2019年4月8日 星期一

雪梨盛夏光年@Opera House

話咁快又來到春日四月天,有冇人又有少少掛住想睇雪梨網誌先(應該無乜)!咁又係時候加快少少動筆寫遊記了,都驚隔太耐會唔識寫……



去雪梨同去金山最大分別係唔會有太勁jet lag,以夏令時間計算其實只快香港三粒鐘,這朝早也很早起了身,由旅館落地大窗望出去就長這樣,係咪好有「晨早空氣清新開朗,陽光溫暖帶來無限美」的感覺呢!



絕對唔係同煤氣公司賣廣告,因為窗外就係這一片「青青早場綠樹蔭」的高爾夫球場view,唔知會唔會有人將個波打過來這邊呢?



這種小旅館當然不會包早餐,所以昨日初來甫到時早已去麵包店買定幾個包做早餐,求其塞飽個肚就出發。出門前路經佢個迷你泳池,隔籬二樓是客房,樓下玻璃屋是旅館的小餐廳。由於跟住成日都出了市中心遊逛,所以都無幫襯過佢個泳池同餐館了。



由West Ryde駕車出返去雪梨市中心Opera House果邊其實不算太遠,睇返地圖大約都係30公里左右車程,唔塞車的話約莫45分鐘就可到達。第一站先去睇睇麥哥里夫人張石凳先!



好喇來到港灣附近這個公園就可以落一落車鬆一鬆對腳先,公園裏除了有免費廁所以外,更重要係有泊車位(好似仲要係無料,唔太記得)……



這公園都幾多大媽大叔團來影相,因為這裏正好可以影到對岸的雪梨大橋和歌劇院靚景。基爾雖然唔係第一次來但都求其影張啦!上圖黑色banner果度係話聖誕新年和國慶(一月尾)有幾星期因為公園裏會有event搞,所以海濱公園這邊通去Botanic Gardens的小徑會封閉,到時海邊係勁多人來睇燒煙花一定封路啦!



基爾聽聞話如果要來這裏睇元旦凌晨的雪梨大橋煙花,要足足成兩個幾三粒鐘先可以疏散到返屋企(滴汗中),有密集恐懼症的話都係乖乖留在家看電視直播算了吧!又或者學基爾咁提早來影下日景都不錯,至少可以欣賞下各式打扮得花枝招展的大媽個個女模上身咁擺甫士同Harbour Bridge和Opera House影合照(當然伴隨喧囂嗓門),其實都幾有娛樂性的!



無聊襯完熱鬧之後,一場來到點都要行過去睇埋張石凳。又見到大媽們車輪戰式上去石凳打卡,眼見站在一旁的番鬼哥哥表情都有點無奈,基爾之前都有來過咁就無謂同人爭位,求其離遠同石凳影張相就走。



不過既然係寫旅行blog,點都要補充返少少資料先係路,咁喱位麥哥里夫人係乜水?Mrs Macquarie是19世紀初的澳洲總督夫人,昔日這裏是總督府禁苑範圍,石椅是雪梨的著名歷史景點。上圖離遠可以見到雪梨塔。



公園附近仲見到一棵開得好燦爛茂盛的曼陀羅,之前在老家行山也時不時會見到曼陀羅盛放的景象,得閒上網check下才知原來原生地是墨西哥中美洲一帶,一般開花期在夏季,十二月正好是澳洲初夏了。



睇完花之後,點都要抽少少時間再過埋去Opera House那邊逛逛,才算來過Sydney吧!由於時近正午,確實感受到澳洲夏日的灼人熱力,幸好濕度尚算乾爽,與老家盛夏的爆標酷熱指數明顯仍有段距離。



基爾第一次來Sydney時,記得也有在歌劇院前面這條長梯級上影過相,那次同樣是盛夏季節的二月天,這著名景點看來沒多大改變,只是似乎耳邊聽到多一點人在講煲冬瓜了吧(似返了大陸)!



Harbour Bridge和Opera House都是雪梨港口的地標,正如外地遊客去到尖沙嘴點都一定要去一去星光大道影張到此一遊的招牌相一樣……但幸好Opera House外圍這一帶暫未見有被大媽舞和歌聲攻佔。



基爾唔太記得上次來有冇入去歌劇院走走,似乎唔太多遊人會入去看看,大多只在外面影幾張selfie就走人!入面大堂就長這樣,除了有售票處之外,還有間souvenir shop和coffee shop之類的店舖……



感覺上大堂設計屬現代簡約風格,唔知將來有冇機會試試真正入去表演廳睇返場show?Anyway,順便去個廁所先走吧!之後再出返去望望Circular Quay那邊的郵輪碼頭,見到上圖這架係Norwegian Jewel係咪好少在港停泊?會唔會主力走澳紐線?

73 則留言:

  1. 你之後有無去爬橋, 我睇 Modern Family, 都見佢地有拍呢

    回覆刪除
    回覆
    1. 無呀,一來都幾貴,二來我有點畏高.....XXXD

      刪除
  2. 咁重口味喺廁所影相??

    回覆刪除
    回覆
    1. 知道王子鍾意睇喱啲丫嘛....XXXXXD

      刪除
  3. 香港4月天,有 30 度? 仲係春日? 我希望去多一次澳洲。講起,第一次都有廿年喇。

    回覆刪除
    回覆
    1. 記得以前復活節假後先換夏季校服嘛....所以一直當復活節後先係夏天XXXD
      依家係咪有直航??不過我諗都要好長程機....

      刪除
  4. 我都希望有機會到澳洲一遊,現在就分享一下先!

    回覆刪除
  5. 印象中我都冇行過入去歌劇院。

    回覆刪除
  6. 我上兩次去都有坐Tallship cruise,唔錯,可以mast,當然唔係我,DD and Babe Dearest 咋,我個張爬mast票送給個年輕人,哈哈哈。

    回覆刪除
    回覆
    1. Wakakakaka....反正坐帆船MD應該都要去試下嘛,叫DD傍住咪得囉XXXD

      刪除
  7. 基爾自駕?? 係澳洲有車方便好多!!
    我家人走左之後, 我全程都係11號BUS.
    我今次去Sydney 都有去Opera House行個圈打卡.
    麥哥里夫人張石凳同公園都無去. 要 WALK, 算了吧!!!
    我就LAZY D, 搭船仔海上睇 Bridge和Opera House.

    回覆刪除
    回覆
    1. 我無車牌,有其他人揸車^^
      如果係近city坐巴士或火車都ok方便的
      Opera House和The Rock同埋Circular Quay果幾度市中心地方都值得去逛逛,地方大又無HK鬧市的擠逼感!!
      係喎我反而未試過搭船睇橋和歌劇院,下次再去要試下^^

      刪除
    2. 我沒住近CITY, 家人住的地方要搭火車去Circular Quay約35分鐘
      Opera House同埋Circular Quay有行,
      The Rock下次啦^^

      刪除
    3. 火車去市中心35分鐘算好近郊啦wakakaka....
      The Rock可以揀weekend去睇下市集,都唔錯嘅,順便去唐人街飲下茶XXD

      刪除
  8. 回覆
    1. 馬來西亞回港後
      都在港島
      本來今早出發去
      廣州
      江門
      四會
      五日遊
      13日從珠海
      港珠澳坐車回港
      因有事
      不能成行

      刪除
    2. 大馬應該天氣不錯,有冇食榴槤??住雲頂?
      去不成咁下次再出發啦,大灣區都可以話去就去啦大夫......

      刪除
  9. 我哥時都有行上悉尼大橋~~~仲俾行橋公司整蠱~~~~~
    我呀!!!我想睇悉尼篇架!!!!

    回覆刪除
    回覆
    1. 點整法?!@@
      我只知上橋前要先去屙尿,因為如果行到中間急尿無得屙XXXD
      wakakaka....我寫得好鬼慢,你寫晒北愛蘇格蘭我都應該未寫晒:P
      你有新profile相喎^^

      刪除
  10. 歌劇院,遊客都係影相多,唔多入去睇歌劇咁=P

    回覆刪除
    回覆
    1. 其實如果有平平地的節目演出都想搵次試下買飛入去睇下^^

      刪除
  11. 可能都係沿海城市關系,SF同Sydney感覺上有啲似,除咗有靚海鮮亦同樣有好貴嘅屋價,哈哈!

    只要景點有他們(同胞)在,我都已經懶得舉機拍照,佢地一招大鵬展翅就霸哂成個景,仲邊洗影吖。;P

    回覆刪除
    回覆
    1. 我都覺係有啲似,一樣有fisherman market....但好似無面包周打蜆湯XXD
      近十幾年啲樓貴左好多,原因你懂的wakakaka...
      其實睇下佢地嘈怨巴閉成個墟咁都幾搞笑嘅,當係不一樣點綴囉XXXD

      刪除
  12. 雪梨係最宜居城市之一,空氣好環境好!

    回覆刪除
  13. 感覺張石凳好大張,好似畀高人坐咁。
    估唔到你連大媽都影埋喎!

    回覆刪除
    回覆
    1. 而且都有百幾年歷史,是文物^^
      都算係一道靚麗風景係咪XXXD

      刪除
  14. 我無去過澳洲 & 南半球,有機會都想去睇下,睇煙花要等兩個鐘先散得到,我同你一樣一定唔會去,雪梨...我都喺like 哩個名多啲

    回覆刪除
    回覆
    1. 咁路霸兄要去一趟,提議如不太熱愛水上活動,也可先選去紐西蘭,南島的自然風景好值得一遊,有至少半個月時間就perfect了!!
      我有人群密集恐懼症XXXXD....所以都有好多年無去睇煙花了:P

      刪除
    2. 好提鴦...
      不過...放半個月假期...命都唔長

      刪除
    3. 都唔會嘅,貯下長假囉^^

      刪除
  15. 我都唔記得有無入過opera house, 我就好鍾意對面公園既山坡仔,草地又綠,風景又靚

    回覆刪除
    回覆
    1. 係咪有點兵頭花園feel^^

      刪除
    2. 唔同呀,地方大好多,有大草地。 印象中無咁多樹,有一棵大樹對住無敵海景

      刪除
    3. 依家兵頭花園都有無敵樓景XXXD
      外國公園一般都好大的呢

      刪除
    4. 兵頭花園唔差架,我耐唔耐都会去。 5點左右各種猴子好活躍好睇架

      刪除
    5. 原來係傍晚時份最活躍......
      唔知係咪因為有飯開呢^^

      刪除
    6. 見到你前面comment 講廁所,我见過兵頭花園𤠣子射向籠外觀眾,好活躍架🤣🤣

      刪除
    7. 咁都幾恐怖喎....所以都係唔好企咁貼籠邊好啲以免中招XXXD

      刪除
  16. 曼陀羅花好難得先見到,如果近距離影多些就正了。
    從照片看來,歌劇院大堂裡面樓底好似好低 ?

    回覆刪除
    回覆
    1. 香港如果去行山,都間中會見到,由干德道行上山頂途中都會見到曼陀羅的^^
      咦,我又無留意樓底,但看照片應不似文化中心咁高

      刪除
    2. 忘記了說:曼陀羅花是有毒的,不可接近。但這也是充滿禪意的花。
      早幾年我在海旁的一處佛壇園地,也無意中拍過這花,可惜又找不回照片。但網上也有不少,日後可能會貼出來,供大家欣賞一下。

      刪除
    3. 對,其實野外不少花卉植物也有毒性,注意睇看手勿動就最好了!!
      你如果有機會舊地重遊不妨再去影影,原來這種花與佛教有淵源?

      刪除
    4. 不錯,有些花草都是帶有毒性的,不可觸摸,側如夾竹桃。
      上月再到該處見到很多花都不同了,也有可能曾經開花又謝了。
      可有看到“曼陀羅花”的花蕾,四邊就是佛教的萬字符號。

      刪除
    5. 之前也看新聞有人胡亂採菇菌吃也中毒,所以野花野菇都不宜亂採:P
      初夏也是看鳳凰木的季節,過多幾星期可能見到很多紅花呢!
      原來如此,原來是似佛教的萬字....

      刪除
    6. 不錯,萬字的符號,就是取自曼陀羅花~花蕾的特別形狀,意思是輪迴。

      刪除
    7. 不說不知原來有這意思.....
      曼陀羅這名字聽落也很似佛家語

      刪除
  17. 那年公幹,碰巧時間,可以在opera house, 睇左場opera! 是該次到悉尼最大得益。

    回覆刪除
    回覆
    1. 上網search下看看裏面係點先wakakaka....

      刪除
    2. 唔貴,好似港幣400元左右,坐尾二果行。

      刪除
    3. 聽說也會有港星去開show但應不是在歌劇院

      刪除
  18. 成日見gael兄周圍搵廁所…XD……或者出門前飲少啲水或者有幫助…
    去到雪梨都冇可能唔去歌劇院打卡影相!

    回覆刪除
    回覆
    1. 老人家係咁㗎啦,第日森兄老了就知了.....XXXD
      我上次去已影過所以今次都無乜影了:P

      刪除
  19. 我妹去過澳洲倒數, 淨係霸靚位睇煙花都坐左8-9個鐘呀..好恐怖呢~

    回覆刪除
    回覆
    1. 好似當地公園附近係有show睇嘅,如果睇埋show應該時間會易過少少^^

      刪除
  20. 原本雪梨睇煙花要行咁耐@@
    唔知香港係咪一樣呢?

    回覆刪除
    回覆
    1. HK應該都一樣啦如果要霸個靚位影下相,真係要花成日時間㗎:P
      咁Matthew有冇去過睇煙花??

      刪除
    2. 唔知今年七一和十一會唔會有,可以去試試看!!

      刪除
    3. 香港維港二岸地方多,可以唔駛霸位

      刪除
    4. 如果要揀啲靚位,我諗都要去霸下啦^^

      刪除
  21. 有機會, 都想去澳州行一躺

    回覆刪除
  22. 都驚隔太耐會唔識寫<--你旅途上有無記低?
    曼陀羅成棵都有毒的。
    成團大陸團又得一張最出名嘅櫈,無辦法呢~🤣

    回覆刪除
    回覆
    1. 今次無,因為都無乜去什麼特別景點,純粹去hea下個resort,所以懶寫筆記:P
      係呀我都知,所以眼看手勿動!!!
      人海戰術丫嘛XXXD

      刪除
  23. 一見著名的歌劇院地標、就知你去的是雪梨!
    說來澳洲紐西蘭我都仲未去、搵次要去吓喇!

    回覆刪除
    回覆
    1. 係咪一睇就明晒,唔駛睇內文都知wakakaka....
      都方便丫兩地都有直航,揀啲off-season去更佳

      刪除