冬日絮語:這個聖誕不太懶

今年整個12月基爾感覺上好似成日周身唔得閒，大典blog固然係無乜時間寫，連巡blog都少了！主要原因係除了之前早已講過會外遊之外，公司年底也勁多野做無乜時間畀基爾蛇王update個blog……

外遊回來立即就迎來聖誕長假期，不過由於之前基爾已請了大假去玩，聖誕假點都要有風度地讓返畀其他同事放，所以全部紅字假期和長周末都返足工好勤力。事實上，年底公司又特別旺場，唔放假當賺多點bonus都係好事（就當幫助下之前旅行的洗費吧）！



既然日日返工、放工又夜都無乜同朋友gathering，不過有心人都有郵寄聖誕禮物來令人喜出望外！記得上次是閃神，今次則是藍精靈。砌喱類小積木其實唔太難，仔細看圖、耐心跟足步驟砌就ok，上圖先砌掂個身先！



之後再砌埋藍精靈個頭，佢個頭的構造比較複雜小小，但只要跟住個圖小心砌就無大問題，幸好奇蹟地一take過唔駛拆散再砌過，基爾都要畀返個「叻」自己！



好喇……唔駛半個鐘已經砌好晒藍精靈個身同個頭，最後一個step就係將個身同頭合二為一，登登登凳！係咪同盒面果個一樣咁靚仔呢！好有成功感呀，果然是一件很有意思的聖誕禮物，多謝晒！



最後當然要同返「上屆」禮物閃神來一幀大合照啦，依家先知原來閃神係比藍精靈高少少喎！好期待唔知「下屆」會係砌乜野公仔呢又？



砌完公仔當然唔少得順便睇埋至愛郵票，外遊前其實基爾已經收到通知信要去郵局拎埋今年壓軸的一個首日封「中國世界遺產系列第三號：中國丹霞」，本來於12月4日發行，由於距離出遊日子非常接近，而基爾又唔想回來後才去拎，所以點都要拿拿林趕住郵局閂門前拎返來。



如果有睇過之前基爾blog都有show過這個世遺系列首日封，如有印象之前的第一號和第二號分別係萬里長城和麗江古城，兩片小型張景色都好壯麗。至於今次的丹霞山也沒有令人失望，基爾不其然回憶返十幾年前與同學仔12月去那裏凍冰冰行山賞梅花的有趣旅程畫面。



聖誕假期日日返工其實都幾鬼dry，點都要對自己好一點忙裏偷閒上網window shopping解一解悶。其實之前外遊時由於知道當地天氣麻麻可能會有大雪，都特登穿了對爛鞋去，一來行雪雨地泥濘地即使踩污糟了都唔駛恨，二來爛了就索性買對新的回來吧！



由於日圓勁抵，所以旅途中一路都有喉住D波鞋店看看會否睇中心水之選，可惜最後都無乜合眼緣。回來後再上網look一look，果然即刻見到對又平又靚的，折了之後只售HKD$166.9真係唔買都對唔住自己！



最過癮係依家佢地間速遞公司仲有網上追蹤服務，對鞋由周五新加坡落單出發上飛機，再運到香港天水圍Distribution Centre，到周二早上終於收貨，睇到對鞋實物之後果然對辦無失望……眾裏尋它千百度，喱D算唔算叫做緣份呢！