2018年3月12日 星期一

舊金山居閑話@Fisherman's Wharf:上

基爾記得數年前去Sydney短住時都有特登出去佢個漁人碼頭行一圈兼食了隻大大隻又新鮮又多肉又抵的大龍蝦,咁今次來到阿美利堅要去多次fisherman's wharf睇睇舊金山喱個係咪仲堅D先得!



去睇金門橋通常都順腳逛埋過去Hyde Street睇古董上山電車,仲有就係去Lombard Street睇九曲花街影張靚相打個卡,之不過為食基爾當然不能走漏了要去埋就近的漁人碼頭逛逛先肯走啦!



三藩市區尤其係遊客區搵位泊車比較麻煩,而且大部份都要入錶,好多時要泊遠少少,行幾條街先可以落返去近漁人碼頭市集果邊,這情況同老家都有D似喎(泊車無位要去到無雷公咁遠)!漁人碼頭喱邊遊人雖然多,但好在建築物都不是太高,望上天空不會太有壓迫感,基爾特別喜歡上圖綠色那種古老單層電車,係咪好有五六十年代的老電影場景風味!唔知當年占士史釗活拍《迷魂記》時又有冇來過喱度取景呢?



話明係去逛fisherman's wharf,花少少時間巡一巡D小食檔是常識吧!基爾見上圖喱種賣clam chowder海鮮湯的幾乎個個攤檔都有得賣,唔知係咪喱度漁人碼頭的名菜呢?突然醒起紅罐C字牌果隻老牌罐頭湯都有喱款周打海鮮湯,基爾間中會加麥皮煮當早餐(每次煮半罐,可分兩餐食)。



行行下見上面喱間餐廳都幾唔錯喎!Lunch specials until 4pm實在太好了,之前去其他地方的食肆好多時下午兩點幾已經落晒場。喱度如果行到下午茶3-4點都不愁無野食醫醫個肚仔!有冇人又想來同無聊基爾玩下「食飯學英文」?Fish & Chips唔駛解釋啦!不過USD$14.75係咪都幾貴?唔知份量係咪好大?咪住!睇真佢個lunch specials係包埋shrimp salad或clam chowder,咁都算抵食喎!



睇埋其他幾樣先,都係USD$15.50-18.25不等(當然也是未連稅及service charge)。最頂果樣叫Rex Sole Almondine有冇睇錯?係咪類似港式茶餐廳乜乜香煎龍利柳果類?Almondine唔識喎係乜野來呢?佢地興加杏仁碎片定係汁?No.2果樣Mussels Bordelaise好深呀!類似紅酒燴牛利果種汁?不過喱個係燴青口果類係咪?



No.3則是Calamari Steak,醒起香港有時街市會有D熟食檔有種燒魷魚餅賣?係咪類似喱種?如果係煎墨魚扒會唔會驚好韌?最後果樣Fried Filet of Sole沒搞錯就是炸魚柳吧!喱度除了有加州鱸魚之外,原來都仲幾興食多寶魚果類扁魚喎,唔知係咪貪佢無乜細骨啖啖肉又易起肉呢?



好喇上完英文堂當係請大家食飽晒,咁又繼續行多陣四圍八下!上面喱間Crab Station顧名思意係咪食蟹出名?不過見佢無避風塘炒蟹果D喎!Crab Cake就食過(USD$5),是用蟹肉打成蓉撈少少洋蔥薯蓉和面包糠炸整到成個圓形餅仔咁,基爾覺得幾好食。不過喱檔最特別係佢個英文menu上面大大隻字寫明「我們通曉國粵語」!



拿!大大隻蟹擺埋出來畀你過目係咪新鮮料,應該可以拆出好多蟹肉用來整crab cake了吧!另外,喱間一樣有clam chowder,有得揀cup / bread / pint / quart,應該係份量size不同,大D就賣貴D,不過bread就最得意,基爾醒起以前食過那種農夫包,裏面有菜有瓜有豬肉有雞肉雜錦乜都有,喱個就用個麵包切開頂蓋來裝周打海鮮湯,如果天氣凍食落當堂暖笠笠之餘,仲要係夠晒環保唔駛洗碗!

66 則留言:

  1. 我估唔會搵隻新鮮蟹做招徠, 其實係用雪藏野掛

    回覆刪除
    回覆
    1. 唔知係咪烚熟咗攤出來吹涼佢先拆蟹肉呢?

      刪除
  2. 記得電車初初有車身廣告的確帶來新鮮感,但我都幾懷念香港綠色古老電車。
    大大隻蟹擺埋出來,非常吸引!

    回覆刪除
    回覆
    1. 有啲廣告都設計幾得靚,有時都會覺得幾有特色呢....
      可以用來做生招牌wakakaka!

      刪除
  3. 澳洲食海鮮應該又平又靚.

    回覆刪除
    回覆
    1. 我只去過Sydney果個fisherman's market,覺得幾抵食^^

      刪除
  4. 回覆
    1. 1968年剛暴動完,係咪物價會低啲?
      聽好多前輩講,暴動果陣港島區好多樓都係幾千蚊已買到XXXXD

      刪除
    2. 1968年尾新地600呎wanchai新樓
      lockhart road /luard road
      $33000

      刪除
    3. 大夫如果早幾十年出世,依家一定做咗灣仔地王XXXXD

      刪除
  5. 咁大隻蟹拆肉整Crab Cake,肯定啖啖肉吧^^

    回覆刪除
    回覆
    1. 一隻咁大隻蟹我諗可以做好多個cake啦^^

      刪除
  6. 可能外國地方發展得冇咁急速,十年廿年個地方都係差唔多…唔似香港時時都不停擴建,隔冇幾耐又見到新面貌,可能都同地方細有關~~
    Gael兄唔好見到咁多美食就不停食,因住有個士啤呔…

    回覆刪除
    回覆
    1. 歐洲城市好多都有舊城區,HK人就唔識喱種珍視文化歷史的規劃!!
      多謝森兄咁關注我條士啤呔,有機會真係要一齊跑下步wakakaka....

      刪除
    2. 因為好多外國返來的人身形都肥咗唔少,而且西方飲食份量大…
      不過外國地方大可以有排跑,gael兄實fit晒啦…

      刪除
    3. 咁如果想增肥係咪首選移民.....XXD
      原則上係,不過要視乎天氣同埋恆心囉^^

      刪除
  7. 嗰菜名...你英文咁叻都考起
    我哋去到直情係唔識叫,
    話時話海鮮都幾抵
    咁鬼大隻蟹得賣咁平
    香港唔斬你幾百蚊都幾難落樓

    回覆刪除
    回覆
    1. 有咕高燦士厘幫手好好多......XXXXD
      唔駛驚喎好多華裔人士,路霸兄行走江湖咁耐應絕對不成問題^^
      幾度海邊,食海鮮都算平啦
      HK依家買棵菜都成十幾蚊斤,啲錢唔見洗

      刪除
  8. Sydney漁市場既海鮮麻麻地好食.
    美國d餐廳包括流動美食車都用成隻蟹or龍蝦拆肉, 俾足料, 唔會好似香港咁小家.

    回覆刪除
    回覆
    1. 去食過一次龍蝦魷魚圈果類都唔錯,其他就唔知了....
      同意,都幾足料,唔會賣平一元半角就即刻諗縮數偷工減料,同埋份量一定夠食^^

      刪除
  9. 鬼鬼地方有新鮮海鮮!🤔
    我當時泊到好遠,之後用電車遊覽

    回覆刪除
    回覆
    1. 喱度近海,如果入內陸啲就一定唔好叫海鮮,多中伏!!
      果度遊客區,好多時難搵位泊車,要泊好遠,我都係自己行返去碼頭海邊咋:P

      刪除
  10. Clam chowder with sour dough please.... XXXd

    回覆刪除
    回覆
    1. 好正呀.....有舊面包唔駛食其他餸了^0^

      刪除
  11. 用周打蜆湯煮麥皮?!?!我第一次聽~~好有新鮮感!!我平時用開水架咋~~~~
    最後淨係食左蟹餅咋?!?!

    回覆刪除
    回覆
    1. 好多時早餐會加麥皮,當做粥咁食會飽肚啲^^
      結果都無食蟹餅,因為之前食咗野,太飽啦:P

      刪除
    2. 哈哈~~所以我成日溝水食兩個鐘度個肚又會再打鼓~~~~~但早上我又懶唔會搞咁多野~
      唉呀~~~~~可惜呀~~~~~~~~~我最想食係生蠔~

      刪除
    3. 求其加幾匙羹落去一齊煲,都方便嘅^^
      生蠔我就唔係太敢食,因為驚唔乾淨:P

      刪除
  12. 你寫左咁多,到底你食左幾多樣?

    回覆刪除
    回覆
    1. 果日係食飽咗先去,都係齋睇無乜食野呀:P

      刪除
  13. 睇到好吸引呀,做仲識強國話/粵語...勁

    回覆刪除
    回覆
    1. 對,應該不會有溝通問題wakakaka....

      刪除
  14. 遊客區係貴,不過美國的份量大,都值回票價呢

    回覆刪除
    回覆
    1. 一般份量都幾大,可以一人份量二人共享都無問題,咁圍起係抵食嘅XXXD

      刪除
  15. 我第一次去漁人碼頭唔夠時間,好熱鬧好多野睇。 911個年再去就....

    Clam chowder 我係香港唔会叫,料唔夠又無咁好飲

    回覆刪除
    回覆
    1. 911去到係咪水靜河飛?
      我都唔會,正如你咁講係無料夾水樣稀...XXD

      刪除
    2. 得小貓2,3隻。 宜家應该熱閙返。 不过諗起昂贵既visa, 朋友话... 等免签先去😅

      刪除
    3. oic......
      如果十年內去多幾次,都抵嘅^^

      刪除
    4. 坐豪啲可以舒服啲.....^^

      刪除
    5. 純粹旅遊探親我諗一般都問題不大吧...!

      刪除
  16. 大大隻蟹係活的定係冰鮮的?好唔好食?

    回覆刪除
    回覆
    1. 我諗係烚熟咗,唔係生嘅,唔識郁的
      無食呀所以唔知好唔好食.....:P

      刪除
  17. 名碼實價有埋樣本睇 , 仲識國粵語好識做生意 .

    回覆刪除
    回覆
    1. 有樣本睇好好多,至少知道大概個樣,不會太離譜:P

      刪除
  18. 你介紹得咁生動,店舖應該要出返鳴謝俾你。^_^

    回覆刪除
  19. 我們通曉國粵語 <--呢句先係最大特色呀, hahhahaa

    咁最後基爾食左d 咩~?

    回覆刪除
    回覆
    1. 至少買野食好方便...^^
      無啊果日食飽先去,行下㗎咋:P

      刪除
  20. 外國人煮海鮮始終無中國人煮得咁叻,咁原汁原味!

    回覆刪除
    回覆
    1. 佢地都有佢地自己一套烹調方法吧,一試無妨,是否啱口味就好個人囉^^

      刪除
  21. Crab cake 真係好好食,只不過我覺得有啲貴,想吃都要忍住!

    回覆刪除
    回覆
    1. 我都覺得唔錯,如果覺得食普通蟹要剝殼太麻煩,crab cake啖啖肉就方便好多XXXD

      刪除
  22. 曾到此一遊,但冇幫襯!

    回覆刪除
    回覆
    1. 我都覺得啲souvenir唔係好吸引,齋睇下就算:P

      刪除
  23. 一舊金.深山居.長氣閑話,已經十五集囉嘩!kaka...

    回覆刪除
  24. 第一張相藍天映襯,左右均衡,拍得好靚。
    以前我都好鍾意買蟹回來煮吃,只要生生猛猛,無論大隻抑或細隻,係肉蟹就好鮮甜好吃。現在都懶整冇買了。睇嚟搵日去買番隻回來,享用一下。

    回覆刪除
    回覆
    1. 多謝你鼓勵,不過那天陽光太猛了,所以影出來暗位會比較黑:P
      劏蟹真係一件唔容易的事,要清走啲肺又要洗乾淨內臟我覺得難度好高呢^^!

      刪除
    2. 係0架,劏蟹真係唔容易0架,首先要用刀背切去牠的兩隻螯拑,再拿去腮,和蟹壳內的髒物,掀去蓋,一切為二。蟹拑要敲裂些。這是一個水上人的嬸嬸教我的。

      刪除
    3. 好勁喎你,我只係識食咋XXD

      刪除
    4. 基哥你懶做啫! 或者唔想殺生吧。

      刪除