永樂大典: 11月 2018

2018年11月27日星期二

珍郵庫@粵劇劇目

快快手手又寫多個首日封！今年年尾好似都幾多靚郵票推出，當中必買的包括下面這套以粵劇為主題的郵票。

粵劇是中國著名的傳統戲曲藝術，於2009年獲聯合國教科文組織列入非物質世界文化遺產名錄。演員主要以唱、做、唸、打四種基本演繹方式，配合饒具特色的音樂、服裝、道具和舞台場景，把故事呈現出來。

細細個時基爾睇得最多大戲就是從電視重播的粵語長片中看到的戲曲片，那些任白戲寶紫釵記帝女花獅吼記唐伯虎點秋香就最有印象了。另外就係每年年尾的籌款節目，都仲經常可以睇到大戲演出。

今次發行的粵劇郵票首日封，全部都是選取自最經典的劇目，相信即使無睇過都一定聽過個戲名，分別包括有$2《帝女花：香夭》（明末清初長平公主與駙馬周世顯花燭夜拜堂殉國）、$2.6《雙仙拜月亭：搶傘》（宋朝尚書王鎮女兒瑞蘭與書生蔣世隆戰亂中相遇）……

另外仲有$3.4《關公月下釋貂蟬：貂蟬自刎》（三國時代關羽識破貂蟬夜訪的美人計）、$3.7《鳳閣恩仇未了情：惜別》（自幼到金國作人質的紅鸞郡主期滿返回宋土淚別護送的耶律將軍）、$4.9《梁祝恨史：化蝶》（祝英台到梁山伯墳前殉愛雙雙化蝶永不分離）、$5《昭君出塞：出塞》（王昭君出塞到匈奴和蕃以一曲琵琶懷念家國之情）。

講左咁多會唔會勾起返好多粵劇大老倌的身影？那些年小基爾睇電視時最有印象係紫禁城破時靚次伯拎住把劍追斬白雪仙果幕；另外麥炳榮同鳳凰女唱「一葉輕舟去」也是經典；仲有芳艷芬去到任劍輝墓前哭墳時突然成個墓爆開，一陣煙就化成了一對蝴蝶；王昭君出塞唔駛講一定記得紅線女拎住琵琶唱歌吧！

粵劇劇目
發行日期：2018年10月9日

2018年11月22日星期四

遺忘的唱盤時光@玉置浩二

寫了遊記、郵票和為食網誌之後，又係時候輪返到去聽一陣歌仔。有冇人仲記得之前基爾聽了幾張日系天后的舊CD？（好明顯應該都冇！）今次就轉一轉口味，摷出這位日系天王的舊CD來重聽。

如果曾於上世紀八十年代生活過、經歷過日樂盛世年代洗禮的話，應該對玉置浩二又或者安全地帶這兩個名字不會感到陌生。不過基爾這兩張碟就冇三十幾年咁耐歷史，冇記錯應該都係九十年代尾到千禧年代初發行的。

這張日版的作品集專輯（忘了是不是在台灣定日本買）包羅了很多玉置浩二於八十年代大熱的流行代表作，當中自然包括有基爾心水至愛的藍眼睛的愛麗斯。

其他無可能唔聽的當然仲有戀之預感、酒紅色的心、向悲哀說再見和Friend（張學友的沉默的眼睛原曲），比較可惜是沒有收錄持續的夢（月半彎）和不要走（李香蘭），如果有買其他玉置浩二精選的話，應不難發現這兩首好歌。

上面藍眼睛的愛麗斯和李香蘭兩段演唱會live片段，大大話話前後應該相差了三十幾四十個寒暑吧！不過基爾覺得不論昔日年輕時代定還是今天早已一頭白髮的玉置浩二，依然係非常有型又有style，聲色藝都完全具備了樂壇巨星的風範。

播開玉置浩二的CD，好少會聽到半路中途就熄掉唱機，大多只會是欲罷不能意猶未盡地由第一首一路聽到去最後一首歌。上面這首Melody也是其精選CD的常客，彷彿沒有這首就不算是完滿的精選碟一樣。

唔知有冇blog友會喜歡聽日本演歌，不過不論你喜歡不喜歡，以前小時候看紅白都一定有唱演歌這個重要環節，一輪到那些八代亞紀、美空雲雀、北島三郎、三波春夫出場，小基爾多數都走為上著了……不過隨著時光歲月在晃眼間流逝，連聽歌的口味有時也會有些微轉變，從另一角度去欣賞演歌原來也可發掘出潛藏的獨特蘊味。

就例如上面這首石川小百合的津輕海峽冬景色，之前基爾也不知原來是首非常經典的老牌演歌，改由玉置浩二重新演繹竟完全沒有了傳統演歌必備的「鄉土味」，只覺是一首非常好聽的流行曲。（順帶一問：有冇人知津輕海峽在哪裏？基爾年前就試過由青森坐JR橫越這處海峽去到函館，重看可click：瀛遊東北。下次若有機會重遊，一定要試試坐船過海的滋味！）

玉置浩二的神級live演繹水準當然並不只限於唱演歌，即使近年他年紀已到了爺爺級數，但依然經常樂於與樂壇後輩玩crossover，包括近年被視為最具實力的新進天后級歌手絢香和中島美嘉等。上面這首雪之華是中島美嘉出道時的大熱之作，玉置浩二游刃有餘的二次演繹老實說明顯比原唱的中島高一個level，揮灑自如的唱功相信也是後輩們的學習目標。

暫時又將時空回撥到去上世紀八十年代，因為每當提起玉置浩二，都一定要講返他初出道時的樂隊安全地帶。好似去年底佢地也曾經來過香港亞博開35周年紀念巡迴騷，不過基爾那時不在港，所以都沒去看了，幸好仍然可以重溫他們昔日的演唱會珍貴片段。

以前外國歌手的演唱會錄影片段或者MV都非常珍貴，不是經常有機會睇到，除了間唔中在電視會播之外（仲記唔記得SUNDAY新地帶或者週末任你點那類音樂節目），就是靠這些陳年收藏的VCD了。至於依家當然就幸福好多，因為可以隨時上網一click即睇。

上面聽了咁多首玉置浩二的經典慢歌，最後結尾就來首更加經典的安全地帶快歌。事隔三十幾年，依家再聽返喱首拒絕再玩完全不會有老土過時的感覺，甚至比現今好多快歌好聽得多又型得多，或許……這就是真正的經典吧！

2018年11月16日星期五

舊金山居閑話@Jelly Belly

上回講到去了Sacramento舊城行了一轉，傍晚回程時經過一個叫Fairfield的小城鎮，順便又去埋參觀Jelly Belly先返屋企啦！

唔知有冇人由細到大都好鍾意食Jelly Belly果隻果汁糖？如果有好多童年回憶的話，都不妨抽點時間來巡一巡喱間著名的糖果廠。

廠房門口的停車場除了有個大型充氣招牌紅豆吉祥物公仔畀來朝聖的擁躉影相之外，當然仲要影埋運送糖果的貨車，都幾靚幾colourful。

突然醒起，細個時應該好多人都跟過學校團去參觀太古汽水廠又或者嘉頓麵包廠之類，喱間糖果廠都係類似的食品工廠……

不過美國貨的門面裝修當然靚好多，如果有小朋友一齊來就肯定會幾興奮，感覺幾似去了主題公園咁！這天來到幸好不是太多遊人，排隊入去廠房參觀前要先戴好紙帽。

糖果廠房入面的生產線就長這樣！咦？乜成間廠都咁鬼靜蠅蠅架呢？亦唔見有工人操作機器，莫非走晒去蛇王？

之前去參觀州議會大樓時都見過朗奴列根的玉照，來到糖果廠竟又巧遇這位昔日的美國總統，原來佢都做過Jelly Belly的糖果禮盒封面喎！唔知係咪慶祝100周年的特別版送贈畀到訪的外國貴賓？

除了列根之外，仲有好多用一粒粒糖砌成的總統畫像，包括有華盛頓和林肯；另外仲連自由神像都有，係咪好栩栩如生？

睇完糖果砌圖畫後繼續再四圍去八下。行行下行到喱個corner位，望入去見有好多舊式的製糖機器，不過入面唔開放，只能在玻璃門外遠望。

至於D豆豆果汁糖到底係點製造出來呢？答案揭曉：就係由上面這個豆豆模具逐粒整出來了吧！有冇人數得出一排可以整出幾多粒糖？

來到這個同樣無晒工人的倉庫，可以見到超大量唔同色唔同味的糖在抖涼，如果要一個人食晒佢，至少食十年都未必食得晒！

到底D工人去晒邊？相信因為這天是聖誕前夕，大部份人早就放了假吧！上圖是另一款老鼠形的製糖模具，依家應該無再生產這種老鼠糖了！

參觀完生產線之後，再出去四圍遊蕩多一陣，有部份廳房見有公司包場搞活動之類，有D就好空蕩蕩無乜人。

行到咁上下要去一去洗手間先。廁所門口都幾有藝術色彩，因為掛了好多幅用糖砌成的經典名畫，不能少的必定有蒙羅麗莎。

除了莎姐之外仲有好型的蝙蝠俠，有冇人認得Johannes Vermeer的Girl with a Pearl Earring？仲有Grant Wood的American Gothic。至於聖誕老人不知是否聖誕期間限定呢？

去完廁所睇完名畫砌圖之後，落返去G/F當然要去逛逛佢個試食counter是常識吧！幸好這天遊人不多唔駛排長龍，只有十個八個人排隊而已。

食過Jelly Belly都知佢除了多唔同果汁味糖之外，仲經常會搞好多無聊花臣，有冇人想試食上圖喱個怪味糖專櫃？死魚味、臭蛋和發霉芝士已是小兒科，會否有人有勇氣去試試barf（嘔吐物）、fart（放屁）、booger（鼻屎）、spoiled milk和stinky socks呢？

每人可以試三款味，基爾好保守只試了西柚、香檳和藍莓味，太重口味果D其實都唔係咁多人去試，相信都只係宣傳綽頭不會真正量產吧！

去完個試食counter之後，繼續行下間紀念品店！原來除了賣糖之外，都有好多唔同周邊產品，少不了的大路產品有杯杯碟碟tee恤和公仔之類，連黃色小矮人都有！

這款賣糖機香港有些商場好似都有見過，不過就無咁大規模成幅牆一整列擺滿晒咁有氣勢！基爾無逐一去睇，但大部份都係賣返大路的果汁味，另外較特別的有爆谷味。

如果想買少少做手信，可以去counter買個膠袋仔再去架機自己裝，可以mix一大堆心頭愛的味道。價錢方面大約係十蚊美金一磅，基爾好耐無買過這品牌的糖，係咪平過香港買？

如果對D果汁糖無乜興趣的話，也可以去幫襯一下店內這間cafe食件cake飲杯咖啡先走都未遲。見佢仲有好多手作花生朱古力和鳥結糖賣，大部份都係USD$3.75（四分一磅）。

臨走前，再去門口影埋上圖這輛好型仔的Jelly Belly懷舊子母電單車先，頭先入來時好似睇漏眼，無同佢影張靚相。

2018年11月11日星期日

珍郵庫@亞洲國際郵展

無無聊聊又繼續睇下郵票！今次這張之前沒有預訂，留返發行當天先去郵局買，重溫了小時候去排隊買首日封的舊情懷！

不過依家時代唔同了，當然也不用大排長龍，非熱門的郵票基本上行埋counter就買到。講返今次這個小型張特別郵票，是為了紀念香港參與澳門國際郵展而發行，唔講真係唔知澳門有搞國際郵展。

以花為題材的郵票系列向來都好少會令人跌眼鏡（很少會設計得醜樣），今次這個小型張以澳門的荷花和香港的洋紫荊為主題，配合以水墨畫風格呈現更別具清𨾣脫俗氣息。

就連背景的荷塘也很有幽雅味道，充滿了夏日的悠閒舒泰感覺。郵票始終只是個小方塊，太花俏複雜的設計有時反而不及簡潔清雅的來得突出，這張小全張絕對是今年最令人眼前一亮的佳作。

澳門2018第35屆亞洲國際集郵展覽
發行日期：2018年9月21日

2018年11月7日星期三

中區警署建築群@中環

金山網誌又係時候要歇一歇，再寫返少少本地料先……大館早前開放後好多人去參觀，基爾都無走雞某個秋日周末也走去趁一趁這個新墟。

之前見好多人不論日場和夜場都有去過大館影相，所以基爾都唔會長篇大論，求其揀幾處特別地方打下卡就算（其實係人太多，也懶了影相）！到訪當天由中環街市沿自動電梯一路上山，好快就到了大館。以前半山的Hollywood Road同Old Bailey Street交界喱度，係無上圖喱條天橋，因為活化大館之後才新建的，現在就成了主要的出入口。

入到去就係Parade Ground這個大大的檢閱廣場，係咪以前D警察操兵集隊的所在地？上圖右的紅磚牆建築物是Police Headquarters Block，即係面向荷李活道經常搭車會經過的那幢灰色的警察總部大樓；至於對面就係昔日的Barrack Block，這幢營房大樓高四層，外面有好幽雅的拱廊（遮太陽隔熱兼通風），是常見的殖民地建築style。

Parade Ground上仲樹立了一幅超級大地圖，真係大近視都唔驚睇唔清楚，成間大館古蹟建築群就長這樣，要行勻一圈其實也不太花時間，當然如果閒日來會chill一點，唔駛周圍都咁人來人往！

近距離再影一影Barrack Block，經修葺後係咪新淨好多？基爾覺得有少少似赤柱美利樓那類風格，但這幢營房大樓就望落好似高少少。由於要趕住六點前Prison Yard果邊閂門前要入去參觀，所以Barrack Block就暫時唔花時間上去閒逛了。

上圖右是Prison Yard的入口，入面其實都頗大，有好多一幢幢監倉，建築物感覺上還帶一點英倫城堡的風味，也可能這種殖民地遺風有一定吸引力，仲見有攝影師帶同model來取景。上圖左這幢紅磚牆建築是昔日的Central Magistracy，可惜這天好像休館，大門口擺了不開放的告示牌。

穿過這度拱門長廊就入到去Prison Yard，途中見有外籍維修工匠正在修補牆上維多利亞時代的壁畫油漆，真係好認真喎！基爾記得以往外遊時，間中見有些大教堂或者修道院之類，都會有很多維修工匠即席表演文物修復工作，有時是修補壁畫瓷磚，也有維修雕花裝飾之類；至於香港的古蹟還是第一次現場見到！

Prison Yard周邊有幾間刑房可參觀，到訪這天是周末要排長龍，結果排了大約二十分鐘才入到去睇，不過因為太多人又有點焗所以無花時間影相，快閃巡一圈簡單看看狹小的監房就走了。上圖是Prison Yard廣場上的面貌，可以見到兩幢新建的賽馬會藝方和立方，前衛的鋼鐵建築風格別具現代感，同四周的古雅風貌又明顯別樹一幟。