秋日絮語:Big Sale掃平貨

中秋過後重陽節又到，霎下眼2015年又過了大半，進入10月後感覺上時間過得特別快，以往這是基爾淡季出遊的黃金時機，不過今年無外遊就留港消費吧！

數字屋的營銷策略確是勝過百記惠記幾班，至少每逢有七八九折減價，基爾已養成去巡一巡執平貨的習慣，而且不少歐洲日韓貨色都不是傳統街坊超市慣常買到的，例如上面喱兩包Supreme雞肉腸就非常抵買，只係HKD$10左右一包，折了之後即係$7。香腸有芝士夾心和冇芝士兩款口味，食落冇廚師牌咁咸，肉質也不會太梅太林。不過Supreme sausage唔係UK品牌咩？包裝袋上卻印了Produit en France！



屋企人間中喜歡去Regal Riverside聚餐，之前lunch buffet因為有折，連加一都只係百七左右非常抵食（近月加返價就二百幾），每逢想食buffet就多數幫襯佢。今次去雖然無了青檸雪糕，但就食到上圖喱隻藍莓芝士蛋糕味，另外仲有開心果味也不俗。這種細杯裝D字頭雪糕在超市買要成HKD$20幾蚊杯，如果食10杯係咪已經回本……



個buffet除了沒有生蠔外，其實一般魚生刺身、熱葷冷盤、點心燒味、沙律甜品甚至印度咖喱都一應俱全，間唔中仲會轉一轉日韓、星馬、泰越又或者南亞阿拉伯之類的食材主題。上圖的鹽燒秋刀魚就又大條又正！



日本的藥妝店行得多，反而HK的就絕少幫襯，某日行過B字頭那間見有Big Sale咁又行入去睇下，發現用開喱隻三間牌淡香水比外面平差不多半價，聽sell士姐姐話喱隻Champions League係新貨，想問佢拎個tester來聞下都冇，反正咁平就照買啦！至於紅色包裝的紅磨坊朱古力鳳凰卷唔記得係數字屋定價真棧買，盒面同樣是寫Made in France，價錢也只是十元八塊而已，但奇就奇在雪凍之後食會勁脆，口感好特別。對鞋就係之前在Zalora網買，忘了是less50%定70%，折了之後百幾蚊，著上腳也不太覺cheapie吧！



秋意漸濃，好多人已經急不及待去買new arrival的秋裝，不過慳家基爾就主要去執「月下貨」，例如平時多數只去window shopping的G字頭，到大減價時又真係抵買到你唔信，在fitting room試過喱兩件酒紅色短袖和長袖tee，著上身睇落感覺都幾ok，而且質地良好，減價後仲有額外七折，兩件加埋兩舊水有找，係咪平過花園街？藍色果件tee係早前Zalora網買，折了之後一件都百幾！



p.s.入秋後，放假時在家都多了好多家務要忙（也是每年這個時節的指定動作），例如逐步要拎D長袖衫出來，夏天衫又逐步收返入大櫃櫳底；另外，風扇又係時候要「沐浴更衣」，收埋之前必須先逐一清洗抹乾淨才可收入盒！至於暖風機就暫時未駛咁快拎出來，通常十度八度先要出動。