原本也是屬於史丹福先生的帕羅奧圖牧場，他找來不少當年著名的建築設計師包括麻省理工校長等前來參與興建新校園，上圖手工精巧的麻石雕花長拱廊就是其代表作之一。



由於是與太后們同行，當然不可能在短短大半天內以基爾慣常閃電速遊進度逛盡史丹福每個角落，就只悠蕩幾處地標就滿足了……上圖是位於校園Main Quad裏的羅丹雕塑園，展出的是羅丹代表作之一加萊義民The Burghers of Calais仿製品。



有沒有去過巴黎的羅丹美術館？如果有去過可能會對這位19世紀法國著名雕塑家Auguste Rodin的沉思者Le Penseur有點印象。其實基爾印象中以前讀中學時的History教科書裏，也好像見過沉思者和地獄之門的照片，有印象的請舉手！

舊金山居閑話@到著SFO

在飛機上睇完3套長戲都仲有好多時間剩，本來想再揀多套戲睇但心水果D有好多都因播放時間不足唔畀睇，咁齋坐係度做乜野消磨時間好呢？

最佳選擇莫過於睇卡通片，捽捽下個mon好彩喎又見到海綿寶寶，連睇幾集正好就差不多落機了！如果有去過美西加西地區都會知，飛機會有點穿越時空時光倒流feel，同日大約兩三點就到著，比起飛時間（傍晚七點）還要早，好似無坐過飛機咁（當然回程機要還鐘）！



基爾初來甫到三藩市機場第一感覺係有點舊，四周又好似有點昏昏暗暗（定還是香港機場太光猛簡直係光污染呢），兩宮太后因為係長者可以走特別通道唔駛排長龍，連帶基爾隨行入境過關，問話也不太繁複，行李也沒搜查直入直出可喜可賀。出到去接機大堂才不過三點幾，已見迎迓太后們的專車，點齊人上車出發，首個景點先去Clement Street那邊買菜買燒味，準備今晚煮返餐家鄉洗塵飯。



三藩市喱邊好似話好多地方泊車都要入錶，上圖右的黃色咪錶好似有少少似昔日香港那種入銀仔咪錶。近列治文日落區喱邊D樓都只有兩三層高，確有點迪士尼美國小鎮大街feel吧！上圖左果間甜品店聽聞係幾好食的，可惜沒有時間入去幫襯下，留返下回再去吃吧！



不逛不知喱條美國小鎮大街又真係幾多唐人店舖喎，有中超之外仲有燒味店蒸包蒸點心店，還有飛髮舖和金魚舖一應俱備，儼如小華埠！一不留神原來太后們早已自動波火速入了去逛旁喱間新聯興超級市場，又揀蕃薯又揀橙又揀香蕉又揀菜，加上店員阿姐全部都同聲同氣似去了屋村街市，完全唔覺去了外國一樣！



由於金山緯度比香港還要高，冬天來到幾乎晏晝四點半已開始日落西山，話雖如此不過似乎都無損太后們行街買菜煮飯的興致，咁對基爾來說都算唔錯喎，可以乘機開個小差，自己無聊沿街四圍遊蕩下，這算不算是真正「自由行」呢？



閒蕩一圈無意間來到其中一個街角見到喱間永利燒臘快餐店，見佢條長長人龍都知應該係喱區的「名店」吧！只見芸芸華人口面顧客人堆當中，赫然發現竟有太后身影，果然識揀喎！真係想入去問下佢地其實到底係咪住喱度架，又會咁老馬識途呢？



搞成粒鐘最後張羅完晚餐飯菜之後，就差不多天都黑齊要返屋企了。返到屋企又要忙煮飯開飯又要執好床鋪枕頭，又要開篋拎手信，最終十點幾沖完涼刷完牙再閃電衝入房撻落張床度，數數手指都有成廿幾粒鐘無好好睡過一覺，手指都未數完已經訓著了……

舊金山居閑話@起飛

眨下眼又hea了大半個月，成個聖誕新年happy長假期都過晒，係時候要開始動筆寫2018年第一blog了吧！會唔會有人已經等到有少少心急？終於起飛了！雖然到依家好似都仲有少少jet lag時差，要捽捽對眼先可以開筆寫blog（眼訓中）……

出發當天是星期日，不過可能仲未到長假期開始，所以都唔算人頭湧湧喎，反而仲覺得個機場有少少靜蠅蠅！雖然是坐傍晚機，但吃了午飯就已準備好出發去搭機場巴了，因為飛美國機可能安檢程序會多一點，為穩妥起見還是提早少少出機場吧！



由於今次主要任務係為東西兩宮太后出巡西京護駕，小基子實在不容有閃失，盡可能預鬆少少時間，check-in填行李牌、帶路入閘安檢以至在機上幫忙點飛機餐和填美國入境紙等大小雜務都要妥善安排。由於臨近聖誕，上圖departure果層有班choir唱聖誕歌搞搞氣氛，不少遊人都駐足觀賞，基爾寄完行李都同兩宮太后落去八下先！



見時間差不多都係早少少入去登機閘口，因為在閘口前所有飛美國機最近都新增多一重「問話」手續，其實都係D簡單提問，例如去美國做乜？去幾耐？手提行李有冇離開過自己之類……



飛機準時起飛，傍晚7時已在空中展開歷時十幾粒鐘的航程。這次坐的是A350-900，算是較新型號客機吧！3-3-3座位感覺唔算太逼，基爾坐長程機一般都偏愛揀走廊位方便出入去廁所，慶幸今班機竟不算太爆，隔籬仲有個吉位可半躺稍休。



基爾都好耐無坐CX，依家佢地D娛樂設施都幾多元化喎！有戲睇有劇煲有機打之餘，仲有好多本電子版雜誌睇，當中旅遊雜誌都唔少，這十幾粒鐘一定唔怕戇居居坐到悶！



簡單揭過幾本雜誌後，點都要望望今輪有乜好戲睇下先！自從book了機票後近喱幾個月基爾都刻意少了去戲院，留返上機先慢慢睇丫嘛！



咁到抵有乜精彩電影先？基爾揀的第一套就係《星聲夢裡人》，之前睇其他人評價都係一般般，所以最後都無去戲院睇留返上機先睇。感覺上最經典依然是半山公園跳舞睇日落果幕；另外長碼頭果段Ryan Gosling獨腳舞同埋結尾果段fast forward空想，基爾也看了兩次；咁多首歌當中最喜歡依然是主題曲City of Stars！



一路食飛機餐一路睇完兩粒幾鐘的La La Land之後，雖然成個機艙基本上都已經熄晒燈黑晒，大部份人都瞌著晒覺，但基爾仲未想訓住喎（想盡量調節下jet lag），咁又揀多套戲睇下先啦！不斷用手指滑動椅背個mon咁又揀中上面喱套《出貓特攻隊》。戲中的出貓橋段其實都幾鬼複雜，在飛機上半夢半醒狀態下看戲當然不宜深究了，印象中幾個春青無敵男女主角都演得令人賞心悅目，比較得人驚就係高才生女主角用筆插喉嚨作嘔果幕，當堂嚇到基爾醒晒！



既然都嚇醒左咯，無無聊聊坐係度又無乜野好做，咁又繼續睇多套戲啦！睇完美片泰片之後，再揀套日片看看。之前喱套《我想吃掉你的胰臟》上映時，印象中好少戲院做所以最後都無睇到。3套戲當中以喱套算是最短，但都有接近兩粒鐘，故事改編自熱賣人氣小說，基爾個人覺得是屬於典型慢節奏的情書式日本愛情片，無獨有偶都與學生時代情侶回憶有關。不過可能因為珠玉在前，加上今次喱套戲前半部份平平淡淡的鋪排情節太冗長，明顯就沒有昔日看《情書》時的那份驚艷感！幸而演少年春樹的北村匠海和成年版的北川景子都有極高顏值，為整套戲挽回不少分數。



寫寫下好似變了寫電影blog咁……係時候回歸返去現實世界的機艙先。基爾近年越來越怕坐十幾粒鐘的長途機，會唔會同年紀漸長有關？不過值得安慰係今次CX個飛機餐都算甚有水準，其中的M牌雪糕可說是驚喜亮點！