2014古都瀟瀟@同鄉指路

行完姬路城已經兩點幾三點，為免餓死都係拿拿林去搵下野食先。

唔想再花時間四圍搵，就沿住返回姬路驛的大手前通睇下路邊有咩心水食店吧！有人已急不及待先在路邊一間小食店吃了隻生蠔……基爾在旅途上一般食野都較謹慎，所以就無謂冒險陪君子了。



最後行到上面喱間，門口寫住「讚歧手打烏冬」！天寒地凍都想食碗熱辣辣湯麵或烏冬，一於入去試下。入到去才發現牆上貼出來的menu係全日文，完全摸不著頭腦唔識叫，點算好呢？



正當基爾人等在議論紛紛無從入手之際，背後那位肥哥哥終於按捺不住拎轉身，用純正廣東話講：個老闆其實係有中文menu可以問佢拎……基爾連聲道謝之餘也可順利無障礙落單，上圖係其中order的一個鍋燒，材料都幾足喎！一千円而已，即係HKD$60幾蚊係咪算抵。



既然他鄉遇同鄉，少不免都要同肥哥哥寒喧幾句，原來佢都係由大阪神戶過來姬路，食完野就去姬路城影相云云……上圖是店裏的招牌烏冬麵，果然係夠晒熱騰騰，最利害係唔知點解仲有一碗仔飯，係咪老闆驚個set唔夠飽呢？！



埋單計都係3400円，人均一舊水唔駛，依家円平食乜都感覺良好！食飽再沿大街漫行返火車站，近火車站那邊有不少mall和百貨公司，友人自動mode順腳行入去光顧洗手間兼行個圈。不過姬路始終不是大阪東京之類的大城市，就連百貨公司都有點兒……土土地唔係基爾杯茶，閃電行完男裝和精品部之後索性搵張長沙發坐陣瞌下眼訓等人好過啦！



再次證明友人D購買慾不容少覷，「懷舊」百貨公司都竟然都有收穫。其實近火車站隔籬個mall好似仲多野行，不過見冇乜時間就skip了吧！反正之後留在大阪的掃貨時間多的是。上到車站月台突然記起要show下個Kansai pass先，因為只買一day，喱日用完就冇架啦！

珍郵庫@歲次乙未羊年

眨下眼又來到年三十晚，在這個送馬迎羊的晚上就暫時停一陣個「日遊系列」，先寫D過年野迎合返農曆年氣氛吧！

最方便快手的莫過於又拎D郵票出來寫下，農曆年當然最主要就係一年一度的生肖郵票吧！不說不知原來喱套羊年郵票已經係郵署發行的第4輯第4套了（第1輯在60年代開始），證明生肖郵票真係長出長有兼長賺，連基爾都唔係太記得買了幾多套！



也由於生肖郵票特別好賣，所以郵署出的產品款式種類幾乎是全年最多的，除了一套4款郵票外，仲有絲綢小型張、套摺、郵資已付賀年卡、小版張等等，務求大賺一筆過肥年。不過基爾床下底實在空間不多，近年已經好忍得手，今次只訂了郵票和小型張首日封就算。



一套4款的生肖郵票，設計意念沿襲前3套龍蛇馬年的模式，都是以中國民間工藝品為題材，包括有：粉彩青瓷小羊（$1.7，背景是三羊啟泰剪紙）、金色羊形彩釉陶瓷（$2.9，背景是玉如意和京柿樹剪紙）、彩色吉羊泥塑（$3.7，背景是大桔和羊頭剪紙）、羊形玉雕（$5，背景是喜鵲和梅枝剪紙）。不過基爾最愛就是上面這張$10的羊形景泰藍工藝品小型張，上面的五彩琺瑯非常colourful，確實幾有過農曆年的氣氛。

歲次乙未羊年
發行日期：2015年1月24日

2014古都瀟瀟@別了鷺城

在西之丸行完一大輪之後，穿過羅之門和哈之門後就進入了本丸建築群範圍，比較可惜是本丸裏大部份地方仍列作維修範圍，遊客「立入禁止」。

進入本丸後，基爾才真正感受到姬路城除了外表靚之外，實質上也是一座固若金湯的城池，城裏分別設置伊、羅、哈、尼4重窄小的關卡城門，部份通道幾乎只夠一人走過，來往的扇坡斜道旁佈滿可供放冷箭和發射火槍的圓形三角形的狹間和投石機關。



再加上迂迴曲折、複雜巧妙的孔道和秘道設計，一般外來入侵的敵軍要過關斬將一路攻上大天守閣，真可說是難比登天，所以被稱為日本最易守難攻的城堡。



基爾遊走在天守閣附近如迷宮一樣的甬道四圍影相，不知不覺間似乎有點蕩失路，與友人也失散了，只好守候在城門口呆等，再會合離開吧！無聊間發現身旁有張大poster，寫住姬路城將於2015.3.27維修竣工正式全面重開，據聞到時日夜都有大型慶祝活動，加上又適逢是賞櫻旺季，到時遊人一定勁多，有興趣去趁熱鬧不妨拿拿林book定機票啦！



此外，仲有喱張比較特別的超巨型姬路城馬塞克海報，行近少少一睇才發現原來係用一幀幀日夜明暗不同的姬路城小照片拼砌而成，有心思得來又要好有心機呢！



沿櫻門橋出口離開前，再次在護城河上影張相先。如果時間充裕又唔太凍的話，真的很想圍繞古城和城濠散步走一圈，可惜這地球上應該唔會有太多人肯陪基爾做這種傻事吧……