2014年7月17日 星期四

海馬公園廿載重遊:下@黃竹坑

來到下集仲有咩睇?嫌悶的可以轉channel,唔嫌悶就繼續跟基爾領隊行埋餘下的行程吧!



話雖說唔係太有意欲帶基爾媽去玩機場遊戲,但一場來到海馬公園象徵式點都玩少少唔太激的,就去搭下喱個「海洋摩天塔」啦!因為喱個刺激度近乎係零,但沿住巨柱一路轉上去可以盡覽山頂一帶的無敵靚景,有點似上了觀光塔,姑且花了點時間去排隊。



在「觀光塔」上除了不時聽到附近機動遊戲傳來的尖叫聲外,仲可以俯覽下面的太平洋海岸館,山崖邊還有一座很美的小燈塔,裏面仲可以讓遊客餵海獅,一於去睇下!



海岸館主要飼養了加州海獅,基爾來到時見有不少已攤在人工岩岸上晒太陽。當工作人員拎住裝滿沙甸魚的膠桶出來時,個個又突然變得精神百倍,企定定等遊人來丟魚,大部份都非常目光敏銳張大嘴巴百接百中。



沒受過訓練的海獅已經咁機靈,在海洋劇場參與表演的這批「專業演員」就更加犀利了。其實相隔廿幾年重遊成個海馬公園,基爾最有印象的就只剩下吊車、山坡上的海馬圖案和海洋劇場這裏而已。



今時今日雖然早已沒有仙遊了的海威小姐,但海豚海獅海豹的縱合表演依然吸引,另外加上類似少年Pi奇幻漂流的故事背景,不論小朋友大朋友都一樣睇得開心,這已很足夠了!



睇完海洋劇場表演都已經差不多5:00pm,見仲有時間就行埋中華鱘館先落山。早幾年由大陸「移民」來港的中華鱘聽聞住了幾年才適應下來,原來這種恐龍時代「活化石」魚類已在地球生活了1億4千萬年,目前全球鱘魚僅剩27個品種,中華鱘是當中體型最巨的,成年中華鱘體長可達5米。



不能不行的當然仲有水母館,除了食海蜇熏蹄之外,基爾對這種軟體生物其實沒大太偏好,不過2006年落成開放時又真係熱鬧了好一陣子,身邊友人同事個個去海馬公園都話必看水母館。



這間名為「水母萬花筒」的展館佔地達4500平方呎,館內有逾千隻水母,當中包括10款珍稀品種,開幕時號稱是全東南亞唯一獨立式水母館。不過基爾置身其中又唔覺地方好大,可能因為館裏其實同時還有兩間餐廳。至於水母品種基本上也不太懂欣賞,驟眼睇只覺得有點似海中的冬菇又或者漂浮的垃圾膠袋。



當然D水母到底靚唔靚,都好受展廳裏的燈光折射佈置影響,喱方面真係一門高深的學問。不過色彩變化奪目的水母其實同毒箭娃一樣,只可遠觀不能捉摸,否則畀佢地D觸鬚炸親都唔係講玩!



睇完水母館出來後已接近打烊時份,去到吊車站又見到條「超級人龍」本來都有少少想打退堂鼓,因為始終如果返去搭海洋列車落山就唔駛排咁耐隊,不過見基爾媽想搭吊車多D,又即管去花點腳骨力排下。



平時基爾係最鬼怕排長龍輪候買野或去食飯等台的人,今次雖然花了足足大半個鐘去排隊搭吊車,基爾卻覺得非常值得,因為只要一上吊車就即時勾起了好多好多難忘的兒時快樂回憶……



山腳的吊車站依家變身成「香港老大街」,雖然裏面只是一些假唐樓門面搭建的傳統攤位遊戲,不過在手機鏡頭下又幾有懷舊味道。有好多「荔園式」的經典古老遊戲如掟階磚,還有傳統麥芽夾餅小食之類,相信好多小朋友都未必玩過食過吧!



之前專登去中環大會堂睇懷舊巴士展,原來老大街喱度都有古董巴士和電車展出,電車可以上去下層影相,巴士則只能遠觀無法上去睇下,比較可惜!



傍晚時份返到「夢幻水都」人工湖和大噴泉果然已經比正午時涼了一些,在日落晚霞襯托下一面欣賞音樂噴泉的變幻起落一面走向大門離開其實都幾浪漫,希望下次再來時不會又是晃眼廿幾年之後吧!

34 則留言:

  1. 海洋劇場表演係必看節目呀, 我試過有次個比較小型嘅表演, 應該係俾小朋友睇架, 搵左位妹妹上台, 佢一對住個咪就講, 隻海獅個口好臭, 全場大笑

    回覆刪除
    回覆
    1. Mo:係呀,佢一日好似都係得三四場,所以要預啱時間先睇到!
      kakakakaka~~~其實都唔出奇,佢地係食魚,所以把口一定係好腥,佢本身個身都係有腥味嘅^^

      刪除
  2. 下年免費遊我一定要訪中華鱘館,未去過呀!

    回覆刪除
    回覆
    1. Stella:係呀中華鱘好值得睇,體型好大條,有點似鯊魚但游得比較慢

      刪除
  3. 呢條「超級人龍」未算長啫!由「海洋摩天塔」開始排隊呀!你先知味道呢!

    回覆刪除
    回覆
    1. JJ:大熱天時如果要排咁長龍真係幾攞命><

      刪除
  4. 我鍾意坐cable car, 不過又驚喎,要捉到實條柱,又唔敢望下面。

    回覆刪除
    回覆
    1. Samwei:其實如果有事,捉實條柱都無用啦kakaka~~~~不過我相信仲係安全嘅,至少感覺上比360安全吧XXXD
      同埋去到海馬公園如果唔坐吊車好似無去過咁^^

      刪除
  5. 七彩奇幻嘅水母館比較有驚喜!

    回覆刪除
    回覆
    1. Wan:打咗燈比較靚,同埋依家先知佢地原來都幾大家族嘅,有好多唔同品種^^

      刪除
  6. 海洋公園, 已經好多年無去了!!

    回覆刪除
  7. 海洋劇場嘅表演, 我係唔會錯過嘅!! Wish you have a wonderful weekend !!

    回覆刪除
    回覆
    1. Hamby:喱個都係主題公園的主菜^^
      Weekend有冇揸車出去行個圈呢你哋?!

      刪除
  8. 怕人擠,怕吵……不知甚麼時候才會「的」起心肝去一趟!

    回覆刪除
    回覆
    1. 摩:如果有屋企人生日就去行下囉^^

      刪除
  9. 我有annual pass嗰年就係“香港老街”開幕,超級多同胞遊客聚集。

    回覆刪除
    回覆
    1. Koosan:香港老街果邊都幾有特色,不過稍嫌細咗D
      今次去見山腳都有好多圍欄,可能係有新園區的工程在做,遲下可能又會有新野都未定

      刪除
  10. 海岸館好耐冇去過啦,而家冇左大樹灣入口就好少行去過邊><
    海洋劇場都好似冇以前咁好睇...海洋館又冇以前咁好,唉......

    回覆刪除
    回覆
    1. Matthew:我都係香港仔隧道一出行條小道落去,其實都行幾遠,第時如果有地鐵起好之後就方便好多,個站就在正門!
      我諗係無咗海威小姐,表演係比較單調咗D囉,感覺無細個時睇咁精彩~~~依家新喱個海洋館我都覺得麻麻地,天幕隧道位唔多

      刪除
  11. 作為影相,我覺得水母館幾靚喎!反而鱘龍有D失望

    回覆刪除
    回覆
    1. Lam:水母館幾有奇幻feel~~~值得一遊
      鱘龍館我諗因為始終要遷就返佢地原棲息環境關係,燈光真係好暗,加上條魚本身又係灰灰暗暗,所以基本上用手機係影唔到佢地嘅,要用大機先得!!
      同埋鱘龍館真係比我想像中細,基本上無乜特色設計!只得一個大缸而已~~~~

      刪除
  12. 搭吊車要排大半個鐘咁耐? 好多人? 自由行?

    回覆刪除
    回覆
    1. 銀:要係,其實果日已經算係唔多人架啦我諗,因為又唔係咩長周末或者大陸長假期,但一樣要排長龍,所以我諗如果假日去就更加可怕!
      自由行和大陸團都一樣多,聽國語多過廣東話XXXD

      刪除
  13. 原來有古董巴士和電車,我以為是假的。

    回覆刪除
    回覆
    1. 說:應該係真嘅,我諗係電車公司和巴士公司將D退役舊車捐比佢地啩!
      不過只作展覽,係唔可以開動嘅

      刪除
  14. 「海洋摩天塔」喱個可以盡覽山頂一帶的無敵靚景,真喺唔錯!

    回覆刪除
    回覆
    1. Ka:喱個用來睇風景都唔錯,可以睇晒山頂區一帶的風景,可惜係唔夠時間去坐摩天輪,摩天輪更近海!!

      刪除
  15. 水母萬花筒~次次去親都一定要睇,啲水母真係好靚,又美妙!

    回覆刪除
    回覆
    1. andy:打咗燈都幾靚架~~~~你潛水見過果D係咪大隻好多?!!

      刪除
  16. 更係見過喇!~海底係一個奇妙既世界.

    回覆刪除
    回覆
    1. andy:香港水域原來都有好多靚珊瑚呢

      刪除
  17. 我真心覺得海洋公園的日落很漂亮:)

    回覆刪除
    回覆
    1. 恩:數碼港果度望出去聽聞好靚!!

      刪除