扶輪園賞櫻:上@大帽山

日本一年一度的櫻花季節快將展開，相信唔少人早已book好晒機票準備飛赴東瀛賞花襯熱鬧吧！至於香港2月開始的賞櫻熱就快到尾聲，基爾拿拿林趕上尾班車，今年選了去大帽山睇。



年前試過去長洲關公亭睇山櫻花（又稱緋寒櫻）盛開，由於長洲四面環海較濕暖，所以一般花期於2月初已展開。來到3月初其實唯一的選擇就是到氣候較涼的大帽山！為免人潮太勁，這朝大清早就來到荃灣西站等51號巴士上山，果然好多人排隊！



行走荃錦公路上大帽山的51號由於只是單層巴士，而且班次不算太密（約15分鐘一班），所以架車都幾爆，中途站未必上到車，加上周末假日有不少人上川龍飲茶，所以還是在荃灣西總站等車比較穩妥。



巴士來到「郊野公園」站就可下車了（即川龍之後兩個站），其實都唔駛怕唔識落車，一來川龍站已經相當多人落車去飲茶，二來3月去大帽山郊野公園賞櫻的人也頗多，落車後跟住人潮一直走就來到扶輪公園茶水亭外的櫻花林。



離遠已經見到大棚人拎住大機細機手機不停圍住D櫻花樹係咁影呀影，所以唔駛擔心會搵唔到個櫻花林。不過好明顯今年確實回暖得比往年更快，如果2月底來櫻花應該會開得較燦爛，基爾3月第一個周末來到見櫻花樹已長出嫩葉，花期眨眼已快到尾聲，僅餘一兩株仍見有幾簇遲來的艷紅。



雖然櫻花已不多，但也無減一場來到的遊人興致。純粹來襯熱鬧的基爾影下花又影下影花的人也是一種樂趣，可能早有心理準備櫻花不多，所以也不會有大太失望吧！影飽櫻花之後，基爾都要拿拿林起錨了，當然山長水遠來到大帽山郊野公園，不會咁快就落山散band回家……



之前上網約略睇過櫻花園這裏附近有兩條「零難度」的行山徑，反正過年大感冒病了很久，就趁這次良機hea行個靚山啦！看地圖見大帽山家樂徑和遠足研習徑呈「8」字形，起點和終點其實都是在扶輪公園的櫻花園，路上指示也很清晰所以不用太擔心會迷路。



途中路經camp site見有唔少大陸自由行來紮營，其實附近配套設施也不錯，有洗手間也有燒烤爐，而且3月未算太熱，蚊蟲也不多，也是不錯的露營季節吧！比較意外係友人竟帶了野食來picnic，雖然只係簡單零食，不過在楓樹林下食住傾偈一hea又大半個鐘，如果12月來唔知又睇唔睇到紅葉靚景呢？



齋食零食當然不可以當lunch，正猶疑好唔好落山返去荃灣或汀九那邊食晏，商議過後結果還是決定沿荃錦公路落山方向步行兩個巴士站返去川龍飲茶。雖然已來過不下5-6次，但始終覺得端記二樓露台有個無敵田園靚景最正，所以印象中幾乎次次來都係幫趁佢。



之前通常係大清早來川龍飲茶，之後再去行山（甲龍徑）；今次是第一次來飲晏晝茶，茶客感覺上好似無朝早咁墟陷，但依然有不少點心選擇，仲見到好耐無食過的糯米卷和蠟腸卷、大包之類，這類懷舊點心今時今日在外面一般茶樓應不常見了。



至於脹卜卜大大隻蝦餃一籠有4隻之多，大中小點一籠幾錢其實基爾次次來也不太清楚（今次埋單計人均也不過$50）；不能不試的還有外面菜田即摘即煮的西洋菜，平時在家慣用西洋菜煲湯，炒西洋菜則比較少食，聽基爾媽講西洋菜在春節過後會帶一點甘澀味道。



第一次來飲晏茶才知原來這裏沒有下午茶時段，伙計大約2:30pm就會自動來埋單及收拾台面作簡單清理就收工（留下了茶壺茶杯讓客人慢慢嘆），結果基爾與友人在露台位hea到3:30pm才願走，整間茶樓就只剩基爾一台客（店門也沒人落閘），四周靜蠅蠅的感覺很特別，只餘簷廊裏籠中的相思鳥間中發出幾下叫聲，似乎在問基爾為何遲遲還未離去呢？同相思say goodbye之後見暮色漸濃，都係時候要繼續起行，穿過川龍菜田往城門水塘引水道進發！