逛完新聞博覽館之後，點都要順腳逛埋毗鄰的Check Point 2：PMQ。
4:28pm │ 元創坊同樣是來自古蹟活化項目，由昔日荷李活道已婚警察宿舍重修而變身為創意中心，翻查資料才知原來重開於2014年，5年來基爾還是第一次來巡場（年前也曾想來看看熊貓可惜最後都沒來看）。
4:33pm │ 近舊街市史丹頓街那邊的入口街邊擺設了幾幀老照片，可以見到百年前同一地點街景的變化，基爾覺得幾有趣，有點穿越時空feel。入到去就見到兩幢舊宿舍大樓，參觀邊座先好呢？
4:37pm │ 結果揀了荷李活樓先去逛一逛，上圖是大樓外往下走的樓梯，樓梯看來很有現代感應是活化後加建的吧！雖然話係第一次到訪PMQ，嚴格而言基爾的青蔥歲月年代也曾時不時路經此地，對活化前的警察宿舍舊貌仍有點印象……
4:43pm │ 印象最深是活化前宿舍也丟空荒廢了一段日子，黎天王也曾來這裏拍過驚慄片（有冇人記得三更）。所以雖然是大白天來到，基爾心裏仍是有點發毛，總是形住電影裏的陰森場景……
4:47pm │ 咪咁生人唔生膽啦依家又唔係去探險！只見重新洗刷髹過晒外牆的宿舍大樓，已經無晒昔日那種破落殘舊的荒廢味道，變得窗明几淨加上人來人往基本上不會再有令人不寒而慄的感覺（如沒看過套戲的話）！上圖是望向對面的史丹頓樓，記得電影中有一幕就見有個小孩在對面這半荒廢宿舍樓層的走廊跑過！
4:55pm │ 宿舍大樓的設計其實都幾特別，走廊的公共空間頗覺寬敞，望落都有成三四百呎大過依家好多人屋企。可能以前無抽油煙機關係，廚房都設置在走廊的露台邊（上圖玻璃窗那間房仔），咁今餐煲粥定煮飯、斬油雞鹵味大舊叉燒定還是腐乳撈青菜，一定全層街坊都睇得一清二楚吧！
5:02pm │ 一路巡到上去四樓會見到新加建的平台花園，用作連接兩座宿舍。花園下面條橋其實是個展覽廳，不過這天來到沒開放無法參觀內裏情況。不過頂樓花園景觀也算開揚，可以見到山下的摩天大廈中環中心。
5:07pm │ 由平台花園走過去史丹頓樓那邊，除了仍是不少潮店和手工坊外，基爾較有興趣的始終是上圖這些重現古蹟昔日面貌的模型屋，見有居民會在走廊露台晒被褥，也有師奶們開枱打返四圈，當然仲有成班細路扮足球小將和捉衣因啦！直情就係七八十年代港人生活的縮影。
5:09pm │ 模型屋的製作手工真係好靚好精緻！Close-up影埋屋入面先，有齊家私電器組合櫃等陳設，出面的走廊露台就變成飯廳，夏天食飯唔駛開冷氣都夠通爽，依家D納米豪宅很難想像會有這種共享空間。
5:12pm │ 除了睇模型之外，基爾最驚喜係仲有得睇埋「示範單位」！全部杯櫃木梳化電鐘風扇收音機花樽電話以至燈掣都重新活現眼前，入面還有板間睡房和晾衫露台。上圖可見牆上電視播放出昔日住客的訪問片段，大談那些年在宿舍內的熱鬧生活都幾有趣好睇。圖右已生鏽的信箱就設在樓下大門樓梯旁。
5:13pm │ 可能會奇怪基爾都無乜去逛宿舍單位改建的workshop和潮店之類，咁睇慣大典網誌都會知古蹟始終是這裏最主要果杯茶吧！另一樣最心心眼的就係上圖這座舊中央書院的復刻版模型了，佢係舊警察宿舍的前身，如果當年有保留下來一定好正，望落可以媲美好多歐洲小型皇宮。
5:16pm │ 咁鍾意睇古蹟，位於basement的這間地下室展示廊Glimpse PMQ一定唔會錯過。又講返少少歷史掌故（咪嗌悶）！中央書院其實是皇仁書院的前身，那座皇宮咁靚的校舍就落成於1889年，而地下室就是百幾年前舊校舍殘存的花崗岩石基座。
5:18pm │ 地下室入面就長這樣，空間其實不算大，約普通中型七仔咁大，其中一整面牆就是這種巨型花崗岩石磚牆。當年歐遊去巴黎逛羅浮宮時也有參觀過佢個地下室城堡遺蹟，感覺同這裏係咪有點異曲同工味道。
5:21pm │ 另外地下室仲保留了中央書院兩段最長的花崗岩地基，旁邊仲掛了一幅巨型的書院老照片，展示出長石基相信就是原本校舍前長樓梯旁的石欄杆基座，有這張復元圖即時了解到當年校舍的宏偉規模。
5:25pm │ 除了陳年花崗石之外，地下室裏仲有好多爛地磚爛瓦片睇，全部都係重修舊警察宿舍時發掘到的出土文物，例如上圖的花磚碎片經專家考證，話係同舊總督山頂別墅為同一製造商，應該係十九世紀製作，望落同港大Main Building果種花地磚都有點似樣喎！
5:36pm │ PMQ比較地方大又較多特別野睇所以比預算用多了時間，都係拿拿林上返地面，再影下Staunton同埋Hollywood低層個招牌之後差不多要撤退了，都無乜機會去八下那裏的食肆cafe有乜好野食。
