Nara Thai@尖沙嘴

年底的大假終可落實，真的好耐無試過12月外遊，記憶中對上一次好似係讀書時代去北京（聖誕前的term break），基爾向來怕去太凍的地方，去年在立山室堂清晨出去行山時遇上橫風橫雪已經覺得幾難頂，希望今次「小雪怡情」就最好了……

無啦啦寫食探搞咩變了浪蕩？還是先談飲飲食食吧！喱晚其實係同領隊先來個pre-trip「茶會」，初步傾傾條主要路線點走。由於早了到步，先去隔籬士多探下「忌廉哥」，順便再到對面馬會買張六合彩先，1.5億的墟陷長龍真係唔野少！結果排了成半粒鐘……



尖東喱一列食肆其實都幾有外國風味，店外露天位坐了不少老外，不過基爾怕熱，始終室內位有冷氣歎，食飯會比較舒服吧！上圖右這杯有很香的石榴味，而且係0% alcohol，唔怕好似上次咁越飲越暈陀陀。圖左是酥炸雞翼和牛肉雞肉串燒，很喜歡它那個沙嗲醬！



唔知點解每次食泰菜，例必都有叫喱味泰式白雲鳳爪，證明真係好多人都鍾意食。不過基爾就唔算特別偏好，幸好今次喱碟都好有水準，酸度和辣度都好夠勁，有時食到D齋得辣字果種就唔太like！



除了泰式鳳爪例嗌之外，上圖左下角那味泰式拼盤都係「例牌菜」，不過食剩竹葉包紮的炸雞才記得影，另外還有炸魚餅和炸蝦餅之類。原本想叫生蝦可惜無貨，唯有改叫芝士焗青口。當然點都要嗌碟菜balance返，友人order圖右喱味蝦醬炒通菜都爆得幾香幾野味！



喱幾味「泰式常餐」不算太多驚喜，於是試下搞點新意思，上面喱3味分別是串燒饅魚、牛肉沙律和咖喱牛腩，味道又幾唔錯喎！與一般醬汁偏甜的日式燒饅魚比較，這個饅魚串燒似乎多一點香口；牛肉沙律的牛肉半生熟，外脆內軟口感一流，夾菜食就更佳，感覺清新不油膩；咖喱牛腩個汁簡直可以撈幾碗飯！



當晚去到剛好係英超比賽日，重頭戲是阿仙奴Vs曼城，唔好浪費一路食一路睇晒全場先走，場波雖然2:2打和但都幾精彩喎！而且店裏氣氛幾好，好多兵工廠fans。上圖的炒貴刁不太辣，竟還有少少甜甜地，味道都算不俗。



友人今日好似好好胃口，最後仲來多一味咕嚕魚柳，其實基爾已經好飽了，魚柳只食了一塊，不過感覺幾嫩一點不會又硬又乾爭爭，重點係佢個菠蘿非常清甜好食，酸酸地又幾開胃。飽嘗口腹之欲再攤抖下睇下波傾下偈，直到10:00pm完場才走人，埋單計人均$240如果計埋睇波都唔算貴吧！



搭單講埋兩款零食，上次提到去759買的cappuccino朱古力，原來仲有espresso和薄荷兩種味道，經王子驗證原產地也有出售但不是出名的品牌，反正基爾覺得espresso和薄荷味也不俗，espresso的咖啡味確實很濃郁，下次再有七折就3隻都買吧！



另外上面喱包芥末菜脯餅也相當好味，姑勿論味精多又或是怕台灣油炸之類的問題，單論小餅乾本身就非常有wasabi味，喜歡「攻鼻」刺激感覺的不妨買來試試，同樣是經常缺貨，每次見到貨架上有售都例必買返包回公司。

Nara Thai Restaurant & Bar
尖沙嘴麼地道75號南洋中心地下