煎釀青椒矮瓜

早前某個星期日晚，基爾與基爾媽飯後難得排排坐睇《美女廚房》（基爾好少坐定定睇電視），突然基爾媽感嘆地說﹕「阿仔，你睇下依家D女仔係唔識煮飯架！你都係時間跟我學返兩道散手，唔係第二時實聽餓死架啦！」基爾的額角立即滴出一大滴汗！

若經常造訪「永樂大典」的blog友可能發現，這裏講食的網誌極少，因為基爾除了去旅行期間外，平時都很少出外食飯，比較鍾意「幫趁」基爾媽的愛心住家飯。其實基爾媽也很注重對仔女廚藝的培訓，只是孻仔基爾無心向學，算是最咋的一個，而且實習機會不多，兩三下手腳已被基爾媽叮走，久而久之只剩半桶水。既然基爾媽原來對基爾依然不離不棄，姑且重開「永樂廚房」啦！為免太緊張，上課前基爾先去看了《阿童木》輕鬆一下，這是齣典型的小朋友卡通，全院充滿孩子的笑聲，氣氛唔錯！基爾最喜歡是那個狗仔垃圾筒，幾搞笑，至於小飛俠阿童木著左衫之後好似唔太順眼，但整體也不錯，小飛俠fans應收貨。

睇完戲就要準備開工，「永樂廚房」第一堂係煮「豉汁煎釀青椒矮瓜」。由於基爾媽怕基爾個樣太細路兼烚下烚下咁，會畀街市阿叔大嬸扼秤或買左D唔靚又唔新鮮的青椒矮瓜，所以也有隨行。材料其實唔貴，在魚檔買了10蚊魚膠；再去菜檔買兩蚊青椒同4蚊矮瓜就返歸。



記得細個時放學後好少去躝街，通常會立即返屋企，一路聽收音機一路做功課，另一重任就係幫返工的基爾媽先煲定老火湯。大家一聽到「老火湯」三個字可能就頭痛，實則卻非常容易，大部分材料切好洗乾淨，豬肉豬展先拖拖水就沒問題了，唯一竅門係放材料入煲的時間次序而已。一般青紅蘿蔔瘦肉湯或花生眉豆雞腳湯都不難，當然基爾媽會不時打電話返黎提一提基爾落乜野材料。還記得當年為了慳煤氣費，多用火水爐煲老火湯，拎住果條小鐵枝點火水爐和控制爐芯的推杆也是一門學問。當然依家久疏戰陣，早已將成本煲湯秘笈畀返晒基爾媽！

說回煮這味「豉汁煎釀青椒矮瓜」，難度系數約3.9，主要其實唔係難而係煩，工序較多而已！買返來的魚膠一般都已經搞好及調味，如果家中有小朋友的話，可以自行加工琢幼一點，以防裏面隱藏細骨。如果嫌腥的話，也可自行再添少量胡椒粉、麻油或蔥花，但由於基爾向來不吃蔥、蒜、薑、芫茜、韭菜之類的東西，所以就不加了！搞好魚肉再來切青椒，一般可以一開四至五瓣，去芯去核即可；矮瓜則切去頂，再以間紋形式批皮，因為如果全部去皮，煮熟後會變成一pat野唔靚，留一點皮可令瓜身更挺，亦會好味D！批皮後再斜切成片即可。



切好青椒矮瓜後簡單清洗一下，就可準備釀魚肉的工夫。先釀矮瓜，竅門係先在瓜面上割幾刀，或挖一個小洞，再將魚肉塗在上面，就可以黐得緊一點，不會在煮的途中容易脫落，變成瓜還瓜魚還肉咁樣衰。至於青椒由於本身呈弧狀，基本上釀肉入去後都不易甩，釀好擺滿一碟後就準備起鑊。



為免魚肉黐底要洗鑊洗餐飽，基爾媽提議先用平底煎pan。先燒滾鑊再倒少少油，就可以放釀好的青椒同矮瓜落煎pan，注意魚肉要向鑊面，主要是將魚肉先煎成金黃即可！青椒矮瓜一面可留待回鑊時再煮熟。



煎好後可先將半熟的釀青椒同矮瓜放開，再用另一傳統不繡鋼鑊煮芡汁。先用少少油及一小篤蒜蓉豆豉醬放在中間爆香起鑊，再將煎好的釀青椒矮瓜倒返落鑊細力炒炒混和醬料；芡汁就用少少生抽麻油胡椒粉及糖鹽栗粉少許，用少少水撈埋一齊就OK，再慢慢倒入鑊中炒一炒，平均擺分佈好青椒矮瓜就蓋上鑊蓋小燜一陣，約分零鐘再開鑊，睇睇芡汁乾身一點後，這時可以試一試味，唔夠鹹的話，可以再添少量鹽或豉油，再煮一陣收乾水就上碟，大功告成。同場其實還有滾白菜湯及蒸肉餅，因為比較容易，不用太分神，可以集中精神煮釀青椒矮瓜。



製成品出來後當然要由基爾媽來擔任評判畀分，結果得7.5分，即係有佢七成半水準，算係咁啦！最主要扣分的地方係唔夠乾身，碟底似乎有太多汁，問題出在矮瓜煮熟後通常會出水，所以通常要煮乾一點先上碟，基爾實在太心急，當然也可以加上釀豆腐卜，發揮吸汁功效。

Anyway，這味「豉汁煎釀青辣矮瓜」總算不失禮吧！只是煮完一大餐又要忙影相實在太疲累，幾乎已經沒有什麼胃口，只吃了一點點。聽說做到出色廚師的先決條件係為食，所以基爾應該不何能當上「廚神」了！當然煮完一餐飯之後就更崇拜基爾媽，覺得佢真係好犀利同埋好偉大啊！