2014古都瀟瀟@京都御苑

在二条城行到三點幾夠晒皮，睇地圖見京都御苑只係行多兩三個街口，咁唔好浪費時間行埋過去睇下啦！

買飛入二条城時特登問一問售票處職員可唔可以買埋京都御苑的門票（因為前年去名古屋時，發現買動物園和水族館的連票有特價；去東京的上野動物園出示passport也有discount），職員解釋一大輪，基爾只隱約聽到參觀御苑係要提早網上預約門票，無即場飛賣。



不過既然一場來到，而且只係行多兩三個街口，咁基爾一於照去摸下門釘啦（心存僥倖睇下有冇得博大霧入去）。去到睇睇門口個案內圖才知京都御苑係超大的，外圍係公眾開放的御苑，只有裏面的舊皇宮京都御所（天皇宮殿）、大宮御所（皇太后寢宮）、仙洞御所（太上皇寢宮）要預約。上圖左係御苑裏的拾翠亭和閑院宮邸蹟。



即使唔入皇宮，只在御花園行一陣，其實都有幾處清幽的大宅別苑可逛。由丸大町通這邊入去御苑，就有幾處古蹟睇，例如上圖這處閑院宮邸蹟就是昔日居於皇宮附近的親王故居大宅；至於上面提過的拾翠亭，就是九条家之遺構其中一部份。



昔日京都御苑附近有不少王公親貴富商的大宅，這是因為自桓武天皇於794年遷都平安京（現今京都）後，歷代天皇幾乎都住在這裏，現存的京都御所可追溯至1331年的光嚴天皇。上圖是閑院宮邸蹟裏的庭園和屋內的陳設，裏面的家具很有點60-70年代日劇的家居佈置feel。



1869年明治天皇正式遷都江戶城（即現時東京皇居）後，京都的皇室貴冑亦一同東遷，原本御苑範圍裏的皇室富戶大宅其後經歲月洗禮而日漸荒廢破落，大正和昭和年間陸續被清拆，只留下數座保存較佳的大宅苑，上圖的閑院宮邸蹟是其中之一，外貌看來有點似古雅的溫泉旅館。



睇完百年豪宅之後，再返出去御花園閒蕩，雖然係閒日下午時份，但原來都有唔少附近的市民來跑步和踩單車，事實上御花園真係又大又空曠，如果有單車租一定會方便得多，可以慳少少腳骨力和時間。上圖這類超大的百年老樹，在園內隨處可見。



上圖左是西園寺邸蹟；右圖是清水谷家之椋，就種在皇宮西南角，樹幹圓周達4米，據聞已經有逾300年歷史……



這棵老樹現時也好像老人家一樣，龐大的樹冠橫枝都需要巨型支架作「拐杖」，幸好它生長在京都，如果在香港就一定會畀人話危害路人要被鋸走。上圖左是皇宮圍牆，一直走就見到入口的清所門；左下則是宜秋門，現時不作開放。



京都御所正門就是這座清所門，門口有守衛檢查訪客的預約文件，基爾無上網預約所以就無得入去參觀了，網上睇過有台灣遊客入去參觀的網誌，裏面也有不少御殿亭台池塘花園的建築（與二条城裏大同小異），一年中也有部份日子開放參觀，如果嫌上網預約麻煩，也可選擇這些日子去（註：今年秋季賞紅葉開放日10月30-11月3日）。



冬天來京都比較快日落，下午4點幾5點已近黃昏，差不多時間要搭火車返大阪會合友人。京都御苑外圍也有不少上圖這類古老的御門，穿過這座「時光門」又可重回現代世界汽車來往如鯽的大馬路……