友人搬入青龍頭眨下眼原來都4年，成日話入去探下佢兼四圍逛逛，一直都無成事，喱日閃電夾到時間，雖然山長水遠，即管去走一趟！
青龍頭的96M小巴站總站 / 圓墩郊遊徑 / 迷你size的深井水塘
以前坐車經過屯門公路都唔知幾多次，但就從來未走過青山公路，所以深井、青龍頭甚至黃金海岸通通都大鄉里無去過！不過原來交通都OK，在荃灣地鐵站有小巴直入，去到深井才發現原來都幾大地方。
深井水塘大壩 / 人跡罕至的水塘 / 山腰的路標
到達青龍頭會合友人後，
佢提議先上山逛逛。OMG！乜唔係去海邊逛下就算架喇咩？我仲剩係著人字拖咋喎，不過算啦，聽佢講條行山徑只係好短，相信冇問題吧！結果沿山路上到山腰的大欖郊野公園已經成身汗，而且仲做埋惡蚊大餐，希望無白紋伊蚊啦！上到郊野公園見有廁所，幾乎想係果度沖個涼先……
沿郊遊徑上山，山腰有個大欖郊野公園燒烤場 / 仲有太極場 / 荒廢了的深井公立學校
再行上山一陣就見到深井水塘。之前行過城門、大潭篤、鶴藪那些mini水塘，但都不及深井這個袖珍，大壩上釣魚的人也不多，感覺似荒廢了千百年的遠古文明遺址。為免餵蚊，稍作休息就拿拿林落返山。
碧堤半島幾豪 / 嘉頓麵包廠……咦！小學時係咪黎參觀過呢？
臨離開行山徑，見到有座荒廢古宅，原來係深井公立學校，正門上還刻有1961的年份，已經有半個世紀的歷史，政府好應該活化下，否則就浪費了。沿路穿出深井街市就來到碧堤半島，又入商場洗個臉歎陣冷風先再起行！
沿海邊一直行去汀九，青山公路風景確實幾靚，有異國風情 / 遙遙望見汀九橋
之後行過少少見到嘉頓麵包廠，記得細個時學校有去參觀過益力多廠、太古汽水廠、華僑日報之類，嘉頓都好似有去過，咁睇黎基爾其實曾幾何時都踏足過深井，只是當時年紀小忘記了……可惜喱日嘉頓無開門，否則會入去買下餅。
機場核心計劃展覽中心 / 很古雅的一座西式別墅，現在已改建成展覽館
行無耐又見到喱座機場核心計劃展覽中心，又入去過冷河先！原來這座以香港機場核心計劃為主題的展覽館早在1996年已開設，由於免費入場，聽聞不少大陸團都會安排黎參觀，基爾真係大鄉里才第一次來！
這幢西式別墅原來已經有80年歷史，有點淺水灣酒店風情
基爾其實對展館裏的機場工程展品興趣不大，反而對這幢古老西式大宅更感興趣，這幢別墅昔日是印度商人律敦治的大宅，稱為「白樓」，建於1930年代。當年他在深井設立香港啤酒廠有限公司，同時建造白樓作別墅，後來港府購入成為高級公務員宿舍，前財政司夏鼎基爵士於70年代曾入住白樓。
在別墅外影返張相 / 麗都灣 / 搭巴士離開
展館裏面主要以模型、圖片及文字展板介紹香港機場的10項核心工程。展館外還有個小花園，設有兩座觀景望遠鏡，除了可欣賞青馬大橋的全景外，仲可以睇到遠至珀麗灣的建築物。離開展館繼續行，無耐就到了麗都灣。
234B巴士站 / 回程時路經麗城花園
就在汀九橋下的麗都灣，90年代因為水質污染問題而關閉，近年水質稍見改善後，今年6月才剛剛重開，但其實水質眼見也只是一般，海面仲有幾多垃圾飄浮，如果只係帶小朋友黎玩下泥沙都仲可以！
沒有留言:
張貼留言