2Q12瀛遊東北@森山海岸

「戴上Ray-Ban太陽眼鏡，走出房間。隨即走進公寓對面的兒童公園，站在昨夜他坐過的滑梯前，在腦中再現當時的情景。大約十二個小時前，真實的他曾經就在這裡，與我所在之處僅隔著一條馬路的地方。他一個人靜靜坐在這裡，久久地仰望月亮……和他所望的相同的兩個月亮！」

告別了友善的日本大叔後，馬上繼續向王池西湖進發，喱邊可以說是十二湖景區裏見到最多紅葉的地方，當然要留耐少少，影多陣相先啦！



紅葉黃葉夾雜尚未轉色的綠葉全部堆在一起，確實係驚人的色彩繽紛，絕對與大棠的紅葉有很大分別，現場睇比看照片還要震撼得多。



至於王池西湖本身，可能由於之前已經睇左好幾個大大小小的湖，所以開始有少少麻木了，但風景依然是很美的，有些遊客如果乜都唔行只行王池其實都OK。



最後終於來到行山徑的終點「八景之池」，唔知點解喱度湖邊的楓樹特別有和風味道，影出來就是一幅靚爆的「浮世繪」。



究竟有邊八景，基爾都不太清楚，不過求其在湖邊影下相已經係一絕靚景，毋須再深究其他。在十二湖中這個池算是較早開發的旅遊區，還有出租小艇供遊人泛舟湖上。



「八景之池」出面正好有個穿梭巴士站，反正已經行得差不多，唔駛諗立即去等巴士返落山腳的火車站。返到火車站原來還剩大半個鐘才有火車，於是在車站附近蹓躂hea時間，原來站旁有個大地圖，可以睇返剛才行山的路線，原來都行左幾遠路喎！



仲有咁多時間當然不會在車站呆坐，上山前基爾先將行李寄存在對面馬路的小食堂，不如就過去看看有咩好野食吧，反正整天只在山上吃了一個麵包而已！



過到去才發現，原來雖然間店舖細細，但都有幾多甜品供應架喎！雖然有好幾種雪糕都好吸引，不過最後都係飲左少少野就返出去行多陣……



飲左少少野就返出去，其實車站對出只要越過路軌，就係一望無際的日本海，附近還有奇石處處的森山海岸，向掘路工人問過路後，立即就過去海邊逛逛。



雖然只係下午4點幾，但這裏已經開始日落了，襯托住海邊防波堤畫出的幾道完美平衡曲線，坐在這裏看日落實在perfect！



不要以為有咁燦爛的太陽，一定是很和暖了，其實那裏海邊超級大風，連外褸的帽子都吹甩，氣溫相信也只有10度左右，如果唔係見有咁靚的夕陽，一定即撇！上圖右是森山海岸最著名的「象岩」，如果時間充裕的話一定行過去睇，不過由於要返火車站搭車，所以都係無謂行咁遠，就在這裏遠觀算了。



由海邊行返去車站要穿過一處松樹林，斜陽下又學人影返張「長腿叔叔」影子照片，出來的效果又幾似踩緊高橋咁！



由十二湖其實只要搭一個站火車就來到椿山站，今晚就要下榻這裏很出色的「不老不死溫泉酒店」，不過其實酒店完全唔近車站，幸好有免費的schuttle bus接駁，間酒店完全係坐落於一處人蹟罕至的海濱，很有點與世隔絕的感覺。



來到酒店check埋in之後，見窗外就是這個無敵全海景，仲唔拿拿林去拎部相機出來狂影？！



好耐無見過「咸蛋黃跌落海」，對上一次睇記憶中好似係年前在大澳，但香港始終煙霞太勁，睇唔清楚，今次在日本喱度就可以完全睇晒個「高清版」跌落海過程了！



唯一遺憾係喱晚無得去開大餐，只能一個人留在房裏對住電視食杯麵……食完之後出去「夜遊」觀星，酒店外面就是伸手不見五指的曠野，可說是零光污染，但幸好是月圓之夜，這時才發現原來月亮真係咁光的，可以隱約照出前面的路，另外那片滿天星空也很令人難忘，可惜基爾的傻瓜機影唔到到。冒住寒風行完一圈睇星之後返到酒店，最佳節目當然又係去剝光豬浸溫泉啦，頓時寒氣盡消，舒服晒！