汲取了之前大安旨意結果去唔成睇畢加索的教訓，喱次為了睇「一統天下：秦始皇帝的永恆國度」展覽，基爾在個多月前已買定飛，不過由於實在太耐差D忘記左，好彩事先將門票貼在月曆上，提醒自己不要忘記去睇！
由於提早左少少出去，問過門口保安阿姐話未入得住，所以去外面行陣花園先，因為之前聽聞外面花園都有野睇的，例如上面的Q版秦俑。
仲有必睇的是喱幅兵馬俑坑3D畫，可以睇到士兵手持弩箭由俑坑衝出來，真係幾有立體感，不過原來這種立體地畫只有一個角度可以睇到3D效果，唔少人要排隊影相。
另一條長樓梯都貼上兵馬俑坑的照片，甚有氣勢。由於當日正值中國太空人訪港，所以對面科學館門口擺放了3位太空人的1:1紙版公仔畀遊人合照。睇睇下見時間差不多，拎埋飛同場刊就入去了。
第一部分喱個「多媒體體驗區」主要用好多touch screen去介紹兵馬俑的來頭，仲用左好多動畫和燈光效果，其實都有少少眼花，不過對小朋友而言應該幾吸引。在中央圓台上見到3座老翻秦俑，配合燈光效果顯得有點詭秘！
室內的燈光較暗，令影相有少少難度，好多時都會鬆郁矇！不過值得一讚係今次展覽全場都可以影相，只要不用閃光燈就可以了，基爾先有機會影畀大家睇下！上圖右的一幅並非基爾倒轉了post，而係真有一駕仿製馬車掛在牆上，很有君臨天下的氣勢。
走進第2個展廳「飛越秦始皇帝陵」時，基爾立即就被這個鑊形全景屏幕迷住了！站在廳中央可以360度睇晒秦俑坑的影像，真有置身其中的感覺，片段除了介紹了秦皇陵之外，仲有秦嶺的風光以及模擬項羽攻入咸陽時放火燒毀兵馬俑坑的情況，非常逼真！
睇完個咁有動感的影像廳之後，都係時候行去睇下D真古董。一入到去這個「文物展示區」，見到整個紅黑布局都幾莊嚴，燈光比剛才的展廳更暗，更有深入兵馬俑坑探秘的氣氛，當然同時也更考起基爾的傻瓜機。
據場刊介紹，展廳內有「20 Must-see Exhibits」，先睇睇其中兩件珍品，包括右上這個「秦公鎛」，鎛是類似鐘的一種古代中樂器，鎛上除了刻有龍鳳雕花圖案外，還有秦國早期的世系，是研究秦代先祖歷史的重要文物。另一樣是右下的「小金盆」，「盆」在古代是餐前洗手的盛水器，這個小金盆是目前出土最早的秦國純金器物。
再睇喱個好似回力標的物體，正確名稱叫「帶銘文石磬」，同編鐘一樣都係先秦時代的敲擊樂，常用於宗廟祭祀和宮廷宴樂等場合，展板上還有它的復原圖。據石磬上的籀文記載，石磬出土的墓主應為春秋時代的秦景公。（待續）
沒有留言:
張貼留言