散策郵誌@山東

去年底上京時提過，基爾真係有N年無正式返大陸旅行，那張礙眼的「黑人」回鄉證擺埋多過用。趁住寫「瀛遊」寫到悶悶地，不如又拎返舊郵票出來懷緬過去的愛漫郵歲月……

基爾不太抗拒返大陸旅行，只是近年內地不少熱門旅行地方越來越商業化（幾乎任何景點都收門票），而且經常逼爆遊人更令人意興大減！基爾還是覺得十幾年前返大陸玩開心好多，雖然逼火車巴士辛苦但人仔平好多，食玩住乜都抵，現在回想也慶幸當年有去過走走神州大地。



即刻鑽入床下底摷舊郵票，今次摷出來的係一套2000年7月發行的「山東嶗山」首日封，4張郵票分別以嶗山的主峰「巨峰」，以及「太清宮」、「北九水」、「仰口灣」等幾處名勝為題材，風景固然靚，設計也很有新派國畫韻味。



再去揭返本陳年旅行相簿才記返起「那些年」，原來山東遊已經係2000年的10月，總覺得唔似咁耐，卻眨下眼就過了14年有多。記得當年是飛青島，而嶗山就座落在青島北面不遠的一處海灣旁，好耐以前係咪有個「嶗山礦泉水」廣告？聽聞青島啤酒也是用嶗山礦泉水釀造，anyway去過才知嶗山原來係道教名山。



當年除了去行嶗山之外，印象最深就是去小魚山和八大關，那時基爾立即就被那些西式古老建築迷住了（千禧年以前鄉下仔基爾還未去過歐洲，只曾在1999年用BNO去過一次南太平洋的魔戒小國，就先賣個關子，容後再用郵票尋覓回憶）。



除了青島外，基爾最鍾意的就是煙台，記憶中還呆站在蓬萊閣的觀景炮台上等了很久，祈求一睹那裏最著名的黃海「海市蜃樓」，最後當然係睇唔到（幾年後在埃及的浩瀚沙漠終於睇到一次）。至於上圖右見到「五嶽獨尊」石刻就知係泰山上的天街，當時搭吊車上到天街，然後再一路行上玉皇頂，都有少少索氣。



睇返那次山東遊的老照片，原來仲有去曲阜孔廟和濟南大明湖（記得入晒黑才去到趵突泉，影相時都幾驚會差錯腳跌入漱玉泉），路經濰坊時還買了紙鳶，不過十幾年來這隻鷹形大紙鳶都從未放過上天呢！