潮客@北角

兔年伊始又來米G蓮開餐，頭炮率先將條利伸去地頭的潮客，當然又係揀下午茶時段去，一來平一點，二來又唔駛同人逼，正！

潮客（Chao and Hak） / 炸芋絲卷（Deep-Fried Taro Rolls） / 海鮮卷（Seafood Roll）

基爾唔係潮州人，對潮菜其實也只屬一般，不太特別偏好。早前已幫襯過同區另一間米芝蓮一星的阿鴻小吃（詳見﹕米G蓮食探出巡:17），這次又來試試喱間潮客，聽同事講唔錯，於是唔帶飯，又跟大隊去食好野。


滷水鵝片併墨魚（Marinated Goose & Cuttlefish Slices） / 蘿蔔絲酥餅（Radish Pastry）

由於有老細請，所以都叫左唔少野，不過由於掛住食（唔執輸的心態），所以都唔得閒樣樣影，只影了當中部份基爾覺得唔錯的點心菜式，例如上圖左的滷水鵝片墨魚，基爾就覺得比米芝蓮一星的阿鴻小吃更好味，仲有滷水豆腐和翠肉瓜墊底，兼且又夠大碟，一大班人食都夠分。至於外型脹卜卜似十足煎堆的蘿蔔絲酥餅，外皮脆脆的，口感很特別。


鮑魚燒賣（Steamed Pork Dumpling with Abalone） / 窩貼（Pan-fried Dumplings）

這裏招牌寫的雖然係潮菜，但也fusion味十足。平時食燒賣，平的有魚肉燒賣，貴的也有魚子或蟹皇燒賣之類，但這次就第一次食鮑魚燒賣，原來都幾唔錯，鮑魚同豬肉味道幾夾。長長的鮑魚片撻在燒賣上，睇落還有少少似壽司呢！


紅豆蓉及奶皇水晶包 / 花生鳥結糖 / 滷水豆乾 / 麻辣牛肉片 / 芝麻酥

記憶中同場仲叫了麻油炒麵、碗仔翅、菠菜餃、咸菜豬肚湯、灌湯小籠包、鮮蝦腸粉……但奇蹟地竟然全部掃清，只留下半片芋絲餅，取「有餘有剩」的意頭！最後來一籠水晶包，紅豆蓉及奶皇餡同樣不太甜，好食！埋單幾錢當然係唔知，但日後不妨都再來「慶功」。捧住個肚返公司發現竟然仲有小食作餘慶節目，大堆的零食恍如一座小山，原來是大陸同事來港的手信。花生鳥結糖同重慶滷水豆乾都唔錯，麻辣牛肉片基爾無食，但聽同事話就最好味，而且最快畀人掃晒！


迷你蒜蓉包（Garlic Bread），只售$2.5

最後再來一包唔太關事的迷你蒜蓉包，這包野其實係基爾媽早前在W超市的特賣雜價攤買回來的，佢聽其他師奶話好食，所以就姑且買兩包回來試試（聽佢話其他師奶係「狂掃」的，非常誇張）！基爾先睇睇個包裝袋，上面的expiry date見係年底，都無咁驚，再仔細研究下，原來係made in Philippines的（基爾媽話又唔見有菲傭掃貨喎），仲寫明係「No added MSG」！真係咁健康？打開後見佢果然係似一小片切片的迷你蒜蓉包，就咁食味道有點似Twisties，基爾比較鍾意在早餐時放入鹹麥皮或海鮮忌廉磨菇湯裏一併食，有點似食粟米片的感覺，幾正！

 

潮客 Chao and Hak
北角健威坊地下上層U26號舖

達文西創意奇想:上@科學館

逛完歷史博物館後，拿拿林再去埋隔籬的科學館，其實今次來尖東掃館，最主要目標就是去喱度睇「達文西的創意奇想」展覽。

達文西展廳設於科學館地庫，有個大大隻字寫住「Marvellous inventions of Leonardo da Vinci」的招牌。入到去就見到上圖這個浴盤水桶之類的東西，裏面裝設了很多齒輪，中央有張木凳仔，木盤邊還有6枝小鋼炮；抬頭再望原來上面仲有個圖形像燈罩的物體吊在半空，大家估到係咩未？好……開估！



原來中世紀時達文西已發明了坦克車，外型竟似一架飛碟！這個展覽以達文西多幅機械設計草圖為藍本，復刻製作出80多件科學藝術精品模型，介紹達文西傳奇的一生和奇妙的創作，展現了這位天才畫家及科學家的驚人天賦。



仲有咩精彩野睇？上面兩樣又夠唔夠堅。咪以為上圖左那具只是一套普通的中世紀武士盔甲，其實它是一個「機械戰士」，請留意盔甲右旁的玻璃展板，上面就是盔甲內的精細零件，問你怕未！再睇睇右圖的「超級戰艦」，艦頂的8枝巨炮可以360度轉動，任你在哪個方向攻來都立即成為炮灰。



到底「機械戰士」係點樣砌出來的，睇睇上面喱幅就是達文西的手繪製作圖解……基爾企係度睇左好耐都唔太明白！其他展品尚包括50多件仿照達文西手稿概念製成的機械發明品，當中不少是令人嘆為觀止的「科幻」軍械。



例如喱個「歐洲血的子」，相信連雍正皇帝都要拜服！到底佢係乜東東呢又？見佢係有兩個車轆的，有少少似人力車，但車上面又有個好似風車的4張大鎌刀喎……唔通係麥田收割機？定還是係刑具？



原來佢係一架「戰鬥馬車」！將馬車套在戰馬上就可直闖敵陣，馬匹拖行馬車時，車上的大鎌刀還會自動旋轉，將敵軍殺過片甲不留。如果岳飛可問到達文西借來這架神奇「戰車」，要大破金兵拐子馬就容易得多了。



其實達文西也不是只懂製作殺人武器，在50多件展品中不少是屬於土木水力工程學、機械力學和飛行器研究。上圖這條木橋就是達文西另一經典傑作，聽說英國倫敦的千禧橋（Millennium Bridge），意念也是源自達文西這個驚人的築橋力學技術。另外上圖右的Batman蝙蝠翼飛行器，有點似現代的滑翔傘。



蝙蝠俠滑翔翼有幾好玩？睇睇上圖那個木公仔示範就知，只要將滑翔翼套在身上就可以飛，滑翔翼只是以簡單的木支架和粗麻布製成，至於背上它後是否真的能滑翔飛行，就要問問達文西先知了。上圖右則是他的另一發明「鑽井機」！



若嫌「蝙蝠俠滑翔翼」唔好玩，上圖喱個螺旋形「直升機」一定能滿足到你。它是全球首個以空氣動力學研製的螺旋槳飛行器，只要坐在下面踏動齒輪，令螺旋布幔轉動並形成向下推動的氣流，「直升機」就會隨隨向上升起，超過癮！圖右是另一款戰艦「蠍子刀鋒船」，特別之處是船身有座巨型吊臂，前端裝上大鎌刀，單看外型已可嚇退敵人，基爾覺得它可能是現代天秤或挖泥機的始祖。



仲係唔明直升機起飛的原理？可以再睇睇達文西上面喱幀手繪圖解……這次展出的每件展品手工都極精細，而且構造複雜，是由意大利佛羅倫斯達文西博物館的專業工匠和知名學者花了多年時間，鑽研達文西手稿再復刻製作而成的傑作。

除了一大堆「摞你命三千」式的發明外，同場其實還展出了多幅達文西的「復刻」經典名畫，姑且留待下回再講！

《迷失某地》摩登真摯父女情

山長水遠黎Elements睇《迷失某地》，主要係想捧下導演Sofia Coppla的場，不過首先要鬧一鬧的是套戲的中文譯名！自從Scarlett Johansson做完《迷失東京》後，不知為何往後她主演的戲全部都冠上「迷失」兩個字，喱個情況仲竟然蔓延到去Sofia Coppla執導的電影，真希望香港的電影發行商畀多少少創意？

《迷失某地》故事的焦點主要是寫父女情，至於所謂「迷失」，其實是講當荷李活明星的爸爸Johnny（Stephen Duff飾），由於是當紅小生，所以經常有女人「送外賣」，住的是星級酒店，出入駕法拉利，生活無憂得來也很糜爛，無聊時會睇下孖女pillar dance，又或者去蒲吧夜夜笙歌聲色犬馬酒池肉林，表面上是人人羨慕的星級生活，但漸漸他已感到百無聊賴失去目標。



某日他與前妻所生的11歲女兒Cleo來到，原來是因為媽媽要去「避靜」，不過這次重逢就令Johnny重拾了當爸爸的重任，也讓他重新審視了自己要面對的人生問題。在戲中，Johnny剛拍完一齣新片，要四出做宣傳，但他覺得自己還未達到人生的某一處……直至女兒的出現，令他醒悟過來。

雖然Johnny自覺仍未能刻盡己職照顧女兒，但在這短短的一星期相處，已是女兒出世後與他一同生活最久的一段日子，後來兩人還同赴米蘭出席頒獎禮。整套戲中，演爸爸Johnny的Stephen Duff經常蓬頭垢面的，成日會一個人在家中沉思，表面看其實不太有明星風采，反而演女兒Cleo的Elle Fanning非常搶鏡。



如果有睇過《不一樣的爸爸》、《捉迷藏》、《強戰世界》或《吸血新世紀》的話，應會認識Elle的姐姐Dakota，這對姊妹同是天才童星。Elle原來早在3歲時已在姐姐主演的《不一樣的爸爸》中飾演過年幼版的她，其後還演過《巴別塔》、《奇幻逆緣》等賣座影片。

今次在《迷失某地》中，Elle除了有場好犀利的skating戲之外，還在家中替經常睡至日上三竿的爸爸煮早餐的戲份，好多時都時一個鏡頭直落拍晒，連坐在基爾後面那位師奶都大讚只有11歲的Elle叻女，比很多港孩都精乖懂事。



最後當然要提提Sophia Coppola，相信很多人早已知她是《教父》著名導演Francis Ford Coppola的女兒，2003年的《迷失東京》令她一鳴驚人，這次的《迷失某地》也令她成為首位獲得威尼斯影展金獅獎的美國女導演，很喜歡今次她在戲中經常加插的小幽默，或許這也是娛樂圈中的真實一面。



自從1999年首次執導以來，Sophia的產量其實不多，除了《迷失東京》和《迷失某地》之外，基爾也看過2003年她拍的法國宮廷片《瑪麗皇后》（Marie-Antoinette），戲中明快的配樂非常有趣，幾乎忘了是古裝片，若有機會也想看看唯一未看過的處女作《鎖不住的青春》（The Virgin Suicides）。

不能不提的仲有戲中那間馬蒙堡酒店（Chateau Marmont），原來不少明星歌星到荷李活拍戲或錄音時，都愛住進這間古雅的公寓式酒店。該酒店聽聞也極少外借拍戲，酒店主人自言是信得過Sophia，才借場地讓她實地拍攝《迷失某地》，平民百姓才有機會一睹酒店內in得來又帶幾分古典味的陳設咋！