香港都有得睇紅葉？無錯，去完日本旅行返黎之後，基爾一直好想去睇下香港的紅葉景，同日本那些對比看看有咩分別……未睇基爾版的「紅葉瀛風」之前，就先去睇元荃古道的紅葉當作rehearsal熱身吧！
本來可以由荃灣地鐵站搭小巴上到港安醫院附近的元荃古道地步點，不過友人話車程只10分鐘，等得車來其實都已經行到去了，反正可以一邊沿荃景圍行上山一邊傾下偈，無問題就行去啦！
元荃古道﹙Yuen Tsuen Ancient Trail﹚之所以叫做「古道」，係因為自古以來這條山路是元朗十八鄉一帶村民將農作物運往荃灣墟市售賣的來往要道。上圖是剛起步的下花山，是全程最斜的路段，都幾索氣！
上山沿途有4個涼亭，如果唔夠氣可以先歇歇腳，而且在山上都幾多靚景睇，由成枝大杉一樣的如心廣場，到海濱花園和荃灣碼頭，以及藍巴勒海峽及青衣橋……可惜喱日天氣麻麻地，行行下仲落起微雨來！
好彩喱段石砌山路修葺得非常靚，雖然又斜又落緊雨，但一點也不覺濕滑難行。聞說喱條石砌山路是去年初才重修的，唔怪得咁新淨啦！
見同行友人索晒氣兼步速減慢，就先在第2亭小休一會，喱度雖然未到山頂位，但已開始感受到風勢逐漸增強，加埋橫飛的微雨其實都幾寒，原本已經除了風褸外套都要重新穿上以免冷親。
行到去第3亭附近有張地圖，上面寫住的「閣下在此」原來只是整條元荃古道的起步階段，距離元朗大棠的終點真係仲有成「十萬八千里」，不過既然洗濕左個頭都要行埋落去啦！
行行下雨勢又好似減弱左，重新睇到山下的風景，遠至青衣盈翠果邊都睇到，不過雲層依然好低，似乎觸手可及，感覺奇妙！
望海那邊可以望到青衣，轉個身另一邊山景就可以見到遠處的大帽山，山頂隱藏在一層層飄過的雲海中！原來除左黃山之外，香港都睇到雲海，不過當然要睇天氣和季節吧！
接近上到山頂位時，仲可以見到下面深井的汀九橋和遠處連接青衣和馬灣的青馬大橋。不過由於只用手機影無法再zoom近D，下次如果天氣好少少帶埋靚仔相機來影日落景應該都幾靚。
上埋喱段曲尺形石砌山路，就可以登上海拔400多米的第4亭。由於四周無遮無掩風勢又強勁，仲要夾雜住橫飛雨點，擔住遮行真係人都吹得郁，友人索性閂遮費事吹反仲狼狽。
上到第4亭望返落去時，發現原來頭先行上來的山路都真係幾鬼斜，而且路兩邊又無乜樹遮擋，馬步唔夠穩陣的話，分分鐘畀大風吹落山！
至於個涼亭在這種天氣下，其實都無咩遮風擋雨作用，雨點夾雜住大風依然橫掃入黎，在亭裏一樣要開遮擋風擋雨，小休一陣就拿拿林起行落山以免吹到傷風。
這處高地叫做石龍拱，是整條元荃古道的最高點，友人話有少少似置身在蘇格蘭高地一樣，從未踏足過英倫三島的基爾真係好想親身去體驗一下。後來回家翻查資料才知，原來Scottish Highlands在古塞爾特語中就叫做Ghaidhealtachd，意思即是the place of the Gaels，試問基爾又點可以唔去一趟呢？！
沒有留言:
張貼留言