珍郵庫@饒宗頤畫作及書法

係呀又係講郵票，看來基爾都要努力少少為大典發掘開拓一些新鮮題材，有乜好提議？定還是繼續享受半休blog呢？

不過，點都寫埋今次喱套先啦！這套以國學大師饒宗頤的水墨書法作品為題材的首日封，可說是今年的重點之作，看訂購單張時已覺得好靚，是今年度必訂之選（有可能全年最賣得就係喱套）。



點知原定於3月底發行的首日封竟一波三折（唔係IQ題，咪誤會有折頭），3月中時收到email通知話「印刷出錯」要重印，仲要延後到不日通知新發行日期（到底印錯乜野咁蝦碌，下面再講）！無止境的等……結果一等就大半年，在幾乎淡忘了之際……



8月中又收到電郵話終於定了9月5日會補出返喱套首日封，咁遲到都好過無到啦！基爾激愛上面喱個$10《荷花四屏》小型張，係咪靚到冇人有呀！印象中上次去美孚那間饒宗頤文化館有見過這幅美得令人心動的荷花寫真，立即翻查舊blog果然有影到（可click去：饒宗頤文化館@美孚），想睇返可以click去睇下！



話明係重點推介，又點會只買一個小全張咁少，一定要買埋其他書畫郵票先安樂啦（開動大解慳囊mode）！上面一套6款郵票幅幅都係代表作，等基爾慢慢逐一話你知係咩名堂吧（一定又要係度拖時間短話長說了）！



好啦由平到貴逐個講：$1.7《黃海虯松圖》和$2.2《九松羅漢》都是饒大師的山水花鳥畫代表作，分別繪於1984和1993年，留意連個郵戳都係饒大師手筆，特別得來又好classic。



跟住上面見到$2.9《閒中有富貴 壽外更康寧》和$3.1《澤潤四方》。開估！就係印錯了$2.9這詩句的簡介。這兩句詩係來自宋朝陸游的《自喜》，寫簡介果個要打patpat太懶唔上網confirm一下，將「壽外更康寧」寫成「壽外處康寧」。陸放翁五律原詩是：「了了復惺惺，蓍龜未是靈。閑中有富貴，壽外更康寧。身備鄉三老，家傳子一經。春回元不記，出戶四山青。」這首未必很多人會讀過，相信《示兒》就大部份人在中學時代一定有讀過吧！



溫習完宋詩之後繼續講埋餘下兩張：$3.7《摹唐人觀音》和$5《金文錄陳曼簠銘》。金文就是刻在青銅鐘鼎上的遠古中文字，饒大師除了精通詩詞文學和書畫外，也鑽研上古史、甲骨學、楚辭學甚至古樂曲等十幾項領域，故有國學大師之稱。



心水清blog友可能會留意到，上面除了兩個首日封之外，側邊好似仲有盒野唔知係乜喎！咁就開埋估啦（其實應該都無乜人想估）！就係上面喱盒野，影埋出來畀你睇知唔知係乜東東？



睇真其實佢係個passport套，唔訂開郵票首日封可能唔會知，依家訂郵票係好似去超市買野貯積分和印花咁，訂郵票係有積分貯，咁貯貯下又有好多分可以換唔同紀念品（其實好多禮品都係D唔等洗無謂野），例如年頭訂生肖郵票會送生肖利市封和生肖金牌（A貨咋）；訂颱風郵票會送颱風訊號手巾仔之類……記得那時預訂喱套饒大師首日封時見到有得用積分換喱個passport套，基爾已經好心心眼，填表交錢時問郵局叔叔可唔可以換喱個套（連自己有幾多分都唔知），郵局叔叔話照填啦！夠分佢自然會畀你云云……結果等大半年等到郵票出先知有定冇，係咪辛苦過等桃花到！

饒宗頤教授畫作及書法
發行日期：2017年9月5日（原定：2017年3月23日）