雪梨盛夏光年@起飛

話咁快過了新正頭又來到三月天，都係時候的起心肝開筆寫雪梨hea蕩網誌了吧！到底基爾如何度過南半球的盛夏光年？快快趣坐上時光機fasten seat belt飛返去回味兩個月前的美好時光……

搭紅色那間航空飛雪梨係咪多數夜機出發？據以往經驗基爾在飛機上80%都不會睡著覺，所以坐早機定夜機其實都分別不太大。



咦！乜又係喱個畫面？記得飛金山那次幾乎同今次旅程是同一時段，機場例牌又邀來學生choir唱聖誕歌，所以成個arrival大堂都好有氣氛。



這次同樣是與基爾媽同行，不過今次這間航空公司的停機位要行到好遠好遠（要行到去30幾閘再轉無人列車，之後再行多十幾分鐘），為免有閃失擔誤還是先入去搵著個登機閘口先（反正D免稅店不是基爾杯茶）。



起飛時間只係delay了大約15分鐘左右都叫做準時啦！今次維航這架Boeing 747-800算是基爾最喜歡的機種型號，早在買機票時已上網畫定靠窗的二人座，唔駛同陌生人逼之餘也方便隨時出走廊伸懶腰，超正！



大節流流其實都唔駛指望econ機艙內有一排四個吉位可打橫訓咁筍（尤其長程機有先至奇），事實上班機也是全爆，咁開餐前先疊埋心水搵搵有冇心水戲睇度過這漫漫長路九個幾鐘飛航好過啦！



快速搜尋一圈結果係有少少失望，因為維航明顯無國泰咁多中文戲，見有東方面孔的就只有Crazy Rich Asians和一套不太認識的韓片，CRA本來都有點興趣看看但原來無中字，為免太勞神咁先揀上面這套有中字的Deadpool 2來解悶吧！



p.s.機上食了兩餐（深夜遲來的dinner和臨落機前的breakfast）但竟掛住食都無影相，記憶中晚飯食了豆豉醬蒸豬肉飯，早餐要了煎蛋配薯餅和西班牙腸仔配茄醬，味道算是可以（基爾要求不太高）；不過若要數最難忘的始終是佢杯抹茶慕斯甜品，即使畀杯HD雪糕來也絕不和你換！

舊金山居閑話@番外篇

完成了33篇金山網誌後，之前好似提過一提話會寫多個番外篇，咁到底係寫乜咁神秘呢？應該會有人估到係寫「收穫」吧！

由於已經事隔一年多，所以買回來的食物好多早已食晒，咁就無謂寫了……剩下來就只有些少outlet戰利品吧！上圖是路經outlet見有交叉牌就火速買件快乾tee，原價USD$20左右見佢有六折咁買啦！不過美國買野要畀9%sales tax，最後連稅大約HKD$100左右應該平過去馬拉記買。



跟住再去睇睇鹿仔牌，香港間鹿仔旗艦店之前好似執了，難得去到美國咁又去看看有冇平野執。前後行了兩間，商場店見到粉紅色那件連稅USD$14.2（港紙$110左右）買件純粹當souvenir。後來去outlet又見有鹿仔牌咁又買埋棗紅果件tee，價錢同粉紅tee差不多但有五折，連稅後HKD$60左右平了一大截想唔買都唔得！



由於香港近年冬天都好少堅凍，厚褸厚毛衣羽絨之類都放棄再買因為根本沒太多機會穿，所以這次也是主力買短袖tee就算。後來去到超級乾燥店又買多件藍tee，成日覺得這品牌在港店實在貴到離譜，在美則明顯才是合理價格水平，例如這件短袖藍tee才不過廿蚊美金（折合約HKD$156左右）即使無折都照買吧！之前話唔買冬天衫但見到後面果件灰長袖薄毛線衫都終於忍唔住要出手，主要原因係佢有三折，連稅後竟然只需約港紙百二蚊有找仲平過件短袖藍tee，如果唔買係咪會對唔住自己！



好喇行行下又行到去海鷗牌，這品牌同之前提過的鹿仔牌其實係同一個阿媽生，每逢大減價時段基爾也會抽空去又一城看看有冇心水筍貨執下，來到美店咁點都要花時間巡一巡舖，結果又要解一解慳囊。先講最平的短袖藍tee七折後港紙約一舊水有交易；紫色杏領薄毛衣同樣有七折，售價約HKD$220左右港店big sale未必買到；最後條軍綠束腳長褲原價成三百幾港紙，竟售半價百五蚊係咪平到喊（突然覺得自己似去了逛U記）！



最後終於行到去真係好有名店feel的TH記，平時基爾牛記笠記平民裝行過佢間新城市店門口都唔係太敢入去睇，即使大減價都因為店裏太多大媽大叔費事入去同人逼所以都無乜點買過這品牌。這次來美就即管入去逛逛，基本上雖然係outlet但都不算太便宜（與基爾條貧窮線明顯有段距離），不過如果唔買，回港後就更加唔捨得，結果睇中上面這件長袖tee連稅都係約30美金算係可負擔的範圍，有少少肉赤都買啦（回港後八卦上網格下價即時覺得賺了）！

p.s.值得一提加州outlet買到的不少是屬於made in中南美洲國家的產品，似乎同東南亞的生產線又有點不同，款式看來與港店慣見的有點不一樣！順帶一提基爾其實還買了對普通的一剔牌波鞋回港（冇影相），忘了六折定七折售價約三百幾港紙，幸好回來後不見有同款，自我感覺良好……

遺忘的唱盤時光@憶蓮盛放

聽得太多陳年東瀛歌手CD會唔會有點悶？不如又回歸返聽聽廣東歌，這次又由床下底揀出兩張好耐無聽過的演唱會VCD……

這些陳年VCD今時今日應不會再有復刻，因為基本上連VCD機也不易買到。不過在沒有上網的年代，這種像素較低間中播播下會起格仔兼跳線的古董影音產品非常流行且盛極一時……都係唔講咁多廢話講返這兩張碟，若要數憶蓮歷來最經典的演唱會應首推左邊那張1996年的「憶蓮盛放」；另外基爾覺得右邊2002演唱會其實也非常有水準，所以也買了隻碟珍藏。



八十年代初出道時林憶蓮唱live的水準老實說真的很一般，形象也偏向東瀛味，直至88年以後推出City Rhythm系列感覺上才有明顯脫胎換骨的進步（多得倫永亮為她改編了不少英倫歐美風味極濃的hit歌），時至今日這一系列快歌medley往往仍是帶動其演唱會氣氛的亮點。

除了快歌煞食外，憶蓮的慢歌還有更多張必聽皇牌，不過網誌篇幅有限，基爾就無謂再花唇舌去多講滴汗依然激情前塵野花那一堆大熱之作了；反而想分享上面這首半冷門的痴纏，這首改編自英倫歌手Julia Fordham的作品可能平時不太多人會留意，卻是基爾其中一首心水之選。特別要留意演唱會裏的舞台設計，長布簾簡單得來又有詩意，視覺效果非常出色。

破曉是另一首基爾幾喜歡的憶蓮佳作，特別愛聽編曲中的笛子前奏，確實很有點旭日初升的晨曦感覺，也成為這首歌的一大特色。順帶一提微涼也是基爾的心水，最近才知原曲是來自美國騷靈天后Roberta Flack（重溫可click：Roberta Flack CD）。



那些年其實都幾興改編外國一些好聽的流行曲，只要配合全新的演繹其實也無不可，感覺總好過太側重單一乏味一式一樣的本土創作。除了之前提過的Roberta Flack和Julia Fordham外，由Beverly Craven的Promise Me改編的沒有你還是愛你當年也好hit，也是憶蓮經常會在演唱會上選唱的大熱作品；至於破曉和野花同是星洲Dick Lee作品，有獨特的東方色彩；你令我性感是來自荻野目洋子的Something About You；因你瘋了則是出自台灣張洪量手筆，但個人覺得憶蓮演繹版本比原曲出色得多呢！