珍郵魅@2016里約奧運

今年暑假真係幾熱鬧，除了在街上和公園成日見到大群訓練員捉精靈外，睇巴西里約熱內盧舉行的奧運也是熱門節目，欣賞賽場上運動員的拚搏精神之餘，仲搞到基爾暫時唔係幾好意思繼續歇暑下去，就先睇返D奧運郵票趁一趁個奧運熱吧！

今屆里約奧運出的紀念首日封長這樣！年初預訂郵票時睇個sample就覺得唔係太開胃，曾有猶疑過好冇訂呢？不過，後來諗住奧運4年才有一次，唔靚都照訂啦！最近終於去郵局拎到實物，打開一睇才發現原來都幾靚喎，好彩有訂到，唔係就後悔！



由這個角度看，可以看到運動員的金屬剪影，銀光閃閃的燙壓效果幾有獎牌味道，4枚郵票分別印上幾項香港選手參與或曾獲獎牌的熱門項目，包括單車和田徑（$1.7）、乒乓球和羽毛球（$2.9）以及滑浪風帆和游泳（$3.7）；另一枚則展示今屆兩項新增賽事：欖球和高爾夫球（$5）……



4枚郵票分別以象徵奧林匹克五環標誌的黃綠藍紅作底色，小全張背景配襯埋2008年北京奧運時香港曾協辦的馬術項目，感覺上幾colourful幾有活力；還有橄欖枝Rio2016特別郵戳，基爾也覺得設計頗美。



講開奧運郵票咁又去摷摷床下底D陳年寶貝，先看上屆的2012年英國倫敦奧運首日封，之前好似無寫過咁又介紹下。驟眼看可能會以為是罕有的圓形郵票，但其實是由4枚方形郵票合併而成，而小全張右面則印上倫敦大笨鐘、塔橋等著名地標，同以放射線條圖案展現出奧運的活力和姿采。



至於4張郵票展示的賽項包括風帆和賽艇（$1.4）、羽毛球和射箭（$2.4）、乒乓球和單車（$3）以及游泳和田徑（$5），每枚郵票還分別加上2、0、1 、2等數字，甚有心思。翻查資料原來上屆倫敦奧運已是這個大不列巔帝國首都主辦的第3次現代奧運會，之前兩屆分別是一次大戰前的1908年和二次大戰後的1948年。



唔嫌悶的話就繼續睇落去吧！講到香港最威水果年，就一定不能不提1996年的美國亞特蘭大奧運，當年這個紀念封原來發行於1996年7月19日，該屆正好是現代奧運的百周年紀念，也是香港回歸前最後一屆參與的奧運會，上圖有金色邊框的就是慶祝奧運百周年紀念版首日封，還有回歸前的香港奧委龍獅圖案標誌；郵票左上角可以見到印有代表英女皇伊莉沙伯二世的「EIIR」和皇冠圖案。



李麗珊在亞特蘭大奧運風帆賽奪金應該好多人記憶猶新（至少記得唔係垃圾的金句），不過數數手指原來已經是20年前的威水史（光陰似箭真係快得驚人）！當年香港奧運代表隊回來後仲有出過上面這套慶祝首奪金牌的紀念封，除了不能少的珊珊威水獎牌相之外，仲有奧運百周年主場館作背景，當然還有$10女皇頭郵票。



1996年亞特蘭大奧運除了珊珊在風帆奪金之外，當屆港隊在殘奧運也取得佳績，包括蘇樺偉在男子4乘100米接力同樣奪金而回，原來當年殘奧也曾出過首日封紀念香港選手取得佳績，不過看郵戳是發行於1997年6月1日，$10郵票也沒有了女皇頭。



若數基爾收藏的奧運紀念封當中，設計最靚的要算是上圖這套1992年西班牙巴塞隆拿奧運，背景除了有奧運聖火和五環之外，郵票上的5個賽項也配合了五環設計，簡約得來又有心思。有冇人仲記得當屆奧運Sarah Brightman與José Carreras合唱的《Amigos Para Siempre》？



最後不如睇埋香港唯一主辦過的大型綜合運動會「2009年東亞運」，當年同樣有出過紀念封，設計也是以運動項目作主題，分為金銀銅3組共6枚郵票，與今屆里約奧運那套同樣採燙壓效果很有metal質感。底下另一套則是同年的「香港巴西聯合發行足球郵票」，中央併合起來成為完整的足球圖案，是香港比較少有以運動為主題的首日封。

2016年里約熱內盧第31屆奧林匹克運動會
發行日期：2016年8月5日

p.s.講開奧運，醒起之前基爾有提過去報班練自由式，10幾堂其實好快就上晒，之後原來仲有成績表派咁盞鬼，可惜裏面係大大隻寫住「不合格」3個字有點醜怪，依家諗返唔怪得最後果堂教練鬧基爾只差果兩三步就掂池做乜唔游埋佢（教練平時好nice唔會鬧人），原來果陣已經係考試了，成績表寫明一定要游到個訓練直池先可以升班否則就要fail，早知忍埋果兩啖氣游埋佢啦！（最新跟進：之後自己再去泳池游多幾次其實已經達標，可惜為時已晚，有點扼腕揼心！）