2014古都瀟瀟@平民和牛

中午過後不久行完金閣寺一圈之後，差不多又係時候離開去下一個幾特別的check-point：有京都廚房之稱的「錦市場」。

旅行在外如果有時間的話，基爾都幾鍾意抽少少時間去逛市集街市超市之類，一來可以睇下當地人到底愛買乜煮飯，二來又可順便食下野！在日本逛過又比較有印象的是金澤的近江町魚市場，還有函館的朝市也很出名。至於今次到訪的這個「京都廚房」則不論遊客或當地人都會來買東西，由街頭到街尾幾乎都人頭湧湧……



整個錦市場基本上就由幾條長街一字形連接而成，各式各樣濕貨乾貨攤檔和食店、零食店、藥妝店、波鞋店應有盡有，齋行一轉都幾粒鐘。比較吸引的除了有即買即燒的章魚八爪魚燒烤檔外，仲有即開即食的生蠔和魚生海鮮檔，還有如上圖這種售賣各種傳統手作米糕和咸甜糕點的餅店……此外仲有唔少賣日本菜用常的醃菜漬物之類，基爾之前在嵐山溫泉旅館食過的醬油醃魚乾仔這裏也有出售，一看才知原來係貴價野，一小盒十數條就要千幾円，但因為實在太好味了，一於照買！



整個下午在錦市場邊行邊食再食埋拉麵之後才離開，在傍晚時份搭巴士返回京都驛附近的弘燒肉店。因為之前一日中午來到才發現原來這間燒肉店只開晚市，深深不忿下今晚要再來食過。網上話喱間店都幾出名，在京都有好幾間分店云云……



緊接著又係飲食環節「和牛時段」，之前在神戶食過走高檔路線的Kobe Plaisir，這晚光顧的弘燒肉店則主要走中價路線，一打開menu望望價目表已經覺得激抵食，看來基爾又要破戒食多幾款唔同的和牛了。



日本這種「燒肉店」，說的當然不是香港那種賣叉燒燒味的燒臘檔，而是比較近似韓式燒烤那種食店。值得讚的是店內抽風設計頗佳，桌面雖然沒設有抽風機但完全唔覺得有油煙……



當然這間明碼實價講到明係中價店，就不會有廚師即席在面前表演烹飪功架了，桌上就只有一個網形的燒烤鍋，想食乜就自己落手燒而已。



比較有驚喜係其實這裏的牛肉味道絕不比神戶食過那間輸蝕，唯一有點緊張係燒烤牛肉的過程中真係要打醒十二分精神，唔好只掛住傾偈，否則唔覺意烤焦了就太暴殄天物！



上圖這碟雪花牛柳粒紋理pattern相當靚，但價錢只是幾百至千多円就有一大碟，感覺上好似仲抵食過香港的牛陣之類，埋單計人均才千幾二千円左右，與神戶店相比更只是1/10多一點價錢，所以之前即使食了閉門羹仍堅持要再來，實在是明智之舉！