風從寶島來@玄奘寺

這雙漿該憶起
誰是西施，誰是范蠡
那就劃去太湖，劃去洞庭
聽唐朝的猿啼

咁遠來到日月潭，當然不會只遊下個湖就走啦！因為湖的四周其實仲有好多風景名勝，預兩日時間去行就最充裕。喱日第一處去的地方就係玄奘寺，寺院正門有一幅唐朝玄奘法師取西經的地圖，像在向你訴說他的故事！



水社遊客中心其實有環湖旅遊巴士穿梭日月潭畔各個景點，搭之前當然要睇清楚行車時間表，也有人索性租單車環湖遊，各適其適任君選擇……說回玄奘寺，左上圖是寺門前守衛的石象；左下為寺內的參天巨杉；右為正門的大牌坊。至於為何日月潭會同玄奘法師扯上關係？莫非佢來過傳佛教？



有睇過《西遊記》都知唐玄奘有去過火焰山、盤絲洞、女兒國，但就好似無聽過去日月潭喎！冇錯，這間玄奘寺原來同二次大戰有關。話說日軍攻陷南京後，偷走了藏於南京的玄奘法師頂骨舍利，並運往日本供奉於崎玉縣慈恩寺。



到了1955年日本政府才將部分玄奘舍利歸還台灣佛教會，暫安奉於日月潭畔的玄光寺，到了1965年11月玄奘寺落成後，舍利才迎入玄奘寺。上圖是寺內最宏偉的玄奘殿。



玄奘寺採用仿唐式建築風格（類似鑽石山志蓮淨苑），碧瓦朱柱古樸無華，前園種植了多棵參天巨木和各式蘭花，還擺放了不少名家石刻、龍龜石碑等，所以寺院雖只有短短47年歷史，卻別具古剎的歷史味道。加上寺院前臨日月潭，後依青龍山，聽聞也是風水福地，基爾當然不會錯過這個吸收天地正氣的良機啦！