行完博物館會唔會有點累？但仲咁早又唔想返酒店住，五點幾鐘半天吊又未到食晚飯時間，而且又唔係太肚餓咋喎！咁不如行多陣街先啦好冇？
博物館附近其實仲有處新興旅遊景點叫做「楚河漢街」，個名好似有點怪（感覺似捉棋的公園）。如果有去過上海的新天地田子坊看那些古老石庫門建築的話，武漢這條街就是類似的古街活化翻新的遊客蒲點。民初時代武漢同上海一樣都有好多外國租界，所以保留了不少西式古老建築。
活化古街裏就長這樣！如果執走背後果幢摩天大樓和街邊的霓虹招牌（必須要搵P圖高手先得），感覺上都幾有民初街的味道，據網上資料話這條街的活化翻新工程都用了成五百億人民幣，投資都幾龐大喎！
唔知係咪時間接近日落時份，街上的光線比較暗，街燈又未開，而且仲有點背光feel，街景影出來總好像黑鼆鼆的不太合意（定還是條友自己戇居居部手機set錯左mode）……Anyway！全長1.5公里的步行街上有幾處小廣場，上圖右是其中的屈原廣場。
行到去中段會有條小隧道（上面是條跨河行車天橋），隧道頂掛滿了金光閃閃的燈飾，基爾覺得幾有聖誕氣氛，影出來仲有點似聖誕時海港城大門口的燈飾係咪？
沿街其實大部份是名店為主，似去了廣東道，咩C字L字G字A字頭都有齊晒（其實佢地真係唔需要山長水遠飛來香港掃貨喎），基爾剩係有興趣行了一陣Zara同GAP，另外仲有去馬莎睇下有乜特別餅仔買。上圖右是街上的王昭君像，依家先知原來她與屈原同是荊楚鄉里，都是秭歸人呢！
行到街尾會見到萬達廣場，又是另一處當地人的潮流shopping mall，基爾見要再過條大馬路就費事行過去行了。舊街場這邊側有座鐘樓，同尖沙嘴鐘樓的風格睇落又有少少近似喎！隔籬斜頂果間屋仔昔日可能是倉庫之類，依家就活化做了摩登當舖，好似連名車都有得當咁話！
這個美好的春日黃昏就在這條購物街來來回回閒蕩消磨時間，之後仲有求其入去Nike和Under Armour兜返個圈，不過大陸近年人仔貴，本身已無乜shopping意慾，用手機㩒㩒照價乘返1.2其實都幾貴，加上款式沒太大吸引力，所以最後運完一輪吉（運吉看來是這條友的強項），就揈著空空兩手瀟瀟灑灑地去食飯好了！
值得一提係其實條街都仲有些街邊小食檔售賣地道小食甜品貢茶之類，不過基爾快要去食飯同埋都驚街邊檔唔乾淨所以只係齋八卦望下就算！至於晚餐食乜？都係求其搵間餐館而已，地道菜式有上圖右的珍珠糯米丸子；另外仲有肉夾饃和東坡肉，味道也是普通，湘鄂菜好似都唔太係基爾杯茶，純粹一試無妨。
食飽飽好似有點眼瞓（仲記唔記得今朝大清早出發去山頂睇日出，之後又行山賞櫻又行博物館又行街一直都無乜抖過），不如就返酒店沖涼瞓覺吧！上了車先發覺竟忘記了去運河邊影夜景，果度見人地影出來似小樽運河的風味，skip了實在可惜呢！
武漢這晚會住在漢陽這邊的洲際，門面望落都幾新淨，最有趣是大門口上面好似有隻飛碟的物體，仲會變色添喎！不過酒店四周就幾空曠，應該是大陸那種乜乜新開發區之類，漢陽這邊似上海浦東感覺較先進多高樓大廈，武昌果邊就是歷史老城區。
準備好入住請敲門未？係咪大部份人入住酒店都習慣有這「指定動作」？之前去大阪都住過一次洲際，不過武漢這間房又好似無咁grand咁大（定還是上次係畀人upgrade左）……Anyway，房裏就長這樣！
上次住大阪果間房裏有個island式的洗臉盆在廳中間（可想而知有幾大），今次喱間就無，但浴室和廁所有分開兩間都幾方便，如果有企缸基爾一般都不用浴缸！Good night，梳洗後就要早少少瞓，明天又要早起身迎接在武漢最後一天的full day行程了！
