閃巡中上環CP3@大館

由於要預留返少少時間搭車過去銅鑼灣，睇睇手錶餘下去逛Check Point 3的時間就只有約一個鐘左右，分秒必爭趕到出汗！

5:45pm │ 由元創坊九秒九趕過去大館那邊，睇地圖其實話遠唔遠，話近亦都唔算好近。路經上圖這處應該好多人都唔會感到陌生，見到地上的石板就知是石板街吧！



5:47pm │ 石板街正式名稱叫砵甸乍街，好多外地遊客都會來影張到此一遊，或許是喜歡石砌街道的古老懷舊味，19世紀香港開埠初年不少老照片都曾在這些石板上取景。另一樣多人影的自然是那些冷織欄杆套！



5:50pm │ 基爾趕時間暫時不花太多時間在這老街久留了，匆匆忙忙三步併作兩步走上去荷李活道，就來到第三處同屬古蹟活化項目的大館。



5:53pm │ 不太善忘的話可能仲記得基爾去年底才剛去過這幢舊中區警署參觀，因乜事咁快又來舊地重遊一趟呢？主要係上次因時間關係，有部份地方都沒徹底逛過，反正今次再來中環，就來個快閃補遊吧！上圖是路經洗衣場石階，可惜這天沒有放電影。



5:57pm │ 可能三日香熱潮已過，是日傍晚來到不太多人，當然也不用麻煩預約就可進場了。咁就趕快去看看上次錯過了的地方吧！上圖這條藝術味道十足的螺旋樓梯肯定是其中一處熱門打卡聖地……



6:05pm │ 位於藝方大樓裏的這條螺旋樓梯聞名不如一見，真係超多港女（其實也有洋妞）雲集selfie取景，基爾要影條完全無人的樓梯幾乎是不可能的任務（但影出來有點人氣也不錯）。



6:11pm │ 藝方裏其實也有不少展覽廳，藝術這家野自問當然不太懂欣賞，但巨大屏幕播出來的影像也甚覺有震撼力。展廳的空間也確實大，將來如辦更多藝術展，相信這裏是理想的場地。



6:15pm │ 唔識欣賞就不花太多時間逗留了，在展廳裏簡單逛過一圈就準備撤退。不過走之前還有個地方想去影陣相，就係藝方樓上這個觀景台，由這裏可以盡覽人來人往的大操場，天際線也尚算開揚，難怪咁多人會來憑欄傾偈chill一會。



6:20pm │ 最後返回中庭部份檢閱廣場，上次有來過影相所以例牌影多張到此一遊就走人，總括兩次參觀大館算是相當圓滿了。

閃巡中上環CP2@元創坊

逛完新聞博覽館之後，點都要順腳逛埋毗鄰的Check Point 2：PMQ。

4:28pm │ 元創坊同樣是來自古蹟活化項目，由昔日荷李活道已婚警察宿舍重修而變身為創意中心，翻查資料才知原來重開於2014年，5年來基爾還是第一次來巡場（年前也曾想來看看熊貓可惜最後都沒來看）。



4:33pm │ 近舊街市史丹頓街那邊的入口街邊擺設了幾幀老照片，可以見到百年前同一地點街景的變化，基爾覺得幾有趣，有點穿越時空feel。入到去就見到兩幢舊宿舍大樓，參觀邊座先好呢？



4:37pm │ 結果揀了荷李活樓先去逛一逛，上圖是大樓外往下走的樓梯，樓梯看來很有現代感應是活化後加建的吧！雖然話係第一次到訪PMQ，嚴格而言基爾的青蔥歲月年代也曾時不時路經此地，對活化前的警察宿舍舊貌仍有點印象……



4:43pm │ 印象最深是活化前宿舍也丟空荒廢了一段日子，黎天王也曾來這裏拍過驚慄片（有冇人記得三更）。所以雖然是大白天來到，基爾心裏仍是有點發毛，總是形住電影裏的陰森場景……



4:47pm │ 咪咁生人唔生膽啦依家又唔係去探險！只見重新洗刷髹過晒外牆的宿舍大樓，已經無晒昔日那種破落殘舊的荒廢味道，變得窗明几淨加上人來人往基本上不會再有令人不寒而慄的感覺（如沒看過套戲的話）！上圖是望向對面的史丹頓樓，記得電影中有一幕就見有個小孩在對面這半荒廢宿舍樓層的走廊跑過！



4:55pm │ 宿舍大樓的設計其實都幾特別，走廊的公共空間頗覺寬敞，望落都有成三四百呎大過依家好多人屋企。可能以前無抽油煙機關係，廚房都設置在走廊的露台邊（上圖玻璃窗那間房仔），咁今餐煲粥定煮飯、斬油雞鹵味大舊叉燒定還是腐乳撈青菜，一定全層街坊都睇得一清二楚吧！



5:02pm │ 一路巡到上去四樓會見到新加建的平台花園，用作連接兩座宿舍。花園下面條橋其實是個展覽廳，不過這天來到沒開放無法參觀內裏情況。不過頂樓花園景觀也算開揚，可以見到山下的摩天大廈中環中心。



5:07pm │ 由平台花園走過去史丹頓樓那邊，除了仍是不少潮店和手工坊外，基爾較有興趣的始終是上圖這些重現古蹟昔日面貌的模型屋，見有居民會在走廊露台晒被褥，也有師奶們開枱打返四圈，當然仲有成班細路扮足球小將和捉衣因啦！直情就係七八十年代港人生活的縮影。



5:09pm │ 模型屋的製作手工真係好靚好精緻！Close-up影埋屋入面先，有齊家私電器組合櫃等陳設，出面的走廊露台就變成飯廳，夏天食飯唔駛開冷氣都夠通爽，依家D納米豪宅很難想像會有這種共享空間。



5:12pm │ 除了睇模型之外，基爾最驚喜係仲有得睇埋「示範單位」！全部杯櫃木梳化電鐘風扇收音機花樽電話以至燈掣都重新活現眼前，入面還有板間睡房和晾衫露台。上圖可見牆上電視播放出昔日住客的訪問片段，大談那些年在宿舍內的熱鬧生活都幾有趣好睇。圖右已生鏽的信箱就設在樓下大門樓梯旁。



5:13pm │ 可能會奇怪基爾都無乜去逛宿舍單位改建的workshop和潮店之類，咁睇慣大典網誌都會知古蹟始終是這裏最主要果杯茶吧！另一樣最心心眼的就係上圖這座舊中央書院的復刻版模型了，佢係舊警察宿舍的前身，如果當年有保留下來一定好正，望落可以媲美好多歐洲小型皇宮。



5:16pm │ 咁鍾意睇古蹟，位於basement的這間地下室展示廊Glimpse PMQ一定唔會錯過。又講返少少歷史掌故（咪嗌悶）！中央書院其實是皇仁書院的前身，那座皇宮咁靚的校舍就落成於1889年，而地下室就是百幾年前舊校舍殘存的花崗岩石基座。



5:18pm │ 地下室入面就長這樣，空間其實不算大，約普通中型七仔咁大，其中一整面牆就是這種巨型花崗岩石磚牆。當年歐遊去巴黎逛羅浮宮時也有參觀過佢個地下室城堡遺蹟，感覺同這裏係咪有點異曲同工味道。



5:21pm │ 另外地下室仲保留了中央書院兩段最長的花崗岩地基，旁邊仲掛了一幅巨型的書院老照片，展示出長石基相信就是原本校舍前長樓梯旁的石欄杆基座，有這張復元圖即時了解到當年校舍的宏偉規模。



5:25pm │ 除了陳年花崗石之外，地下室裏仲有好多爛地磚爛瓦片睇，全部都係重修舊警察宿舍時發掘到的出土文物，例如上圖的花磚碎片經專家考證，話係同舊總督山頂別墅為同一製造商，應該係十九世紀製作，望落同港大Main Building果種花地磚都有點似樣喎！



5:36pm │ PMQ比較地方大又較多特別野睇所以比預算用多了時間，都係拿拿林上返地面，再影下Staunton同埋Hollywood低層個招牌之後差不多要撤退了，都無乜機會去八下那裏的食肆cafe有乜好野食。

閃巡中上環CP1@新聞博覽館

又係時候歇一歇將個雪梨放入雪櫃先，快快手寫幾篇巡館記再算！今次快閃Check Point 1先來看看由必列者士街街市活化而成的新聞博覽館。

3:30pm │ 好長一段時間沒去過中上環因為都好山長水遠（好懶搭車），這天終於的起心肝因為約了舊公司同事年度飯聚，反正都過開港島區就去巡一巡上圖這間新館。應該唔少人已經去過認得佢個門面，沒錯就是去年底十二月才開幕的新聞博覽館。



3:33pm │ 由於在家裏mememormor（這是基爾常態）搞到預留巡館的時間只餘三句鐘左右，但目標是去勻中西區三間館（因唔想之後再花時間搭車來），所以一定要抓緊時間，頭一站火速入去新聞博覽館打個round先。上圖是地下果層展出的電視台新聞記者用的咪，相信大部份人都唔識佳視果支咪吧（傻啦識都話唔識）！



3:45pm │ 算把啦……咁上圖這份《循環日報》應該更加無乜人見過！睇返資料話這份創刊於1874年的老字號，是香港開埠後首份由華人創辦的報紙，直至六十年代才停刊。



3:52pm │ 除了電視台舊咪和舊報紙之外，館內仲有唔少關於傳媒的舊事舊物可看，例如有新聞攝影師抬出街採訪拍攝用的攝錄機，仲有好大部的古董錄音機，全部看來都甚具份量。當年應想像不到半世紀後一部手機就可取代咁多重裝備吧！同場仲見有學生團體來參觀；右邊黃色果塊展版講述當年一份報紙的售價與同期物價對照都幾有趣，唔講唔知六十年代一份報紙只售一至兩毫，同期一支可樂賣三毫子，而戲票一張售一元七角。



4:03pm │ 另外上圖這個新聞界大事年表都幾多野睇，由十九世紀《循環日報》創辦，一直至前年的奇妙電視開台（依家改了名做開電視）都有介紹，傳媒百年滄桑歷史就濃縮到一塊展版上講晒。



4:06pm │ 唔敢花太多時間逐一仔細睇展品，只揀選覺得比較有趣的才詳細睇，例如上圖這個是介紹二戰前到日治時期的新聞管制和審查，報紙不得刊載貶斥日本的字眼和文章，所以經常有新聞被抽起出現開天窗情況。



4:10pm │ 時間不多火速上埋二樓參觀，基爾其實對這幢五十年代舊建築的興趣更大。好耐以前這裏未變成博物館前，印象中已曾路經過這裏幾次，以前還保留了街市檔攤的石桌間隔之類，依家當然早已拆走大部份，只餘下少量檔攤舊貌保存下來。



4:15pm │ 比較有趣是上面這個跳飛機，街市都有得玩跳飛機又幾有趣，係咪畀小朋友跟阿媽去街市買餸時有得成班一齊玩下唔駛咁悶呢？聽聞以前這裏也曾改建過成為公園休憩地方，咁有跳飛機都唔出奇……不過話時話係咪已經唔係咁多人知跳飛機係乜？



4:20pm │ 老人院時間到此為止，都係加快少少速度巡一巡二樓有乜睇。二樓其實地方都幾大，間隔成不同空間用來展出唔少昔日的新聞圖片，有暴動的火紅年代也有制水和颱風，不能少的還有中英談判和回歸新聞，當然仲有抗疫和股災的歷史……巨細無遺包羅萬有。



4:23pm │ 全館整體而言算是比較細規模，特別的展品也不算多，其中上圖這個「當日頭條、今日歷史」展覽感覺上較有互動性，那其實是一座大型投影器，只需站在前方用手上下左右揮動，便可重看很多經典的報刊畫面，比齋睇展版有趣。