新春期間突然回暖，友人本諗住上山頂行個大運，卻苦無其他朋友和應，基爾當然要拍心口一同上路。
由中環一直行上山頂其實基爾已經行過四、五次之多，幾乎瞌埋眼都識行。在中環街市會合友人後乘中區半山行人自動電梯上到超級豪宅區干德道，再一直往西走，到旭龢道後轉上龍虎山郊遊徑，絕對不怕會蕩失路！上圖右是郊遊徑上的維多利亞城界石碑，有逾百年歷史。
行到上去龍虎山郊野公園燒烤場旁的古蹟叢林廢堡，即表示上山的路段已完成了一半，先到涼亭稍休才再上路吧！叢林廢堡除了有戰前的古老碉堡外，還有幾個荒廢了的大炮台，由於之前已經影過很多相，今次就不影了！
小歇完後再沿龍虎山郊遊徑一直上，無耐即可見到夏力道和盧吉道的分岔路口休憩處。沿盧吉道前行往纜車站方向，可以盡覽維港靚景；若行夏力道則可賞南區日落景。
上幾次朝早來就可以繞圈一周睇晒港島南北兩邊風景，今次晏了就只行盧吉道這邊吧！由盧吉道棧道望落山真係好有香港代表風味呀，基爾覺得與日本北海道的函館相比，不論日夜景都有得fight！
今時今日香港要欣賞這片碧海藍天也不容易，每年趁農曆年期間北面大陸的工廠停工放長假，才有機會來賞沒有霧霾的維港靚景！上圖右是盧吉道上著名的印度橡樹，估計有逾百歲，每次來到都要替它影張美髯靚相。
行到4點幾開始出現黃昏落霞的magic moment，從這角度可影到「香港雙塔」IFC和ICC，所以超多大陸自由行搶位影張「到此一遊」，基爾費事同人逼求其影張收貨就走人。
如果有留意早前新聞報道盧吉道27號大宅有意改建為文物酒店，由於要開放盧吉道行車而引來不少人反對，事實上盧吉道咁鬼窄絕對不宜行車，恐危及行人，基爾一場來到都要簽名反對！
日落前終於來到山頂廣場，即時畀眼前一片大陸自由行「人海」嚇親，基爾以往從未見過喱度原來可以打蛇餅逼滿咁多人，真係咩興致都無晒。不過因為行到有點餓，就即管去麥記醫肚才走吧！入到麥記當然又要好似打仗咁先買到個餐再搵到位坐低食啦……若以窗外的風景論，這間山頂麥記可以一路睇住日落一路食野本來是一絕享受；不過若論全球最污糟邋遢麥記（雖然基爾唔係去過好多外國麥記），喱間都一定位列十大之內。
基爾搵到位坐低時，真係要無奈地「驚嘆」：搞乜D大陸人會食到成張台都係茄汁四周圍都係垃圾成個亂葬咁污糟呢！真係絕無誇張，除了成台茄汁外，仲有台底凳周圍都係薯條，欄杆邊又擺滿未執拾的殘餘物資……基爾不是要責怪清潔嬸嬸，只見她已經好努力執拾了，但始終人客太多加上又無公德搞到烏喱單刀一頭煙。最搞笑係隔籬台一家人仲要在吃泰昌蛋撻，清潔嬸嬸警告話唔可以食店外食物，佢地仲可以厚顏地講「不用理她」若無其事繼續吃，真係咁都得？！
在麥記打完仗後，本來諗住拿拿林走人，點知去到巴士站又要打第二輪仗。其實人多排長龍基爾早已預了，但跟住身後的一家大陸人不知為何總愛身貼身逼埋來（可能佢地大陸排隊興咁），如果基爾係女人就一早大嗌非禮了！連友人也忍唔住鬧後面個山東大漢不要再推可以嗎？基爾也暗中鬆佢幾肘盡量避免同佢有任何親密身體接觸；最後逼到上車又係成車國語嘈到拆天，最後到了灣仔立即落車才可鬆一口氣……總結這次教訓，第時大陸長假真不敢再去旅遊區了。其實有時真係無意歧視大陸人，但有時他們的缺德冇品劣行真的好難不令人「側目」！
