珍郵庫@香港世界地質公園

舊年底填表預訂郵票時，已知道今年會出全新「香港通用郵票」，由於包括了$20和$50等大面額郵票所以價錢都要成百幾蚊都幾貴，不過咁多年先出一次又無理由唔買，咁唯有赤赤地都買一套收藏啦！

原來對上一次發行通用郵票已經係2006年12月的「香港雀鳥」，記憶中好似都無買（而且那時還未開始寫blog），事隔8年今次就以「地質公園」為主題。



之前聽聞好似都搞過票選最喜歡香港地質公園地貌，結果16款郵票的所屬地質地貌，大多都是熱門之選，部份基爾都有去過呢！



整套16款通用郵票面值由$0.1-$50，當中基爾記憶中行山時有去過$0.5的大浪灣、$1的破邊洲、$1.7的萬宜水庫東壩、$2.2的黃竹角咀鬼之手、$2.3的新娘潭，在東坪洲的$2.9難過水、$3.1龍落水和$3.7更樓石都有去過，另外N年前也去過$5的鴨洲。等天氣涼返D之後，很期待再去埋其餘幾處，咁就可以貯齊一整套「地質行」了！

香港通用郵票：香港世界地質公園
發行日期：2014年7月24日

九天攬月探月工程@科學館

睇返自己的網誌才知原來都有成大半年無去巡館，喱日碰巧有假期就出去走一圈。

幾年前試過買半年pass，如果遇上有大型展覽都抵用，唔駛次次買飛咁煩，又唔駛遷就周三超多人的免費日。今次再買返，原來張新卡靚了好多呢！



剛好這天有個開幕大典，科學館大門口搭建了個大台，可能有好多大人物來主持開幕禮，唔怪得門口咁鬼多記者！



展廳就在底層，就是以往常設展廳那一part，舊有的展品全部暫時搬走晒，騰出地方來搞喱個探月工程展。這次眾多展品中，焦點一定是「嫦娥」和「玉兔」吧！



上圖右是發射嫦娥和玉兔號的長征5號運載火箭；左下圖是基爾覺得幾有趣的「天文秤」，由於月球質量只有地球的六份一，如果在地球體重60幾kg，去到月球就只剩10kg左右，同一包大裝米差不多重量，任何人去到都可成為輕功高手。



中國探月工程原來始於2004年，除了在地球設置探測船外，還有發射探月衛星，最重要當然是去年12月嫦娥3號登陸月球和玉兔號月球車的實地勘探。上圖喱個月球儀顯示了好多地方都已經畀美國和俄羅斯插了旗，中國就只有很少的幾個小區域。



展廳中央擺放了嫦娥3號和玉兔號月球車的1:1模型，嫦娥3號著陸器比想像中巨型，有一輛小型貨車咁大，不過唔知點解外表都包了一層金屬紙，即時覺得假了很多，還是覺得擺在展廳門口那架玉兔號模型做得更精巧仔細像真度高。



除了著陸器和月球車外，展聽裏還擺放了長征火箭、人造衛星、模擬發射場、觀月探測船等模型，部份附設影片介紹。上圖是嫦娥1號探月衛星，它園繞了月球一圈拍了不少珍貴月表圖片。



「嫦娥奔月」和玉兔、吳剛和丹桂樹這些傳統神話故事，相信每個中國小孩都會聽過，展聽一角還擺了雕塑家袁熙坤的「嫦娥奔月」作品。



此外同場還展出了一些以「嫦娥奔月」為主題的書法字畫和瓷器之類……話說回來「九天攬月」又出自何經何典？中國古代天文學家相信天有九重，「九天」就是天空的最深處，詩詞文人雅士也相信是月亮的所在空間；「攬月」就是採摘明月之意。至於「九天攬月」一詞又出自哪位名家手筆？上網一查才恍然大悟，是來自毛主席的詞，唔怪得啦……

「九天攬月：中國探月工程展」
日期：21.7.2014 - 24.8.2014

MOS Burger@北角

唔記得幾耐無幫襯過MOS Burger，至少應該都有幾年冇去食了，最近原來出了個「極品特選和牛漢堡」同事話想去試下，於是又跟埋去親下熱鬧。

以前印象中MB總是貴夾唔飽，所以即使幾好食但如果食晏時段都是絕少幫襯。不過時移世易今時今日即使麥記一個普通餐都閒閒地30幾蚊計，相比返MB又唔算真係貴到離譜喎，而且仲有人serve埋唔駛自己拎，食得多自在！



基爾叫的喱個餐原本有幾款薯條可配，不過睇睇下個menu下面原來仲有一款南瓜薯餅（$19）可選擇，仲駛諗梗係揀喱個啦！



食落果然沒有選擇錯，喱個外脆內軟新鮮熱辣的南瓜薯餅甜甜地，真係仲好食過個包呢！



至於主菜個包方面，基爾唔太食牛所以都放棄了試那個新出的和牛包，見其他沒太多特別選擇都係揀返吉列蝦漢堡（他他醬）$25算了，始終這個都係穩陣之選，很喜歡它的他他醬汁，令個包食落唔會太乾。Drink方面店員推介期間限定的「土啤梨梳打」，雖然有少少果肉但味似糖水，整體只屬不外如是而已，早知慳返$3。



睇返甜薯餅張相依然好回味！如果送多一個更佳，話晒大拿拿成$19一個都幾貴。食到半飽再去阿信屋行陣shopping入貨，依家周三四真係幾多人掃貨，基爾都要刻制D唔好買咁多零食，主力買了上面喱隻「神級」鯡魚罐頭。仔細睇佢原來係德國來路貨，之前食過芥末汁那款真係超正，原來仲有隻比較傳統的茄汁味一於試埋佢，反正折實才$12，每次見到有都例必買定幾罐在家看門口先得！



掃完貨再去圖書館還書，之前睇blog友的介紹話喱本小說很精彩，果然真係無介紹錯，以恆河和輪迴轉世為題材幾合基爾口味。以慣常看書的龜速而言，這本可以在兩星期內睇晒的小說算是神速了，因為故事中的幾個角色主線都寫得精彩，磯邊和木口的故事尤其感人，後者難得還帶點反戰味道，遠藤周作寫人物筆觸極極細膩真緻，曾獲芥川獎的他難怪是近代日本殿堂大師。