港珠澳閃遊36小時:下

速寫閃遊話咁快來到Day 2，晨早六點幾就morning call有很充足時間梳洗仲可以睇一陣電視（收到大台），好耐無試過星期日清早起身睇電視。

7:15am │ 在房hea一陣就落去酒店樓下food court食早餐buffet，中西日韓食檔齊備，但同場太多人，野食又出唔切，總之係一個亂字



7:48am │ 外遊時基爾食野一般都比較謹慎（尤其在大陸），盡量避免食生冷野（尤其早餐），咁一碗熱粥或者熱麥皮就係必然之選，再配上烚雞蛋炒麵烚椰菜饅頭仲有蕃薯已經夠晒飽肚



8:30am │ 跟團要好有時間觀念，食飽趕上房拎行李再落大堂集合（自己check-out），立馬就要趕上旅巴出發去今日第一個景點



9:51am │ 坐了成個鐘車開始見到大片草原（人地係農田來的），覺得好relax好心曠神怡，可否留在這裏逛耐點呢導遊先生



10:05am │ 導遊話這朝早就留在這裏看碉樓了（開心晒），在村口對錶約好集合時間就入村開始自由行；碉樓村外有條風景好靚的護城河，城牆上仲保留了大躍進時代的標語？有冇藍色解放裝出租著住去打卡



10:15am │ 開平這一帶近年好出名好hit，因為碉樓歷史建築群景區入了世界文化遺產，鳳儀里這裏就是其中之一



10:22am │ 昔日村裏都有好多金山阿伯衣錦還鄉帶美金回來起碉樓，依家就大部份變了吉宅用作展覽（注意牆上貼了地圖指示最佳遊覽路線，一定唔怕蕩失路）



10:37am │ 村裏真係有好多橫街窄巷，幸好指示幾清晰（咪扮野跟人行之嘛），行過這間「微碉樓展示館」好似幾有趣，就入去睇睇



10:45am │ 山外有山樓內有樓，碉樓入面竟然又有碉樓，說的是模型屋，手工製作看來都唔錯，都幾靚喎



10:55am │ 有時間仲可以行上樓頂天台登高望遠，碉鄉田園風光盡入眼簾一覽無遺，空氣又夠清新，果真不錯



11:03am │ 上圖的南遠樓有四五層咁高，外表望落係咪有些似歐洲舊城裏的鐘樓或城堡？趁無乜遊人又入去參觀一下（慶幸有充裕時間）



11:16am │ 上去碉樓頂要花一點氣力，而且樓梯頗狹窄，但上到天台就值回票價，遠眺村鎮外圍難得仲保留了大片稻田（沒改作豪宅樓盤或貨櫃場），有些還已長出稻穗可以準備收成



11:22am │ 部份碉樓內仍保存昔日的陳設格局，上圖這間則展出50-80年代的糧票（係咪以前公社生產大隊的產物）



11:28am │ 還有些房間展覽不少舊時農村的竹織農具；田邊仲有村民即席表演操作打穀機，不斷踩動機內的滾輪可以將稻穗打出穀粒



11:36am │ 德廬是村裏保養得最好的villa，建於二戰前的30年代，是由加拿大華僑修建的青磚院落，樓高三層，坐南向北別樹一格



11:45am │ 行到田邊又發現一列十幾個爐灶遺址，聽大叔講解話係似以前農村煮大鍋飯用（唔知有冇呃細路），依家就擺滿不少雜物



11:52am │ 另外仲有一座比較高的是東樓，都有好多遊人排隊上樓睇風景，一場來到無理由唔上去睇睇，內部格局同南遠樓也差不多



11:58am │ 頂樓天台風景長這樣，同樣是一望無際的稻田風光；值得一提係碉樓內的木樓梯其實都好古雅，但由於實在有太多遊人上上落落，經常聽到發出木板聲音好驚會踩爛古蹟



12:10pm │ 好辛苦先排隊上樓（上行和下行時在樓梯會塞人），咁上到天台一定打多陣卡hea多一陣先肯落樓



12:20pm │ 集合時間差不多，又係時候返出村口上車，到賓館食個lunch先；這餐有雞鴨豬魚九餸一湯同樣白飯任裝



2:05pm │ 食飽中午飯又再出發，下午景點主力去新會陳皮村shopping



2:15pm │ 村裏基本上都是售賣旅行手信，有花生糖和各樣乾果零食任君選擇，當然重點是賣陳皮，有些攤檔擺滿一地新會柑



2:25pm │ 果肉全部任食唔嬲唔駛錢，但最矜貴當然是陳皮，真係有價有市，見有團友豪擲四位數大手入貨，好勁



3:03pm │ 村口仲有好多棵許願樹，全部掛滿祈福寶牒，而且每棵都是真樹，如果是新年來一定好熱鬧



3:58pm │ 團友個個買到一抽一袋滿載而歸，之後由新會直接坐車返珠海，沿途都是走高速公路，幸好沒有塞車



8:00pm │ 再經港珠澳大橋返歸，不過傍晚過關實在太多人，等旅巴又等好耐，結果安抵家門已差不多晚上八點，順利完成閃遊36小時