2014年11月27日 星期四

渣打藝趣嘉年華@銅鑼灣

除了一年一度的年宵花市之外,基爾平時真係好少夜嗎嗎走去逛維園,喱個周末咁神心去就係想去睇喱個由香港青年藝術協會舉辦的「Arts in the Park」夜光巡遊。



基爾實在孤陋寡聞,不說不知原來喱個銅鑼灣藝趣嘉年華已經舉辦了好幾年,2008年開始移師維園,去年起更加插了壯觀的夜光大巡遊。



基爾由天后那邊入維園,可能由於要配合夜巡節目關係,好多燈都熄了,嘉年華入口都係黑嗎嗎的,很有點神秘感,但入到場內已經見好多人圍觀好熱鬧。



不斷聽到有人嘩嘩聲和音樂聲,原來夜光巡遊已經展開,基爾當然要拿拿林逼入少少去睇下,冷不防已經見到一隻全身亮了led燈且貌似大飛蛾的怪獸撲面而來,緊接著仲有隻藍色大龍蝦在身邊慢慢游過。



因為預了影夜巡,本來一早帶定腳架仔方便影得清少少,不過大巡遊夾道兩旁實在太多人了,基本上係無乜可能放到腳架,咁就盡量隻手定少少影啦!上圖這張「花仙子」算是無咁手震的,仲見到可愛小仙子的俏臉。



全場要數喱個「七彩流星槌」最百厭,經常揮動扑向兩旁圍觀的遊人,畀佢扑中的人全部都唔會嬲只會卡卡笑。



唔知點解成班巨型螢光怪物造型都好有點Tim Burton奇幻風格,不過身邊小朋友見到喱D食人花和巨蜘蛛怪,又好似唔係好驚唔會嚇到喊喎!



另外仲有巨型水母和瘋狂博士出場,隻螢光水母最生猛仲經常滿場飛,夠盞鬼又夠閃夠colourful!



其實聽聞weekend下晝的嘉年華都有大型日間巡遊活動在銅鑼灣舉行,出年如果再有大巡遊都可以早少少來睇。



除了睇夜光巡遊那些怪獸之外,維園另一邊仲有一班唔發光的怪獸,上圖這朵吐舌食人花好搶鏡,佢個造型夠晒核突!



原來咁多喱D造型古怪的「藝術品」係來自全港九新界廿幾間中學的學生手筆,果然創意無限,不過睇勻好似都唔見基爾間母校參與。



夜巡完畢後,所有螢光怪獸齊集在main stage同遊人say hello兼謝幕,全部聚首一堂鬥靚又鬥創意,真係幾壯觀喎!



可能因為燈光效果關係,始終「花仙子」影出來最sharp最清最靚,其他果D因為不停地擺動和揮手,用基爾部古董傻瓜機基本上係好難影得靚。



時間都差不多,D怪獸都要逐個揮揮手say goodbye,一個跟住一個咁離開!開始散場了……



臨走前幸運地搵到一處無咁多人的靚位,終於可以近距離同幾隻螢光怪獸影返幾張似樣少少的靚相,希望無令blog友們失望吧!



螢光怪獸走晒之後,main stage重新開燈,一時間對眼都唔太適應,睇真D原來台邊仲有幾隻擺設的機械獸。



總括而言這個夜間巡遊都幾有趣幾靚幾好睇又夠熱鬧,好多人都一家大細來看,熱鬧程度也不遜於新年花市和中秋時的維園,明年如果再搞這個嘉年華,一定會再來襯下熱鬧。

52 則留言:

  1. 好多人,好多野睇,好熱鬧!

    回覆刪除
    回覆
    1. Joice:既然你都畀3個「好」,咁出年我繼續去直擊一下日場巡遊啦XXXD

      刪除
  2. 小盆友點會驚,只有覺好奇, 係d低智成人先乜都驚.
    冇你母校參與 ,正路啦, 睇下教出你咁古板既弟子 , 就從來唔知天馬行空為何物XXD

    回覆刪除
    回覆
    1. 毛豆:咁啲示威人士一早就要扮成咁樣去旺角啦XXXXD
      梗係啦~~~~那是間超級古板學校,悶足七年所以搞成咁><
      不過好彩依家有得睇毛豆blog,才頓悟咩叫做天馬行空^0^

      刪除
  3. 嘩!人多到咁!睇你介紹仲好啦!

    回覆刪除
    回覆
    1. Stella:現場睇會有氣氛啲,幾開心架^^

      刪除
  4. 可能藝術有點高深...呢個大會有冇特定主題架??

    回覆刪除
    回覆
    1. 森:其實藝術既野可淺白也可高深,同森兄啲作品一樣囉^^
      根據official網頁係咁樣介紹嘅:「今年將以「藝遊科幻境界」為主題,匯聚超過3,500名本地青少年及專業藝術家的創意,展現藝術與科學強大的交織力量。活動更會透過視覺藝術、表演藝術及互動遊戲等不同形式,啟發參加者對科學的興趣。」

      刪除
  5. 回覆
    1. Ahmo:其實只要去下佔領區睇下人地張貼的手繪海報和連儂牆,就知道香港人係幾有創意XXXD

      刪除
  6. 維園無比人佔領嗎?這燈會真有趣,不過唔好比強國人知道,唔係佔維園是大6人啦!

    回覆刪除
    回覆
    1. Sydney:無呀!唔會佔維園啦,主要係佔大馬路.....
      我諗強國人對喱啲野一點興趣也沒有,佢地有時間都去隔籬逛sogo希慎果邊掃貨啦,又或者去買蘋果,LV,Gucci,Chanel和飛甩雞毛,阿媽尼之類,仲要趕住去搬啲化妝品店和金舖和走水貨奶粉!!
      忙成咁,又邊會浪費時間去維園睇喱啲無謂野XXXD
      除非有HKD$500派啦kakakakaka

      刪除
  7. 回覆
    1. Samwei:有冇睇過talk to her?男主角一路駕車一路喊一路諗返同女友的回憶片段時,就是唱住喱首歌,到依家都仲記得這個很感人的電影畫面~~~很正!!^^

      刪除
  8. 好少夜嗎嗎走去逛維園>> 驚有色狼?
    唔見基爾間母校參與>>你去咗咪已經有個造型古怪做代表囉. 唔使參與啦.

    回覆刪除
    回覆
    1. 王子:你又無去,唔驚啦kakakakakaka!!!!
      係喎一言驚醒夢中人~~~~~早知我果日帶個閃神面具去助慶啦XXD

      刪除
  9. 維園就少去,唔知邊樹就多去呀嘛!知道喇!
    D公仔唔似紙扎喎!

    回覆刪除
    回覆
    1. JJ:唔知喎,邊庶多去?!!~~~其實我最想去羅馬尼亞睇下^^
      唔似~~~佢地都無搽紅胭脂在臉上XXXD

      刪除
  10. 渣打藝趣嘉年華?!真係未聽過,肯定宣傳不足!但現場幾熱鬧!

    回覆刪除
    回覆
    1. Wan:原來都搞咗幾年,我都係依家先知咋!!

      刪除
  11. 渣打藝趣嘉年華,錯過咗添!

    回覆刪除
  12. 好正呀!原來有個咁好藝趣嘉年華,多謝基爾咁好嘅分享。

    回覆刪除
  13. 咦 ... 我都唔知有個咁得意的嘉年華喎 !!

    回覆刪除
  14. 呵呵好多靚靚怪獸喎 , 我都唔知有這個嘉年華會 , 明年再有我都好想去趁熱鬧 .

    回覆刪除
    回覆
    1. Ak:啲怪獸都幾過癮架,表演果啲都好投入,明年去襯下熱鬧啦^^

      刪除
  15. back ground 首歌好聽X2
    夜光巡遊 好有神秘感。

    回覆刪除
    回覆
    1. Longbell:係呀我都覺得喱首歌唔錯,套戲都幾正^^
      覺得幾特別,畢竟在香港唔多機會睇到類似的街頭巡遊吧

      刪除
  16. 這個銅鑼灣的藝趣嘉年華,又真系好過癮囉!

    回覆刪除
  17. 香港有d咁既嘉年華幾得意喎~~~
    可能之後會變成巴西嘉年華咁勁~~~正~

    回覆刪除
    回覆
    1. Tiffany:如果係都幾正喎,不過夏天搞有氣氛啲

      刪除
    2. 咁又係呀...好似呢幾日咁~~凍冰冰都係留係屋企好d啦可~

      刪除
    3. Tiffany:至少天寒地凍對啲森巴女郎似乎唔係好人道啦XXD

      刪除
  18. 我都唔知有呢個嘉年華喎, 都幾有趣!!

    回覆刪除
    回覆
    1. 蜻蜓:佢地啲扮相都幾有心思㗎^^

      刪除
  19. 你唔講我真係唔知有D咁有趣嘅嘉年華,得閒都去睇吓先~

    回覆刪除
    回覆
    1. Momomom:下年去睇下,佢有日場和夜場巡遊的!!!

      刪除
  20. 我都唔知銅鑼灣有咁精彩夜間巡遊。

    回覆刪除